දේශපාලනයේ මහ මොළකරුවන් විය හැකි මිථුන ලග්න හිමියෝ
මෙලොව උපදින ඕනෑම කෙනකුට පළමුවෙන්ම හිමිවන්නේ ලග්නයයි. ඔහුට හෝ ඇයට නමක් පවා හිමි වන්නේ ලග්නය ලැබීමෙන් පසුයි. කෙනකු උපදින මොහොතේ නැඟෙනහිර ක්‍ෂිතිජයෙන් උදාවෙමින් පැවැති ලග්නය ඔහුගේ හෝ ඇයගේ ලග්නය වන බව ජේ‍යාතිෂයේ සඳහන්ය.
ජන්මියකුගේ හැඩරුව, ගතිගුණ, චරිතය, දක්‍ෂතා, ලෙඩ දුක් ආදී ජීවිතයේ සියලු දේවල් සිදු වන්නේ ලග්නය අනුවය. ඔබ උපන් ලග්නය අනුව ඔබේ ජීවන තොරතුරු ඉදිරිපත් කරන ලිපි පෙළේ තෙවැන්න වන මෙයින් මිථුන ලග්න හිමියන් ගැන විග්‍රහ කෙරේ.
ශරීර ලක්‍ෂණ :
මිථුන ලග්න හිමියන්ගේ ශරීර ස්වභාවය වන්නේ තරමක් දික්වූ අත්පා හිමි වඩා උස හොඳින් වැඩුණු ශරීරයකට හිමිකම් කීමයි. තරමක් බෙල්ල සිහින් වූ පළල් නළලක් හිමි පැතලි වූ නිකටක් මෙම ලග්න හිමි අය තුළ පෙනෙන්නට තිබේ. සිහින් දිගටි නහයක් හා තඹවන් වූ ඇස්ද හිමි මෙම ජන්මීන් තරමක රූපශි්‍රයකින් හෙබි මධ්‍යම ප්‍රමාණයේ ශරීරයකින් යුතු අයයි. කිසියම් ලතාවකට ගමන් කරන පැහැදිලි ලෙස වචන කතා කරන තලෙළු ශරීරයක් මිථුන ලග්න හිමියන්ට හිමිය.
ගතිගුණ :
බුධ ග්‍රහයා අධිපතිව සිටින හෙයින් හොඳ වාග් ශක්තියක් ඇත. කරුණාබරිත හදවතක් හිමිය. ජීවිතය පිළිබඳ හොඳ අවබෝධයක් ඇති අය වේ. සෑම දෙයක්ම දන්නා ලෙස කතාවේ දක්‍ෂතා පෙන්වයි. මොවුන් යමක් කරන්නේ හොඳින් සිතා මතා කිසියම් සැලැස්මකට අනුවය. මිථුන ලග්න හිමියන් බොහෝ විට පැහැදිලි වචනයෙන් කතා කිරීමේ දක්‍ෂතා දක්වයි. අදහස් නිතර නිතර වෙනස් කරන බැවින් යමක් පටන් ගත්තද ඒ ආකාරයෙන් එම ක්‍රියාව අවසන් නොකරයි. සංචාරයට වඩා කැමැති මිත්‍රශීලී ගති ඇති මිථුන ලග්න හිමියා ඕනෑම වැඩකට පුරුදු අයකු සේ නොපැකිළව ඉදිරිපත් වන අයෙකි.
මොවුන් නිදහස් මතධාරීන්ය. කිසිවකුට යටත් වීමට කැමැති නැත. නිතරම තැත් කරන්නේ විශාල දේවල් ඇරැඹීමටය. කල්පනාකාරීව කටයුතු කරන වෙනස්වීම්වලට ආශා ඇති නොසැලකිලි ලෙස ක්‍රියා කරන වෙනස් කරන ප්‍රතිපත්ති ඇති අය මිථුන ලග්නයෙන් බොහෝ විට ඉපදෙයි. මොවුන් ප්‍රයෝගකාරී, කපටි ගති ඇති ආත්මාර්ථකාමී අය වේ. අනුන්ට අපහාස වන දේ කිරීමට කැමැති රාගාධික අය මිථුන ලග්නයෙන් උපදියි.
ආදරය හා ලිංගිකත්වය :
මෙම ලග්නයේ අය ආදර සම්බන්ධකම් වැඩිපුර ඇති කර ගැනීමෙන් කරදරවල පැටලේ. දුරදිග නොබලා සබදතාවලට මුලපුරයි. ආදරය ඉදිරියේ අන් අය වසඟයට ගැනීමේ හැකියාව මෙම ජන්මීන් තුළ උපතින්ම පිහිටයි. විවාහය පිළිබඳව නීත්‍යනුකූල භාවය පිළිබඳ එතරම් තැකීමක්ද අපේක්‍ෂා නොකරන මොවුන් තරමක් රාගාධික අය වෙති. මිථුන ලග්න හිමියන් නිතරම ලිංගික ජීවිතයේ උපරිම සැප සතුට පතන්නෝය.
විවාහය :
මිථුන ලග්නයෙන් උපන් අයට සැප්තැම්බර් 22 ඔක්තෝබර් 22 අතර හෝ ජනවාරි 20 පෙබරවාරි 20 අතර උපන් අයකු විවාහයට වඩා යෝග්‍ය වනු ඇත. බුධ අධිපති බැවින් බුද්ධිමත් ලෙස කටයුතු කළ විට විවාහය සාර්ථක අන්දමින් පවත්වාගෙන යා හැකිවේ.
රැකියාව :
මිථුන ලග්නයෙන් උපන් ජන්මියාට ලිපිකරු තනතුරක් ලැබීම හෝ ගුරුවරයකු වීමට වාසනා මහිමය ඇත. ව්‍යාපාර ඇරැඹීම, පොත්පත් ලිවීම වැනි රැකියාද යෝග්‍ය වේ. නීතිඥ වෘත්තිය, තැපැල් සේවාව ඉන්ජිනේරු යන තනතුරුවලද බොහෝ මිථුන ලග්න හිමියන් නිරත වේ.
ඡායාරූප ශිල්පය, කඩදාසි ලිපි ද්‍රව්‍ය ආශ්‍රිත රැකියා තුළින් ලාබ ඉපයිය හැකිය. මොවුන්ට බොහෝ විට ගැළපෙන්නේ තමන්ගේම ව්‍යාපාර කටයුත්තකි. ජනමාධ්‍ය කලාවද මිථුන ලග්නයට හිමිය. එසේම මිථුන ලග්න හිමියාට දුරදිග පෙනීමක්, උපක්‍රමශීලී භාවයත් හිමිවීමෙන් ඔවුන් දේශපාලනයට ඉතා සුදුස්සන්ය.
ධනය හා වස්තුව :
මෙම ලග්න හිමියන්ට ස්ථිර ධනයක් හිමි නොවන අතර ධනය ලබා සැප විඳීමට නොලැබේ. ධනය තිබුණොත් අනිසි සැප විඳීමට යෑම නිසා ධන හානි ඇති කර ගනී. ස්ත්‍රීන් නිසා ධනය පිරිහෙන අතර මුදලේ අගය නොදැනීම නිසා ලැබුණු දෙයක්වත් රැස් කර ගැනීමේ අගය වටහා නොගනී. ඔවුන් මුදල්වලට වැඩි ආශාවක් නොදක්වන නමුත් මිථුන ලග්න ජන්මීන්ට බොහෝ විට විශාල දේපළ, ධනය හිමිවන බව පෙනේ. කිසි විටෙක අයථා ලෙස මුදල් හරි හම්බ කිරීමට සූදානම් නොවේ.
සෑදෙන රෝග :
නහර ආශ්‍රිත අසනීප, අත්පා රෝග, උමතුතාව, පෙණහලු ආශ්‍රිත රෝග, මුත්‍රාශයේ හා වකුගඩු ආශ්‍රිත ආසාදන හා ගුදය ආශ්‍රිත අර්ශස්, භගන්දරා රෝගද ඇති කරනු ලබයි. බොහෝ විට සිත් තැවුලෙන් කල්ගත කිරීමට සිදුවීමෙන් මානසිකත්වයද දුර්වල වන අවස්ථා ඇත.
මරණය :
සර්ප භය, වස විස කැවීම්, මාර්ග අනතුරු හෝ ජලයෙන් ඇති විය හැකි පීඩා, සතුන්ගෙන් හානිද තුළින් මෙම ජන්මීන්ට මරණය අත්වේ. ජල මාරක, අනතුරු සිදුවන නිසා විශේෂයෙන් වතුරෙන් ප්‍රවේශම් වීම සුදුසුය.
ජය අංක හා සුබ දවස් :
සඳුදා, බදාදා, බ්‍රහස්පතින්දා, සිකුරාදා යන දිනයන් මිථුන ලග්න හිමියන්ට සුබ පල උදා කරන අතර ජය අංක වන්නේ 3, 5 යන අංකය. සෙනසුරාදා හා අඟහරුවාදා කරන කියන වැඩ කටයුතුවල සාර්ථක භාවය අඩුවේ.
දුර්වලතා :
හදිසි වැඩකටයුතු තිබියදී ඒවා නොසලකා විවේකීව සිටීම මෙම අයගේ දියුණුවට බාධා ගෙනදෙන අතර බොහෝ විට තම සිතට වහල් වී කටයුතු කිරීමෙන් ගැටලු ඇතිකර ගනී. අදහස් නිතර වෙනස් කිරීම හා වැඩ අවසන් නොකර අතරමඟ නතර කිරීම් මෙම ලග්න හිමියන්ගේ දුර්වලතා අතර කැපී පෙනේ.
ජය වර්ණය හා මැණික් :
කොළ පාට සහ කහ පාට මෙම ජන්මීන්ට සුබඵල ගෙන දෙන අතර නිල් හා රතු පාට අසුබ ඵල ගෙන එයි. මිථුන ලග්න හිමියන්ට සුබ මැණික් වන්නේ පච්ච ගල්ය. එම ගලක් ඇල්ලූ රන් මුදුවක් පැලඳීම සුබවේ.
මිථුන ලග්න හිමියකුගේ කේන්දරේ :
මිථුන ලග්න හිමියන් පිළිබඳව අප මෙතෙක් ඉදිරිපත් කළ තොරතුරු කොතෙක් දුරට නිවැරැදි දැයි මිථුන ලග්නයෙන් උපන් ශ්‍රී ලංකාවේ ප්‍රථම අගමැතිවරයා වූ ඩී.එස්. සේනානායක මැතිතුමාගේ ජන්ම කේන්ද්‍රය පරීක්‍ෂා කිරීමෙන් වටහාගත හැකිය. ඩී.එස්. සේනානායක මැතිතුමාගේ මිථුන ලග්න ජන්ම කේන්ද්‍රය මේ සමඟ පළවේ.
මිථුන ලග්නය :
ඩී.එස්. සේනානායක මහතා උපන්නේ 1884 ඔක්තෝබර් මස 20 වැනි සඳුදාය. මිථුන ලග්න හිමියන්ට හිමිවන්නා වූ මධ්‍යම ප්‍රමාණයේ සිරුරකින් යුතු ඩී.එස්. සේනානායක මැතිතුමාට හිමිවූ පළල් නළල් තලය එතුමාගේ බුද්ධිමත් භාවය විදහා පෙන්වීමට සමත් විය. ඩී.එස්. සේනානායක මහතාට පැවැතියේ කරුණාව, මෛත්‍රිය, දයාව, රජ කළ සිතිවිලිය. එවැනි කරුණාබරිත හදවතක් මිථුන ලග්න හිමියා සතුය. මිථුන ලග්න හිමියන්ට දේශපාලනයේ නිරත වීමේ වරප්‍රසාද හිමි වන අතර ඔවුන් අනුන්ට යටත් වීමට කැමැති නැත. ඩී.එස්. සේනානායක මහතා මිථුන ලග්නයට හිමි කරුණාව හදවතේ දරාගත් මිනිසකු වුවද කාටවත් යටත් නොවන සිංහයකු වැනි ඍජු යුග පුරුෂයෙකි. ඩී.එස්. සේනානායක මැතිතුමාට විශාල ලෙස ධනය සහ දේපළ හිමිව තිබිණි. එතුමා කිසි විටෙක තම ධනය ගැන ලෝභකමක් නොදැක්වූයේ මිථුන ලග්න හිමියන්ගේ ආවේණික ගුණයක් ලෙසය.
මිථුන ලග්න හිමියා සැම විටම තැත් කරන්නේ ලොකු වැඩ පටන් ගැනීමටය. සේනානායක මැතිතුමා ආරම්භ කළ ගොවි ජනපද ව්‍යාපාරය නිදහස් ශ්‍රී ලංකාවේ පළමු වරටම ආරම්භ කළ විශාලතම ව්‍යාපෘතියක් විය. ඩී.එස්. සේනානායක මැතිතුමාගේ ජීවිතය හා ගතිගුණ හුදෙක්ම මිථුන ලග්න හිමියකුට ආවේණික වූ ගතිලක්‍ෂණවලින් පිරිපුන් විය.
නියෝජ්‍ය විදුහල්පති
එම්. උපුල් ජය ශ්‍රී ද සිල්වා
කොස්ගොඩ
0777 108 343
උපුටා ගැනීම මව්බිම පුවත්පත
