හොඳ නරක දෙකට ම හවුල් වන සෙනසුරු

විශ්ව බලපෑම මත ඕනෑම කේන්ද්‍රයක බලවත් ග්‍රහයන් තිදෙනා රවි, සඳු හා ලග්නාධිපති වුවත් කරදරකාරයා සෙනසුරුය. චණ්‌ඩියා අඟහරුය. දැනුමැත්තා බුධ සහ ගුරු ය. මනමාලයා සිකුරුය. රාහු කේතු හැංගිමුත්තන් කාරයෝය. රවි සඳු බලවතුන් වන්නේ ඉර සහ හඳ නියෝජනය කරන ග්‍රහයන් දෙදෙනා නිසාය. එසේම පියා සහ මව නියෝජනය කරන ග්‍රහයන් දෙදෙනා නිසාය. තවත් අතකින් විග්‍රහ කරන විට අපට පෙනීම ලබාදෙන ග්‍රහයන් දෙදෙනා නිසාය. ලග්නයට අධිපති ග්‍රහයා වැදගත් වන්නේ ජන්මියාගේ පෞරුෂය මතුකර පෙන්වන ග්‍රහයා නිසාය. සෙනසුරු කරදරකාරයා බව සඳහන් කළේ ඔහුට දුක පිළිබඳ කාරක අයිතියක්‌ පවරා දී ඇති බැවිනි. කෙනකු වෘත්තියක යෙදුණොත් සෙනසුරු ලග්නාධිපති හෝ දශාධිපති වුණත් කරන කටයුත්ත වගකීමෙන් හා මහන්සියෙන් කළ යුතු බැවිනි. වගකීම් පිළිබඳ භාරකාරත්වය නිසා සුවපත් නින්දක්‌ නැතිවිය හැක. වේලාවට ආහාරපාන ගැනීමක්‌ නැතිව කටයුතු කරන්නට සිදුවිය හැක. නහර පිළිබඳ කාරකත්වයක්‌ ඇති නිසා යම් යම් රෝගාබාධ ඇතිවිය හැක. එමෙන්ම එය දරාගෙන කාර්යයෙහි නිරත වන්නටද සිදු වේ. සෙනසුරු චරිත කිහිපයක රංගනයක යෙදෙන ග්‍රහයෙකි. ඒරාෂ්ටක අපලය පිළිබඳ කටුක අවස්‌ථාවට සම්බන්ධ වන්නේත් සෙනසුරුය. සෙනසුරු ස්‌වකීය අයිතිය ඇති මකර - කුම්භ රාශි දෙකට හැර අනෙක්‌ කුමන රාශියක ගෝචර වෙතත් ඒ රාශියේ ඵලය අවුල් කරන්නට සිතයි. එසේම සෙනසුරු යම් නැකතක වේද ඒ නැකත අධිපතියාගේ ගුණය ඩැහැගනී. නැකැත් හිමියාගේ සුබ අසුබතාවය අනුව මතු කරන ප්‍රතිඵලද වෙනස්‌ය. සෙනසුරු යම් රාශියක වෙතොත් එම රාශිය අධිපතියාගේ ගුණය ද දරා ගනී. ගුරු හිමි ධනු රාශියේ දී පමණක්‌ තම බලය මතු කරන්නට අපහසුය. එහෙයින් ධනු රාශිය හරහා ගමන් කරන සෙනසුරුට "කෝදණ්‌ඩ ශනි" යන නමක්‌ද භාවිත කරයි.

ජන්මියාගේ අතපය කඩා දමන්නට, නහර, ස්‌නායු දුර්වල කරන්නට වැළඳුණු රෝගයක්‌ සුව කිරීමට බොහෝ කාලයක්‌ ගත කිරීමටත් සෙනසුරු දායක වෙයි. පිළිකා වැනි භයානක රෝග මතු කිරීමෙහිලා පුරෝගාමී වන ග්‍රහයාත් සෙනසුරුමය. වෛද්‍ය වෘත්තියට අදාළ කුමන රැකියාවකට වුවද සෙනසුරුගේ දායකත්වය මුසු වී තිබිය යුතුය. එයට හේතුව සෙනසුරු රෝගීන්ට නෑකමක්‌ ඇති ග්‍රහයා බැවිනි. ඉංජිනේරු වෘත්තියට නෑකම් කියන කුමන රැකියාවකට වුවද සෙනසුරුගේ දායකත්වය අවශ්‍යය. හේතුව බර වැඩට වෙහෙසෙන වැඩට ශනි ප්‍රමුඛ ග්‍රහයා බැවිනි. සෙනසුරුගේ ඥතිත්වයක්‌ නැතිව දේශපාලනයද අමාරුය. එයට හේතුව නම් සෙනසුරු කම්කරු ජනතාව නියෝජනය කරන ග්‍රහයා බැවිනි. සෙනසුරු කේන්ද්‍රයක 07 වැන්නට නරක නැත. හොඳත් නැත. නරක නැතැයි සඳහන් කළේ සෙනසුරු කේන්ද්‍රයක 07 වැන්නට දික්‌බල ග්‍රහයා බැවිනි. හොඳක්‌ නැතැයි සඳහන් කළේ විවාහය පමා කරන, විවාහකයා ඉක්‌මනින් මහලු කරවන ග්‍රහයා බැවිනි. එහෙත් 07 වැන්නේ සිටින සෙනසුරු විවාහය කඩා දමන්නට පුරෝගාමී වන්නේ නැත. එය එසේ වන්නේ දුක දරා සිටීමේ අප්‍රමාණ ශක්‌තිය ඇත්තේ සෙනසුරුට බැවිනි. මෙසේ බලන විට ඇතුවත් බැරි නැතුවත් බැරි ග්‍රහයා වන්නේ සෙනසුරුය. සෙනසුරු පිළිබඳව සැබෑ විග්‍රහයක යෙදෙන්නට නම් මේෂ, වෘෂභ ආදී රාශි 12 තුළදී සෙනසුරුගේ බලපෑම වෙන වෙනම විග්‍රහ කළ යුතු වේ. එයට හේතුව කේන්ද්‍රස්‌ථාන, ත්‍රිකෝණස්‌ථාන, දුෂ්ට ස්‌ථාන ආදියේ දී මතුකරන ප්‍රතිඵල විවිධ බැවිනි. එසේම උච්ච නීච ස්‌වක්‌ෂේත්‍ර රාශිවලදීත් සෙනසුරුට අයත් හෝරාවලදීත් විවිධ ප්‍රතිඵල මතුකරන බැවිනි.

ලග්නය මේෂ වූවොත් රාශි 12 තළදී ගමන විවිධාකාරය. ලග්න 12 තුළදී 12 ඞ 12 = 144 අවස්‌ථාවක්‌ පෙන්නුම් කරනු ඇත. නියෝජනය කරනු ලබන නැකත අනුවද සෙනසුරුගේ ස්‌වරූපය විවිධ වනු ඇත. මේෂ රාශියේ සිටින සෙනසුරු දුබලය. ඒ එම රාශිය සෙනසුරුට නීච වන රාශිය බැවිනි. තුලා රාශියේ දී සෙනසුරු බලවත්ය. ඒ ඔහුගේ උච්ච රාශිය බැවිනි. මකර කුම්භ රාශි තුළදී ස්‌වක්‌ෂේත්‍ර බල සහිතය. බුධ සිකුරු දෙදෙන සෙනසුරුගේ මිත්‍රයෝය. රවි, චන්ද්‍ර කුජ තිදෙනා සෙනසුරුගේ සතුරෝය. ගුරු - කේතු මධ්‍යස්‌ථ ග්‍රහයෝය. ඒ නිසා සතුරු මිතුරු ග්‍රහයන් සමග යෝගවන සෙනසුරුට විවිධ පැවතුම් වේ. පලාපල කථනයේ දී ජන්මියෙකුගේ ගතිගුණ වෙනස්‌වන්නේ ඒ අනුවය. සෙනසුරු සෘජුව ම කම්කරුවන් නියෝජනය කරන ග්‍රහයා නිසා දේශපාලනයට නරක නැත. සෙනසුරු වූ කලී සෘජුව ම පිළිකා වැනි ආබාධවලට කාරක ග්‍රහයා බැවින්, දුෂ්ට රාශිගත, පාප කර්තරී වූ පාප දෘෂ්ටි සහිත සෙනසුරුගේ දශා කාලය දැඩි සේ ආරක්‌ෂා විය යුතු කාලය වේ. සෙනසුරුගේ දශාවක්‌ ජීවිත කාලය තුළදීම නොලබන තරමට යහපත්ය. එසේ වන්නේ උපත බුධ ට අයත් අස්‌ලිස දෙට හෝ රේවතී යන නැකතකින් උපත ලබතොත් පමණි. එවිට සෙනසුරු දශාවක්‌ ලබතත්, ඒ වයස අවුරුදු 80 ක්‌ පමණ පසුකළ විටදීය. සෙනසුරු නෛසර්ගික පාපියෙකි. එහෙත් වෘෂභ ලග්න හිමියාට පමණක්‌ 09 සහ 10 යන හොඳම රාශි දෙකේම අයිතිකාරයා නිසා කදිම යෝගකාරක අයිතියක්‌ ඇති ග්‍රහයාය. දුෂ්ට ග්‍රහයා දුෂ්ට රාශියට ඔරොත්තු දෙතැයි යන පිළිගැනීම නිසා එම සෙනසුරු 06, 08, 12 ට නරක නැතත් දුෂ්ඨ රාශියක්‌ අධිපතියෙකුගේ නැකතක්‌ දරමින් ශුභ රාශියක සිටීම නම් යහපත් නැත. එසේ වෙතොත් එම සෙනසුරු සිටි රාශියට අයත් සුබ පල නැති කර දමයි.

රවි - ශනි යෝගය හොඳ නැත. පරම සතුරු ග්‍රහයන් දෙදෙනාගේ යෝග වීමකි. ඒ නිසා බුද්ධි ශක්‌තිය හීන කරයි. සතුරු බල සහිතය. එසේම සඳු ශනි යෝග වෙතොත් බිරිඳ අකාරුණිකය. මාපියන්ට ගරු සරු බවක්‌ නැත. ධන හානියටද හේතුය. කුජ - ශනි යෝගය කලහකාරී එකකි. මෝඩකම් කරයි. ඒත් බුධ ශනි යෝගය නරක නැත. ගුණවත්කමට හා ධනවත්කමට හොඳය. ගුරු සමග ශනි යෝග වූයේ නම් කලාකාමී සිත් ඇති වේ.

රවි - බුධ - ශනි ත්‍රි ග්‍රහ යෝගය නොමඟට නැඹුරු එකකි. මිතුරන් නොමැත. නිර්ධනය. නපුරු අදහස්‌ වේ. රවි - කුජ සමග ශනි යෝග වෙතොත් ඥතීන්ගෙන් තොරය. මනා අවබෝධයෙන් තොරය. ආබාධ සහිතය. එහෙත් රවි ගුරු ශනි සංයෝගය හොඳය. නිර්භීතය. මනස පිරිසිදුය. රාජ සම්මාන ලබන්නෙකි. එසේම රවි සිකුරු ශනි සංයෝගය අභිමානවත්ය. ගෞරව සම්පන්නය.

චන්ද්‍ර කුජ - ශනි සංයෝගය නිසා චංචල අදහස්‌ වේ. ආත්මය දුෂ්ටය. මවට පවා විරුද්ධ වේ. එම යෝගය වෙතොත් කුඩා කාලයේදීම මවගේ මරණය සිදුවන බව සාරාවලිය කියයි. සඳු බුධ - ශනි යෝගය යහපත්ය. ත්‍යාගශීලීය. ගුණවත්ය. ගෞරව ලබයි. චන්ද්‍ර ගුරු ශනි යෝගය උගත්කම් සපුරන්නෙකි. වැඩි මහල්ලන් ඇසුරු කරයි. එහෙත් කුජ බුධ - ශනි යෝගය වෙතොත් සේවකයෙකි. තැන තැන ඇවිදින්නෙකි. රෝග සහිතය. බුධ ගුරු - ශනි සංයෝගය හොඳයි. යහපත් පවුල් ජීවිතයකි. බිරිඳට සැමියාට ලැදිය. ඉක්‌මනින් දියුණු වේ. එහෙත් බුධ ශුක්‍ර - ශනි යෝගය යහපත් නැත. පහත් ඇසුරු කිරීම් වේ.

රවි චන්ද්‍ර කුජ සමග සෙනසුරු යෝග වෙතොත් පතිවත නොරකින බිරිඳකගේ පුරුෂයෙකි. ඒ නිසා දුප්පත් වේ. මේ අනුව ශනි සමග යෙදෙන චතුර් ග්‍රහ හා පංචග්‍රහ යෝගවලදීත් විවිධ ප්‍රතිඵල ලබයි.

මේෂ රාශියේ නම් (ඒ ශනි නීචය) ඒ නිසා මෝඩකම් කරයි. වෘෂභ රාශියේ නම් ලබන ආදායම අඩුය. මිථුන රාශියේ සිටි විට බුද්ධිය අඩුය. දරුවන් අඩුය. සම්පත් අඩුය. සෙනසුරු කටකයේ සිටි විට මවගේ කරුණාව අහිමි වේ. ශනි සිංහ රාශියේ සිටි විට අපකීර්තිය ලබයි. ශනි කන්‍යාවේ සිටි විට ධනය පමණක්‌ නොව දරුවන්ද අඩුය. තුලාවේ සිටි විට (එම ශනි උච්චය) නගරයක හෝ ගමක ප්‍රධානියෙකු කරයි. වෘශ්චික රාශියේ ශනි සිටියේ නම් නපුරු සිත් ඇති වේ. ධනු රාශයේ සෙනසුරු වුයේ නම් ධනය ලබයි. මකර රාශියේ සෙනසුරු සිටියේ නම් රාජ සම්මාන ලබයි. කුම්භ රාශියේ ශනි සිටීමත් ධනය ලබන පිහිටීමකි. මීන රාශියේ සෙනසුරු සිටින විට ගුණධර්ම රකින ගෞරවනීය කෙනෙකි.

1. සෙනසුරු ලග්නයේ නම් ශරීරයේ සුව නොවන තුවාලයකි. අංගවිකල විය හැක. එම ශනි උච්ච නම් බලවතෙකි. වංශාධිපතියෙකි. ගුණවත්කම නිසා ප්‍රියජනකය. ආයු බල සහිතය.
2. සෙනසුරු දෙවැන්නේ නම් වචන ශක්‌තිය සඟවයි. අදහස්‌ අඩුය. ග්‍රහයෙකු විසින් නොදුටුවේ නම් දිළිඳු වෙයි. 
3. සෙනසුරු තුන් වැන්නේ නම් අඩුවෙන් ආහාර ගනී. ගතිගුණ උසස්‌ය. ධනය වේ.
4. ශනි හතර වැන්නේ නම් මවගේ සිත් රිදවයි. සම්මත පැවතුම්වලින් බැහැර වේ. 
5. පස්‌වැන්නේ සිටින ශනි සතුරන් ජය ගනී. එහෙත් කල්පනා ශක්‌තිය දුබලය. චංචල සිත් ඇති වේ. 
6. සෙනසුරු 06 වැන්නේ නම් කෑමබීම ආදියට කෑදරය. විරුද්ධවාදීන්ට බිය වේ. පොහොසත් වෙතත් සල්ලාල සිත් ඇති වේ. 
7. ශනි හත් වැන්නේ නම් සිතේ කරදර ඇත. බරක්‌ උසුලාගෙන බොහෝ දුරක්‌ යන කෙනෙකු මෙනි. 
8. අටවැන්නේ සෙනසුරු සිටී නම් නරක මිනිසුන්ගේ නායකයෙකි. වස්‌තුව නැතත් ශක්‌තිය ඇත.
9. ශනි නවවැන්නේ නම් උසස්‌ පිළිගැනීමැති අයෙකි. එහෙත් ජීවිතයේ උදව්කරු නැති වෙයි. 
10. දස වැන්නේ ශනි සිටී නම් වරදකරුවන්ට දඬුවම් දෙන බලය ඇති නායකයෙකි. අප්‍රමාණ ඉවසීමක්‌ ඇති ආඩම්බර කෙනෙකි. 
11. සෙනසුරු එකොළොස්‌ වැන්නේ නම් රාජ්‍ය සේවයෙන් හෝ ව්‍යාපාර මගින් ධනය ලබන්නෙකි. පස්‌කම් සැප විඳින්නෙකි. 
12. සෙනසුරු දොළොස්‌ වැන්නේ නම් නුවණ මඳ වේ. හෙවත් මෝඩ වේ. රැවටීම්වලට ලක්‌වේ.