This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
හත අධිපති නවවැන්නේ නම් සසරේ පතාගෙන ආ අයෙක්

යෞවනයේ පසුවන සියලුදෙනාගේම එකම අපේක්‍ෂාව යහපත් විවාහයක් කරගැනීමයි. සමහර තරුණ තරුණියන්ගේ විවාහය ඔවුනොවුන්ගේ හඳුනාගැනීමක් තුළින් සිදුවන අතර ඇතැම් අයගේ විවාහය යෝජිතව සිදුවෙයි. මේ අතර සදහටම යුග දිවිය අහිමි අයද සිටිති. තරුණ වියේ පසුවන ඔබ ඔබගේ විවාහය පිළිබඳ තොරතුරු දැනගැනීමට මහත් උනන්දුවක් දක්වයි. ඔබගේ ජන්ම ලග්නය අනුව ලබන සහකරු හෝ සහකාරියගේ ගතිලක්‍ෂණ කවරේදැයි මේ තුළින් ඔබට තේරුම් ගැනීමට හැකිවනු ඇත.

යම් අයකුගේ විවාහය පිළිබඳ තොරතුරු ජන්ම පත්‍රයේ හත්වැනි රාශිය තුළින් විමර්ශනය වන අතර චÂද්‍රයාගෙන් හත්වැන්නද, සිකුරුගෙන් හත්වැන්නද පිරික්සීමෙන් විවාහය පිළිබඳ තොරතුරු සොයා බැලිය හැකිය.

සිංහ ලග්නය හිමි අයගේ හත්වැන්න සෙනසුරුට හිමි කුම්භ රාශියයි. හත අධිපති සෙනසුරු හත්වැන්න තුළම සිටීනම් දිග්බලයෙන් යුක්ත වන අතර සස නම් පංච මහා පුරුෂ යෝගයක් උදාකරයි. ඔබගේ විවාහය තරමක් ප්‍රමාද වී සිදුවුවත් යහපත් විවාහයකට හිමිකම් දරයි. ගුණගරුක අයකු වන අතර ඔබට ආදරය සැලකිල්ල නොඅඩුව ලැබෙයි. පවුල් ජීවිතය තුළ ගරුත්වය රකින අවංක අයෙකි. කලබලකාරී තත්ත්වයෙන් තොර ටිකෙන් ටික ජීවිතයේ දියුණුව කරා පියමං කරයි. අතමිට දිගහැර වියහියදම් නොකරන මෙම අය අර පිරිමැස්මෙන් යුක්තව කටයුතු කරයි. වරින් වර අදහස් වෙනස් කරන ස්ථිර ප්‍රතිපත්තියකින් යුක්තව කටයුතු කරන අයකු හිමිවනු ඇත.

හත අධිපති අටවැන්නේ නම් ඔබගේ සහකරු හා සහකාරිය තැන්පත් ජීවිතයක් ගතකරන ආගම දහම කෙරෙහි දැඩි විශ්වාසයකින් යුක්තයි. තරබාරු ශරීරයක් හිමි ඇත්තකු විය හැකියි. පෞද්ගලික වාසිය තකා වැඩ නොකරන මෙම අය තමන්ගේ උපන් ගති පැවතුම් කිසිවිටෙක වෙනස් නොකරයි. ජීවිතයේ දීර්ඝකාලීනව බලපාන රෝග නිසා පසුතැවිලි වන අවස්ථාද ඇතිවිය හැකියි. කොලෙස්ටරෝල්, ප්‍රෙෂර් වැනි රෝග ඇති අයකු වීමට පුළුවන. ඔහුට හෝ ඇයට හදිසි විපත් ඇතිවීමට ඉඩකඩ පවතී.

හත අධිපතියා නව වැන්නේ නම් සංසාරගත බැඳීමක් තුළින් මුණගැසුණු අයෙකි. තරමක් ඉක්මන් කලබලකාරී ස්වභාවයකින් යුක්ත වුවත් අසාධාරණ වැඩ නොකරයි. යුක්තිසහගතව ජීවත්වන අයෙකි. පවුල් ජීවිතය තුළ තමන්ගෙන් ඉටුවිය යුතු යුතුකම් හා වගකීම් නොපිරිහෙළා ඉටුකරයි. දුර බැහැර ප්‍රදේශවල සංචාරය කිරීමට කැමැත්තක් දක්වන මෙම අය සහජ දක්‍ෂතාවකින් යුක්ත අයකු විය හැකියි. කාර්මික දක්‍ෂතාවන්ගෙන් පිරිපුන් අයකු වෙයි.

හත අධිපතියා දහවැන්නේ නම් ඔබගේ හිමිකාරයා මඟතොටදී රැකියාව කරන ස්ථානය තුළද හමුවිය හැකියි. බොහෝ දුරට ප්‍රේම සබඳතාවක ප්‍රතිඵලයක් ලෙස විවාහය සිදුවීමට ඉඩකඩ පවතී. ඔහු හෝ ඇය විනෝදයට ප්‍රිය කරයි. නිතර අලංකාරව සිටීමට උත්සාහ දරයි. නිතර කතා කරන විට සිනාමුසු මුහුණකින් යුක්ත වෙයි. ඕනෑම අයකු ක්‍ෂණිකව මිත්‍රශීලී කරගනී. ඇඟලුම් ක්‍ෂේත්‍රය, රියැදුරු ව්‍යාපාර අංශවල රැකියාවක නිරත අයකු විය හැකියි. වාහන හිමිකරුවකුද විය හැකියි. මනා රූප ස්වභාවයකින් යුක්ත මෙම අය අනාගතයට වඩා වර්තමානය ගැන සිතා කටයුතු කරන අයෙකි. හත අධිපති එකොළොස්වැන්න තුළ නම් දැනීම බුද්ධිය හිමි නිතර පොත්පත් පරිශීලනය කරන අයෙකු සහකරු හෝ සහකාරිය විය හැකියි. කුඩා ව්‍යාපාරවලටද යොමුවිය හැකියි. මුදල් ඉපයීමට දක්‍ෂ කාර්යශූර අයෙකි.

වැය පැත්තට වඩා අය පැත්ත ගැන සිතා කටයුතු කරයි. තමන්ගේ හැසිරීම අන් අයට ප්‍රියජනක වෙයි. ඔබට ගෞරවය ආදරය දක්වන අයකි. පවුල් ජීවිතය තුළ වගකීම් කරට අරගෙන කටයුතු කරන අයෙකි. හත අධිපතියා ‍ෙදාළොස්වැනි රාශිය තුළ නම් විවාහය ඔබ සිතන පතන කාලයේදී සිදු නොවෙයි. ප්‍රමාද වී ලබන ඉරණම්කාරයා දුර බැහැර ප්‍රදේශයක සිටින අයෙකි. බොහෝ දුරට විදෙස් රටක සේවය කරන අයකු විය හැකියි. ජලයෙන් විපත් කරදර ඇතිවිය හැකියි. ඔබගේ අදහස්වලට ප්‍රතිවිරුද්ධ අදහස් දරන අයකු වෙයි. චපල සිතක් ඇති අයෙකි. පසුකාලය තුළද අෑත්ව සිටීමට උත්සාහ දරයි. සුළු දේටත් ඔබ සමඟ අමනාප විය හැකියි.

හත අධිපතියා ලග්නයේ නම් ඔබගේ හිමිකාරයා අවංක අයකු ලෙස ඔබ සිතයි. නමුත් උගුරට හොරා බෙහෙත් බොන අයෙකි. නම්‍යශීලී නොවන මෙම අය තද තීරණ ගන්නා අවස්ථාවන්ද බහුලයි. තමන්ගේ වාසියට හැමදෙයක්ම හරවා ගනී. නිතරම සමාජය තුළ කැපී පෙනී සිටීමට උත්සාහ දරයි. තමන්ගේ තත්ත්වයට වඩා පහත් අය ඇසුරු නොකරයි. නිතර ඉහළ තනතුරු දරන අය හඳුනා ගැනීමට උත්සාහ දරයි.

හත අධිපතියා දෙවැන්නේ නම් ඔබ ලබන හිමිකරුට ස්ථිර තැන්පත් මුදලක් හිමියි. ධනය ඉපැයීමට දක්‍ෂයෙකි. කතාව තුළින් අන් අයව වසඟ කර ගනී. සබකෝලයෙන් තොර මෙම අය පිරිසක් අතර නොබියව කතා කරයි. ඕනෑම කටයුත්තක් තේරුම් ගැනීමට ඥානශක්තිය ධාරණ ශක්තිය හිමියි. අන් අයට අත නොපා ජීවත්වෙයි. පොත්පත් ලිපිලේඛන ආශි්‍රතව රැකියාවක නිරත විය හැකියි. ජේ‍යාතිෂ ශාස්ත්‍රය කෙරෙහි තදින්ම විශ්වාසය පවතී.

හත අධිපතියා තෙවැන්නේ නම් විනෝදයට ප්‍රියකරන සහජ කලා කුසලතාවන් යුක්ත අයකු ලබයි. යාන වාහන හිමියි. සමාජය තුළ ජනප්‍රියතාවක් උසුලයි. සහෝදරයන්ට වඩා සහෝදරියන් බොහෝ සිටියි. තමන්ගේ ගරුත්වය මෙන්ම විවාහ ජීවිතය තුළ පවතින ගරුත්වය රැකගනී. තමන්ගේ ස්වාමියා බිරියගෙ හොඳ ගති පැවතුම් අන් අයට කියාපාමින් පවුල් ජීවිතය තුළ සමඟිය වර්ධනය කර ගනී. විදේශ ගමන්වලටද හිමිකම් දරයි.

හත අධිපතියා හතරවැන්න තුළ නම් ආරක්‍ෂක අංශවල හෝ කාර්මික ක්‍ෂේත්‍රයන් තුළ රැකියාවක නිරතවීමට බොහෝ දුරට පුළුවනි. ඔබ ලබන අය ක්‍රියාශීලී බවෙන් යුක්තයි. ක්‍ෂණික කෝපය උපදවයි. කලබලකාරී ගතිය නිසා අනතුරු ඇති කරගනී. පවුල් ජීවිතය තුළද සමඟියට බාධා පමුණුවයි. සුළු දේටත් අන් අය සමඟ ගැටීම් ඇති කර ගැනීමට පෙලඹෙයි. අවිනිශ්චිත චිත්ත ස්වභාවයෙන් පසුවන මෙම අය හොර රහසේ වැඩ කරන අවස්ථාද ඇත. ගේ ‍ෙදාර ඉඩකඩම් ලබයි. නමුත් ඒවා තුළින් දියුණුවක් නොලබයි.

හත අධිපති පස්වැන්න තුළ නම් ඔබගේ ඉරණම්කාරයා දැන උගත් අයෙකි. උපදේශක තනතුරු, රජයේ ස්ථිර රැකියාවක් ලබන්නකු වෙයි. ගුරු වෘත්තිය වැනි අංශවලට යොමුවිය හැකියි. පිරිපුන් ශරීරයකි. උසේ තරමට මහත ඇත. ගුණගරුක සමාජ සේවකයෙකි. ධාරණ ශක්තිය ඥාන ශක්තිය ඉහළ මට්ටමක පවතී. පරිත්‍යාගශීලීව කටයුතු කරන මෙම අය තමන්ගෙන් ඉටුවිය යුතු යුතුකම් නොපිරිහෙළා ඉටු කරයි.

හත අධිපතියා හයවැන්න තුළ නම් ඔබ ලබන හිමිකරු කම්මැළි ස්වභාවයෙන් තොරව වැඩ කරන අයෙකි. දුක් විඳ දරාගෙන ජීවිතයේ දියුණුව කරා පියමං කරයි. ඥාතීන්ගෙන් උදව් උපකාර ලබන අතර ඔවුන් සමඟ ඉතාමත් සමීපව කටයුතු කරයි. ඉඩකඩම් දේපොළ ලබයි. විදේශ ගමන්වලටද හිමිකම් දරයි. සතුරු කරදරයක් නිසා ජීවිතයට කරදරයක් ඇතිවීමට පුළුවනි. ඔබගේ හත අධිපති හයවැන්න තුළ බලවත් වීම නිසා පවුල් ජීවිතය තුළට බාධක ඇති නොකරයි.

ජ්‍යෝතිෂවේදී සරත්චන්ද්‍ර බෝතලාගේ
උපුටා ගැනීම මව්බිම පුවත්පත
0724270694