🛍️   Business Directory
📣   Classifields
🛍️   Business Directory
📣   Classifields

රන් මලක් ලෙස දෙවි බඹුන් දෝතින් පිදූ මේ පින් බිමේ රටම වසඟ කළ මේ ගීතය වස්කවියක් වුණේ මෙහෙමයි



විශ්වය තුළ ශක්තිය ගැබ් වනුයේ අපටත් නොදැනීමය. ඒ ශක්ති කදම්බවලට යම් යම් අවස්ථාවන්වලදී ගැබ් වන අහිතකර දේ නිසාම විශ්වයේ රටාවන් පවා වෙනස් වේ. ඒවා පියවි ඇසට දැකිය නොහැකි ශක්ති කදම්බ වුවත් එහි ප්‍රතිඵල අත්විඳීමට අපට සිදුවේ. පසුගිය තිස් වසරක් පුරාවට ඒකාධිපති වියරුවක නිරන්තරයෙන් මේ මහ පොළොව රුධිරයෙන් තෙමී යන යුගයක අපි ජීවත් වුණෙමු. දහස් ගණනකගේ දුක් අදෝනා වා තලය සිසාරා දිව ගියේ ත්‍රස්තයන්ට සාප කරමිනි. අඳුර දුරලා සාමයේ අරුණලු කැන්දන්ට වැදගත් මෙහෙවරක් ඉටුකරලූයේ ත්‍රිවිධ හමුදාවේ විරුවන්ය. පෞද්ගලික ලාබ අපේක්ෂාවන් පසෙකලා පොදු අරමුණක් වෙනුවෙන් ඒකරාශී වූ ඔවුන් වෙනුවෙන් කළ හැකි දෑ කරන්න බොහෝ දෙනකු පෙළ ගැසුණහ. උදේ හවා ජාතියම රකින මුර දේවතාවුන්ගේ ජීවිතය රක්ෂා කරන ලෙස දෙවියන් ඉදිරියේ කන්නලව් කළ දහස් ගණන් දෙනා අතර ඔබත් මමත් සිටියෙමු. ලේ පිපාසිතව, චීවරය හැඳි සාමණේර හිමියන්ගේ සිට මවගේ තනයෙන් කිරි උරා බොන පුංචි මල්කැකුළු පවා උදුරා ගත් ම්ලේච්ඡයන්ට අපි සාප කළෙමු. රුපු තෙද බිඳ වැටී ත්‍රිවිධ හමුදාවේම තේජස බල පරාක්‍රමය ධජ නැංවෙන ලෙස විවිධ ගීතද රචනා විය. පෙර කීවාක් මෙන් ශක්ති කදම්බ ඒකාරාශි වනුයේ අපිටත් නොදැනීමය. රණවිරුවන් තේමා කොට ගනිමින් ලියැවුණු සමහර ගීතවල විශ්වයේ අසුබ ශක්තීන් ඇද ගැන්මට සමත් කුසලතාවන්ද ගැබ්ව පැවැතිණි. කිසිවකු දැන දැනම තමන්ගේ ජීවිතය රක්නා දෙවියන්ට ශාප කරන්නේ නැත. එහෙත් නොදැනුවත්වම නොසිතන අයුරින් ඔවුන් අතින් අකටයුතුකම් සිදුවේ “රන් මලක් ලෙස දෙව් බඹුන්” ගීතය ලියැවුණේ දේශය ආරක්ෂා කරන්නට තුන්තිස් පැය පුරාවට දැල්වුණු ආලෝකයන් වෙනුවෙනි. ඔවුන්ට ශක්තියක් වනු පිණිසය. නමුත් සියල්ලන්ටම රහසින් එකකට එකක් ප්‍රතිවිරුද්ධ ශක්තියක් ගැබ්ව ඇත. නොතිබිය යුතු ශක්තියක් ගීතයෙහි අන්තර්ගත වී ඇති නිසා විශ්වයේ පවතින අසුබ බලවේගයන් ඈඳා ගැනීමේ ප්‍රතිශතය ඉහළ අගයක් ගනී. ගීතය පුරාවට ලියැවෙනුයේ ජාත්‍යානුරාගයෙන් ඔද වැඩුණු පද මාලාවකි. එකම සිහිනයක මුළු ලොවම නිදි ගැන්වෙද්දී දේශයේ මුර දේවතාවුන් ලෙස මුළු රැය පුරාම රන් වැටක් විලස මේ බිම ආරක්ෂා කරන්නේ ඔවුන්ය. තම ලෙයින් උපන් පුතුන් ගිනි අවිය දෝත දරාගෙන රණ බිමෙහි යුද වදින කල දහසක් පියවරුන්ගේ අත් හිස් මුදුනට බැඳෙති. මවුබිමේ හිමිකම පතමින් ජීවිතය පූජා කරන විරු දරුවන්ගේ නමින් හැම අම්මා කෙනකුගේම ළය ක්ෂීරයෙන් පිරී යයි. මවුපිය සියල්ලන්ගෙන් වෙන්ව යුද බිමෙහි තනිවම නැඟී සිටින කල හදවතින් කිසිදා ඔවුන් තනි නොවන බව මේ ගීතයෙහි පැවැසේ. සියුම් ලෙස හද පතුලම අතගා ජාතික ආල පිරිමැදීමට තරම් මෙම ගීතය ජව සම්පන්නය. මෙය කන වැකෙන වාරයක් වාරයක් පාසාම ත්‍රිවිධ හමුදාව කෙරෙහි ඇතිවන්නේ මහත් වූ සෙනෙහසකි. මුවින් ගිලිහෙන මේ වදන් වැල් මනසෙහි උද්දීපනය වන ගෞරවය හා මුසුව වා තලය හා බැඳී යයි. මෙහි කියැවෙන වදන් වැල් තුළ අපට නොදැනුවත්වම මානසික වශයෙන් බලයක් ගොඩ නංවයි.

එනිසාම ගීතය ගැයෙනුයේ මහා පිබිදීමකිනි. ඕනෑම ශබ්දයකට සැඟවුණු හැඩයක් හා ශක්තියක් ඇත. වචනාර්ථයෙන් ශබ්දයක් ප්‍රකාශ නොවුණද මනසින් පවා එයට බලයක් ගොඩනැඟේ. සෙත් කවිය නිවැරැදි ශබ්ද රටාවන්ගෙන් තොරවූ විට වස් කවියක් වන අවස්ථාද නැත්තේම නැත. මේ ගීතයෙහිද ශබ්ද රටාවන් වෙස් වළාගත් වස් කවියක් බඳුය. මෙහි ඉලක්කය වනුයේ ත්‍රිවිධ හමුදාවය. මෙමඟින් ආශිර්වාද කරනුයේද සෙත් පතනුයේද ත්‍රිවිධ හමුදාවටමය. එනිසාම මෙහි ශබ්ද රටාවට ඇදෙන අසුබ ශක්තීන්හි වැඩිපුරම බලපෑම එල්ල වනුයේ ත්‍රිවිධ හමුදාවේ ඉහළ නිලයන්හි සිටින නිලධාරීන්ටය. ඔවුන්ගේ නම්වල අසුබ ශක්තිය පරාවර්තනය කෙරෙන පිහිටීමක් ඇත්නම් ගැටලු ඇති නොකෙරේ. නමුත් අසුබ ශක්තීන් ඇදගැනීමේ බලයක් ඇති අයට ලැබෙන ප්‍රතිඵල බරපතළය. මාරක ප්‍රතිඵල වුවද ගෙනදිය හැකිය. ඔළුව විකාර කරවන පිහිටීම් සහිත ශබ්ද රටාවන්ගෙන් යුක්තය. මෙහි ගණ පිහිටීම්වලට අනුව සුළු සුළු ජයග්‍රහණ කිහිපයකට පසුව විශාල පරාජයන් ඇති කරවයි. සමස්තයක් ලෙස මුළු හමුදාවට මෙහි බලපෑම ඇතිවේ. අතීතය පිළිබඳ මතකයන් පිරික්සා බැලීමේදී සුළු ජයග්‍රහණවල සතුට යුද විරුවන්ගේ ලෙයින්ම පරාජයේ සලකුණු බවට හැරුණු අයුරු සෙයා ගත හැකිය. එකිනෙක ඝට්ටනය වුණු දෝෂ නිසා ආයුෂ අඩු කරවන පිහිටීමක් පෙන්වයි. මේ ගීතය රචනා වී තිබෙන්නේ සමස්ත යුද හමුදාව වෙනුවෙනි. ගීතයෙහි අධිපතීත්වය දරනුයේ යුද හමුදා විරුවන්ය. එනිසා ගීතය ගැයෙද්දී ඒකාරාශි වන අසුබ ශක්ති කදම්බ කේන්ද්‍රගත වනුයේ යුද හමුදා ඛණ්ඩයන්ටය. අදහසින් හමුදාවට සුබාශිංසනය කෙරුණද එහි ගොඩ නැඟෙන ශබ්ද ශක්තීන් එකකට එකක් ප්‍රතිවිරුද්ධ නිසා හමුදාව පීඩනයකට ලක්කෙරේ. විරුද්ධ පාර්ශ්වයට සුළු හානි ගෙනදී හමුදාවන් විශාල ලෙස ගොදුරු කරගනියි. වර්තමානයේදී වුවත් එක දිගටම මෙම ගීතය ප්‍රචාරණය වුවහොත් අනියමාර්තයේ කරදර ඇතිවිය හැකියි. සමස්තයක් ලෙස ගත්කල ගීතයේ පදමලාව ප්‍රශංසනීයයි. එහි තර්ක කළයුතු දෙයක් නැත. නමුත් අසුබ ලෙස එක්වී ඇති ශබ්ද ශක්ති හේතු කොටගෙන පාරාවළල්ලක්ව සෙත් කවිය වස් කවියක් බවට පත්ව ඇත. ශබ්දවලට හැඩයක් පවතී. එය කම්පනය කරන රටාව අනුව ශබ්දයේ මුහුණුවර වෙනස් වන බව විද්‍යාත්මකව පවා සනාථ කර ඇති ප්‍රස්තුතයකි. ශබ්ද තුළ පිටතට නොපෙනන රටා ශක්තීන් එකිනෙක ගැටීම හේතුකොට ගෙන ඇතිවන ප්‍රතිඵල විවිධය. නිතර දෙවේලේ පිරිත් හඬ ඇසෙන නිවෙසක බිත්ති ඉතා ඝනකමින් වැඩිය. මවකගේ ගර්භාෂයෙහි වැඩෙන කලලයක් පවා ශබ්ද ශක්තීන්ට සංවේදිය. එය නියමයකි. ශබ්දයේ ශක්තිය කිසිදු මනුෂ්‍යයකුට වෙනස් කළ නොහැකිය. එය පොදු නියමයකි.


නාම හා ශබ්ද ශාස්ත්‍රඥ, නිවංක දිනාරංග රත්නායක 0773583370
සවනි ශේශාධි හර්ෂා
උපුටා ගැනිම මව්බිම පුවත්පත