ඉරණම්කාරයා ගැන හත අධිපති කියන කතාව

විවාහය වනාහි ආත්මීය බැඳීමකි. සංසාරගත බැඳීමක සොඳුරු ඵලය විවාහයයි. විවාහය ආත්ම හතක බැඳීමක් බව හින්දූන්ගේ මතයයි. ආත්ම ගණනාවක් පාරමී දම් පුරමින් එකට එන සිදුහත් - යශෝදරා විවාහය සසර දුකින් අත්මිදෙන අවසන් බවය තෙක්ම එකිනෙකා පතාගෙන ආ සොඳුරු බැඳීමකි. එය ගෞරවයෙන් සිහි කළ යුතුය. පෙරුම් පුරා වසර ගණනාවක් පෙම් දම් පුරා හෝ යෝජනාවක් මත හෝ එක වහලක් යටට නික්ම යන යුවතිපතීන්ගේ සොඳුරු කැදැල්ල එසේත් නැති නම් ජීවිතයේ සොඳුරුතම කඩඉම් සියල්ලන්ටම නොලැබෙන ජීවිතයේ සෞභාග්‍යය විවාහයයි. යෞවනයේ පසු වන සියලු දෙනාගේම එකම අපේක්ෂාව යහපත් විවාහයක් කර ගැනීමයි. සමහර තරුණ තරුණියන්ගේ විවාහය ඔවුනොවුන්ගේ හඳුනා ගැනීමෙන් සිදු වන අතර ඇතැම් අයගේ විවාහය යෝජිතව සිදු වන අවස්ථාද ඇත. මේ අතර සදහටම යුග දිවිය අහිමි අයද සිටියි. තරුණ වියේ පසුවන ඔබ ඔබගේ විවාහය පිළිබඳ තොරතුරු දැන ගැනීමට මහත් කැමැත්තක් දක්වයි. ඔබගේ ජන්ම ලග්නය අනුව ලබන සහකරු හෝ සහකාරිය පිළිබඳ ඔවුන්ගේ ස්වභාවය, ගතිලක්ෂණ මේ තුළින් ඔබට තේරුම් ගැනීමට සිදුවෙයි. යම් අයකුගේ විවාහය ජන්ම පත්‍රයේ හත්වැනි කොටුව තුළින් විමර්ශනය වනු ඇත. එපමණක් නොවෙයි. චන්ද්‍රයාගේ හත්වැන්න හා සිකුරුගේ හත්වැන්නද හත්වැන්නෙන් හත්වැන්නද විවාහය පිළිබඳ තොරතුරු විමර්ශනය කරයි.

ඔබේ කේන්දරයේ හත් වැන්නාධිපති හඳුනා ගන්න.

හත අධිපති ලග්නයේ හෙවත් පළමු කොටුවේ නම් මොවුන් දැඩි ලෙස ප්‍රේමයෙන් බැඳුණු පෙම්වතකු හෝ පෙම්වතියක වීමට හැකියාව ඇත. මොවුන් ඉතා වාසනාවන්තයෝය. තම සහකරු හෝ සහකාරිය සොයා ගැනීම අසීරු කටයුත්තක් නොවන අතර ඔවුන් ඔබ සොයා ඔබ වෙත පැමිණෙනු ඇත.

හත අධිපති දෙවැන්නේ නම් : ගායනය, කථිකත්වය වැනි කටහඬ මූලික කරගත් අවස්ථාවකදී ප්‍රේමය ප්‍රකාශ වනු ඇත. නැති නම් මුදල් ගනුදෙනුවකදී වැනි අවස්ථාවකදී විය හැකිය. ඉරණම්කරු බොහෝ විට හමුවන්නේ නිවෙස ආශි්‍රත පරිසරයෙනි.

හත අධිපති තුන්වැන්නේ නම් : ලබන අය රාජ්‍ය අංශයේ ස්ථිර රැකියාවක නිරත වීමට ඉඩකඩ පවතී. ඉහළ තනතුරු දරන අය ඇසුරු කරයි. ජීවිතයේ සෘජු තීරණ ගෙන කටයුතු කරයි. තරමක් උසින් වැඩියි. තේජවන්තව ගමනේ යෙදෙන අයෙකි. පිරිසක් අතර ප්‍රධානත්වයක් උසුලයි. සමාජය තුළ කුමක් හෝ හේතුවක් නිසා ජනප්‍රියතාවට පත්වෙයි. ඔහුට හෝ ඇයට තරමක් උෂ්ණ රෝග ඇති කරයි.

හත අධිපති හතර වැන්න තුළ නම් : දැනීම, උගත්කම ඇති අයකු හිමිකරු හෝ හිමිකාරිය වෙයි. දැනීම අන් අයට බෙදාදෙන ලිපි ලේඛන පිළිබඳ රැකියාවක නිරත වීමට පුළුවනි. මනා ලෙස ශරීරය වැඩුණු නැති අයකු වුවත් දැනීම බුද්ධියෙන් පරිපූර්ණ අයෙකි. කුඩා අලංකාර නිවෙසකට හිමිකම් දරන අතර ජීවිතයේ යථාර්ථවාදීව කටයුතු කරයි. ස්ථානෝචිත ප්‍රඥාවෙන් යුක්ත මෙම අය නිකරුණේ කාලය ගත නොකරයි. තරමක් කපටිකමින්ද යුක්ත අයෙකි.

හත අධිපතියා පස්වැනි කොටුවේ නම් : නිතරම යමක් ඉගෙන ගැනීමට උත්සාහ දරන අයෙකි. චිත්‍ර කර්මාන්තය, සංගීතය, නාට්‍ය කලාව වැනි අංශවලට යොමු වෙයි. ඔබගේ හිමිකරු හා හිමිකාරිය ඇසුරක් මත හමුවූ අයෙක් වන අතර ආදරය හොඳින් හඳුනාගනී. විවාහ ජීවිතය ඉතාමත් සතුටින් ගත කිරීමට උනන්දුවක් දක්වන අයකු ලබන අතර ඔහුගේ හෝ ඇයගේ අවංක ආදරයත් මුළු ජීවිතය පුරාම හිමි වෙයි. කලා ක්ෂේත්‍රය තුළ හෝ විසිතුරු දේවල් නිර්මාණය කරන ව්‍යාපාර අංශවල නිරත අයකු විය හැකියි.

හත අධිපති හය වැන්නේ සිටී නම් : ඔබ ලබන ඉරණම්කරු බොහෝදුරට ඔබගේ අදහස්වලට ප්‍රතිවිරුද්ධ විය හැකියි. සුව කළ නොහැකි රෝගී තත්ත්වයක් නිසා ජීවිතයේ පසු කාලය තුළ කනස්සලු ස්වභාවයෙන් පසු වන අයෙකි. ක්ෂණික කෝපය උපදවන අතර සමහර අවස්ථාවලදී දුරදිග නොබලා කටයුතු කරයි. සුළු දේටත් කිපෙනසුලු අයකු වන බැවින් ජීවිතයේ ප්‍රශ්නයක්, ගැටලුවක් බොහෝදුරට නිරාකරණය කර ගැනීමට නොහැකියි. සමහර අවස්ථාවලදී ඔබගේ සතුරකු ලෙස ජීවත් වීමට පුළුවනි. ආරක්ෂක අංශ හා කාර්මික ක්ෂේත්‍රවල රැකියාවක නිරත වීමට ඉඩකඩ පවතී.

හත අධිපති හත්වැන්න තුළ සිටි විට : ඔබ ලබන සහකරු හෝ සහකාරිය ආගම දහමට ළැදිව කටයුතු කරන පරිත්‍යාගශීලී ගති පැවැතුම් ඇති රාගික හැඟීම්වලින් යුතු අයකු වෙයි. බොහෝදුරට උසේ තරමට මහත ඇති පිරුණු ශරීරයකින් යුක්ත අයෙකි. මොවුන් ආධ්‍යාත්මික සුවය අගය කරයි. පිරිසක් අතරට ගිය විට ප්‍රධානත්වයක් ලබන අතර නිස්කලංකව සිටීමට උත්සාහ දරයි. ඔබට හිමි වන්නේ ආරාධනාත්මක ප්‍රේමයකි. එය ඔබ කෙරෙහි බලවත් වූ හැඟීමෙන්ම ඇති වූවකි. මෙවැනි කේන්දර හිමියන් සොයා ඔහුගේ හෝ ඇයගේ පෙම්වතා හෝ පෙම්වතිය පැමිණෙනු ඇත. මෙවැනි අයට උරුම ප්‍රේමනීය විවාහයකි.

හත අධිපතියා අටවැන්නේ නම් : තමන්ගේ ප්‍රේමය හමු වන්නේ හදිසි අවස්ථාවකදීය. ලබන අය තමන්ට, තමන්ගේ අදහස්වලට නොගැළපෙන අයෙකි. නිතර පහත් වැඩ කිරීමට උත්සාහ දරයි. ආගම දහම කෙරෙහි විශ්වාසය නොතබන මෙම අය තමන්ගේ වාසියට හැම දෙයක්ම හරවා ගනී. බොහෝදුරට ජීවිතය අසන්තෝෂයෙන් කල් ගෙවයි.

හත අධිපතියා නව වැන්නේ නම් : නිතර නිතර දුරබැහැර ප්‍රදේශවල ගමනේ යෙදෙයි. ජීවිතය තුළ කොපමණ ප්‍රශ්න කරදර තිබුණත් එතරම් ලොකුවට ගනන් නොගනී. ජීවිතයේ විශාල බලාපොරොත්තු ඇති කර නොගෙන ජීවත් වන මෙම අය පෙර සංසාරයේ සිටම දෛවෝපගතව හමු වන අය විය හැකිය. උස, මහත තිබුණත් මෙම අයගේ ශරීරයේ ප්‍රියමනාප හැඩයක් නැත.

හත අධිපති දහවැන්නේ නම් : ඔබගේ හිමිකරු රාජ්‍ය අංශවල ස්ථිර රැකියාවක නිරත හෝ ව්‍යාපාර අංශවල නිරත අයකු විය හැකිය. ඉතාමත් සාධාරණ තීරණ අනුව වැඩකටයුතු කරන පරාර්ථකාමී සිතිවිලිවලින් පිරිපුන් අයකු වෙයි. ජීවිතයේ ධනාත්මක සිතිවිලි ගොඩනඟාගෙන වැඩ රාජකාරි කරන අතර නිතරම වර්තමානයට වඩා අනාගතය ගැන සිතා කටයුතු කරයි. කලබල ගතිවලින් තොර වන වන මෙම අය ධාර්මිකව කටයුතු කරයි.

හත අධිපති එකොළොස්වැන්න නම් : ඔබ ලබන අය කාර්යශූර එඩිතර ගති ඇති තරමක් කලබලකාරී ගති ඇති අයෙකි. සිතන පතන දේවල් එවෙලේම ක්‍රියාවට නංවයි. ජීවිතයේ හොඳ ආර්ථික ස්ථාවරයක් ගොඩනඟාගන්නා මේ අය අන් අයට අතනොපා ජීවත් වෙයි. බොහෝදුරට ආරක්ෂක අංශවල හෝ කාර්මික ක්ෂේත්‍රය තුළ රැකියාවක නිරත වීමට පුළුවන. ඔබගේ සහකරු හෝ සහකාරිය නිරායාසයෙන්ම ඔබ සොයා ගන්නා අයෙකි.

හත අධිපති වැයස්ථානය වන දොළොස්වැනි කොටුවේ සිටී නම් : ඔබගේ හිමිකරු හෝ හිමිකාරිය දුරබැහැර ප්‍රදේශයකින් හමුවෙයි. සහජ කලා කුසලතා ඇති විනෝදයට ප්‍රිය කරන ආගන්තුක සත්කාරවලින් යුක්ත අයෙකි. අලංකාරයට, විනෝදයට ප්‍රිය කරන අතර උපයන ධනය වැඩි කොටසක් යොදවන්නේ ලෞකික සැප සම්පත් භුක්ති විඳීමටයි. බොහෝදුරට විදෙස්ගතව ආර්ථිකය උපයන මොවුන් ව්‍යාපාර ක්ෂේත්‍රවලද නිරත වීමට පුළුවනි.

ඉහත දැක්වූ ආකාරයට ඔබත් ඔබගේ හත අධිපති කේන්දරේ කුමන කොටුවේදැයි විමසමින් ඉරණම්කරු පිළිබඳ තොරතුරු දැනගන්න.

උපුටා ගැනීම මව්බිම