This site has features that require javascript. Follow these simple instructions to enable JavaScript in your web browser.
Sithmal Yaya
කුජ කන්‍යාවේ ලග්න තුනකට සුබය
2013 නොවැම්බර් 27 දා සිට 2014 පෙබරවාරි 4 දා දක්‌වා අඟහරු සිංහ රාශියෙන් මිදී කන්‍යා රාශියේ ගමන් ගනී. පෘථිවියට ඉතාම කිට්‌ටු ග්‍රහ තරුවක්‌ ලෙස අඟහරු ග්‍රහලෝකය හැඳින්විය හැකිය. මෙහි විශ්කම්භය සැතපුම් 4215 කි. ජෝතිෂවේදයේ ලභුමි පුත්‍රල යනුවෙන්ද අඟහරුට (කුජට) කියයි. මොහු පාප ග්‍රහයෙකි. කුජ ග්‍රහයා මේෂ වෘශ්චික රාශි දෙකට ස්‌වක්‍ෂේත්‍ර වේ. මකර රාශියට උච්චයි. මිථුන කන්‍යා රාශි දෙකට සතුරුයි. කුජ මිත්‍ර වන්නේ ධනු, මීන, වෘෂභ, සිංහ රාශි වලටය. කටකයට නීච වේ. තුලා, කුම්භ රාශිවලට සමයි. නිර්භීතකම, උත්සාහවන්ත ගතිය, තේජවන්ත ගතිය කුජගෙන් දිස්‌වේ. කුජ බලවත්ව සිටීමෙන් මෙම ගති ඇතිවේ. දීර්ඝ ගමන් බිමන් පිටරට ගමන් කුජ නිසා ඇති කරයි. කුජ අශුභව සිටීමෙන් දරුණු උෂ්ණ රෝග, හදිසි අනතුරු ඇතිවේ. හිසට පවා තුවාල ඇතිවිය හැකිය. කුජගේ ග්‍රහ මාරුව ඔබගේ ලග්නයට බලපාන හැටි මෙසේය. මේෂ - මේෂයට ලග්නාධිපති වූ කුජ 6 වැන්නේ ගමන් ගනී. තම බලය තහවුරු කර ගැනීමට උත්සාහ දරයි. ආමාශගත ආබාධ ඇතිවේ. ඉඩකඩම් දේපළ ලැබීමේ භාග්‍යය හිමි වේ. දරුවන් අපේක්‍ෂා කරන කතුන්ට ප්‍රසූත දෝෂ ඇති කරයි. පවුල් ජීවිතය යහපත් වේ. වෘෂභ - කුජ 5 වැන්නේ ගමන් ගන්නා නිසා නිරෝගී වේ. තම කටයුතු හොඳින් හෝ නරකින් හෝ කර ගනී. ව්‍යාපාර කටයුතුවලට යහපත්ය. කුළුඳුල් දරුවාට අගුණයි. ඉගෙනීම් කටයුතුවල යෙදී සිටින අයට යහපත් නැත. සථාන මාරුවීම් ඇතිවිය හැකිය. මිථුන - 4 වැන්නේ අඟහරු ගමන් ගැනීමෙන් දේපල ලබයි. කාමාශ වැඩියි. ඥතීන් සමග විරුද්ධ වේ. දේපළ හානි ඇති කරයි. ආත්මාර්ථකාමී වේ. මවට අපලයි. සිත් වේදනා ගෙන දෙන කරුණු යෙදේ. හිතුවක්‌කාරය. කටක - 3 වැන්නේ කුජ සිටීමෙන් ඉගෙනීම් කටයුතුවල නියෑලී සිටින අයට ශුභයි. ගණිත-මිනිත යන්ත්‍ර සූත්‍ර කටයුතුවල යෙදී සිටින අයට යහපත්ය. යුධ කටයුතුවලින් (සටන්) ජය ලබයි. ඥනවන්ත දරුවන් ලබයි. සිංහ - අඟහරු 2 වැන්නේ ගමන් කිරීමෙන් කොහොමහරි මුදල් උපයාගනී. වියදම්ද එසේමයි. විරුද්ධවාදීන් වැඩියි. ප්‍රධානත්වය ඕනෑ කරයි. දේපළ පිළිබඳ ආරවුලක්‌ ඇතිවේ. පදිංචි ස්‌ථානයේ වෙනසක්‌ සිදුවේ. ගෘහ ජීවිතය වාසනාවන්තයි. කන්‍යා - ලග්නගතව කුජ ගමන් ගනී. නිර්භීතයි. විරුද්ධවාදීන් වැඩී. කොතනට ගියත් එතැන තමාට ප්‍රධානත්වය ඕනෑ කරයි. අර පරිස්‌සම් ගතියක්‌ නැත. දරුණු අනතුරු ඇතිවිය හැකිය. ලෞකික සැප ලබයි. සටන්කාමී වේ. ඔළුවේ ආබාධත් ඇතිවේ. තුලා - 12 වැන්නේ කුජ ගමන් කරන නිසා වැඩ කටයුතු අවුල් වේ. කකුල්වලට තුවාල සිදුවෙයි. ඉතිරි කර ගැනීම අපහසුයි. නඩු හබ බන්ධනාගාර ගතවීම් ඇතිවිය හැකි නිසා කල්පනාකාරීවන්න. ගනුදෙනුවලින් පාඩු සිදුවේ. වෘශ්චික - ලග්නාධිපතියා 11 ගමන් කිරීම ශුභයි. පොළවෙන් වස්‌තුව ලබයි. මැණික්‌ ගරන අයට වාසි ලැබේ. සමාජ කටයුතු ප්‍රිය කරයි. නීතිඥයන්ට යහපත්ය. ව්‍යාපාර කොන්ත්‍රාත් කරන අයටද ඉතා ශුභයි. අතමිට සරුවේ. ධනු - 10 වැන්නේ කුජ ගමන්කරන නිසා රැකියා කටයුතු සාර්ථක වේ. ප්‍රධානත්වය ලබයි. වැඩ කිරීමට සේම වැඩ ගැනීමටද දක්‍ෂයි. ඉඩකඩම් දේපළ ලැබීමේ භාග්‍ය ඇත. රජයෙන් සම්මාන උසස්‌වීම් ලබයි. යහපත් කාලයකි. මංගල යෝග උදාවේ. මකර - 9 වැන්නේ කුජ ගමන්කරන නිසා දේපල ලබයි. විද්‍යා විෂයයන් ඉගෙනීමට දක්‍ෂයි. උරුම හිමිකම් ලබයි. නිතර උභය පාර්ශ්වය ගැන සිතයි. දීර්ඝ ගමන් බිමන්වලදී අනතුරුවලට භාජනය විය හැකිය. පිටරට ගමන් යෙදේ. කුම්භ - කුජ 8 ගමන් කිරීම ශරීර සෞඛ්‍යයට හිතකර නැත. හදිසි අනතුරු ශල්‍යකර්ම පවා සිදුවීමට ඉඩ ඇත. පිට පළාත්වලින් ප්‍රයෝජන සැලසේ. දේපළ පිළිබඳ ආරාවුල් පැන නගී. ගැබ්ගත් කතුන්ට ප්‍රසූත දෝෂ ඇති කරයි. මීන - 7 වැන්නේ අඟහරු ගමන් කරන නිසා විවාහය ඉක්‌මන් වේ. මහජන විරෝධතා ඇතිවේ. හිතුවක්‌කාරව කටයුතු කරයි. ආලය පිළිබඳ කටයුතුවලදී කරදර ඇති කරයි. අනවශ්‍ය සම්බන්ධතා නිසා කරදර ඇතිවේ. මීරිගම ආර්. එම්. ටී. බී. රත්නායක උපුටා ගැනීම දිවයින පුවත්පත