රාහු කාලය තුළ වැඩ කළොත් වැටේ ලෙඩ
ශුභ වැඩට අහිතකර රාහු කාලය ගැන දැනගන්න. ජ්‍යෙතිෂයට අනුකූලව කටයුතු කිරීම බොහෝ දෙනකුගේ පුරුද්දය. රාහු කාලය ගැන එහිදී විශේෂයෙන් සලකා බලන අතර, ඒ කාලය තුළදී, ශුභ කටයුතු ආරම්භ කිරීමෙන් වැළකී සිටීම බොහෝදෙනාගේ සිරිතය. රාහු කාලය යනු, ශුභ කටයුතුවලට අත නොගැසිය යුතු අශුභ කාලයකි. දිනපතාම විවිධ කාලවේලාවන්හිදී එම කාලය යෙදෙන අතර ජ්‍යෙතිෂ්‍ය ශාස්‌ත්‍රයට අනුව, සතියේ දවස්‌ හතට, එම කාලය යෙදී ඇත්තේ හත් ආකාරයකිනි. සූර්ය උදාව සිදුවන්නේ පෙරවරු 6.00 ටය යන සම්මතයට අනුකූලව සකසා ඇති රාහු කාලය පවතින වේලාවන් පහත සඳහන් ය. ඒ ඒ දිනවල සූර්ය උදාව මීට වඩා විනාඩි කීපයක්‌ එහා මෙහා විය හැකි හෙයින්, එම වේලාවන්ද ඒ අනුව එහා මෙහා විය හැකිය.
ඉරිදා – 5.00 – 6.30
සඳුදා – 8.00 – 9.30
අඟහරුවාදා – 3.30 -5.00
බදාදා – 12.30 – 2.00
බ්‍රහස්‌පතින්දා – 2.00 – 3.30
සිකුරාදා- 11.00 – 12.30
සෙනසුරාදා – 9.30 – 11.00
පෙරවරුවේදීත්, පස්‌වරුවේදීත් අදාළ කාලවේලාවන් තුළ රාහු කාලය පවතින අතර ඊට ඇතුළත් කාලය පැය එකහමාරකි. රාහු කාලය හැඳින්වෙන්නේ, විශ්වයේ අයහපත් කිරණ ඒකීභූත වන අවස්‌ථාවක්‌ හැටියටය. අප ජීවත්වන පෘථිවිය හා චන්ද්‍රයා ද සූර්යයා වටා භ්‍රමණය වන විට, සූර්යයාගේ කිරණ කැපී යන අවස්‌ථාවක්‌ ඇති අතර එහි එක්‌ තැනක්‌ කේතු බවත්, අනිත් පැත්ත රාහු බවත් ජ්‍යෙතිර්වේදීහු පවසති. පැය 1 1/2 ක කාලයක්‌ තිස්‌සේ පවතින මෙම කාලය තුළදී, අප කරා පතිත වන්නේ අයහපත් කිරණ බවද ඔවුහු කියා සිටිති. රාහු කාලය පවතින වේලාව තුළ කරන වැඩ සාර්ථක නොවන්නේ, එම අයහපත් කිරණ නිසා යෑයි ද කියති. එම කාලය තුළ වැඩක්‌ කළොත්, ප්‍රශ්න, ගැටලු, බාධා, අවහිරකම් සිදුවන්න බැරිකමක්‌ නැත. අනතුරු පවා සිදු වන්නටද බැරිකමක්‌ නැත.
විශ්වයේ පවතින අහිතකර කිරණ, රාහු කාලයට අයත් වේලාව තුළ ඒකරාශීව පවතින බවද, ඒ නිසා, ඒ කාලය තුළ යහපත් කිසිවක්‌ නොකළ යුතු බවද දෛවඥයෝ කියා සිටිති. එම කාලය තුළ යමක්‌ කරන්න ගියොත්, අවහිරතාවක්‌ හෝ බාධාවක්‌ හෝ අනතුරක්‌ හෝ සිදුවන්නට බැරිකමක්‌ නැති තරම් ය.
දැරියකගේ කන් විදීම, දරුවකුට හෝ දැරියකට හෝ බත් කැවීම, අකුරු කියවීම, හිස කෙස්‌ කැපීම, පාසලට ඇතුළු කිරීම, විවාහය, නිවසකට අත්තිවාරම කැපීම, මහණ කිරීම, ගෙවැදීම, ගොවිතැනක්‌ ආරම්භ කිරීම, වෙළෙඳ කටයුත්තක්‌ ආරම්භ කිරීම යනාදීයේදී, රාහු කාලය තුළ ඒ කිසිවක්‌ නොකිරීමට හැමෝම වාගේ වග බලා ගනිති. එම කාලය තුළ එවැන්නකට අත ගැසුවොත්, අනිෂ්ට ප්‍රතිඵල අත් වන බවට පවතින තදබල විශ්වාසය ඊට හේතුවය. යට කී අන්දමේ කිසියම් ශුභ කටයුත්තක්‌ ආරම්භ කිරීම සඳහා, ශුභ නැකැත් වේලාවක්‌ම යොදා ගැනීමට සියල්ලෝම වග බාල ගන්නේ ඒ නිසාය. ශුභ නැකැත් වේලාවන් සකසන්නේද, රාහු කාලය මගහැරය. අප ජීවත් වන පෘථීවි ගෝaලය ද, සෞරග්‍රහ මණ්‌ඩලයේ ග්‍රහ වස්‌තුවකි. සෞරග්‍රහ මණ්‌ඩලයේ ප්‍රධාන ග්‍රහයා සූර්යයා වන අතර ලෝකයේ මිනිසා ද ඇතුළු සියලුම ජීවීන් රදා පවතින්නේ, සූර්යයා නිසාය.
සිංහල හා හින්දු ජනයා, වසරකට වරක්‌ අප්‍රේල් මාසය මැදදී, සූර්ය මංගල්‍යයක්‌, එනම් අලුත් අවුරුදු උත්සවයක්‌ පැවැත්වෙන අතර එහිදී, ආහාර පිසීම, වැඩ ඇල්ලීම ගනුදෙනු කිරීම, අනුභවය, හිස තෙල් ගෑම, රැකී රක්‍ෂා සඳහා පිටත්ව යාම යනාදී හැම කටයුත්තක්‌ම සිදු කරන්නේ රාහු කාලය මග හැර, ශුභ නැකැත් වේලාවන්ට අනුකුලවය.
ජීවිතයේ වැදගත් කටයුත්තකදී, සුභ නැකැත් වේලාවක්‌ ඒ සඳහා යොදා ගැනීමෙන් යහපත් ප්‍රතිඵලයක්‌ අත්වනවාට සැකයක්‌ නැත. මෙහිදී, තමන්ගේ කේන්ද්‍රයන්ට සරිලන විලසින් ශුභ නැකත් වේලාවක්‌ සකසා ගන්නවා නම්, වඩාත් සුදුසුය. රාහු මහ දසා කාලයක කෙනකු සිටින විට, බුද්ධියට හානියක්‌ ද, කලහ ආරවුලක්‌ද ඇති වන බවත්, ධර්ම හානියක්‌ සිදුවිය හැකි බවත්, රෝග පීඩාදී හට ගත හැකි බවත්, මිතුරු මිතුරියන් හා සමඟ විදේශගත වීමට ඉඩ ඇති බවත්, රති සුවය විඳිය හැකි බවත්, පෞරාණික ජ්‍යෙතිෂ්‍ය ග්‍රන්ථයක්‌ වන මානසාගරියෙහි සඳහන්ය.
මේ අතර, රාහු අතුරු දශා කාලයකදී, නෑසියන් හා සමග රණ්‌ඩු සරුවල් ඇති කර ගන්නා බවද, රෝග පීඩා සැක බිය ඇතිවන බවද, භාර්යාව, දරු මල්ලන්, නෑසියන් නැති වන බවද, පව් කිරීමට පෙළඹෙන බවද එහි සඳහන්ය.
උපුටා ගැනීම දිවයින
