🛍️   Business Directory
📣   Classifields
🛍️   Business Directory
📣   Classifields

විෂ්ණු දෙවියන්ට බටකොළ කැවූ සෙනසුරා

සෙනසුරාගේ නම ඇසෙන විටත් බොහෝ දෙනෙක් බිය වෙති. සෙනසුරු ඒරාෂ්ටකය, සෙනසුරු දශාව මෙන්ම උපතේදී සෙනසුරු පිහිටි ආකාරය පිළිබඳව විවිධ මත පවතියි. විෂ්ණු දෙවියන් සූකර වෙස් ගෙන මඩ ගොඩක ළඟිමින් බටකොළ කෑවේත්, බෝසතුන් සය වසරක් දුෂ්කර ක්‍රියා කළේත් සෙනසුරු ඒරාෂ්ටක කාලයකදී බව නොදන්නා කෙනෙකු නැත. ඇත්ත වශයෙන්ම සෙනසුරු එතරම් භයානකද? ග්‍රීක දේව කතාවන්ට අනුව ශනි යනු සියස්ගේ පියා වශයෙන් සිටි ක්‍රෝනස්ය. දරුවන් තමාට වඩා උසස් වී රාජ්‍යය බලය පැහැර ගනීවි යැයි බියෙන් සිටි ඔහු දරුවන් සියල්ලන්ම උපත ලත් වහාම කා දැමුවේලු. එහෙත් මවගේ ආරක්ෂාව යටතේ හැදී වැඩුණ සියස් පියා මරා රජකමට පත් වීමෙන් ක්‍රෝනස්ගේ භීතිකාව සත්‍යයක් බවට පත්විය. හින්දු දේව කතාවන්ට අනුව සෙනසුරුගේ වම් කකුල කැඩුණේ හනුමා විසින් වාලධියෙන් පහරක් එල්ල කිරීම නිසාය. ජනප්‍රවාදයන්ගෙන් හෝ විවිධ කතා මගින් විවිධාකාරයෙන් විස්තර කළද ‍ජ්‍යොතිෂයේදී විස්තර වන්නේ දුෂ්ට පෙනීමෙන් යුක්ත, වම් කකුල කොර ගසන, කෘශ සිරුරක් සහිත, අලස, කපුටා වාහනය කොට ගත් නපුංශකයෙකු ලෙසිනි. මේ කුමන ආකාරයකින් විස්තර කළත් සෙනසුරු යනු සෞරග්‍රහ මණ්ඩලයේ පිහිටි ග්‍රහ තාරකාවක් බව නම් ඇත්තය. අනෙක් ග්‍රහයන් සමග යෝග වන ආකාරයද දෘෂ්ටි ලැබෙන ආකාරයද අනුව ශනිගෙන් ලැබෙන බලපෑම් වෙනස් වේ. සිකුරු සමග සප්තම දෘෂ්ටියෙන් පිහිටිවිට හුදකලා බවක් දැනීම හා ප්‍රේම සම්බන්ධතාවයන්ට බාධා පැමිණීම ආදිය ඇතිවන බව පෙනී ගොස් තිබේ. එසේම දෙදෙනා යෝග වීමෙන් විවාහය කල් පසු වීම හෝ විවාහ නොවී සිටීම වැනි අයහපත් බලපෑම් ඇතිවන නමුත් යමක් ක්‍රමානුකූලව කරගෙන යාමේ හැකියාව සකසුරුවම වැනි යහපත් බලපෑම් දක්නට ලැබේ. චන්ද්‍රයා සමග යෝගව සිටීම හෙවත් ජන්ම ඒරාෂ්ටකයෙන් උපත ලබන්නෝද ස්ථීර දේපළ ඇත්තෝ වන්නාක් මෙන්ම, වයසට යාමත් සමග දියුණුව ළඟා කරගනිති. ‍ජ්‍යොතිෂයේදී සෙනසුරුගේ ගතිගුණ වශයෙන් දැක්වෙන්නේ අවාසනාවන්තකම, දිළිඳුබව, අධෛර්යයමත් වීම, අලස බව මෙන්ම වැඩ කටයුතුවලට බාධා පැමිණීම, රෝග පීඩා ආදියයි. එය එසේම විය හැකි වුවද සෙනසුරුගේ හොඳ පැත්තක්ද තිබෙන බව අප දත යුතුය. දුක් විඳිමින් ඉදිරියට යාමේ හැකියාව ආත්ම දමනය ආගමික භක්තිය චිත්ත ඒකාග්‍රතාවය වැනි යහපත් ඵල දීමටද ශනි මූලික වේ. මෙහිදී මා සලකා බලන්නේ උපතේදී ශනි පිහිටි ආකාරයෙන් ඇතිවන තත්ත්වයත් දශා අන්තර් දශා සහ ඒරාෂ්ටක ආදියේ ඵල අපල තත්ත්වයනුත් පමණි. හත්වැන්නේ ශනි පිහිටීමෙන් විවාහය ප්‍රමාද වන බවත් වයසින් ඉතා වැඩිමහලු කෙනෙකු විවාහ කරගන්නට සිදුවන බවත් සමහරු විශ්වාස කරති. එහෙත් මෙය ඇත්තක්ද යන්න අවිශ්වාස සහගතය. එයට හේතුව ශනිගේ දිග්බල ස්ථානය හත්වැන්න වීමයි. දිග්බලයෙන් සිටින අනෙක් ග්‍රහයන් යහපතක් කරන්නටත්, ශනි පමණක් අයහපතක් කරන්නටත් විශේෂ හේතුවක් තිබේද? හොඳින් විමසා බැලීමේදී පෙනී යන්නේ ශනි පමණක් නොව අනෙක් ග්‍රහයන්ද බලවත්ව සිටි විට යහපතක් සිදු කරන්නාක් මෙන්ම දුර්වලව පාප දෘෂ්ටි ලැබ සිටි අවස්ථාවන්හිදී සුබ ඵල නොදෙන බවයි. සෙනසුරු උච්චව හෝ ස්වක්ෂේත්‍රගතව හත්වැන්නේ සිටි පුද්ගලයන්ට නියම වයසේදී පියකරු කාන්තාවන් විවාහ කර ගෙන සිටිනවාක් මෙන්ම තරුණියන්ට කඩවසම් තරුණයන් නිසි වියේදී මුණ ගැසී තිබේ.

එසේ නම් බොහෝ දෙනෙකු විශ්වාස කරන පදනම් රහිත කතාන්තර පිළිගත හැකිද?

ශනි උච්ච ක්ෂේත්‍රව හෝ ස්වක්ෂේත්‍රගතව කේන්ද්‍රස්ථානයක පිහිටීමෙන් ඇතිවන සස යෝගය ඉතා විශිෂ්ට වූවකි. තුලා, ධනු, මකර, හෝ කුම්භ යන රාශියක් ලග්නය වී සෙනසුරු එහි සිටියහොත් සිත් ඇදගන්නා පෙනුමක් මෙන්ම ධනය හා වීර්යයද ලබා දෙයි. තුන්වැන්නේදී සතුරන්ගේ බලය බිඳ දමයි. පහේ ශනි නීච වීම ධනය ලබා දෙන පිහිටීමකි. නවවැන්නේදී අධික ආගම් භක්තියක් ලබා දේ. එහෙත් අනෙක් රාශිවලදී යහපත් ඵලයක් ලැබේ යයි නොපෙනේ. 11 වැන්නේ පිහිටි සෙනසුරුගේ දශාව නොමරා මරණ කාලයක් වේ. රාහු යහපත් තත්ත්වයකින් 11 වැන්නේ සිටියදී හදිසි ධන ලාභ ලබා දෙනවාක් මෙන් ශනි හැර අනෙක් ග්‍රහයන් සියල්ලෝම 11 වැන්නේ සිටියදී බොහෝ කොට සුබ ඵල දෙති. එහෙත් 11 වැන්නේ ශනි සිටින කෙනෙකුට එම දශාව ලැබිමෙන් පසුව විනිශ්චයට අපහසු රෝග තත්ත්ව වැළඳුණ බොහෝ පිරිසක් මා දැක තිබේ. කොපමණ ඖෂධ ගත්තත් ඔවුන්ට සුවයක් නොලැබේ. 11 වැන්න අධිපතිව 11වැන්නේ පිහිටි ශනිගේ මහ දශාව මාරක කාලයකි. ඒ අනුව කවුරු කවුරුත් සෙනසුරාට බිය වීම සාමාන්‍ය දෙයකි. සෙනසුරුගේ මහ දශාවක් ලැබූ විටද, ඒරාෂ්ටකයක් පැමිණි විටද ‍ජ්‍යොතීර්වේදියෙකුගේ පිහිට පතන්නේ ඒ බිය නිසාය. සෙනසුරු තුලා රාශියට පැමිණීම කූට ව්‍යාපාරයක් බවට පත් කර ගත්තෝ විවිධ මුසාවාද දෙසමින් එක් එක් භාණ්ඩ විකිණුහ. ඒවාට තිබූ ඉල්ලුම පිළිබඳව සලකා බැලීමේදී පෙනී ගියේ සෙනසුරු භීතිකාව බොහෝ දෙනෙකුගේ සිත් තුළ හොල්මන් කරන බවය. මෙහි යථාර්ථය සලකා බැලීමේදී පෙනී යන්නේ සෙනසුරා යනු අපේ හැසිරීම් පාලනය කරන, විනයානුකූල ජීවිතයකට හුරු කරවන, ආගම දහමට ළැඳියාවක් ඇති කරවන, දිළින්දන්ට හා ආබාධිතයන්ට දන් දීම, ඇප උපස්ථාන කිරීම හා උපකාර කිරීම කියා දෙන බලසම්පන්න වැඩිහිටියෙකු මිස බිය විය යුතු බිල්ලෙකු නොවන බවයි.

ශනිගේ අපල කාලයකදී එහි අයහපත් තත්ත්වය සමනය කර ගැනීම සඳහා නිර්දේශ කරන්නේ මොනවාද?

වැස්සකටවත් පන්සල් නොයන බෞද්ධයෝද බෝධිපූජා පැවැත්වීම සඳහා සතියකට වරක්වත් පන්සලට ගොස්, මහත් ශ්‍රද්ධාවෙන් යුක්තව, පන්සිල් සමාදන්ව දෙවියන්ට පින් අනුමෝදන් කරති. නියම ආබාධිතයෙකු දෙස ඇසක් හැර නොබැලුවෝ එවන් පුද්ගලයන් සොය සොයා ගොස්, ඇප උපස්ථාන කොට දන් දෙති. මව්පිය වැඩිහිටියන්ට නොසලකන දූවරු පුත්තු ඔවුන් නාවා, කාවා ‍පොවා, ඇප උපස්ථාන කරති. දුගී යාචකාදීන් නිවසට කැඳවා දන් දෙති. එසේනම් අප අවබෝධ කර ගත යුත්තේ සෙනසුරු යනු බිය විය යුතු බිල්ලෙකු නොව අප යහමගට, සුමගට යවන උපදේශකවරයෙකු බවය. හැමදාමත් ආගමානුකූල ධර්මානුකූල ජීවිතයකට හුරු වී ජීවිතය ගත කරනවා නම් සෙනසුරුට පමණක් නොව කිසිම ග්‍රහයෙකුට බිය විය යුතු නැත.

චන්ද්‍රසිරි සී.කළුබෝවිල තිනෙත් ‍ජ්‍යොතිෂ කාර්යාලය කඩවත පාර, රාගම

උපුටා ගැනීම ලක්බිම පුවත්පත