ධන කුවේරයන්ගේ අත සරසන Emerald
මැණික් පැලඳීමේදී මිනිසුන්ගේ කැමැත්ත එක් එක් ආකාරයට බෙදී යයි. නමුත් බොහෝ පිරිසක් ඇලුම් කරන ලෝක ප්‍රකට ඉතා වටිනා මැණික් වර්ගයක් ලෙස මරකත එනම් එමරල්ඩ් අපිට හඳුන්වා දෙන්න පුළුවන්. මරකත මැණික් කොළ වර්ණයෙන් යුක්තයි. නියම හරිත වර්ණය ඇති හොඳ තත්ත්වයේ මරකත මැණික් දියමන්තිවලටත් වඩා වටින බව අද වෙළෙඳපොළේ හොඳ තත්ත්වයේ මරකත මැණික්වල මිල සමඟ සසදා බැලීමේදී තේරුම් ගත හැකිය.
මරකත මැණිකේ කොළ වර්ණ ගණනාවක් පවතින අතර ගිරවුන්ගේ කොළ පැහැයේ සිට ගැඹුරට මෙම වර්ණ කාණ්ඩ කෙරේ. ගැඹුරු කොළ වර්ණය සහිත පලුදු දෝෂ රහිත මරකත මැණික් කැරට් එකක ප්‍රමාණයක් රුපියල් ලක්ෂ දෙකකට වඩා අධිකය. වෙළෙඳපොළේ මෙම තත්ත්වයේ මරකත මැණික් නොයෙකුත් ව්‍යාජකරණයන්ට ලක්කර විකිණීමට ඇති හෙයින්ම හොඳ තත්ත්වයේ මරකත මැණිකක් මිලදී ගැනීමට අපහසු වෙයි. මරකත මැණික් දෘඪතාව අඩු අතර ස්වභාවයෙන්ම මරකත මැණික් අභ්‍යන්තරය වායු බුබුළු හෝ සියුම් පැළීම්වලින් අන්තර්ගතය. මරකත මැණිකෙහි මෙවන් තත්ත්වයක් දක්නට ලැබුණොත් එය යහපත් ලකුණක් ලෙස සැලකෙනුයේ එහි අව්‍යාජ බව ඉන් පිළිබිඹු වන බැවිනි. 1846දී ප්‍රංශ විද්‍යාඥයකු විසින් කෘත්‍රිම ලෙස මරකත නිපදවීමේ ක්‍රමය සොයාගන්නා ලද අතර එතැන් පටන් නොයෙකුත් ක්‍රම ඔස්සේ මරකත මැණික් කෘත්‍රිමව නිපදවූ නිසා මරකත මැණික් මිලදී ගැනීමේදී බොහෝ සැලකිලිමත් විය යුතුව ඇත. ස්වාභාවික මරකත මැණිකක් තෝරා ගත් පසු තවදුරටත් එහි අභ්‍යන්තර තත්ත්වය පරීක්ෂා කර බැලීම යෙහෙකි. ස්වාභාවික මරකත මැණික් සඳහා පිළිගන්නා ක්‍රමවේදයක් වන තෙල්වල බහා තැම්බීමේ ප්‍රතිකර්මය අද ඕනෑම මරකත මැණිකකට සිදුකරන පිළිගත් ප්‍රතිකර්මයකි. මේ ප්‍රතිකර්මය මඟින් මරකත මැණිකෙහි ලස්සන තවත් වැඩි කෙරේ. නමුත් සමහර කූට වෙළෙන්දන් මෙම වර්ණ රහිත තෙල් ප්‍රතිකර්මය වෙනුවට වර්ණ ගැල්වූ තෙල් ප්‍රතිකර්මයක් සිදුකොට මෙම මරකත මැණිකෙහි ස්වාභාවික වර්ණය තවත් වැඩිකිරීමක් කරති. එහෙත් මෙවැනි ව්‍යාජ මරකත මැණික්වලින් ඔබ ප්‍රවේසම් විය යුතුව ඇත. මේ නිසා මරකත මැණික් මිලදී ගැනීමේදී වර්ණ නොගැල්වූ මරකත මැණික්ම මිලදී ගැනීමට පරික්ෂාකාරී වන්න.
මරකත මැණික් ද්‍රවිඩ භාෂාවෙන් පච්ච, එනම් මරකත පච්ච යන නමින් හඳුන්වන අතර ඉංගී්‍රසියෙන් එමරල්ඩ් නමින් හඳුන්වයි. මරකත මෝසස්ගේ වගුව අනුව දෘඪබවින් අඩු එනම් දෘඪතාවය 7.5ක් වන මැණිකකි. පහසුවෙන් බිඳෙනසුලු නිසා මරකත කපා ඔප දැමීම මෙන්ම ස්වර්ණාභරණයකට එබ්බවීමද ඉතා සැලකිල්ලෙන් කළ යුතුව ඇත. කිමද ඉතා සුළු අතපසුවීමකින් වුවද මෙම මැණික් කැපී යන්නට ඉඩ ඇති හෙයිනි. ලොව වටිනාම මරකත ලැබෙන්නේ දකුණු ඇමෙරිකාවේ කොලොම්බියාවෙනි. බ්‍රසීලය, රුසියාව, ඉන්දියාව, පාකිස්තානය, සෝමාලියාව, නයිජීරියාව, ඇෆ්ගනිස්ථානය ආදී රටවලින්ද මරකත පච්ච ලබාගැනේ. ලෝකප්‍රකට රූප රාජිනියන් වූ ක්ලියෝපැට්රා උතුරු ඊජිප්තුවේ ආස්වාන්වලට නැඟෙනහිරින් පිහිටි කඳුවලින් මරකත ලබාගත් බව එරට ඉතිහාසයේ කියැවෙයි. එම පතලයෙන් ලබාගත් මරකත 'ක්ලියෝපැට්රා මරකත' නමින්ද හැඳින්වෙයි. එය එසේ වුවත් මෙම කරුණු ඓතිහාසික තොරතුරු වන අතර වර්තමානයේ ඊජිප්තුවෙන් මරකත නොලැබෙනබවද සඳහන් කළ යුතුයි. කෙසේ නමුත් ඓශ්චර්යාරායි දකුණු අත සුළැඟිල්ලේ නිරන්තරයෙන් පලඳින මරකත පච්ච මැණික් ගල කෙරේ ඇය බොහෝ සේ විශ්වාසය තබන බවද ඉන්දීය කලා ලොවෙන් ලැබෙන තොරතුරකි.
අමිතාබ් භච්චන් නම් ඉන්දීය සිනමා සහ ව්‍යාපාරික දැවැන්තයා තමා ආර්ථිකමය අතින් දැඩි සේ කඩා වැටීමකට ලක්වූ අවධියක එම තත්ත්වයෙන් තමා මුදවාලීමට නිල් මැණිකක් සහ මරකත පච්ච මැණිකක් පැලැඳි බවත් එම මැණික් පැලඳීමෙන් සුළු දිනකට පසු නැවතත් තමා ආර්ථික සහ සමාජයීය අතින් ස්ථාවර වූ බවත් පවසයි. ලෝක ප්‍රකට ව්‍යාපාරිකයන් ධන කුවේරයන් සහ ඔවුන්ගේ බිරින්දෑවරු මෙම මරකත මැණික් කෙරේ ඇති ආදරය සහ කැමැත්ත ඔවුන්ගේ පලඳනා තුළ ඔබ්බවා ඇති නොයෙකුත් ප්‍රමාණයේ මරකත මැණික් දැකීමේදී අපට පැහැදිලි වන කරුණකි. ආදරයේත්, අමරණීයත්වයේත් විශ්වාසයේත් සංකේතය ලෙස මරකත මැණික හැඳින්වෙයි. මරකත මැණික් පිළිබඳ සංස්කෘත භාෂාවෙන් රචිත 'රත්න පරීක්ෂා' නම් ග්‍රන්ථයේ මෙසේ සඳහන් කරයි. 'මරකත පුද්ගලයකුගේ එක් පාපයකින් මුදවාලයි. සියලු වර්ගවල බිය දුරු කරයි. වස විසවල බලපෑම දුරු කරයි. උසස් ගුණාංගයන්ගෙන් හෙබි මරකත මැණික් පලඳිනාට තමාගේ සතුරන් පරාජය කර තව තවත් ප්‍රසිද්ධිය, කීර්තිය සහ අභිමානය දිනාගත හැකිය. තමාගේ ජන්ම පත්‍රයට අනුව බුද ග්‍රහයාගේ බලපෑම සසදා බලා ගැළපේ නම් මරකත පච්ච මැණික් පැලඳීම තුළ තමා කරන කියන කටයුතු ඉතා සාර්ථකව සහ ජයග්‍රාහී මට්ටමින් සිදු කරගැනීමට මහත් රුකුලක් වන බව ඔබ හමුවේ තබන්නේ ඉතා විශ්වාසයෙනි.
උපුටා ගැනීම මව්බිම
