කේන්දරය හෝ අත හෝ නොබලා කෙනකුගේ උපන් දිනයෙන් ද පලාපල කිව හැකිය
කේන්දරය බලන්නේවත්, අත බලන්නේවත් නැතිව, කෙනකුගේ උපන් දිනය අනුවද, ඔහුගේ හෝ ඇයගේ පලාපල කිව හැකිය. මේෂ, වෘෂභ, මිථුන, කටක, සිංහ, කන්‍යා, තුලා, වෘශ්චික, ධනු, මකර, කුම්භ හා මීන යන ලග්න දොළහෙන් එකක්‌ මෙන්ම, උපන් වේලාවේ හිරු, සඳු, කුජ, බුධ ආදී ග්‍රහයන් පිහිටි ස්‌ථාන, නැකත් ආදියද කේන්දරයකට ඇතුළත්ය. අතක නම්, ජීවන හෘදය, ශීර්ෂ, ධන, දෛව ආදී රේඛාවන්ය. රාශි චක්‍රයටද, මේෂ, වෘෂභ, මිථුන ආදී රාශි දොළස ඇතුළත් වන අතර රාශි චක්‍රය සොයා ගන්නා ලද්දේ මීට වසර දහස්‌ ගණනකට පෙරාතුව තාරකා ශාස්‌ත්‍රඥයන් විසිනි. රාශි චක්‍රය, පෘථිවියට සැතපුම් ලක්‍ෂ ගණනකට එපිටින්, අභ්‍යවකාශයේ භ්‍රමනය වන හිරු, සඳු, කුජ, ආදී ග්‍රහයන්ට සම්බන්ධ චක්‍රයකි.
ග්‍රහ මණ්‌ඩලයේ ප්‍රධාන ග්‍රහයා හැටියට සැලකෙන, සූර්යයා පිහිටියේ, පෘථිවියට සැතපුම් 9,93,00,000 කට එපිටිනි. සූර්යයාගේ විෂ්කම්භය සැතපුම් 8,64,000 කි. පෘථිවිය මෙන් 3,30,000 ක්‌ තරමට විශාලය. රාශි චක්‍රයේ කිසියම් කොටසක සූර්යයා ස්‌ථානගතව සිටින විටක, අදාළ කිසියම් රාශියක බලපෑමට ලක්‌වන ජීව, අජීව සියලුම වස්‌තූන්, සූර්යයාගේ බලපෑමට ලක්‌වීම, ස්‌වභාවයෙන්ම සිදුවන්නකි. එහි ප්‍රතිඵල වශයෙන්, ශුභා ශුභ ප්‍රතිඵල අත්විය හැකිය. රාශි චක්‍රයේ ඒ ඒ ග්‍රහයන්ට අදාළ මාස ආරම්භ වන්නේ කැලැන්ඩරයේ ජනවාරි, පෙබරවාරි ආදී මාසවල මෙන් 1 වැනිදා සිට නොව, ඒ ඒ මාසයන්හි 19 වැනිදාත්, 23 වැනිදාත් අතරතුරය. ඒ අනුව, රාශි චක්‍රයට අදාළ වසරේ මුලින්ම ඇරඹෙන මාසය, මාකර රාශියට අදාළ මාසයයි. එය දෙසැම්බර් 22 වැනිදා ආරම්භව, ගෙවී යන්නේ, ජනවාරි 20 වැනිදාය. කුම්භ, මීන, මේෂ, වෘෂභ, මිථුන, කටක, සිංහ, කන්‍යා, තුලා, වෘශ්චික හා ධනු යන සෙසු රාශීන්වලට අයත්වන කාල වකවානු පහත සඳහන්ය.
- කුම්භ – ජනවාරි 21 – පෙබරවාරි 19
- මීන – පෙබරවාරි 20 – මාර්තු 20
- මේෂ – මාර්තු 21 – අප්‍රේල් 19
- වෘෂභ – අප්‍රේල් 20 – මැයි 20
- මිථුන – මැයි 21 – ජුනි 21
- කටක – ජුනි 22 – ජූලි 22
- සිංහ – ජූලි 23 – අගෝස්‌තු 22
- කන්‍යා – අගෝස්‌තු 23 – සැප්තැම්බර් 23
- තුලා – සැප්තැම්බර් 24 – ඔක්‌තෝබර් 23
- වෘශ්චික – ඔක්‌තෝබර් 24 – නොවැම්බර් 22
- ධනු – නොවැම්බර් 23 – දෙසැම්බර් 21
ජ්‍යෙතිෂයේ දැක්‌වෙන අන්දමට, ඒ ඒ රාශීන්ගේ ලක්ෂණ හා පාලන ග්‍රහයන් ද මෙසේය.
- මකර – මත්ස්‍යයකුගේ වලිගය සහිත මකරෙකි. පාලන ග්‍රහයා ශනිය.
- කුම්භ – කළගෙඩියකින් මසුනට දිය වත්කරන පිරිමියෙකි. ග්‍රහයා යුරේනස්‌ය.
- මීන – මත්ස්‍යයන් දෙදෙනෙකි. ග්‍රහයා ගුරුය.
- මේෂ – අං දෙකක්‌ සහිත එළුවෙකි. ග්‍රහයා කුජය.
- වෘෂභ – ජව සම්පන්න වෘෂභයෙකි. ග්‍රහයා සිකුරුය.
- මිථුන – නිවුන් දරුවන් දෙදෙනෙකි. ග්‍රහයා බුදය.
- කටක – කකුළුවෙකි. ග්‍රහයා චන්ද්‍රයාය.
- සිංහ – ජව සම්පන්න සිංහයෙකි. ග්‍රහයා සූර්යයාය.
- කන්‍යා – කන්‍යාවකි. ග්‍රහයා බුදය.
- තුලා – තරාදි කුට්‌ටමකි. ග්‍රහයා කිවිය.
- වෘශ්චික – ගෝනුස්‌සෙකි. ග්‍රහයා කුජය.
- ධනු – හිස ඇතුළු ඉහළ කොටස, මිනිස්‌ සිරුරකින්ද, පසුපස කොටස අශ්ව රූපයකින් ද සමන්විත ධනුර්ධරයෙකි. ග්‍රහයා ගුරුය.
රාශි චක්‍රයේ මේෂ, වෘෂභ ආදී රාශීන්ගේ ලක්ෂණ ඉහත සඳහන් ආකාරයටයි පිළිගැනෙන්නේ ඒ රූප ආකාරයට ඒ ඒ රාශීන්ගේ තරු පිහිටා ඇති හෙයිනි. ග්‍රහලෝකාගාරය වැනි තැනකට ගොස්‌ නිරීක්‍ෂණය කර බැලුවහොත් ඔබටද ඒ වග තේරුම් ගත හැකිය. උපන් දිනයට අනුකූලව, කෙනකු පිළිබඳ කරුණු ගොන්නක්‌ හෙළි කළ හැකිය. ඔහුගේ හෝ ඇයගේ හෝ ස්‌වභාවය හා ගති පැවතුම් ජීවිතය හා සෞඛ්‍ය තත්ත්වය, උසස්‌ මට්‌ටමකට ළඟාවීම සඳහා ගැලපෙන වෘත්තීය. ඒ ඒ අයට සෑම වසරකදීම එළැඹෙන සුභාසුභ කාලවකවානු, ප්‍රේම සම්බන්ධ හෙවත්, ගැලපෙන සහකරුවකු හෝ සහකාරියක හෝ තෝරා ගත හැකි ක්‍රමය හා විවාහ ජීවිතය ඒ ඒ අයගේ වාසනාවන්ත දිනය ශුභදායක වර්ණය, ලෝහ වර්ගය හා මැණික්‌ වර්ගය, ඒ ඒ අයගේ විනෝදාත්මක කටයුතු හා ඔවුන් කැමැත්ත දක්‌වන කෙළි සෙල්ලම් යනාදිය එම කරුණුය.
උපුටා ගැනීම දිවයින
