කාලි මෑණියන්ගේ පිහිට

විශ්වයේ සැගවුණු බලවේගය කාලි මෑණියන් බව සත්‍යයකි. දෙස් විදෙස් ඕනෑම තැනක සිටින දුකට පත් පුද්ගලයකු කාලි මෑණියන් මා සමගයි යන්න මෙනෙහි කළහොත් ඇයගේ පිහිට විශ්වය තුළින් ඔහුට ළංවන බව මහා භද්‍රකාලි කෝවිලේ මහේන්ද්‍රන් සාමි පවසයි. කාලි මෑණියන් පිහිට ඉල්ලා අයැදින අයකුගේ හෘද සාක්ෂිය අවංකවම නිර්දෝෂීද යන්න සුළු මොහොතක් ඇතුළත කාලි මෑණියෝ හඳුනාගනිති.

හංවැල්ලට නුදුරු ප්‍රදේශයක පරම්පරාවෙන් පරම්පරාවට කාලි මෑණියන් ඇදහීම නිසා දියුණු වූ පරපුරක එකම පවුලේ නිවුන් සොහොයුරන් දෙදෙනකු ගමේ තරුණයන් පිරිසකට දියුණුවේ දොර හැර දෙන්නට ගොස් අමාරුවේ වැටුණු අවස්ථාවක කාලි මෑණියන් ඔවුන් බේරාගත් අන්දම කියන්නට මෙවරත් හඬ අවදි කර සිටියේ මහා භද්‍රකාලි කෝවිලේ මහේන්ද්‍රන් සාමිය. ඒ අතීත සිද්ධිය ගැන මහේන්ද්‍රන් සාමි කීවේ මෙසේය. මම මේ කියන නිවුන් සහෝදරයන් දෙදෙනා සවුදි රාජ්‍යයේ රැකියාවකට ගියේ දැනට වසර 10කට පෙර. ඒ පවුල්වල අයට අතීතයේ සිට දියුණුවට අත දුන්නේ කාලි මෑණියන් කියලයි ඒ අය කීවේ. හිත හොඳ දූ දරුවන් පිරිස ගෙවී ගිය කාලය තුළ ඉඩකඩම් යාන වාහන අරන් සතුටින් ජීවත් වුණු පිරිසක්. ඒ අයගෙ පවුල්වල වැඩි පිරිසක් මාස දෙකකට වරක් කාලි කෝවිලට ඇවිත් මෑණියන්ට අභිෂේක පූජා පැවැත්වූවා. ඒ මොකද ඒ අයට වසරින් වසර ඒ අයගෙ ආදායම් මාර්ග වැඩිදියුණු වුණු නිසා ආදායමෙන් කොටසක් වෙන් කළේ කාලි මෑණියන්ට. මේ අය සතුටින් ජීවත් වනු දැකීමෙන් ගමේ සමහර දෙනා ඒ අයට ඊර්ෂ්‍යා කළා. සවුදි රාජ්‍යයේ ගිණුම් ලිපිකරුවකු සහ ඉන්ධන පිරවුම්හලක් භාරවයි ඒ නිවුන් සොහොයුරන් රැකියා කළේ. ඒ දෙන්නා නිතරම කල්පනා කළේ ගමේ ඉන්න ඒ අයගෙ පාසල් වියේ සිට මිතුරන්ව සිටි දෙතුන් දෙනකුට හරි උදව් කරන්න ඕනෑ කියල. ඒ නිවුන් සොහොයුරන් දෙන්නත් මාස්පතා ගන්න වේතනයෙන් කොටසක් එහෙ ඉඳන් කාලි මෑණියන් උදෙසා වෙන් කළා. මේ නිවුන් සොහොයුරන් දෙන්න නැවතිලා සිටිය බෝඩිමේ තවත් විදේශිකයන් කීපදෙනකු හිටියා. නීග්‍රෝ අප්‍රිකානු ජාතිකයකුද ඒ අතර සිටියා. එතැන සිටිය නරකම මිත්‍රය තමයි නීග්‍රෝ ජාතිකයා. ඒ අය නිතරම මේ නිවුන් සහෝදරයන්ගේ ඇසුර පැතුවත් මේ අය එයට කැමැත්තක් දැක්වූවේ නැහැ. මේ නිවුන් සහෝදරයන් දෙන්න හය මාසයකට සැරයක් ලංකාවට ආවා. ඒ ආව වෙලාවක ගමේ හිටිය පාසල් මිතුරන් දෙන්නෙක් මේ අයගෙන් විදේශ රැකියාවක් සොයල දෙන්න කියල ඉල්ලා සිටියා. මේ නිවුන් සහෝදරයන් දෙන්න ගමට ආවත් කාලි කෝවිල විතරක් නෙවෙයි, ගමේ පන්සලත් අමතක කළේ නැහැ. ඒ අය කාලි කෝවිලට ආව දිනක සවුදියේ ඉඳල ඇවිත් සිටිය තවත් පිරිසක් කෝවිලේදී හමුවුණා. එදා ඒ දෙගොල්ල අතර අලුත් මිතුදමක්ද ඇතිකර ගත්තා. මේ අහඹු හමුවීම ගැන ඒ අයට ඇතිවුණේ හරිම සතුටක්. මේ නිවුන් සහෝදරයන් ලංකාවෙ නැති හැම අවස්ථාවකම කෝවිලට ආවෙ ඒ අයගෙ මවුපියන්. ඒ ආව හැම වෙලාවකම සිහිපත් කළේ සවුදි රාජ්‍යයේ රැකියා කරන නිවුන් දරුවන් දෙදෙනා ගැන.

මේ නිවුන් දරුවන් එදා නිවාඩුවට ඇවිත් ආපසු යනකොට ගමේ හිතවත් මිතුරන් දෙදෙනකුගේ අයැදුම්පත් අරන් තමයි ආපසු ගියේ. ඒ ගිහින් මාස දෙකක් යන්න කලින් ගමේ මිතුරන් දෙන්නටත් සවුදියේ රැකියා දෙකක් ලබාදෙන්න ඒ අයට හැකිවුණා. ඒ දෙන්නටත් රැකියා ලැබුණේ මේ නිවුන් සොහොයුරන් රැකියා කරන තැනට නුදුරෙමයි. ඒ එක් අයකුට හෝටලයකත් අනික් අයට ඉන්ධන පිරවුම්හලකත් රැකියාවල් ලැබුණා. මේ අය ගෙන්වාගත් යහළුවන් දෙදෙනාත් බෝඩ් කරගත්ත මේ අය සිටින තැනමයි. සති, මාස ගණනක් ගෙවී යද්දී ගමේ තරුණයන්ට නිවුන් සොහොයුරන් දෙදෙනාගෙන් වෙන්වී වෙනත් බෝඩිමකට ගියේ මුල අමතක කරදාල. ඒ අය ගිය අලුත් බෝඩිමේ වැඩිහරියක්ම හිටියේ විදේශිකයන්. මේ අයට එතැනට යන්න පාර කපල දීල තිබුණෙ අර නිවුන් සහෝදරයන් සිටින බෝඩිමේ හිටිය නීග්‍රෝ ජාතිකයා. මෙයාල ගමෙන් ගිය තරුණයන් දෙන්න එක්ක අලුත් බෝඩිමට ගිහින් තිබුණා. ඒ තුන්දෙනා රාත්‍රි කාලයේ සාප්පු සවාරිවල යෑම පුරුද්දක් කරගෙන තිබුණා. සමහර දිනවලදි ඒ අය සවුදි වෙළෙඳ සල්වලින් භාණ්ඩ සොරාගැනීමට පෙලැඹී සිටියා. එහෙම කරගෙන ගිහින් හය මාසයක් යන්නත් පෙර ඒ තුන්දෙනා සවුදි පොලිසියට හසුවුණා. එහෙ හිටපු නිවුන් සහෝදරයන් සමග සිටි ගමේ හිතවතුන් දෙදෙනා නීග්‍රෝ ජාතිකයා සමග සම්බන්ධ වීම නිසා තමයි සොරකම්වලට අහුවෙලා තියෙන්නෙ. නමුත් ඒ අය සොරාගත් භාණ්ඩවලින් කීපයක් නිවුන් සහෝදරයන්ගෙ බෝඩිමේ කාමරය තුළත් පරිස්සමට තියල තිබිල. මේ අයත් ඒ සොරකමට අහුවුණා. ඒ විතරක් නෙවෙයි නීග්‍රෝ ජාතිකයා සමග සිටි නිවුන් සොහොයුරන්ගෙ ලාංකික හිතවතුන් දෙන්න ඒ කාලෙ ඉඳන් මේ අයගෙ කාමරේ අතිරේක යතුරක් පාවිච්චි කරල නිවුන් තරුණයන් දෙන්නා රෑ වැඩට යන දිනවලට ඒ බෝඩිමේ කාමරය තාවකාලිකව කුලියටත් දීමේ සිරිතක් තිබිල තියෙනවා. ඒ සඳහා ඔවුන් සතු අතිරේක යතුරක්ද පාවිච්චි කළා. ඒ යතුරු සවුදි පොලිසියට අහුවුණ නිසා තමයි නිවුන් සහෝදරයොත් පොලිසි ගෙන ගියේ. තම නිවුන් දරුවන් දෙන්නා සවුදි පොලිසියට අහුවුණ සිද්ධිය දැනගත්න දවසෙ ඉඳන් ඒ අයගෙ මවුපියන් හැඩූ කඳුළින් තමයි පසුවුණේ.

ඒ ඥාති පිරිස එකට එකතු වෙලා කාලි කෝවිලට ඇවිත් දරුවන් බේරා දෙන්න කියල කාලි මෑණියන් ඇයැද සිටියා. සවුදි ඉන්න නිවුන් තරුණයන් දෙදෙනාගෙ මවුපියන් කාලි මෑණියන්ට අමුත්තක් නොවෙයි. ඒ අයගෙ අනෙක් ඥාති පිරිසද ඒ පවුලේ අය අනුගමනය කරමින් කාලි කෝවිලට ඇවිත් නිවුන් තරුණයන් දෙදෙනා ගැන සිහි කරමින් කාලි මෑණියන්ට බාරහාර සිදුකළා. ඒ ඇවිත් දින 21ක් ගෙවුණේ නැහැ අහක යන ප්‍රශ්නයකට මැදිවෙලා සවුදි පොලිසිය අත්අඩංගුවට ගත් නිවුන් තරුණයන් දෙදෙනා පමණක් නිදහස් කළා. ගමේ අයට අතදෙන්න ගිහින් අමාරුවෙ වැටිල මාස තුනක් විතර දුක් වින්ද ඒ නිවුන් තරුණයන් දෙදෙනා ලංකාවට ආවත් ඒ අය ගමේ ඉඳන් ගිය හිතවතුන් දෙදෙනාට දොස් තැබීමෙන් වැළකී සිටියා. මේ නිවුන් තරුණයන් දෙදෙනා පමණක් නිදහස් වීම ගැන ඒ අය කාලි මෑණියන්ට හදවතින්ම ස්තූතිය පුද කළේ මෑණියන්ට පුද පූජා දෙමින්. ඒ අය කාලි කෝවිලට ආවෙ මවුපියන් සමගයි. ඒ ඇවිත් ගිහින් සති දෙකක් ගෙවී ගියේ නැහැ ඒ නිවුන් සහෝදරයන් දෙන්නට කුවේට් රාජ්‍යයේ රැකියාවල් ලැබුණා. එහෙම ලැබුණේ මේ දෙන්න සවුදි රැකියා කළ ප්‍රධාන සමාගමේ මේ දෙන්න හොඳින් වැඩ කළ නිසා. ඒ අයගෙ ඊළග ශාඛාව තිබුණ කුවේට්වල රැකියාවක් ලබාදෙන්න ඒ අය කැමැති වී තිබුණා. මේ නිවුන් සොහොයුරන් දෙන්න ගමෙන් අරන් ගිහින් සවුදි රැකියා ලබාදුන්න කෙළෙහිගුණ නොදත් හිතවතුන් දෙදෙනාට සවුදියේදී සිර දඬුවම් විඳින්නට සිදුවුණා. විදේශ රටකදි අනුන්ගේ දුකට පිහිට වී තමන් අමාරුවේ වැටෙන පුද්ගලයන්ට වුව කාලි මෑණියන්ගේ දහසකුත් දෑස් විහිදා පිහිටවූ ආකාරය එම සිද්ධියෙන් පැහැදිලිව ඔප්පු වන බව පවසමින් කාලි කෝවිලේ මහේන්ද්‍රන් සාමි සිය කතාව අවසන් කළා.

උපුටා ගැනීම මව්බිම පුවත්පත ඇසුරෙනි