පස්‌වැන්නෙන් කියවෙන දරු ඵල
"තස්‌මාහි භූතා නිසාමෙථ සබ්බේ" යනුවෙන් බුද්ධ දේශනාවේ සඳහන් වන්නේ යහපත් වූ දෙවියන් පිළිබඳවය. එහි සරල අරුත දිවා රෑ දෙකෙහි ඔබලාට පුද පූජා කරනු ලබන මිනිසුන්හට ඔවුන්ගේ ව්‍යසනයේදී මෙත් සිතින් පිහිටවව් යන්නය. අද දෙවියන් වෙනුවෙන් කෙරෙන පුද පූජා බහුලය. අනෙකුත් නොපෙනෙන බලවේගයන්ගේ පිහිට පතන්නවුන්ද අපමණය. එහෙත් නිවැරැදි පිහිටක්‌ ලැබීම උගහටය. ඔබත් දරුපල අහිමි මවක්‌ හෝ පියෙක්‌ විය හැකිය. දරු සැප පතා පුද පූජා ආදියෙහි යෙදෙන යුවළක්‌ විය හැකිය. එවන් යුවතිපතින් දෙපළකගේ පරම පැතුම දරු සම්පතය. විවාහය පරිපූර්ණ වන්නේ ද නිවසක්‌ සොඳුරු කැදැල්ලක්‌ වන්නේ ද දරු සම්පත හිමිවීමෙනි. එය ලෝකයේ පැවැත්ම උදෙසා යුවළක්‌ විසින් කරන්නා වූ ජීව විද්‍යාත්මක ක්‍රියාවලියක උතුම් මෙහෙවරයි. එම කාර්යභාරය තරුණ යුවළක සතුය. එහෙත් විවාහ වී දරු සුරතල් අහිමි වූ වේදනාවට පත් යුවතිපතින් බොහෝය. බුදුදහම අනුව එය සංසාරගත කර්මශක්‌තියක්‌ ලෙස සැලකිය හැකිය. ජ්‍යොතිෂය අනුව ග්‍රහ බලපෑම්වල නියමයන් ලෙස සැලකිය හැකිය. කේන්ද්‍ර සටහනක පස්‌වැන්න සහ පස්‌වැන්නාධිපති දරුඵල පෙන්නුම් කරන ස්‌ථානයයි.
විවාහ වී වසර දෙක තුනක්‌ ඉක්‌මවා යුවතිපතීන් හට දරුඵල අහිමිවීම සමාජයේ දෝෂදර්ශනයට ලක්‌වීමකි. මෙහිදී සමාජයේ දඹරැගිල්ල යොමුවන්නේ කාන්තාව වෙතය. වඳ ස්‌ත්‍රිය යනුවෙන් සමාජය හඳුන්වන ඇය සමාජයට අප්‍රියජනකය. සමාජය විසින් කාන්තාව මෙලෙස පීඩනයට පත්කරද්දී කිසිවකු පුරුෂයා දෙස දඹරැගිල්ල යොමු නොකරයි. පුරුෂයා නහරගත රෝගාබාධ - ලිංගික දුබලබව - නිසරු බව සහ 22 දෙර්කාණාධිපතිගේ බලපෑම් කාන්තාවගේ දරුඵල නොමැතිවීමට සාධක විය හැකිය. දරුවන් නොලැබීමට පාදක වන්නා වූ ග්‍රහ බලපෑම් ස්‌ත්‍රියගේ කේන්ද්‍ර සටහනේ මෙන්ම පුරුෂයාගේ කේන්ද්‍ර සටහනේ ද ඇතුළත් විය හැකිය.
මිථුන - සිංහ - කන්‍යා යන රාශි පස්‌වැන්න හෝ එකොළොස්‌වැන්න වීම දරුඵල අහිමිවීමට හේතුවකි. ලග්නාධිපති සහ චන්ද්‍රයා සිටින රාශි ද මිථුන - සිංහ - කන්‍යා රාශිවලට ඇතුළත්වීම ද දරුවන් නොලැබීමට හේතුවකි.
කේතු පස්‌වැන්නේ වීම දරුඵලවලට හානිදායකය. එය නහරගත හැකුලුම්කාරක කමකට හේතුවෙයි. එමෙන්ම 22 දෙර්කාණාධිපති පස්‌වැන්නේ විසීම හෝ පස්‌වැන්න දැකීම ද දරු සම්පතට බාධා ඇති කරයි. ලග්න අනුව පස්‌වැන්නාධිපති මෙලෙසය.
මේෂ - රවි
වෘෂභ - බුධ
මිථුන - සිකුරු
කටක - කුජ
සිංහ - ගුරු
කන්‍යා - ශනි
තුලා - ශනි
වෘශ්චික - ගුරු
ධනු - කුජ
මකර - සිකුරු
කුම්භ - බුධ
මීන - සඳු
ස්‌ත්‍රී කේන්ද්‍රයක පස්‌වැන්නාධිපති 6 - 8 - 12 යන ස්‌ථානයකට සම්බන්ධ වීම ද දරුඵල ගැටලුවලට හේතුවෙයි. දරුවන් ලැබීමට බාධා ඇති කරයි. පස්‌වැන්නාධිපති හයවැන්නේ සිටීම විවාහයෙන් වසර ගණනාවක්‌ යනතුරු දරුඵල අහිමි වීමකි. නැතහොත් ජීවිතය පුරාවටම දරුඵල නැතිවීමකි. පස්‌වැන්නාධිපති අටවැන්නේ නම් දරුගැබ පිහිටයි. එහෙත් මුල් කාලයේම ගබ්සාවීමට හේතුය. පළමු මාස තුනට පෙර ගබ්සාවීම පස්‌වැන්නාධිපති අටවැන්නේ පිිහිටීම සිදුකරනු ලබයි. පස්‌වැන්නාධිපති දොළොස්‌වැන්නේ නම් දරුගැබට මාස තුන ඉක්‌මවූ පසු ගැබ වියෑකෙයි. මළ දරු උපත් සිදුවන්නේ ද මෙම ග්‍රහ පිහිටීම අනුවය.
පස්‌වැන්නාධිපති 6 - 8 -12 පිහිටීම දරුඵලවලට අහිතකර පිහිටීමක්‌ වුවද දරුඵල නොමැති යෑයි සිතිය යුතු නොවේ. වෙනත් ග්‍රහ පිහිටීම එම දෝෂ භංග කිරීමට හේතු විය හැකිය.
පුරුෂ කේන්ද්‍රයක කේතු පස්‌වැන්නේ සිටීම - කේතු හත්වැන්නේ සිටීම සහ ශනි - ගුරු ආදීන් හත්වැන්නේ පිහිටීමත් 22 දෙර්කාණාධිපතිගේ බලය පස්‌වැන්නට හෝ හත්වැන්නට නියෝජනය වීමත් දරුඵල අහිමිවීමට හේතුය.
නූතන වෛද්‍ය මතය අනුව ද ස්‌ත්‍රී පුරුෂ නිසරුභාවය (දරුඵල අහිමි බව) හඳුනාගත හැකිය.
එවැනි දොස්‌ සහිත නිසරු බවක්‌ යුවතිපතින් හට නොමැති නම් ග්‍රහදොස්‌ සමනයට ප්‍රතිකර්ම යෙදිය හැකිය. කේන්ද්‍ර සටහනේ ඇතුළත් වන්නේ පෙර කුසල් අකුසල්ය. කිසිදු ග්‍රහ වස්‌තුවකට අසුබ හෝ සුබ ඵල දිය හැකි නොවේ. කේන්ද්‍ර සටහනින් පෙන්නුම් කරන්නේ ග්‍රහයන් සතු සොභාවයයි. එම ග්‍රහයන්ගේ කාල නියමයනට අනුගතව පෙර කුසල් අකුසල් බලපෑම අනුව යහපත් හෝ අයහපත් කාලනියමයන් දක්‌වයි. ආනන්තරිය පාපකර්ම හා විපාක විඳිය යුතුම වූ කර්ම හැර අනෙකුත් කර්ම බලවේගයන් කුසල් වැඩීමෙන් යටපත් කළ හැකිය. පෙර ආත්මභවයන්හි කුරුලු කූඩු කඩා බිත්තර විනාශ කළ කුඩා පැටවුන් මරා කෑ දරුගැබ් විනාශ කළ එයට උදව් උපකාර කළ උදවිය මෙකල දරුවන් අහිමිවීමේ වේදනාවෙන් තැවෙති. පෙර අකුසල කර්මයන්හි විපාක අත්විඳිති. පළමුව තමන් දැහැමි විය යුතුය. දරුවකු පිළිබඳ පරමාර්ථය බලවත් විය යුතුය. එහෙයින්, ගැබිනි මාතාවනට සත්කාරය - ළදරුවන්හට කිරිපිටි - ඇඳුම් පැළඳුම් ආදියෙන් උපකාර කිරීම, සිරගත කළ සතුන්හට අභය දානය දීම, අනාථ ළදරු නිවාස සඳහා ආධාර උපකාර කිරීම - දැහැමි දිවි පෙවෙත තුළින් පත්තිනි දේවමාතාවට බාරහාර වීම ද දරුඵල අහිමි යුවලකට තම ප්‍රාර්ථනා සඵලත්වයට මාර්ගයකි. තිසරණ සරණ මූලික කොට දන්පින් කිරීමත් යහපත් වූ දෙවියන්හට පුද පූජා තබා බාරහාර වීමත් දරුඵල අහිමි යුවලකට ඉතා යහපත්ය. බලංගොඩ ආනන්ද මෛත්‍රිය හිමි, රේරුකානේ චන්දවිමල හිමි වැනි නාහිමිවරුන් ද යහපත් වූ දේවපූජා පැවැත්වීම යහපතට හේතුවන බව සඳහන් කර ඇත. දෙවියන්හට පුද පූජා - බාරහාර වීමේදී පළමුව කුසලයෙහි පිහිටිය යුතුය. ඉහත සඳහන් කුසලයනට අනුගත වී යුවතිපතින් සවස්‌ කාලයේ බෝධි පූජා තැබීම ඉතා යහපත්ය. සියලු ග්‍රහ අපල සමනයට බෝධි පූජාව මූලික වෙයි. තිසරණයෙහි පිහිට ලබා කරනු ලබන බෝධි පූජාව බෝධිය අභියස සැරිසරන යහපත් වූ ආත්මයන්ගේ තරංගයකට යොමුවෙයි. යුවතිපතින්ගේ යහපත් ප්‍රාර්ථනාමය තරංගයන් යහපත් වූ ආත්මයන්හි තරංගයන් හා ගැටී එම ආත්මයන්හි තුටු වීමට ආකර්ශනයට බඳුන් වෙති. යහපත් වූ මවකගේ කුසයෙහි යහපත් පිළිසිඳගැනීමකට එයම හේතුකාරකයක්‌ වන්නේය. කායික ගැටලු නොමැති නම් ග්‍රහ දොස්‌ භංග වන්නේ නම් යුවතිපතින්හට දරුඵල අහිමිවීම පිළිබඳ පීඩාවක්‌ ඇතිකර ගත යුතු නැත. නිවැරැදි ජ්‍යොතිෂමය උපදෙස්‌ හා කෙම් ක්‍රමවලින් ද යහපත් වූ බෝධි පූජාවේ බලය වර්ධනය කළ හැකිය. අදාළ වත්පිළිවෙත් සහ කුසල් වැඩීමේ බලමහිමයෙන් එවන් යුවළකගේ පැතුම් නිසැකවම සපලත්වයට පත්වනු ඇත. එහෙයින් දරුඵල පිළිබඳ සුබඵල පතනා සැමට මෙයින් නැණ නුවණ පහළ වනු ඇත.
