🛍️   Business Directory
📣   Classifields
🛍️   Business Directory
📣   Classifields

ගජකේශරී යෝගය හිමි අය ඇතුන් මැද සිටින සිංහයෙක් වගේ

ගජකේශරී යෝගය හිමි අය ඇතුන් මැද සිටින සිංහයෙක් වගේ 

අපි හැමෝටම කේන්ද්‍ර සටහනක් තිබුණාට ඒ අතරින් සමහර අයගේ කේන්ද්‍ර වඩාත් බලවත් වෙනවා. බලවත් කේන්ද්‍රයක් තිබෙන අය අනෙක් අයට වඩා ඉහළට යන බව පැහැදිලිව පෙනෙන සත්‍යයක්. කේන්ද්‍රයක් බලවත් වන්නේ කොහොමද? ග්‍රහයන් බලවත්ව පිහිටලා හොඳ යෝග නිර්මාණය වී තිබෙන කේන්ද්‍ර බලවත්. ඔබගේ ජන්ම පත්‍රයේ සඳු හා ගුරු බලවත්ව සඳුගෙන් ගුරු කේන්ද්‍ර ගතව සිටීම ගජකේශරී යෝගයයි. මෙම යෝගය ඔබට තිබෙනවා නම් ඔබත් ඇතුන් මැද සිංහයකු වගේ යම් යම් කැපී පෙනෙන ලක්‍ෂණ සහිතව ජීවත් වෙනවා. සඳු (චන්ද්‍රයා) සිතුවිලිවලට අධිපති ග්‍රහයා බවත් මාතෘ කාරක ග්‍රහයා බවත් අපි දන්නවා. ගුරු ග්‍රහයා (බ්‍රහස්පති) ජේ‍යාතිෂයේදී සුරගුරු කියලා හඳුන්වන්නේ දෙවියන් අතර දෙවියෙක් යන අර්ථය ඇතිවයි. ගුරු ධනයට අධිපතියා ලෙසද පුත්‍රකාරකයා ලෙසද, චරිතයේ පිරිසුදුකමට, ප්‍රසිද්ධියට මවුපිය ගුරුවරුන්ට දක්වන ගෞරවයට, නිරෝගී බවට, කලබල නොවන ගතියට, දුකට පත් අයට පිහිට වීමට, සෞම්‍ය ගතියට අධිපතියා ලෙසද හඳුන්වනවා.

කේන්ද්‍ර පිටපතක් කොටු 12කින් සමන්විත අතර එයින් 1, 4, 7, 10 යන ස්ථාන හඳුන්වන්නේ කේන්ද්‍රස්ථානය හැටියට මේ නිසා එක ග්‍රහයෙක් සිටිනා තැනින් වම් පැත්තට ගණිනා විට 1, 4, 7, 10 යන ස්ථාන එම ග්‍රහයන්ගෙන් කේන්ද්‍ර ගත වෙනවා කියලා කියනවා. ඔබගේ ජන්ම කේන්ද්‍රයේ චන්ද්‍රයා සිටින ස්ථානයට අංක 1 කියලා වම් පැත්තට ගැන ගෙන යන විට ගුරු ග්‍රහයා සිටින්නේ ඉහත අංක 1, 4, 7, 10 ස්ථානවලින් එකක නම් ඔබටත් ගජකේශරී යෝගය තිබෙන බව වටහා ගන්න. ගජ ඇතා යන අර්ථයද, කේශරී සිංහයා යන අර්ථයද ඇතිව නිර්මාණය වූ ගජකේශරී යෝගය යන නම ඇසූ පමණින්ම අප තුළ ඇතිවන්නේ කිසියම් අභිමානයක්. ජේ‍යාතිෂ මූලාශ්‍රවල ඉතාමත් ඉහළින් වර්ණනා කර තිබෙන යෝගයක් තමයි මේ ගජකේශරී යෝගය. මෙම යෝගය ක්‍රම හතරකට පිහිටන්න පුළුවන්. යෝගය බලවත් වීමට නම් සඳු සහ ගුරු යන ග්‍රහයන් කේන්ද්‍රයේ බලවත්ව රාශියක් තුළ සිටිනා ආකාරය අනුව උච්ච, මූලත්‍රිකෝණ, ස්වක්‍ෂේත්‍ර වැනි පිහිටීමක සිටීම වැදගත් වෙනවා. ඒ වගේම පාප ග්‍රහයන්ට මැදි නොවී පාප ග්‍රහයන්ගේ දෘෂ්ටියට ලක් නොවී සිටීමත් වැදගත්. සඳු හා ගුරු කිසියම් සුබ භාවයක අධිපතිකමක් දරනවා නම් එයද මෙම යෝගය බලවත් වීමට හේතු වෙනවා.

1. සඳුගෙන් හත්වැන්නේ ගුරු ග්‍රහයා පිහිටීමෙන් ඇතිවන යෝගය වඩාත්ම බලවත් බවයි සඳහන් වන්නේ. මෙහිදී සඳු හා ගුරු දෙදෙනාම බලවත් නම් රාජ යෝගයක් යැයි කියා තිබෙනවා. සිරිමාවෝ බණ්ඩාරනායක අග්‍රාමාත්‍යතුමියගේ කන්‍යා ලග්න කේන්ද්‍රයේ සඳු පළමුවැන්නේද ගුරු හත් වැන්නේද පිහිටා තිබුණා.

2. දෙවනුව සඳුගෙන් දහවැන්නේ ගුරුගේ පිහිටීම බලවත් බව සඳහන්. ආර්. ප්‍රේමදාස ජනාධිපතිතුමාගේ මේෂ ලග්න කේන්ද්‍රයේ ගුරු පිහිටා තිබුණේ සඳුගෙන් දස වැන්නේ.

3. සඳු සමඟම ගුරු පිහිටීමෙන් නිර්මාණය වන යෝගයේ බලය තරමක් අඩු බව සඳහන් වෙනවා. ගජමන් නෝනාගේ කටක ලග්න කේන්ද්‍රයේ සඳු සහ ගුරු පස්වැන්නේ පිහිටා තිබුණා.

4. සඳුගෙන් හතරවැන්නේ ගුරු පිහිටීමෙන් නිර්මාණය වන යෝගයට ලැබෙන ස්ථානය ඉහත ක්‍රම තුන තරම්ම බලවත් නැති බව සඳහන් වෙනවා. ගජකේශරී යෝගය මොන ආකාරයට පිහිටා තිබුණත් ඒ අය පැහැදිලි බුද්ධියකින් යුතු අයයි. ඔවුන් බොහෝ විට ත්‍යාගවන්තව ඉතාමත් ගෞරවනීය ජීවිත ගත කරන බව පෙනෙනවා. ධනවත්කම සහ අධ්‍යාපනය අතින්ද ඉහළට යන මේ අය සාහිත්‍ය කලා ආදී ශාස්ත්‍ර ගැන සහජ හැකියාවක් ඇති අය කියලත් කියන්න පුළුවන්. මෙම යෝගය තිබෙන අය බොහෝ විට දේශපාලන කටයුතුවල නියැළී සිටින බවද ඔවුන් ගම් නගර සංවර්ධනය සඳහා මහත් පරිශ්‍රමයක් දරන බවද දැකගත හැකිය. අද සමාජයේ ජීවත් වන අය අතරින් තරමක් හෝ බලවත්, ධනවත්, ප්‍රසිද්ධ අයගේ ජන්ම පත්‍ර පරීක්‍ෂා කිරීමෙන් පැහැදිලිව පෙනෙන කරුණක් තමයි ඔවුන්ට ගජකේශරී යෝගය හිමිව තිබීම. ඔබටත් මෙවැනි යෝග තිබෙන්නට පුළුවන්. ඒ නිසා මම අර මුලින් කී විදියට ඔබේ කේන්ද්‍රය අරගෙන ඒ පිළිබඳව සෝදිසි කරන්න.

ජේ‍යාතිෂවේදී අගලවත්තේ චන්දන වීරක්කොඩි 077-5489695

උපුටා ගැනීම මව්බම පුවත්පත