මුහුදු පත්ලේ ධන නිධානයයි
මැණික් ලොව රජුන් ලෙස දියමන්ති කිරුළ හිමි කරගන්නා අතරම ඊටත් එහා වටිනාකමකින් යුතු මුතු, මැණික් ලෝකයේ රැජන ලෙස විරුදාවලිය ලබනවා. මුතු අපිට ලබා දෙන්නෙ මුතු බෙල්ලන් විසින්.මුතු බෙල්ලන් ජීවත් වන්නේ මීටර් තිහක් හතළිහක් පමණ ගැඹුරු මුහුදු තීරයේ.නමුත් අද වෙන විට කෘත්‍රිමව බෙල්ලන් වගා කිරීමෙන් ලබා ගත හැකි මුතු ෆාම් ක්‍රමයක් මිනිසුන් විසින් පවත්වාගෙන යනවා.මෙසේ වගා කළ මුතු ලස්සනට පැලඳීම සිදු කළ හැකියි. නමුත් එහි කිසිදු විශ්වශක්ති ආකර්ෂණයක් නම් සිදු වන්නේ නැහැ. මොකද ඒවා මිනිසා විසින් මුලපිරූ සංසිද්ධියකින් බිහිවන දෙයක් නිසා. හරියටම කියනවා නම් කෘත්‍රිම මැණික් ගලක් වගේ. මේ අර්ධ කෘත්‍රිම මුතු අපි 'කල්ච පර්ල්' ලෙස හඳුන්වනවා. මේ නිසා ඔබ මුතු කිසියම් ග්‍රහ බලපෑමකට හෝ විශ්ව ශක්ති ආකර්ෂණය ලබා ගැනීමට පලඳින්නේ නම් 'කල්චර් මුතු' පැලඳීම තුළ කිසිදු සෙතක් අත්නොවන බව ඔබට කිව යුතුයි. වෙළෙඳපොළේ බොහෝ සාප්පුවල මේ ස්වාභාවික මුතු කියල ඔබට ලබා දෙන්නෙ අර්ධ කෘත්‍රිම කල්චර් මුතු. මේ කල්චර් මුතු වෙළෙඳපොළේ කැරට් එකක් රුපියල් පන්සියයේ සිට රුපියල් දෙදහස පන්දහස ආදියෙන් මිල කරනවා. නමුත් ස්වාභාවික මුතු මීට වඩා බොහෝම මිලයි. ඒ වගේම ස්වාභාවික මුතු අපි මනින්නෙ එහි ඇති බරෙන් පමණක් නොවෙයි. එහි වපසරිය මිලි මීටර්වලින් මැන ඒ අනුව ස්වාභාවික මුතු මිල කරනවා.
ඉස්සර අපේ ලංකාවෙ මන්නාරම් ප්‍රදේශයේ මුහුදු තීරයේ මේ මුතු කිමිඳීම සිදු කළා. මුතුවල වටිනාකම සහ ශක්තිය නිසා ඉපැරැණි රජවරු මුතු කිමිඳීමට වෙනමම කණ්ඩායම් පවා යොදවා සාගර පත්ලේ ඇති මේ මහා ධන නිධාන ලබාගනු ලැබුවා.මුතු බෙල්ලාගෙන් ලබා ගන්නා මේ මුතු සෑදී තිබෙන්නෙ කැල්සියම් කාබනේට් කියන රසායනික සංයුතියෙන්. මුතු බෙල්ලාගෙන් ලබාගත් පසුවත් වසර දහස් ගණනක් ජීවී තත්ත්වයේ තිබෙන සෛල ගොනුවක් වන මුතු පැලඳීම තුළ අපට වරප්‍රසාද රැසක් හිමිවනවා. සඳුගේ දශා කාලවලත් සඳු දුර්වලව සිටින අවස්ථාවලත් ජේ‍යාතිෂයට අනුව පලඳින මුතු බොහෝ දෙනකුට පැලඳීම ඉතා යෝග්‍යයි.රූසපුව වැඩීමට උදවු වන ලොව ඇති එකම සහ හොඳම මැණික් වර්ගය ලෙස මුතු අපිට හඳුන්වා දෙන්න පුළුවන්. ඒ නිසයි බොහෝ රජ කුමරියන්, සිටු කුමරියන් එකල නිතර තම ගෙල මුතු පොටකින් සරසා හැඩ වුණේ.ඒ විතරක් නොවේ අදටත් එංගලන්ත මහ රැජන වගේම අනෙකුත් ප්‍රභූ කාන්තාවනුත් මේ ස්වාභාවික මුතු පැලඳීම අමතක කරල නැති වග ඔවුන්ගේ ආභරණ දෙස මඳක් විමසිල්ලෙන් බැලුවොත් ඔබටත් පෙනී යාවී. මුතු පැලඳීම තුළ නිරෝගිමත් සමක්, නිරවුල් මානසික ශක්තිය, දත්වල ආරක්ෂාව, නියවල ආරක්ෂාව සහ සමෙහි දිදුලන ස්වභාවයත්, තරුණ භාවයත් ආරක්‍ෂා වනවා. තම රූප ස්වභාවයට ඇලුම් කරන එය වැඩිදියුණු කර ගැනීමට පැලඳීමට කදිමම මැණික් වර්ගය මුතු බව ඔබට ඉදිරිපත් කරන්නෙ සඵල වූ බොහෝ පාරිභෝගික අත්දැකීම්ද ඇතිවයි.
මව්බිම
