ලග්නාධිපතිගේ භාව 4ක පලාපල
මේෂ ලග්නය වී කුජ ලග්නයේ සිටීම
ස්ව තීරණ මත කටයුතු කරයි. දියුණු වීමට දැඩි ආශාවක් දක්වයි. ආරම්භ කරන වැඩ කටයුතු හොඳින් කරගෙන යයි. කලබලයෙන් වැඩකරන අයෙකි. නොයෙකුත් දක්ෂකම් ඇති කරන කාර්ය හරියාකාරව කිරීමට කැමැතිය. නිදහසට කැමැතිය. කිසි කෙනකුට යටත් නොවන නිර්භීත නිතර සටනට කැමැති සතුරන් පරදවා ජය ගන්නා අතර අනෙක් දේවල් ගැන නොබලා ඉදිරියට යන තද ලෙස කාමුක අයෙකි. නිතර පෙන්වන නොඉවසිලිවන්ත බව හා හොඳින් වැඩුණු සිරුරකට හිමිකම් කියයි.
ප්‍රමාණයට කරුණාවන්ත ඇති තේජවන්ත ගතියෙන් එය නොපෙන්වා ජීවත් වේ. නීතිරීති සුළුකොට සිතන පාලනයට සංවිධානයට දක්ෂ, ගෞරවය උසස් කොට සලකන අයෙකි. ජීවිත සටනින් ජය ගනී. ව්‍යායාම ප්‍රියකරන ක්‍රියාශූරත්වය නිසා කුඩා කාලයේම දියුණුවට පත්වෙයි. ව්‍යාපාරයක මූලිකයකු වන අතර යම් දෙයක් ඇති කිරීමට හෝ නැති කිරීමට දක්ෂ අයකු වෙයි.
ඉවසිල්ලක් නැති අනුන්ට හිස නොනමන බාධක කරදර ගැන නොසලකන අයකු වෙයි. ඉන්ජිනේරුවරුන් කොන්ත්‍රාත්කරුවන් බිහි වන අතර හොඳ නරක හොඳින් වැටහෙන අතර කුමන හෝ දෙයක් වැරැදුණොත් ජය ලැඛෙන තුරු සටන් කරයි. ලෝහ කර්මාන්ත, වෙදකම, ත්‍රිවිධ හමුදාවට හොඳ පිහිටීමකි. අලුත් දේට ආශා කරන සබඳතා කිහිපයක් පවත්වන අයකු වෙයි. අන්තිම කැමැතිපත්‍ර වලින් ධනය ලැඛෙන සහකරු හෝ සහකාරියගෙන් ධනය ලැඛෙන පිහිටීමකි.
වෘෂභ ලග්නය වී
සිකුරු ලග්නයේ සිටීම
ඉතා වාසනාවන්ත පිහිටීමකි. උසස් කෙනකුගේ දෙවැන්නෙක් ලෙස කටයුතු කිරීමෙන් බොහෝ ජයග්‍රහණ හිමි වේ. මුදල් පාලනයට, අලංකාර කිරීමේ කටයුතුවලට හොඳ පිහිටීමකි. නිතරම උසස් දේට ඇස හිත යොමු වෙයි. නිතරම අනුන්ට යහපතක් වීමට සිතයි. නීතියකට අනුව ආදරය කරන අයෙකි.
මෙම අයට බොහෝ විට සෙසු පෞද්ගලික කාර්යයන් ඇත. සෑම කාර්යයක්ම ඵලදායී ලෙස නිම කරයි. නිතර සැහැල්ලුවෙන් විනෝදයෙන් සිටියි. කරුණාවන්තය. පවක් සිදු වුවහොත් එය බැරි වීමකින්ය. අනුන්ගෙන් උදව් උපකාර හිමි වේ. උසස් හා බුද්ධිමත් මිත්‍රයන් හිමි වේ. පවිත්‍ර ඇඳුම් පැලඳුම්වලට ප්‍රිය කරයි. නිහතමානී අයෙකි. වෙදකම හා සාත්තු සේවයෙන්ද රස දිව පිනවන ආහාරපාන සුඛෝපභෝගී යානවාහන හිමි අයකු සහකරු හෝ සහකාරියගේ නෑ හිතවතුන් අතර නිතර සබඳතා පවත්වයි. සතුරන් අඩු අයෙකි. සමාජ සේවයට ප්‍රියකරයි. නිතර ප්‍රධානියෙක් වෙයි. අලංකාර ගෙවල් දොරවල් හිමි වෙයි. ගෘහ ජීවිතය වාසනාවන්තව ගත කරයි. වාසනාවන්ත දරුවන් බිහිවේ. නිතර සහකරු හෝ සහකාරියගේ වැඩ කටයුතුවලට සහාය කරගත හැකිවේ. ගායනය රංගනය වැනි කලා ක්‍ෂේත්‍රයට යොමු වන්නේ සිකුරු ලග්නයේ සිටි අයයි. සතුන්ට ආදරය කරයි. සෑම දෙයක්ම ප්‍රමාණයට වඩා ලොකුකර පෙන්වීමට කැමැති අය වෙති.
ලග්නය මිථුන වී බුධ ලග්නයේ සිටීම
උරුමයෙන්ම ධනය යානවාහන ගෙවල් දොරවල් හිමි අයෙකි. ඉගෙනීමට දක්ෂය. භාෂාවන් කිහිපයක් ඉගෙන ගනී. ගෙදරදීම කරන ශාස්ත්‍රීය කටයුත්තකින් ප්‍රසිද්ධිය ලබයි. නිතර අනුන්ට අවවාද අනුශාසනා කරයි. නිතර පොතපතට පළමු තැන දෙයි. ඉගෙනීමේ කටයුතුවල යෙදෙන අයට නිතර උදව් උපකාර කරයි. දෙමවුපිය සහෝදර සහෝදරියන්ට ආදරයෙන් සලකයි. ජීවිතයේ අග භාගය වෙන්න වෙන්න ධන තත්ත්වයෙන් වෙනස් වෙයි. ලියකියවිලි වැඩ ලියුම් ඛෙදීම, ග්‍රන්ථ කතුවරයකු පොත්පත් වෙළෙදාම ග්‍රන්ථ කතෘවරයකු හෝ මුදුණ ශිල්පය ආදායම් මාර්ගය ලෙස සලකයි. කය වෙහෙසා කරන වැඩවලට වඩා බුද්ධිය වෙහෙසවා කරන කටයුතුවල යෙදෙයි.
ඇනුම්පද හා නිතර විහිළු කිරීමට හොඳ පිහිටීමකි. අපක්ෂපාතීව නොයෙක් දෙයට සිත ඇදී යන අතර සෑම දෙයක්ම තමාගේ වාසිය සඳහා උපයෝගි කර ගැනී අලුත් අලුත් දේ සොයන නිතරම කල්පනාකාරීව පරීක්ෂා කරයි. වහා අවබෝධ වන සුළු අයෙකි. නිතරම හොඳින් කියැවීමෙන් කරුණු වටහා ගනියි. උගතුන් විශාරදයන් ධනවතුන් අතර ශ්‍රේෂ්ඨ කථිකත්වයක් ඇති අය වෙති. ඇසට පෙනෙන දේට වඩා සිතට සිතෙන ආකාරයට කාරිය කරයි. කරුණාවන්ත අයෙකි. සහජ බුද්ධියක් හිමි උගත් දරුවන් බිහි වන අය වෙති. වාසනාවන්ත යුග දිවියක් ගත කරයි. රැකියා කිහිපයක් කරයි.
ලග්නය කටක වී සඳු ලග්නයේ සිටීම
නිතර ඇවිදීමට ප්‍රිය කොපමණ වැඩ කටයුතු ඇතත් භාරදූර කමක් හිතට නොගනියි. නිතර අදහස් වෙනස් කරයි. සමාජයට කැමැති වුවත් ලැජ්ජාවෙන් අයින් වන අයෙකි. සමාජ සේවයට කැමැතියි. නිතර අය-වැය බලමින් කටයුතු කරන අයෙකි. රැකියාව පදිංචි ස්ථාන නිතර නිතර වෙනස් කරයි. සහජ බුද්ධියක් හිමි අයෙකි. දියුණු වීමට ඇති ආශාව නිසා නිතර වැඩක යෙදෙයි. නිතර හිත මිතුරන් ඇතිකර ගනී. නිතර පරීක්ෂාකාරී වන තද හිතක් නැති අයෙකි. රාත්‍රි කාලයේ නොයෙක් දේ ගැන සිත සිතා ඉඳියි.
බැල්මෙන් හා කතාවෙන් අනුන් තමා වෙත ඇදී එයි. ගුප්ත විද්‍යාවට, ජ්‍යොතිෂ විද්‍යාවට ප්‍රිය කරයි. කුඩා කාලයේදීම පවුලෙන් වෙන් වෙයි. පහසුවෙන් වැඩිබරක් නැතිව ජීවිතය ගෙන යයි. ලෞකික සැප සම්පත්වලට වැඩියෙන් ප්‍රිය කරයි. රසවත් ආහාරවලට ප්‍රිය කරයි. කාන්තාවන් නිතර ඇසුරු කරයි. නිදහසේ ජීවිතය ගත කරන චිත්‍ර ශිල්පයට, සංගීතයට ප්‍රියකරයි. වරින් වර විවිධ ප්‍රදේශවල වාසය කරයි. අවිවේකී ගතිය වැඩිකරයි. ජීවිතයේ වැඩි කාලයක් විනෝදයෙන් සැහැල්ලුවෙන් ජීවත් වෙයි. උපන් ගමෙන් හෝ ප්‍රදේශයෙන් හෝ උපන් රටෙන් පිටව වැඩිපුර ජීවත් වෙයි. හොඳ නරක සියලු දෙනාවම ආශ්‍රය කරයි. ගමන ඉක්මන් නිසා අව්ව, වැස්ස රෑ දවල් නොබලයි. රාත්‍රි කාලයට බය ගතියක් ඇත. නිතර ගෙදර වාසය කිරීමට ප්‍රිය කරයි. දරුවන්ගෙන්, මිත්‍රයන්ගෙන් ආධාර උපකාර හිමි වෙයි.
උපුටා ගැනීම මව්බිම පුවත්පත
