සිංහ ලග්නයේ කාන්තාවන් ගැනයි මේ
රාශි චක්‍රයේ අංශක 120 ත් 150 ත් අතර දිවෙන ගිණිකාරක රාශියකි සිංහ රාශිය. මේ රාශියෙන් උපන් කාන්තාවන් දැඩි රෞද්‍රත්වයෙන් යුක්‌ත එඩිතර ක්‍රියාවේ දක්‍ෂ ආත්මශක්‌තියෙන් සමන්විත දියුණුව කරා යන පරාජය පිළිනොගන්නා අය වෙයි. කෙසේ වෙතත් ඔවුනොවුන්ගේ උපන් නවාංශක අනුව ක්‍රියා කලාපයන් වෙනස්‌ වන අයුරු පරීක්‍ෂා කර බලමු.සිංහ ලග්නයේ වෘෂභ නවාංශකයෙන් ජන්ම ලාබය ලැබූ කාන්තාවන් පිළිබඳව විමසා බලමු :
මේ කාන්තාවන් දක්‍ෂ බුද්ධිමත් කාන්තාවන් වන අතර සමාජයේ වගකීම් දරන තනතුරු දැරීමට වාසනාව ඇත. නිතර සත්‍යවාදී බව පෙන්නුම් කරයි. ත්‍යාගශීලීභාවයක්‌ ද ඇත. පුරුෂ පක්‍ෂය වැඩිපුර ආශ්‍රය කිරීමට ඇලුම් කරයි. මිත්‍ර සමාගම් ඇතිකර ගනී. ඔවුන්ගේ දුර්වලතාවය නම් ඕනෑම ප්‍රශ්නයකදී විමසා බැලීමෙන් තොරව කලබල වී තීරණ ගැනීමයි. එසේම වැඩිමහල් සහෝදර සහෝදරියන්ගෙන් පල ප්‍රයෝජන අඩු බවක්‌ පෙන්නුම් කරයි. බොහෝ විට මොවුන් පවුලේ වැඩිමහල් දරුවන් සේ පෙනී සිටියි.
මේ කාන්තාවන්ගේ ගුරු විවාහක ස්‌ථානයේ සිටම විවාහ බාධකවලට හේතු වෙයි. ඒ අනුව දෙමාපිය විරෝධතා මැද සිය කුල වංශවලට පිටස්‌තරයන් සමඟ වුවද හිතුවක්‌කාර විවාහ සිදුකර ගනියි. මේ කාන්තාවන්ගේ ගුරු 10, 4 සිටම ස්‌වාමියාගේ රැකියාව සහ සිය රැකියා වගකීම්වලට ද බාධා ඇති වෙයි. ගුරු දශා අතුරු දශා කාලවල ගුරුගේ තත්ත්වය අනුව රැකියා අහිමිවීමට ද පුළුවන. මේ නිසා එබඳු කාන්තාවන් ඒ පිළිබඳව විමසීමෙන් සිටීම වැදගත් වේ.
මේ කාන්තාවන්ට විශේෂ සුබපල දෙන ග්‍රහයා වන්නේ අඟහරුයි. ඒ අනුව අඟහරු 7 සිටියත් මේ කාන්තාවන්ට වාසනාව උදාවෙනවා. නමුත් විවාහයේදී එම අංශකවලට කුජ සිටින පිරිමි කේන්ද්‍රයක්‌ම වීම භාග්‍යයක්‌ වෙනවා. එසේම මේ කාන්තාවන්ගේ කරමස්‌ථානයේ කුජ රවි කුජ ශනි ආදී ග්‍රහ යෝගගත වුවහොත් රැකියා දියුණුවක්‌ ඇත් කරන අතර විධායක ශ්‍රේණියේ රැකියා කිරීමට ද වාසනාව ඇති වේ. 4 වැන්නේ කුජ සිටීමෙන් පරම්පරා උරුමයන්ට ද වාසනාව ඇති කරයි. ගුරු දින ගුරු හෝරා මොවුන්ට අසුබයි. කුජ දිශා කුජ හෝරා සුබ පල දෙයි.
කන්‍යා කටක නවාංශකවලින් ජනිත කාන්තාවන් පිළිබඳ විමසමු :
මේ කාන්තාවනට නිතර අපල කරදර ඇති කරවන්නේ සඳු ග්‍රහයායි. ඒ නිසා සඳු සිටින ස්‌ථාන ආකාර අනුව ඔබ බුද්ධිමත් විය යුතුයි. මේ කාන්තාවන් උසස්‌ ගති ගුණ වලින් යුත්තේ දියුණුව කරා යැමට එතුමාට මග සාදා දෙන්නේ ගුරු ග්‍රහයායි. ඒ අනුව ගුරු ඔබේ කර්මස්‌ථානයේ හෝ අය ස්‌ථානයේ සිටින්නේ නම් ඔබ ධනවන්තියක්‌ වේ. නමුත් ගුරු 12, 8 නම් ඔබ කල්පනාකාරී විය යුතුයි. මේ කාන්තාවන්ට මාසික ශුද්ධිය යම් යම් බාධා ඇති කරවනවා. පියයුරු පිළිබඳ ප්‍රශ්න බාධා ඇතිවෙනවා. එසේම වලිප්පු, සන්නි රෝග, උදරාබාධ, බෙල්ලේ ආබාධ ඇතිවීමට වැඩි ප්‍රවනතාවයක්‌ දක්‌වයි. සඳු අසුබ ස්‌ථානවල නම් ඔබ කල්පනාකාරී විය යුතුයි.
මේ කාන්තාවන් විශේෂයෙන් සඳු 7 වැන්නේ සිටී නම් කල්පනාකාරී විය යුතුයි. විවාහ බාධා, අනියම් ප්‍රේම සම්බන්ධතා ඇතිවිය හැක. සිකුරු යෝග වුවහොත් හෝ දෘෂ්ඨිගත වුවහොත් විවාහයට බාධා ඇති කරයි. විවාහකයා රෝගී තත්ත්වයට පත්කරයි.
වෘශ්චික නවාංශක සිංහ ලග්න කාන්තාවන් පිළිබඳ විමසා බලමු :
මේ කාන්තාවන් දැඩි ආවේගශීලී අය වෙයි. මේ නිසා අන් අය යටතේ සේවය කිරීම මොවුන්ට අපහසු තත්ත්වයක්‌ පෙන්නුම් කරනවා. නිතර ගැටුම් ඇතිකර ගැනීමේ ප්‍රවනතාවය වැඩියි. පාරිසරකවද බාහිර අනතුරු වැඩි නිසා ඒ පිළිබඳව ද විමසීමෙන් සිටීම වැදගත් වේ.
මේ කාන්තාවන්ට කුජ ග්‍රහයා බාධක ග්‍රහයා වේ. මේ නිසා 12,4,1,8,7 යන ස්‌ථානවල කුජ සිටී නම් විවාහ බාධා ඇති කරයි. විශේෂයෙන් සැමියාට ද මාරක විය හැකිය. මේ නිසා මේ කාන්තාවන් කුජ මහ දශා අතුරු දශා කුජ හෝරා දින පිළිබඳව විමසීමෙන් කටයුතු කළ යුතුයි.
මේ කරුණු කාරණා ඔබ තේරුම් ගතහොත් ඔබේ ජීවිතයේ ප්‍රේම සම්බන්ධතා වෙනත් මිත්‍ර සමාගම් ඇතිකර ගැනීමේදී විවාහයේදී සමාජයම තනතුරු රැකියා තනතුරු ලබාගැනීමේදී ඔබට වැදගත් වේ. එසේම ඔබේ දියුණුව ද වාසනාවද ළඟාකර ගැනීමට හැකියාව උදා වේ. ඔබට ජය සතුට.
ප්‍රවීණ ජ්‍යොතිෂ්‍යවේදී
මුදියන්සේ නැමිඇල්ල
උපුටා ගැනීම දිවයින
