කටක ලග්නයේ දීප්ත ග්‍රහයෝ
අද අප කටක ලග්නයේ දීප්ත ග්‍රහයොත් එක්‌කනේ හමු වෙන්නේ. මේ ලග්නයේ ලකුණ කකුළුවානේ. කකුළුවා ගැන හොඳට බලන්න පරක්‌ තෙරක්‌ නොදැක යන්නමයි බලන්නේ. ඔය වෙළක කුඹුරක ගිහින් බලන්න. කකුළු බෙනයක අගක්‌ මුලක්‌ හොයන්න ලේසියෙන් හම්බවෙන්නෙ නෑ. ඔහේ හාරගෙන හාරගෙන ගිහින්. ඉතිං මේ ලග්නය අයිති ඔයාලත් මෙහෙම තමයි. කෙලවරක්‌ නැතුව හිතනවා. ඔයාලගේ සිතුවිලි ගලාගෙන යනවා. ඒවයි අගක්‌ මුලක්‌ හොයා ගන්න හරි අමාරුයි. අර කකුළුවාගේ බෙනය වගේ තමයි. කක්‌කුටු බෙන හරියට වැහුවෙ නැත්නම් කවදාවත් ලියද්දක වතුර බැඳලා තියා ගන්න බැහැ. ඒ කියන්නේ ඒක හරියට නොකර කොච්චර වේළි බැන්ඳත් වැඩක්‌ නැහැ කියන එකනේ. ඒ වගේම තමයි ඔයාලගේ ඔය පරක්‌ තෙරක්‌ නැතුව ගලාගෙන එන සිතුවිලිවලට නිශ්චිත අරමුණක්‌ කියන හොඳ බැම්මක්‌ ඕන. නැත්නම් අර ලියද්දේ වතුර පුරවන්න බැහැ වගේ කවදාවත් එක අරමුණක ඉන්න බැරුව යනවා. එතකොට ජීවිතෙත් ඔහේ ගලාගෙන යනවා. මොකද මේ රාශිය ජල රාශියක්‌නේ. ඒ වගේම මේක හරියට චංචලයි. ඒකත් හරියට වතුර වගේ තමයි. තියන භාජනේ හැඩේ තමයි ගන්නෙ. ඉතිං මේ ලග්නයේ ඔයාලට දීප්ත ග්‍රහයෝ ඕනම වෙනව. නැත්නම් ඉතිං පේනවනේ හරියට වතුර නොබැඳපු ලියද්ද වගේ කියලා. ඒ කියන්නේ මේ ලග්නය අයිති හඳටනේ. හඳ කොහොමත් දවසින් දවස වෙනස්‌ වෙනවනේ. අමාවකට දකින්න නෑ. වගේම පුර පසළොස්‌වකට බලන්න ලස්‌සනයි. මුළු අහසම දිළිසෙනව. හැබැයි හඳ පෙනුණත් නැතත් මේ ලග්නයේ ඔයාල හරි කරුණාවන්තයි. තෙත් හදවතක්‌ තමයි තියෙන්නේ. ඒක හින්දම ඕනම කෙනකුට ඔයාලගේ හිත කිලුටු කරන්න ලේසියි. එක තමයි හරහට හිටින්නේ. ඉතිං මේ තත්ත්වය පාලනය වෙනව ඔයාලගේ ග්‍රහයෝ දීප්ත තත්ත්වයෙන් ඉන්න කොට.
ඉතිං ඔයාලගේ ලග්නයට ගුරු දීප්තයි.
මෙතන ගුරු ඉන්නවයි කියන්නේ පංච මහා පුරුෂ යෝගවලින් එකක්‌ වන ගුරු හංස යෝගයත් ලබා ගෙනම තමයි ඔයාල ඉපදිලා තියෙන්නේ. හරිම වාසනාවන්තයි. ඉන්න තැනකට සිරිකත කැන්දවනවම තමයි. පොතේ ගුරෙක්‌ නොවෙයි සිතේ ගුරෙක්‌ වෙනවම තමයි. ඒ ඥනයෙන් ඉන්න සමාජයට සේවයක්‌ වෙනවම තමයි. හැම දෙයක්‌ම තමාගේම නුවණින් අවබෝධ කර ගන්නවා, ධනය ටිකක්‌ අඩු උනත් දැනුමින් පොහොසත්. ජීවිතයට අඩුපාඩුවක්‌ දැනෙන්නෙ නැහැ ලේසියෙන්. හැබයි බාල සහෝදරයො නැති වෙන්න ඉඩ තියෙනවා. ඔය මස්‌සිනාලා එහෙම උනත් හතුරුකම් කරන්න ඉඩ තියෙනවා. හැබැයි ඕන දෙයක්‌ දරාගන්න ශක්‌තිය ඔයාලට තියෙනවා.
ඔයාලගේ දෙවැනි භාවයේ ඒ කියන්නේ ධනස්‌ථානයේ ප්ලූටෝ ඉන්නව නම් දීප්තයි. හැබැයි එයා අපට ගොඩක්‌ ඈත. ඉන්න වාමන ග්‍රහයෙක්‌නේ. එක නිසා ඔයාලට ලොකු වාසියක්‌ පේන්නේ නැහැ.
කටක ලග්නේ ඔයාලගේ තුන්වැනි භාවයේ බුධ ඉන්නව නම් දීප්තියි. ඔයාල උපදින කොට පොළවට වැටිලා තියෙන්නෙ බුධගේ හොඳ පැත්ත. ඒක නිසාම ඉතා යහපත් නුවණක්‌ පිහිටනව. පොත් පත්තර ලියුම් කියුම් කටයුතුවලින් දියුණුවක්‌ ලැබෙනවම තමයි. ඒ වගේම අනතුරු නොතකා සමාජ යහපත සඳහා සන්නිවේදන කටයුතුවල යෙදෙනවා. ඒක හරියට අර පොඩි එකා අතුරෙ යන්න බය නැහැ වගේ තමයි. ඒ කියන්නේ මානව හිතවාදී මාධ්‍යවේදීන්ට මේ පිහිටීම බොහෝ දුරට පිහිටල තියෙනවා කියන එකනේ.
හතරවෙනි භාවයේ සෙනසුරු තැන්පත්නම් එයත් දීප්තයි. ඒ වගේම මේක නිසා පංච මහා පුරුෂ යෝගවල එන ශෂ කියන යෝගයද ලබල තියෙනවා. ඉතිං ඔයාල යන යන තැන යාළු මිත්‍රයෝ ඕන තරම් ඉන්නවා. හැබයි අම්මට ටිකක්‌ අපලයි. ඒ වගේම අම්මට අයිති දේපළ එපයි කියන්න ඉඩ තියෙනවා. මොකද ඊට වැඩිය සමාජයෙන් ලැබෙනවා. ඒ කියන්නේ තමන්ට හොයා ගන්න ශක්‌තිය ලැබෙනවා. අනුන්ට උපදෙස්‌ දෙන්න හරි දක්‌ෂයි. ඒ වගේම අනුන්ගේ ප්‍රශ්න විසඳන්නත් හරි දක්‌ෂයි. හැබයි තමන්ගේ ප්‍රශ්නයක්‌ ආවම නම් පැටලුන නූල් බෝලයක්‌ වගේ හිත හිත ඉන්නවා. තීරණයක්‌ ගන්නේ නැහැ. ඒ උනාට මට පෙර සමාජය කියන ගුණාංගය පිහිටල තියෙනවා. ඒ වගේම පොළොවෙන් එන මුතු මැණික්‌ රත්තරං වගේ මේ ලැබෙන්නත් වාසනාව තියෙනවා. ඒත් හිත තරාදියක්‌ වගේ දෙපැත්තට පැද්දෙනවා. ඒක හින්ද ගෙවල් දොරවල් යාන වාහන වගේ දේවල් රඳව ගන්න තියෙන හැකියාව ටිකක්‌ අඩුවෙනවා.
ඔයාලගේ 05 වැනි භාවයේ කේතු ඉන්නවනම් දීප්තයි. ඒ වගේම යුරේනසුන් දීප්තයි. මෙතන අයිති අඟහරුට. එයා ඉතිං කලබල කාරයෙක්‌නේ. ඕනෑම දෙයක්‌ කරන්නේ හොයන්නේ බල්නනේ නැතුව නේ....? යුරේනසුත් එහෙමම තමයි. ඉතිං බොහෝ දුරට මෙතන ඉන්න යුරේනස්‌ අනාගතයට ඕන කරන දේවල් ඉක්‌මනට ලබා දෙනව වගේම ඉක්‌මනින් නැති කරනවා. ඒ කියන්නේ ඔය මිල මුදල් ධන, ධාන්‍ය ලබා දෙනව කියන එකනේ. මේව ඉක්‌මනින් නැතිවෙන්නත් හොරකම් කරන්නත් පුළුවන් නේ. හැබැයි මෙතන ඉන්න කේතු ලබා දෙන්නේ එහෙම ලේසියෙන් කෙනෙක්‌ට හොරකම් කරන්නවත් උදුර ගන්නවත් බැරි දෙයක්‌ තමයි. ඒ කියන්නේ ඥනය ලබන්න තමයි මෙතන ඉන්න කේතු උදව් කරන්නේ. ඉතිං මේක ලේසියෙන් කෙනෙක්‌ට උදුර ගන්න හොරෙන් ගන්න බැහැනේ කැමැත්තෙන් දුන්නොත් මිසක්‌. ඒ කියන්නේ මේ ලග්නය අයිති ඔයාලට කේතුගේ දීප්ත තත්ත්වය මේ භවයටත් වැඩිය සංසාර ගමනේදී වැදගත් වෙනවා.
කටක ලග්නේ ඔයාලගේ 07 කුජ ඉන්නව නම් එයත් දීප්තයි. ඒ වගේම මේක රුචක කියන පංච මහා පුරුෂ යෝග තත්ත්වයක්‌ද වෙනවා. ඒ වගේම භෞම දොaෂ තත්ත්වයක්‌ද වෙනවා. ඒක හින්දම විවාහයේ දී හොඳට කල්පනාකාරී වෙන්න වෙනවා. මොකද අඩු වයසින් හිත ගියාට ඉක්‌මනට එපා වෙනවා. ඒ කියන්නේ ටිකයි. හොඳයි. ඒ වගේම ක්‍රියාශූරයි. සමාජ යහපතට ඉදිරිපත් වෙනවම තමයි. හැබැයි සංසාරගත හතුරො සංවිධානය වෙලා බලාගෙන ඉන්නෙ වට්‌ටන්නම තමයි. ඒත් බොහෝ හතුරො මෙල්ල වෙනවා. ලෝකයම කරුණාවෙන් දිනන්න වාසනාව තියෙනවා. හැබැයි දරුවන්ටවත් මිතුරන්ටවත් ලේසියෙන් ඔයාල අභිබවා යන්න ලැබෙන්නේ නම් නැහැම තමයි.
කටක ලග්නය අයිති ඔයාලගේ 09 වෙනි භාවයේ සිකුරු ඉන්නව නම් ඒකත් දීප්තයි. 09 කියන්නෙ සංසාර පිං පෙන්නන තැනනේ. සිකුරු කියන්නේ හඳ ඇරුණම අහසේ වැඩියෙන්ම අපට එළිය දෙන ග්‍රහය නේ. ඔය කියන්නේ ග්‍රහලොව හැඩ කාර මනමාල කෙල්ල කියලනේ. ඉතිං මෙයා මෙතන ඉන්න ඔයාල හරි ලස්‌සනයි. ඔයාලට ලැබෙන්නේත් ලස්‌සන ස්‌වාමියෙක්‌ නැත්නම් ලස්‌සන බිරිඳක්‌ම තමයි. ඒ වගේම ඔයාල හරි කරුණාවන්තයි. අනුන්ගේ දුකකදී හිත උනුවෙන්නේ පිහිට වෙන්නේ සංසාර පුරුද්දට.
කටක ලග්නය හිමි ඔයාලගේ 10 වෙනි භාවයේ රවී ඉන්නව නම් දීප්තයි. ඒ කියන්නේ ඔයාල ඉපදීලා තියෙන්නේ අප්‍රේල් මාසෙ මැද ඉඳල මැයි මාසේ මැද වෙනකම් දිනයක දහවල් 12.00 ට ආසන්න වෙලාවක. ඒ කියන්නේ ඉරේ ශක්‌තිය නොඅඩුවම ලැබෙන වෙලාවක. සමාජය නම් හිතන්නේ මහ ආඩම්බරකාරයො කියලා. පෙන්නෙත් ඒ වගේම තමයි. ගොඩක්‌ වෙලාවට ආඥදායකයෙක්‌ විදියට තමයි වැඩ කරන්නෙ. මේක හොඳවෙන තැනුත් තියෙනවා. ඔය වැඩක්‌ ලේසියෙන් කරන්නේ නැති රජයේ සේවකයන්ගෙන් වැඩ ගන්න නම් ඔයාල උපන් හපන්නු. ඒ වගේම රජුන්ගෙන් ලැබීම් තමයි වැඩියෙන් පෙන්නන්නෙ. ඒ කියන්නේ බලවත් රජයේ සේවකයෙක්‌ වෙනව කියන එකනේ. හැබැයි ඔයාල නොදැනම කරන වැරද්දකුත් තියෙනවා. මොකක්‌ද දන්නවද තමන් ආපු තැනට තමන්ගේ එකෙක්‌ එන එක වළක්‌වන්නම තමයි බලන්නේ. ඒ කියන්නේ ඔයාල ඔය නීති හදන තැනක එහෙම හිටියොත් කරන්නේ තමන් මෙතනට ආවේ කොහොමද කියල හිතනවා. ඊට පස්‌සේ තමන්ගේ පංතියේ එකෙක්‌ මෙතෙන්ට එන්න තිබෙන ඉඩ කඩ අහුරලා නීති හදනවා. ඔය කීවේ එකක්‌ ගැන විතරයි. අනික්‌වාත් එහෙමම තමයි. හැබැයි ඔයාලටත් ඔතෙන්නට එන්න ලේසියෙන් ඉඩ ලැබෙන්නේ නැත. මොකද කාටවත් ඔලුව නවන්නේ නැති ගුණයට අකමැති පිරිස සමාජයේ වැඩියි නේ. මේ හින්දම බොක්‌කෙන්ම ඉන්න යාළුවො අඩුවෙනවා. හැබැයි වාසියට තනතුරුවලට එකතු වුණ සංසාර හතුරො, මිතුරො විදියට ඉන්නවා. ඒ වගේම ඔයාලා පුංචි පවුලක ඉපදීලා ඉන්නව නම් මේ දීප්ත තත්ත්වය හොඳ නැත. මොකද කෙලින් වෙච්ච එකා ලේසියෙන් තව එකෙක්‌ කෙලින් කරන්න බලන්නේ නැහැනේ. අර මහා රූස්‌ස ගස්‌ අතර පුංචි පැලේකට මතුවෙන්න කොච්චර අමාරුද මේ යෝග තිබුනට ඒ ගැනත් නිතර හිතන්න ඕනා.
ඒ වගේම කටක ලග්නයේ ඔයාලගේ 11 වෙනි භාවයේ සඳු ඉන්නවනම් දීප්තයි. හැබැයි ඒ මුල අංශක 03 විතරයි. මෙතනදීත් බොහෝම හොඳ ප්‍රතිඵල පෙන්නනවා. සමාජයෙන් ගරු සැලකිලි ලබනවා. ඒ වගේම මැණික්‌, රත්‍රං, දියමන්ති, මිනිරං, යකඩ වාගේ දේවලින් හොඳට ලැබීම් පෙන්නනවා. ඒ වගේම මඟුල් කපුකම් බෝකර් වැඩ වගේ ඒවත් හොඳට පිහිටනවා.
කටක ලග්නේ ඔයාලගේ 06, 03, 12 කියන දුෂ්ට ස්‌ථානයන්හි කිසිම ග්‍රහයෙක්‌ දීප්ත නැත. ඒ කියන්නේ ඔයාලට ලෙඩ දුක්‌ වලින් ලේසියෙන් ගැලවෙන්න ලැබෙන්නේ නැහැ. ඒ වගේම සතුරන්ගෙන් ජය ලබන්න බොහොම අමාරුයි. මිතුරො විදියට සංසාරගත හතුරො එකතු වෙනවා. ඒ විතරක්‌ නෙවෙයි ඔයාලගේ කීර්තිය නැති කරනවා. අර කියන්නේ අඟේ ඉඳන් කන කනවා කියලා. ඒ වගේම විපත්තිවලින් ගැලවෙන්න ලේසි නැහැ. බොහෝ විපත්ති එන්නේ එක පිට එක. එකකින් ගැලවෙන්න යනකොට ඒකම කැරකිල තව විදියකට එනවා. ඒ වගේම තමයි වියදම් උනත් පාලනයක්‌ නැති වෙනවා. ලැබීම් කොච්චර ලැබුනත් ඒකට වියදමක්‌ හැදෙනවා. හැබැයි මේ තැනක වෙන තත්ත්වයකින් හරි ඔය (රාහු සෙනසුරු) බාදක ග්‍රහයෙක්‌ හිටියොත් මේව ටිකක්‌ වෙනස්‌ වෙනවා.
කොහොම වුණත් කටක ලග්නය හරි වාසනාවන්තයි. ආධ්‍යාත්මික පැත්තට බර උනොත් කෙලවරක්‌ දකිනකම් යනවා. ඒ කියන්නේ බොහෝa දුරට මෙයාලගේ සංසාර ගමන හොඳයි. අප ශාන්තිනායක සම්මා සම්බුදු රජාණන් වහන්සේද කටක ලග්නයේ නේ. ඒ වගේම මේ ග්‍රහයොත් බොහෝ දෙනෙක්‌ දීප්තව හිටියනේ. මේ භවයේ දී ග්‍රහයො කොහොම හිsටියත් අපට සත් පුරුෂයො වෙන්න පුළුවන්. මිනිහයි සතයි වෙන් වෙන්නේ ගතිගුණවලින්නේ. ඉවසීමයි. දරාගැනීමේ ශක්‌තියයි දෙකම මිනිහගේ හොඳ ගතිගුණ වෙනවා. මේව පුරුදු කර ගත්තොත් ග්‍රහයො කොහොම හිටියත් ජීවිතය දිනනවම තමයි. දිනන ජීවිත අයිති ඔයාලගේ සංසාර ගමනත් දිනනවම තමයි.
හෝමාගම ජී. සමරප්පුලිගේ
උපුටා ගැනීම දිවයින
