This site has features that require javascript. Follow these simple instructions to enable JavaScript in your web browser.
Sithmal Yaya
බලු කපුටු දානය නසයි සෙනසුරු දොසය
වින රැඳි ග්‍රහ අපල ලෝදන හද රිදවා පින මද බැවින් පව්කම් ලොව පලදෙනවා දෙන බලු කපුටු දානය මත බල හිඳුවා සෙනුසරු අපල සත්තයි දුරුවී යනවා සෙනසුරු යන නම ඇසූ පමණින් බොහෝ ජන්මීන් අධික ලෙස බියට පත්වේ. එයට හේතුව නම් ග්‍රහලොව සිටින නපුරුම ග්‍රහයා සෙනසුරු වන බැවිනි. මෙකී නපුරු ස්‌වභාවය නිසාම ග්‍රහයන් නව දෙනා අතරින් වැඩිපුර කතාබහට ලක්‌වන සෙනසුරු හැමවිටම අයහපත් ප්‍රතිඵල ගෙනදෙන ග්‍රහයකු නොවේ. යමෙකුගේ ජන්ම පත්‍රය යහපත් තැනක ශනි තැන්පත් වුවහොත් එකී පුද්ගලයාට යහපත් ප්‍රතිඵලම උදාකරනු ඇත. ඒ අනුව සෙනසුරු, මකර, කුම්භ, තුලා යන රාශියක උප්පත්තියේදී සතර කේන්ද්‍රය තුළ පිහිටියේ නම් එවැනි ජන්මීන්ට සෙනසුරු ග්‍රහයා ඉතා සුබඵල ලබාදෙන අතර වෘෂභ, තුලා ලග්න හිමියන්ට සෙනසුරු සුබවාදී ග්‍රහයෙකි. ග්‍රහයන් අතුරින් එකම රාශියක වැඩිම කාලයක්‌ ගතකරන ග්‍රහයාද සෙනසුරු වන අතර එම කාලය දළ වශයෙන් වසර 2 1/2 ක්‌ පමණ වේ. මෙලෙස ගත කරන කාලය තුළදී අදාල ජන්මියාගේ පෙර අකුසල් සැලකිල්ලට ගෙන ඊට දඬුවම් ලෙස නියම කරන්නාවූ අපලකාරී තත්ත්වයක්‌ නිසි ආකාරයෙන් ලබාදීමට සෙනසුරු ග්‍රහයා කිසි කලෙක පසුබට නොවනු ඇත. දඬුවම් දීමේදී සාධාරණ කමක්‌ තිබිය යුතු නමුත් සෙනසුරුගෙන් එවැනි සාධාරණයක්‌ කිසි විටෙක සිදු නොවේ. ජ්‍යොතිෂ්‍යයට අනුව සෙනසුරුගේ ඒරාෂ්ඨක වර්ග හතරක්‌ ලෙස දැක්‌විය හැකිය. එනම් සෙනසුරු ග්‍රහයා ලග්නය මතින් ගමන් කරන විටදී ලග්න ඒරාෂ්ඨක අපලයද අටවැනි භාවය මතින් ගමන් කරන විටදී ලග්න අෂ්ඨක ඒරාෂ්ඨක අපලයද චන්ද්‍රයා උපතින් රැඳී සිටි රාශිය තුළ ගමන් කරන විට ජන්ම ඒරාෂ්ඨක අපලයද චන්ද්‍රයා උපතේදී රැඳී සිටි රාශියේ සිට අටවැනි රාශි තුළ ගමන් කරන කාලයේදී ජන්ම අෂ්ඨම ඒරාෂ්ඨක අපලයද යනුවෙනි. මෙලොව ජන්ම ලාභය ලබන ඕනෑම ජන්මියකු වසර තිහක කාලක්‌ ආයු වළඳන්නේ නම් එම තිස්‌වසරක කාලය තුළ හතර වතාවක්‌ද වසර හැටක කාලයක්‌ ආයු වළඳන්නේ නම් අට වාරයක්‌ද වසර අනූවක්‌ ආයුව ළඳන්නේ නම් දොළොස්‌ වාරයක්‌ද ඉන් එහාට ආයුවළඳන්නේ නම් දහසය වාරයක්‌ද ඉහත කී අපල තත්ත්වයන්ට මුහුණදීමට සිදුවීම නොවැළැක්‌විය හැකි දුක්‌ත තත්ත්වයකි. අපට වර්ෂාව නවතාලිය නොහැකි වුවද කුඩයක ආධාරයෙන් අප ශරීරය මතට ඇදහැලෙන වැසි ජලය විශාල ප්‍රමාණයකින් ආවරණය වී ගමන් කළ හැකි අන්දමට සෙනසුරු ග්‍රහයා අපල කරන කාලවකවානු තුළදී ඉන් බේරී සුපුරුදු පරිදි දිවිගෙවීම සඳහා පිළියම් රාශියක්‌ ජ්‍යෙතිෂ්‍යයේ සඳහන් වේ. ප්‍රධාන වශයෙන් ශනි ග්‍රහයාගෙන් එල්ලවන දොaෂ දුරුකර ගැනීමට නම් ශනි සතුටට පත්කරමින් පවින් වැළකී කුසල් වැඩෙන ක්‍රියාවන්හි නිරත විය යුතුය. මෙකී කාරණා දෙකම එකවර ඉටුවන විශේෂිතම ශාන්තිකර්මයක්‌ ලෙස බලු කපුටු දානය සඳහන් කළ හැකිය. ශනිගේ හුදකලා බව නසමින් නිරතුරුව ශනි ළඟ රැඳෙන ශනිගේ අවතාරය නමින්ද හඳුන්වන කපුටාට සලකන අයට සෙනසුරු ග්‍රහයාගේ ආශිර්වාදය නොඅඩුව හිමිවන්නේය. සෙනසුරුගේ වාහනය ලෙසද හැඳින්වෙන කපුටා යනු හැමවිටම සාගින්නෙන් පෙළෙන සත්ත්වයෙකි. කෙතරම් ආහාර ගත්තද එම ගින්න නොනිමෙයි. එබැවින් කපුටාගේ කුසගින්න නිවීම සෙනුසරුගේ අපල පීඩාවන් ගෙන් මිදීමට සිදුකළ හැකි ඉතා උසස්‌ කුසල කර්මයකි. අපල වලින් මිදීමට ඉතා පහසුවෙන් සිදුකළ හැකි බලු කපුටු දාන නිසි පිළිවෙළට සකස්‌ නොකර දීමෙන් නැති අපලද එක්‌කරගෙන අනවශ්‍ය පීඩා විඳීම වෙනුවට ඒ පිළිබඳව දැනුවත්ම එම කටයුතු සිදුකර තම බලාපොරොත්තු ඉටුකර ගැනීමට ජන්මීන් දැනුවත් විය යුතු කරුණු රාශියක්‌ මෙසේ දැක්‌විය හැකිය. ඔබ විසින් පිළියෙල කරන මෙම දානය දෙන්නේ සතෙකුට වුවත් එය ඉතා පිරිසිදුවෙන් පිළියෙල කිරීම අත්‍යවශ්‍යම කරුණකි. මේක දෙන්නේ කාක්‌කන්ටනෙ බල්ලන්ටනෙ කියා සහල් සහ අනෙකුත් ද්‍රව්‍ය නිසිලෙස පිරිසිදු නොකර සකස්‌ කර දෙන දානයෙන් ඔබට කුසල් නොලැබෙන බව මතක තබා ගන්න. පිරිසිදු ජලයෙන් නියමිත වාරගණනින් සහල් සෝදා නොයිඳුල්ව ගාගත් පොල් මිරිකා ලබාගත් කිරි දමා අවශ්‍ය ප්‍රමාණයට ලුණු එක්‌කර නැවුම් මුට්‌ටියක බස්‌නාහිර දිශාවේ ලිප් බැඳ සකස්‌ කර ගන්නා කිරිබත ලිපේ තිබියදීම පිරිසිදු කරගත් තල ඇට ස්‌වල්පයක්‌ හා එළඟිතෙල් මිශ්‍රකර ගුලි සාදා සෙනසුරාදා දිනවල ශනි හෝරාවෙන් එනම් උදේ 6.00 - 7.00 අතර කාලයේදී නුගකොළ මත තබා බස්‌නාහිර දිශාවේ උස්‌ ස්‌ථානයක තබා කපුටන්ට කෑමට සලස්‌වා හැමවිටම කුසගින්නෙන් පෙළෙන සෙනසුරු ග්‍රහදේවතාවන්ගේ වාහන වන්නාවූ කපුටාගේ කුසගින්න නිවීමට මෙය දානයක්‌ම වේවා · එකී දානය දීම තුළින් හටගන්නා කුසලකර්මයෙන් මාවෙත පැමිණ ඇත්තාවූ සෙනසුරු ග්‍රහදොස්‌ දුරුවේවා යනුවෙන් ප්‍රාර්ථනා කරන්න. මෙහිදී කපුටාගේ කුසේ ඇති ගින්න නිවීමට යෑයි සිතා එළඟිතෙල් පෙඟවූ පහන්තිර බත්ගුලි අතර තබා කෑමට සැලැස්‌වීමෙන් වළකින්න. පහන්තිර යනු ආහාරයක්‌ නොවන බව සිහිතබා ගත යුතුම කාරණයක්‌ වන අතර ඒ තුළින් කපුටා හිංසනයට පත්වීමෙන් ඔබ වෙත නැති අපල පැමිණීමට එය හේතුවක්‌ වනු ඇත. බල්ලන් සඳහා දෙන දානයද ඉතා පිරිසිදු ලෙස බස්‌නාහිර දිශාවේ ලිප් බැඳ සහල් සෝදා ගරා නොඉඳුල්ව ගාගත් පොල්වලින් කිරි මිරිකා දමා පිරිසිදු කරගත් කරවල කටුද එක්‌කර එම බතටම තුනපහ කුඩු සහ එළිඟිතෙල් මිශ්‍රකර පදමට ලුණු දමා පිළියල කොට කෙසෙල් කොළ මත තබා තුන්මං සලකදී බල්ලන්ට කෑමට සලස්‌වා පෙර පරිදිම දුන් දානයේ කුසලයෙන් තම සෙනසුරු දොස්‌ දුරුවේවායි අධිෂ්ඨාන කරගනිමින් හැකි සෑම අවස්‌ථාවකම මෙම කුසල් වැඩෙන දානය සතුන්ට ලබා දෙන්න. ජ්‍යොතිෂ්‍යවේදී රංජන් සිසිර කුමාර සටහන ධම්මික හේවාවසම් උපුටා ගැනීම දිවයින