කුජගේ අපලවලට නොවරදින පිළිවෙත්

ජන්මියකු මෙලොවට දායාද කළ දෙමව්පියන්ට පහරදීම ඔවුන් ඝාතනය කිරීමෙන් ආනන්තර්ය පාපකර්මයට ගොදුරුවීම සතුන් දඩයම් කිරීමෙන් ප්‍රාණගාත අකුසලය සිදුකිරීම පර අඹුවන් පර පුරුෂයන් සමග වැරදි කාම සේවනයේ යෙදීම හෙවත් කාමයේ වරදවා හැසිරීමේ ශික්‍ෂා පදය කඩකිරීමෙන් තම දරු පවුල් අවුල් සහගත තත්ත්වයන්ට පත් කිරීම හා නිතර නිතර කෝපසහගත ලෙස හැසිරෙමින් කෝපාවිෂ්ඨව ක්‍රියාකිරීමේ අකුසලකර්මවලට විපාක වශයෙන් මේ ආත්මභාවයේ "කුජ" ග්‍රහයාගෙන් එල්ල වන්නාවූ පීඩාකාරී තත්ත්වය හෙවත් "කුජ අපලයෙන්" පීඩා විඳීමට සිදුවේ. එවැනි තත්ත්වයන්ට මුහුණ දීමට සිදුවූවන්ට පහත සඳහන් ශාන්තිකර්ම මගින් කුජ අපලය දුරුකර ගැනීමට හැකිය.

අඟහරුවාදා දිනවල කුජ හෝරාවෙන් එනම් පෙ.ව. 6.00 - 7.00 අතර හෝ ප.ව. 8.00 - 9.00 අතර කාලය තුළ බෝධියේ දකුණු දිශාවේ පස්‌තෙල් පහන් දල්වා රතු නෙළුම්, රතු අරලිය, රතු කනේරු (රතු කනේරු ඉතා සුබ වේ) ආදී රතු මල් සුවඳ දුම් පූජා කර හල්දුම්මල වලින් බෝධියට දුම් අල්ලන්න. අපලකරුගේ උසට ගොතාගත් රතු කනේරු මල් මාලයක්‌ ද අඟහරු දොස්‌ දුරුවේවා යනුවෙන් ලියූ රතු කොඩියක්‌ ද බෝධියේ දකුණුපස එල්ලන්න. පෙරාගන්නා ලද පැන් කළයක්‌ ගෙන මහා මංගල සූත්‍රයෙන් 3 වරක්‌ ද චක්‌ක පිරිතෙන් 3 වරක්‌ ද අභිසම්භිධාන පිරිතෙන් 3 වරක්‌ ද පිරිත් කර "කුජ අපලය" දුරුවේවායි ප්‍රාර්ථනා කර බෝධිය නාවන්න. පහත සඳහන් කුජ පීඩාහර ස්‌තෝත්‍රය 9 වරක්‌ ගායනා කර බෝධිය අබියසදීම කතරගම දෙවියන්ට පිං අනුමෝදන් කර අපල දුරුකර දෙන මෙන් ඉල්ලා සිටින්න.

කුජ පීඩාහර ස්‌තෝත්‍රය :

දිනපතා රාත්‍රි නින්දට පෙර ආගමික වතාවත්වලින් අනතුරුව පහත සඳහන් කුජ ස්‌තෝත්‍රය හා සෙත්කවිය නව වර බැගින් ගායනා කරන්න.

ධරණ ගර්භ සම්භූතං
විද්යුත් කාන්ති සම්ප්‍රභම්
කුමාරං ශක්‌ති හස්‌තානං
මංගලම් ප්‍රාණ මා සභාම්

සෙත් කවිය :

පසළොස්‌ චරණය ගුණපිරි මුණි
සදහම් මග පෙන්වාදුන් පහදා
විඡ්ජා චරණය නැණ බල විහිදා
කුජ ග්‍රහ අපලය දුරලන් සැමදා

Ö මැණික්‌ හා යන්ත්‍ර පැළඳීම කොරල් හෝ රතු මැණික්‌ ගලක්‌ පස්‌ලෝ මුදුවක අල්ලා අත පළඳින්න. නැතහොත් කොළොන් කොළයක ආකෘතියකට සවිකර ගෙළ පළඳින්න. ශාස්‌ත්‍රානුකූලව සකසා ගත් අභිසම්භිධාන යන්ත්‍රය එකී පිරිතෙන් 1008 වරක්‌ පිරිත් කර පළඳින්න.

Ö ඖෂධ පැන් ස්‌නානය බෙලිකටු, සුදු හඳුන්, බැබිල, රතු කනේරු මල්, ජටාමාංශ පෙරුන්කායං යන ඖෂධ සඳුදා දිනක නැවුම් කළයකට දමා එයට පෙරන ලද පැන් පුරවා පැය 12 කට පසු අඟහරුවාදා දිනයේ උදේ සාමාන්‍ය ස්‌නානයෙන් පසු ඖෂධ පැන් කළය පෙරා ස්‌නානය කරන්න.

Ö ගෙවත්තේ දකුණු දිශාවේ කොළොන් වෘක්‌ෂයක්‌ අඟහරුවාදා දිනක සිටුවා ස්‌පර්ෂ කරමින් සාත්තු කරන්න.

Ö අසරණ රෝගීන්ට ලේ දන්දෙන්න. රතු පැහැති ධාන්‍ය වර්ග රතු හාල්, රතු පරිප්පු, රතු කව්පි වැනි දේ ග්‍රහ දාන වශයෙන් ලබාදෙන්න. අතපය බිඳුණු ආබාධිත තරුණ පිරිමි පක්‍ෂයට විශේෂයෙන්ම හමුදා සේවයේදී එලෙස පීඩාවට පත් වූ අයට මේවා ලබාදීම හා උපස්‌ථාන කිරීමෙන්ද මරණයට කැප වූ එළුවන්, කුකුළන් බේරා ගැනීමෙන්ද කුජ අපලයෙන් වන පීඩාකාරී තත්ත්වය මගහැර ගත හැකිය. මේ සියලු කටයුතු සිදුකරන අතරතුර සිතෙහි ඇතිවන කෝපය මැඩගනිමින් හැකි සෑම අවස්‌ථාවකම අභිසම්භිධාන පිරිත සඡ්ඡාධායනය කරන්න. මෙනෙහි කරන්න.

ජ්‍යෙතිෂ්‍යවේදී - රංජන් සිසිර කුමාර

සටහන - ධම්මික හේවාවසම්

උපුටා ගැනීම දිවයින පුවත්පත