අපේ පවුලට මොකද උනේ?
සුජාතා මහත්මිය මා ඉදිරියේ අසුන් ගත්තේ ඔක්‌තෝබර් මස 8 වැනි සිකුරාදා දහවල් 12.00 ටය. කේන්ද්‍ර පරීක්‍ෂාව ඇයගේ අවශ්‍යතාව විය. තත්කාලයේ උදාවූයේ මකර ලග්නය හා වෘෂභ නවාංශකයයි. රවි හෝරාව විය. මේ තක්‌කාල කේන්ද්‍රයයි. අද සිකුරාදා දිනයයි. සිකුරු ග්‍රහයාට විශේෂ බලයක්‌ තිබේ.
"මහත්තයට මොකද උනේ?" මම එසේ ඇසුවේ සිකුරු සහ සඳු දොළහේ තැන්පත්වූ බැවිනි.
සුජාතා යන්තම් සිනාසුනාය.
"ඇයි මහත්තයට මොකද උනේ?" මම නැවතත් ප්‍රශ්න කළෙමි.
සුජාතා මා අසල සිටි මගේ සහායකයා දෙස බලා නැවත මෙසේ කීවාය.
"මහත්තය ගෙදර ඉන්නව."
ඇය කියන අන්දමට ඇය සැමියා සමඟ යහතින් සිටී. මම නැවත වරක්‌ කේන්ද්‍රය සාදා බැලුවෙමි. වරදක්‌ සිදුවී නැත. මෙම සාකච්ඡාව නිම කළ යුතු බව පෙනේ. නෝන මහත්තයගෙ වෙලාවට මේක කියන්න බෑ වගේ පේන්නෙ. කරුණාකරල බුලත් ටිකයි පඬුරුයි ගන්න. වෙන දවසක පුළුවන් උනොත් බලමු. මම ඇයට සමුදුන්නේ විවාහ ප්‍රශ්නයක්‌ පැහැදිලිවම පෙන්වන බැවිනි. හත අධිපතියා දුර්වලව 12 නම් මහත්තයත් එක්‌ක යහතින් ඉන්නේ කෙසේදැයි මට නොතේරේ. සුජාතා මහත්මිය බුලත් සහ පඬුරු ආපසු ගත්තේත් නැත. නැඟී සිටියේද නැත. ඇය නැවත කතා කළාය. එවිට මගේ සහායකයා කාමරයෙන් ඉවත්ව සිටියේය.
මහත්තය ගෙදර ඉන්නවා තමා... ඒත්? ඒත් කිසි සම්බන්ධයක්‌ නෑ... බළලා මල්ලෙන් එළියට පැන්නා සේය. සුජාතා මහත්මිය කතා කළේ මට පමණක්‌ ඇසෙන ලෙසිනි. අවුරදු හතක්‌ වෙනවා. වෙන කෙනෙක් එක්‌ක සම්බන්ධයක්‌ තියෙනව. රටට පේන්ඩ විතරක්‌ ගෙදර ඉන්නවා. කිසි සම්බන්ධයක්‌ නෑ. සැමියා තමන්ගේ නාමික ස්‌වාමිපුරුෂයා පමණක්‌ බවත් වසර හතක සිට අනියම් බිරිඳක්‌ ඇසුරු කරන බවත් ගෙදරදී කතාවක්‌ නැති බවත් ඇය පැහැදිලි කළාය.
තත්කාල කේන්ද්‍රයේ පස්‌වැන්නාධිපතිද සිකුරුම වෙයි. පහ දරුවන් ගැන කියන තැනයි. දරුවො ගෙදර නැද්ද? මම ප්‍රශ්න කළෙමි. එවිට සුජාතා මහත්මියගේ දැසට කඳුළක්‌ නැගෙනවා මම දිටිමි. ඒක තමයි මහත්තයා බලන්ඩ ආවෙ. ගිය සුමානෙ පුතත් තරහවෙලා ගියා එයා ගෑනු ළමයෙක්‌ එක්‌ක යාළුවෙලා මම විරුද්ධ වුණා කියලා මාත් එක්‌ක අමනාප වුනා. දැං මම ඉන්නෙ තනියම. සැමියාත් පුතාත් අහිමිව අසරණ වූ මාතාව ජ්‍යොතිෂයේ පිහිට පතයි. තවදුරටත් තක්‌කාල කේන්ද්‍රය පවසන්නේ කුමක්‌ද? මම විමසිලිමත්වීමි.
ගේ ඉස්‌සරහ ලයිට්‌ කණුවක්‌ තියෙනවද? 10 වැන්නේ සිටින රවි විදුලිය ආලෝකය ගැන සංඥ කරන බැවින් මම ඇසුවෙමි.
ඔව්.
නිල්පාට මල් ගහක්‌? ශනි නිල්පාට බැවිනි.
ඔව්. නිල් කටුරොඩු වැලක්‌ තියෙනවා.
අපිරිසිදු කසලගොඩක්‌ හරි කුණුවලක්‌ වගේ දෙයක්‌?
ඔව් ටොයිලැට්‌ එක.
තක්‌කාලයේ ශනි දෙන සංඥ සැබෑ වන විට සතුටක්‌ දැනේ. කේතු ග්‍රහයා 4 වැන්නේ පිහිටා ඇත. රාහු දහයේය. හතර අධිපති කුජ අටවැන්නේ සිටී. එබැවින් මට මෙසේ කීමට සංඥ ලැබී තිබේ. මේ ගෙදර උතුරු පැත්තෙ තියෙන කාමරේ කළුවරයි. හිරු එළිය අඩුයි. වාතාශ්‍රය මදි. ගේ ඉස්‌සරහට කෙසෙල් උණ වගේ හරයක්‌ නැති උස ගහක්‌ පේනවා. තව ගෙඩි නැති බුලත් වගේ වැලක්‌. ගේ පිරිහෙන බව පේනවා. අමනුෂ්‍ය දෝෂ තියෙනවා. මේ සියල්ල සුජතා මහත්මිය විසින් අනුමත කළාය. මේ ප්‍රශ්නෙ ගැන බලන්න මීට ඉස්‌සරත් කෙනෙක් ළඟට ගියා නේද? මම ප්‍රශ්න කළේ උභය රාශියක්‌ උදාවූ බැවිනි. සුජාතා මහත්මිය ඊට එකඟ වූයේ ලැඡ්ජාවෙනි.
තවදුරටත් විස්‌තර කළ යුතු දෙයක්‌ නැත. මම සුජාතා මහත්මිය රැගෙන ආ කේන්ද්‍රය පරීක්‍ෂා කළෙමි. එහි සෙනසුරු ආදී බරපතළ අපලයක්‌ නැත. එහෙත් නිවසේ මිය ගිය අය පින් අපේක්‌ෂාවෙන් බලා සිටී, ඒ අයට පින් දීම ද අවශ්‍යය. සුජාතා මහත්මියගේ සැමියාගේ කේන්ද්‍රය රැගෙනවිත් තිබුණේ නැත. එසේ රැගෙන විත් තිබුණේ නම් ඒවා ගැලපෙන්නේ නැති කේන්ද්‍ර විය යුතු බව ද තක්‌කාල සටහන් පෙන්වා දෙයි.
සුජාතා බෞද්ධ බව කීවාය. මේ අනුව සාංඝීක දානයක්‌ දී මිය ගිය ඥාතීන්ට පින් දෙන ලෙසත් පිරිතක්‌ මගින් ආරක්‌ෂාව කරන ලෙසත් විස්‌තර කර දුනිමි. මහත්තය පුතා ගිය එක ගැනයි මට දුක නැවතත් ඇය අවසන් ප්‍රශ්නයක්‌ ඉදිරිපත් කරයි. උදාවී ඇත්තේ චර රාශියකි. පුතා ඉක්‌මනට එයි. ලබන මාසෙ පස්‌වෙනිදා විතර සිකුරු ලග්නයට එන දෙසැම්බර් 5 දා ඇයට පුතා ආපසු ලැඛෙනු ඇත. මේ දිව්‍යඥානයක්‌ බඳු තක්‌කාල ශාස්‌ත්‍රයයි.
ජ්‍යොතිෂවේදී සුනිල් කුමාර ගම්ලත්
උපුටා ගැනීම දිවයින පුවත් පත
