ඔබේ සහකරු හෝ සහකාරිය අංක විද්‍යාව අනුව තෝරා ගන්නේ මෙහෙමයි
අංක විද්‍යාව මනුෂ්‍ය වර්ගයාගේ ඉතිහාසය තරම්ම පැරණිය. මනුෂ්‍යයින් මිහිමත ඇවිදිමින් තමන්ගේ කාර්යයන් කරන්නේ අහඹු ලෙස චලනය වන අංශු ලෙස නොවේ. ඔහුගේ පැවැත්මේ හේතුවක් ඇති අතර එහි පැවැත්මේ කාලයක්ද තීරණය වේ. කාලය ඇති තැන අංක පැමිණේ. අංක නැතිනම් කාලය කොයින්ද? ක්‍රි.පූර්ව 6 වන සියවසේ සිටි මහා ගණිතඥ පයිතගරස් අංකවල පැවැත්ම සහ එහි සජීවී භාවය පිළිබඳව සිය සැලකිල්ල යොමු කළ අයෙකි. අංක විද්‍යාව කෙළින්ම සබැඳී ඇත්තේ පෘථිවිය පාලනය කරන ප්‍රධාන ග්‍රහවස්තු හත සහ ඒ හා බැඳෙන අංක සමගයි.
අපගේ සතියේ දවස් හත සලකන්න. ඔබ කුමන ජාතියක බැලුවද ඒ හැමෝම පාවිච්චි කරන්නේ දින හතක සතියකි. එසේම එම දින හතෙහි අනුපිළිවෙළ එනම් හිරු (ඉරිදා) (සඳුදා) යනාදී වශයෙන් ප්‍රධාන ග්‍රහවස්තු හතට අදාළව මෙම දිනයන් බෙදා ඇත. චීන, ඇහිරියන්, හින්දු, ඊජිප්තු, හීබෘෘ, ග්‍රීක්, ලතින්, ප්‍රංශ, ජර්මන්, ඉංග්‍රීසි මේ ඕනෑම ජාතියක මෙම සතියේ දින හත එකම අනු පිළිවෙළට පාවිච්චි කරනු ලබයි. එසේම මෙම දින හතේ බෙදීම මනුෂ්‍යයාට පාවිච්චි කරන අනිකුත් සියලුම කාල ඒකක, වසර, මාස සෘතු හරහා ගමන් කරන නමුත් ඒවායේ උප ඒකකයන් නොවේ. එනම් සතිය යනු මාසයෙන් හතරෙන් පංගුව නොවේ. එය වෙනම ඒකකයකි. එය කෙළින්ම අංක විද්‍යාව සමග බැඳේ.
- හිරු-1,4
- සඳු-2,7
- ගුරු-3
- කුජ-9
- බුධ-5
- සිකුරු-6
- සෙනසුරු-8
යනාදී වශයෙනි. මෙම එක් එක් අංකයනට හිමි ගතිගුණ රටාවක් ඇත. දැන් ඔබ ඉපදී ඇත්තේ 11/27 වනදායි සිතන්න. මෙහිදී ඔබගේ පෞද්ගලික අංකය 2+7 අංක 9 වෙයි. මෙය ඔබගේ පෞද්ගලික අංකයයි. අංක එකේ සිට 9-00 දක්වා පැමිණි පසු ඊළඟට 11, 12, 13 යනා දී වශයෙන් ගියද 11 යනු 1+1 වේ. මේ නිසා ඕනෑම අංකයක් සැබවින්ම තනි අංකයක් බවට කෙටි කළ හැකි වේ. මේ අනුව 31 වනදා උපන් අයකුගේ පෞද්ගලික අංකය 4 වේ. දැන් අපි අංක 1 සිට 9 දක්වා පුද්ගලයින්ගේ ගතිගුණ සහ චරිත ස්වභාවයන් සලකා බලමු.
- අංක 1:- නියෝජිතයා හිරුය. ඉතා ස්වාධීනයි. නිර්මාණශීලීයි. නායකත්වය ගනී. මුරණ්ඩු ස්වභාවයකින් යුක්තයි. අංක 4 සමග මිතුරු වේ.
- අංක 2:- නියෝජිතයා සඳුය. සෞම්‍යයි. කලාවට නැඹුරුයි. ජලය ප්‍රිය කරයි. පාලනය වීමට කැමතියි. සංවේදීයි. අංක 7 සමග මිතුරු වේ.
- අංක 3:- නියෝජිතයා ගුරුය. ශක්තිමත්ය. දියුණු වීමට කැමතියි. ආඩම්බරයි. ක්‍රමානුකූල ඉහළ නැගීමක් ඇත. අංක 6,9 සමග මිතුරු වේ. 4 සහ 8 සමග සතුරු වේ.
- අංක 4:- මූලද්‍රව්‍ය සහ විද්‍යාව සහ ඉලෙක්ටේ‍රානික් වල අංකයයි. ප්‍රායෝගිකයි. විශාල දරා ගැනීමේ ශක්තියක් ඇත. අංක 8 සහ 1 සමග මිතුරුයි.
- අංක 5:- සුවපහසුව සොයයි. හැඟීම්බරයි. සිතුවිලි ඉක්මන්ය. ස්නායු ආතතියට ගොදුරු වෙයි. ඔට්ටු ඇල්ලීම ප්‍රිය කරයි. ඉක්මනින් මුදල් සෙවීමේ ක්‍රම පිළිබඳව සොයා බලයි. අනිත් සෑම අංකයක්ම සමග මිතුරු වන අතර තවත් 5 හේ පුද්ගලයින් සමග ( 5,14,23) මිතුරු වේ. බුධගේ නියෝජිතයාය.
- අංක 6:- මේ හොඳින් තුලනය වුණු අංකයකි. සිකුරුගේ නියෝජිතයාය. විශ්වාස කටයුතු පුද්ගලයින්ය. අලංකාරයට කැමතියි. ආදරය ප්‍රිය කරයි. අංක 3,9 සමග මිත්‍රයි.
- අංක 7:- මෙය ගුප්ත විද්‍යාවේ අංකයයි. නියෝජිතයා නෙප්ටියුන්ය. ද්‍රව්‍යමය දේ ගැන දැඩි ඇල්මක් පිහිටන්නේ නැත. පහසුවෙන් අංක 2 පුද්ගලයින් සමග මිතුරු වේ. නමුත් අංක 2 වඩා දැඩි භාවයකින් යුක්තයි. එහෙත් දාර්ශනිකය.
- අංක 8:- මේ ඉතා සුවිශේෂී අංකයකි. මෙම අංකය හිමි තැනැත්තාට ඉතා ප්‍රබල ආත්ම ශක්තියක් අධිෂ්ඨානයක් පිහිටයි. ඔවුහු පවතින තත්ත්වයට කැමැත්තක් නැත. යම් යම් දේ අලුතින් වෙනස් කිරීමට බලයි. නියෝජිතයා සෙනසුරුය. අංක 9 හා සතුරු වන අතර 4 හා මිතුරු වේ.
- අංක 9:- මෙයද ප්‍රබල අංකයකි. සටනට අධිපති වේ. මේ අය සාර්ථක වන්නේ සටනකින් පසුවයි. අංක 8 සමග සතුරු වේ. කුජගේ නියෝජිතයාය.
ඉහත සඳහන් කළ ආකාරයට අප භාවිතා කරන අංක නමය ග්‍රහ වස්තූන් නමය අතර බෙදී ගොස් ඇත. දැන් ඔබ කළ යුත්තේ ඔබ අයත් වන්නේ කුමන ග්‍රහ වස්තුවක අංකයකට දැයි බැලීමයි. මෙම අංක විද්‍යාව තේරුම් ගැනීමේ ප්‍රතිඵල ඉතා විශාලය. විවාහය සම්බන්ධව මෙම අංක බලපාන අයුරු හැකිතාක් සරලව දැන් සලකා බලමු. විවාහක පුද්ගලයින් දෙදෙනාගේ පෞද්ගලික අංක මුලින් සොයා ගන්න. පිරිමියා 21 ඉපදී ඇති අතර කාන්තාව 27 ඉපදී ඇතැයි සිතමු. 21 යනු අංක තුන වන අතර 27 යනු අංක 9යි. දැන් ඉහත සටහන බලන්න. එහි අංක තුන යටතේ අංක 6 සහ 9 සමග මිතුරු බව සටහන් කර ඇත. දැන් අපි මෙම විවාහය යන ඉතාම සංකීර්ණ සංස්ථාවට අවධානය යොමු කරමු. එ තුළ විවිධ ගැටලු පැන නැගීම ස්වාභාවික දෙයකි. එහෙත් මෙම අංක දෙකෙන් බිහි වූ පුද්ගලයින් තුළ මූලික වෛරයක් නැත. ඒ නිසා කුමන ගැටලුවක් පැමිණියේද විසඳා ගැනීම පහසු වේ. නමුත් මෙහිදී කාන්තාව අංක නමය බව පෙනේ. එහි කුජගේ බලය අධිකයි. එම නිසා මේ දෙදෙනා අතර මතුවන ප්රශ්නයක් බොහෝ විට අංක 9 යේ කැමැත්තට ඉඩ දෙමින් අංක තුන ඊට එකඟ වේ. අපි වඩා සතුරු තත්ත්වයක් පිළිබඳ උදාහරණයක් ගෙන බලමු. 26 වන දා උපන් කාන්තාවක් සහ 27 උපන් පිරිමියෙකු විවාහ වූයේ යැයි සිතන්න. මෙහිදී කාන්තාව අංක 8 වන අතර පිරිමියා අංක 9 වේ. අංක 8 සෙනසුරු අධිපති වන අතර ඇයගේ හඳහනෙහි සෙනසුරුගේ බලය වැඩිපුර පිහිටයි. අංක 9 ඇත්තාගේ හඳහනෙහි කුජගේ බලය අධිකයි. මේ දෙදෙනා අතර විවාහය ඉතා ප්‍රවේශමින් ගෙන යා යුතු දෙයක් වේ. මක් නිසාද යත් මෙහිදී මූලික සතුරුකමක් ඇති හෙයිනි. කුජ සහ සෙනසුරු සතුරු වේ. තත්ත්වය මෙසේ හෙයින් අංක 8 සහ 9 ය විවාහ නොවිය යුතුයි. විවාහ වී සිටියද ප්‍රවේශම් නොවුණහොත් බිඳ වැටිය හැකිය. අංක 2 හිමි බොහෝ අයගේ සහකරු හෝ සහකාරිය වන්නේ අංක 7යි. එසේම අංක එක හිමි අයගේ සහකරු හෝ සහකාරිය වන්නේ අංක 4යි. අංක තුනේ ශ්‍රේණිය එනම් 3,6,9 සෑම විටම සිය මිතුරන් එම අංක වලින්ම සොයා ගන්නා ආකාරය බලන්න. එසේම අංක 4 අංක 8 සොයාගෙන යන අන්දම බලන්න. ඔබ අංක විද්‍යාවට පැමිණ බලන්න. විවාහයේ ප්‍රශ්න මතුවන්නේ ඇයිදැයි යන්නත් ඊට කළ යුතු කළ හැකි දේත් බොහොමයි. අපි කිසි විටෙකත් මෙම කරකැවෙන හෝරා යන්ත්‍රයට විරුද්ධව නොයා යුතුයි. එයට අනුගත වීමෙන් විපුල ප්‍රයෝජන ලබාගත හැකි වනවා ඇත.
වෛද්‍ය බන්දුල සිරිවර්ධන
උපුටා ගැනීම ලක්බිම
