අසම සම වූ ලග්නාධිපතිගේ භූමිකාව
උත්පත්ති කේන්දරයක ලග්නාධිපතියාට හිමිවන්නේ අද්විතීය ස්‌ථානයකි. නිවසක ගෘහ මූලිකයාට හිමි තැන මෙන් ලග්නාධිපතියා ද ලකේන්දරයල නමැති ගෘහයේ මූලිකයා ලෙස සැලකුම් ලබන්නෙකි. එක්‌ එක්‌ ලග්නය අනුව ලග්නාධිපති ග්‍රහයා වෙනස්‌ වන අතර පහත සඳහන් සටහනෙන් ඒ පිළිබඳව ඔබට අවබෝධයක්‌ ලබා ගැනීමට පුළුවන.
ලග්නය ලග්නයට අධිපති ග්‍රහයා යෝගකාරක ග්‍රහයන් :
මේෂ අඟහරු හෙවත් කුජ ගුරු
වෘෂභ ශුක්‍ර හෙවත් සිකුරු ශනි
මිථුන බුධ බුධ, සිකුරු
කටක සඳු හෙවත් චන්ද්‍ර කුජ, ගුරු
සිංහ රවි කුජ
කන්‍යා බුධ බුධ, සිකුරු
තුලා ශුක්‍ර හෙවත් සිකුරු ශනි
වෘශ්චික අඟහරු හෙවත් කුජ චන්ද්‍ර, ගුරු
ධනු බ්‍රහස්‌පති හෙවත් ගුරු රවි, බුධ
මකර ශනි හෙවත් සෙනසුරු සිකුරු
කුම්භ ශනි හෙවත් සෙනසුරු සිකුරු
මීන බ්‍රහස්‌පති හෙවත් ගුරු කුජ, ගුරු
කේන්දරයක පළමු භාවය හෙවත් ලග්න සලකුණට ඉහළින් පිහිටා ඇති කොටුව ලග්නයට අයත් ලග්න භාවයයි. මෙම ස්‌ථානයෙන් කේන්දරය අයත් ඔබේ ආයුෂ, රූප ස්‌වභාවය, පෞරුෂය උස්‌ මහත් බව, චරිතය, අඟපසඟ, වාසනාව හෝ අවාසනාව, දියුණුව හෝ පිරිහීම, පවුලේ තත්ත්වය ආදී ඔබේ ජීවිතයට සම්බන්ධ ඉතා වැදගත් කරුණු රැසක්‌ හෙළි කරයි.
ඕනෑම කේන්දරයක ලග්නභාවය හා එහි අධිපති ග්‍රහයාගේ තත්ත්වය අන් ග්‍රහයන්ට වඩා මෙන්ම අන් භාවයකටම වඩා පරීක්‍ෂා කිරීම ඉතාම වැදගත් බව සෘෂිවරු පවසා තිබේ. ඇත්ත වශයෙන්ම කේන්දරයක පලාපල විමර්ශනය කිරීමේදී ලග්නාධිපතියාගේ භූමිකාව පිළිබඳව වැඩි අවධානයක්‌ යොමු කළ යුතුය.
පවුලක පියකු සතු වගකීම් සම්භාරය මෙන් ලග්නාධිපතියා වෙතින් ද තම ජන්මියා වෙනුවෙන් විශාල වගකීම් හා යුතුකම් රාශියක්‌ ඉටු විය යුතුය. කේන්දරයක මූලික වශයෙන් සුබපල දෙන භාවයන් ලෙස ත්‍රිකෝණ ස්‌ථානයන්ද, කේනද්‍රස්‌ථානයන් වූ 1, 4, 7, 10 යන ස්‌ථානයන් ද ජ්‍යොතිෂයේදී පෙන්වා දී තිබේ. ත්‍රිකෝණ ස්‌ථාන ලෙස දක්‌වා ඇත්තේ 5 හා 9 යන භාව දෙකය. නමුත් ත්‍රිකෝණයක්‌ වීමට නම් තවත් භාව ස්‌ථානයක්‌ එයට සම්බන්ධ විය යුතුය. එම ස්‌ථානය වනුයේ ලග්නයයි. එවිට 1, 5, 9 යන ස්‌ථාන තුන ත්‍රිකෝණය නිර්මාය කරනු ඇත.
මෙහිදී ලග්නය, ත්‍රිකෝණ ස්‌ථානය ලෙස ගණන් ගැනීමේදී පළමු ත්‍රිකෝණස්‌ථානය ලෙස ද, කේන්ද්‍රස්‌ථාන හතර පිළිබඳව විමසිලිමත් වීමේදී පළමු කේන්ද්‍රස්‌ථානය ලෙස ලග්නය ද හඳුන්වනු ලැබේ. මෙයින් ගම්‍ය වනුයේ අන් හැම භාවයකටම වඩා වටිනාකමින් වැඩි, උතුම්ම භාවය වනුයේ ලග්නය බවයි.
එමෙන්ම ලග්නය හිමි ලග්නාධිපති ග්‍රහයා, අන් හැම ග්‍රහයකුට ම වඩා බලවත් ග්‍රහයා වන අතර ජන්මියකු වෙනුවෙන් විශිෂ්ට කාර්යභාරයක්‌ ඉටු කර ලීමට ඔහු වගකීමෙන් බැඳී සිටිනු ඇත. කේන්ද්‍රස්‌ථාන අතරත්, ත්‍රිකෝණ ස්‌ථාන අතරක්‌ ප්‍රධානියා වන ලග්නාධිපති ග්‍රහයා, සමස්‌ත කේන්දරයේ ම බලවතා බවට අනිවාර්යයෙන්ම පත් වේ.
කේන්දරයක යෝග කාරකයා නිර්මාණය යනුයේ ද ත්‍රිකෝණ ස්‌ථානයක්‌ වූ නවවැන්න හා කේන්ද්‍රස්‌ථානයක්‌ වූ දසවැන්න ආශ්‍රයෙනි. එම ස්‌ථාන අධිපති ග්‍රහයන්ගේ යෝගය ඉතා බලවත් වන අතර එය හඳුන්වනුයේ ලධර්මකර්මාධිපතිල යෝගය ලෙසිනි. එසේ නොමැතිව ඔවුන් දෙදෙනා පරිවර්තනය වී හෝ අන්‍යොන්‍ය දෘෂ්ටි ලබමින් සිටියදීත් මෙම බලගතු රාජයෝගය නිර්මාණය වනු ඇත.
නම කියෑවෙන විටදී පවා මනුෂ්‍යයන් බියට පත් කරවන සෙනසුරු ග්‍රහයා, ග්‍රහ මඩුල්ලේ සිටින කුරිරු හා නපුරුම ග්‍රහයා ලෙස හංවඩු ගසා ඇත. නමුත් සෙනසුරු එලෙස අසුබ පල උදා කරන ග්‍රහයකු ලෙස නම් කර ඇතත්, තුලා හා වෘෂභ යන ලග්න දෙකෙන් උපත ලද ජන්මීන් හට එකම යෝගකාරක සුබයා වන්නේ සෙනසුරුමය. තුලාව හා වෘෂභය අයත් වන්නේ සෙනසුරුගේ අතිජාත යෙහෙළිය වන සිකුරුට වන අතර එම රාශි දෙකට සෙනසුරු යෝගකාරකයා වන්නේ මෙලෙසිනි.
පරාසර සෘෂීන්ගේ න්‍යායට අනුව තුලා ලග්නයෙන් උපත ලද ජන්මීන් හට හතරවැන්න වූ කේන්ද්‍රස්‌ථානයත්, පස්‌වැන්න වූ ත්‍රිකෝණස්‌ථානයත්, අධිපති සෙනසුරු හෙවත් ශනි ග්‍රහයා, සුබපල උදාකරන එකම යෝගකාරකයා වේ. වෘෂභ ලග්නයේදී නවවැන්න වූ ත්‍රිකෝණ ස්‌ථානයත්, දසවැන්න වූ කේන්ද්‍රස්‌ථානයත් සෙනසුරුට හිමිවීමෙන් සෙනසුරු ග්‍රහයාට වෘෂභයේ යෝගකාරකත්වය හිමිව තිබේ. එදා මෙන්ම අදත් මෙම න්‍යාය මතම පිහිටා කටයුතු කරන බවක්‌ පෙනෙන්්නට ඇත.
ඉහත කී න්‍යායට අනුව කටයුතු කරන වත්මන් ජ්‍යොතිෂවේදීන් මෙය සත්‍ය ක්‍රමවේදයක්‌ බව ප්‍රකාශ කර ඇත.
මගේ පරීක්‍ෂණයන්ට අනුවද මෙම මතය පිළිගත හැකිය. එකවර කේන්ද්‍රස්‌ථාන හතරෙන් ප්‍රථම කේන්ද්‍රස්‌ථානයත්, ත්‍රිකෝණ ස්‌ථාන තුළින් ප්‍රථම ත්‍රිකෝණස්‌ථානයත් හිමි වන ග්‍රහයා තරම් බලවත් ග්‍රහයකු කේන්දරයක සිටීමට නොහැකි යනු මගේ මතය ද වේ. එමෙන්ම ලග්නය භාවය හා සම කළ හැකි වෙනත් භාවයක්‌ ද කේන්දරයක නොතිබිය හැකි අතර කෙලෙසින් කිරා මැන බැලුවද ලග්නභාවය හා ලග්නාධිපතියා අනිවාර්යයෙන්ම ජන්ම පත්‍රයක්‌ තුළ උත්තරීතර වනු ඇත. ලග්නය හා ලග්නාධිපති බලවත් වීමෙන් ජන්මියා වූ ඔබට දීර්ඝායුෂ ලබාදී මනා රූ සපුවක්‌ ද දායාද කරවන අතර තීක්‍ෂණ නුවණක්‌ හා මනා ශික්‍ෂණයක්‌ ද ලබාදෙනු ඇත. එමෙන්ම විනීත හා යහපත් ගති ගුණයෙන් ද ඔබව පෝෂණය කරවන අතර සමාජයේ කැපී පෙනෙන බලගතු පුද්ගලයකු බව ට ඔබව පත් කරන බලවත් ජ්‍යොතිෂ පිහිටීමක්‌ ලෙස සෘෂිවරු මෙය පෙන්වාදී තිිබේ. ලග්නය හා ලග්නාධිපතියා බලවත්ව පිහිටන ලද ඔබගේ කේන්දරයේ අනිකුත් ග්‍රහයන් කවර අන්දමින් පිහිටා සිටියද, ඉන් ඔබට එතරම් හානියක්‌ සිදු නොවන බව මගේ පරීක්‍ෂණවලින් තහවුරු වී තිබේ. එසේම ලග්නාධිපති ග්‍රහයා 6, 8, 12 යන භාවාධිපතීන්ට යෝග වී හෝ ඔවුන්ගේ චතුරශ්‍රාදී දෘෂ්ටිවලින් පීඩාවී සිටීමෙන් අනෙකුත් බලගතු යෝගවල පවා බල බිඳී යන අයුරු අත්දැක ඇත. එයින් දෙනු ලබන පණිවුඩය වන්නේ අන් හැම ග්‍රහයකුටම වඩා ලග්නාධිපතියා ඉතා බලවත්ව හා පිරිසිදු අයුරින් පවිත්‍රව සිටිය යුතු බවය.
ලග්නාධිපති ග්‍රහයා ලග්න ගත වීම බොහෝ බලවත් මෙන්ම ඉතාම සුබ පිිහිටීමක්‌ බව පඬිවරු එක හෙළා පවසා ඇත. නමුත් මෙහිදී අප සුපරීක්‍ෂාකාරී විය යුතු බව මගේ හැඟීමයි. මන්ද ලග්නාධිපතිය ලග්නභාව ගතවීමෙන් පමණක්‌ ම ඔබට සුබ පල ලැබේද යන්නයි. මා ලද අත්දැකීම්වලට හා දැනුමට අනුව ලග්නාධිපති ග්‍රහයාට එල්ල වන ග්‍රහ දෘෂ්ටි හා සංයෝග අනුවද ලග්නාධිපතියාගෙන් ප්‍රදානය කෙරෙන සුබ පල වෙනස්‌වීමට බොහෝ දුරට ඉඩ ඇත. එසේ වන්නේ පාපයන් හා යෝග වීමෙන් හා ඔවුන්ගේ දෘෂ්ටියට ලක්‌වීමෙනි.
ඇත්ත වශයෙන්ම ලග්නාධිපතිගේ පමණක්‌ නොව, ඕනෑම ග්‍රහයකුගේ සුබ අසුබ මැනීමට පෙර එම ග්‍රහයන් වෙත පතිත වන සුබ අසුබ ග්‍රහ දෘෂ්ටි පිළිබඳව විමර්ශනයක යෙදීම අත්‍යවශ්‍ය ය. මේ තවද, ලග්නාධිපති ග්‍රහයා බාධක රාශිගත වීමෙන් ද ජන්මියාගේ ඉදිරි ගමනට බාධා පැමිණෙන බව මගේ අත්දැකීම් ඇසුරෙන් පැවසිය හැකිය.
කිසියම් පවුලක ගෘහ මූලිකයා හෝ පියා, යහපත් සමාජය මට්‌ටමක සැලකිය යුතු ආර්ථික තත්ත්වයක දිවිගෙවන්නේ නම්, ඔහුගේ දරුවන්ට අඩුපාඩු නැති, සමෘද්ධිමත් හා සුත මුදිත ජීවිතයක්‌ ගත කිරීමේ භාග්‍යය හා වාසනාව ඇති බවට රහසක්‌ නොවේ. එමෙන්ම පියා බලවතකු වුවහොත් ඔහු හා ඇසුරු කරනුයේ ද බලවත් මිනිස්‌ කොට්‌ඨාසයකි. එය ස්‌වභාවයයි. එවිට ඔහුගේ පවුලේ උදවියට ද සමාජයෙන් පුද සත්කාර, ගරු සැලකුම් හා පිළිගැනීම් නිතැතින්ම හිමිවීම නොවැළැක්‌විය හැක්‌කකි. ඉහතින් දක්‌වන ලද කරුණු කාරණාවලට අනුව බලන විට වේලාපත්කඩක ලග්නය හා ලග්නාධිපතියා ජන්මියාට නොහොත් ඔබට ඉටු කරනුයේ වචනයෙන් පැවසිය නොහැකි තරම් සුවිශාල මෙහෙයක්‌ බව අවිවාදයෙන් පැවසිය හැක.
ඩී. ඩග්ලස්‌ නිමලවංශ ගුණවර්ධන
උපුටා ගැනීම දිවයින පුවත් පත
