This site has features that require javascript. Follow these simple instructions to enable JavaScript in your web browser.
Sithmal Yaya
අංක විද්‍යාවෙන් පැවසෙන ඔබේ යුගදිවි වගතුග
අංක විද්‍යාව යනු පෙරදිග මෙන්ම අපරදිග රටවලත් එකසේ අනුගමනය කරන සුවිශේෂී විද්‍යාවකි. යම්කිසි පුද්ගලයකුගේ නම, යම් ස්ථානයක නමක් වැනි දෙයක් අංකමය අගයක් බවට පරිවර්තනය කොට, ඒ ඇසුරින් යම් යම් පලාපල ප්‍රකාශ කිරීම මෙහිදී සිදුවේ. මෙහි ඇති වැදගත්ම දෙය වන්නේ ඕනෑම අයෙකුට මෙම විද්‍යාව පහසුවෙන් අනුගමනය කරන්නට හැකිවීමය. අප කතාබහ කරන්නට යන්නේද එවැන්නක් පිළිබඳවය. එනම් විවාහය පිළිබඳ අංක විද්‍යාවෙන් දැනගත හැක්කේ කුමක්ද යන්න පිළිබඳවය. විවාහකයන් මෙන්ම විවාහ වන්නට බලා‍පොරොත්තුවෙන් පසුවන්නන් සිය විවාහ දිවිය පිළිබඳ අනාවැකි දැනගැනීමට දක්වන්නේ ඉමහත් කැමැත්තකි. මේ කැමැත්ත සපුරා ගැනීම සඳහා අංක විද්‍යාව යොදාගන්නේ කෙසේද යන්න පැහැදිලි කිරීම මෙම ලිපියේ අරමුණය. අංක විද්‍යාවට අනුව කාන්තාවකගේ හා පුරුෂයකුගේ අංක අතර ගැළපීමක් සිදුවන්නේ නම් එතැන විවාහයක් සිදුවේ. අංක අතර ගැළපීමක් සිදු නොවන්නේ නම් එය විවාහයක් සඳහා සුදුසු නැති බැව් පැවසේ. අපි මුලින්ම නමක් අංක බවට හරවාගන්නේ කෙසේ දැයි සොයා බලමු. ඒ සඳහා අපට පහත දැක්වෙන වගුව අවශ්‍ය වේ. මෙහි 1 - 9 දක්වා අංකත්, එම අංකවලට අදාළව ඇති ඉංග්‍රීසි අක්ෂරත් දක්නට ලැබේ. අපි දැන් නමක් අංකයක් බවට හරවා ගන්නා ආකාරය උදාහරණයකින් විමසා බලමු. උදාහරණයක් ලෙස අපි ‘කාන්ති’ යන නම සලකා බලමු. මුලින්ම ‘කාන්ති’ යන්න ඉංග්‍රීසි බසින් ලියාගනිමු. K A N T H I 2 1 5 2 8 9 දැන් අපි මේ අංක සියල්ල එකතු කරමු. අංක 27 අපට යළි කුඩා කළ හැකිය. 2 + 7 = 9 එවිට ‘කාන්ති’ යන නම සඳහා ලැබෙන්නේ අංක 9යි. අංක විද්‍යාවට අනුව නමක් සඳහා අවසානයට ලැබිය යුත්තේ තනි අංකයකි. නමක් අංකයක් බවට හරවා ගන්නා ආකාරය දැන් අපි දැනගතිමු. ඔබ විවාහක අයකු නම් හෝ විවාහවන්නට බලා‍පොරොත්තුවෙන් සිටින්නේ නම් ඔබ දෙදෙනාගේම නම් සඳහා වෙන් වශයෙන්වූ අංක සොයා ගන්න. ඉන්පසුව මෙහි දැක්වෙන ආකාරයට අනුව විවාහ දිවිය පිළිබඳ යම් අදහසක් ඔබට ලබාගන්න පුළුවන. අංක විද්‍යාවට අනුව දෙදෙනාගේම අංකය 1 නම්, ඔවුන්ගේ සබඳතාව තුළ යම්කිසි තරගකාරී බවක් දක්නට ඇතැයි පැවැසේ. ඔවුනට ඇත්තේද එක හා සමාන හැඟීම්ය. මෙහි ප්‍රතිඵලයක් ලෙස පවු‍ලේ යම් යම් අර්බුද ඇතිවන්නට පුළුවන. එක් අයෙකුට පිහිටියේ අධික ලෙස කෝපගැන්වෙන පුරුද්දක් නම් අනෙ’කාටද එය නොඅඩුව පිහිටයි. එවිට මතභේදාත්මක අවස්ථාවක් උද්ගතවූ විට තත්ත්වය භයානක වන්නට පුළුවන. යම් අයුරකින් කාන්තාවගේ අංකය 2 නම් තත්ත්වය මෙයට වඩා වෙනස් වේ. පුරුෂයාගේ අංකය 1 වී කාන්තාවගේ අංකය 3 වී නම්, එය ඉතා සුබදායක වේ. ඔවුන්ගේ විවාහය ආදරය හා සෙනෙහස රජයන්නක් වන්නේය. කාන්තාවගේ අංකය 4 වී නම් එම යුවළ අතර අහේතුව අඬදබර ඇතිවන්නට පුළුවන. එවිට නිවසේ සාමකාමී වටපිටාව අඩු වේ. කාන්තාවගේ අංකය 5 වී නම් විවාහ ජීවිතය ප්‍රීතිමත් හා සමාකාමී වේ. යම්කිසි තරුණියකගේ අංකය 5 හෝ 7 නම් ඇයට ගැළපෙන්නේ අංක 1 හිමි තරුණයෙකි. එවිට ඔවුනගේ ජීවිතය ප්‍රීතිමත් එකක් වනු ඇත. කෙසේ මුත් තරුණියගේ අංකය 6 හෝ 8 වී, ඇය අංක 1 හිමි තරුණයකු හා විවාහ වූයේ නම්, විවාහ ජීවිතය ප්‍රසන්නශීලී නොවනු ඇත. මනාලයාගේ අංකය 2 වී මනාලියගේ අංකය 1 හෝ 7 වූයේ නම් විවාහ ජීවිතයේ කරදර ඇතිවන්නට පුළුවන. තරුණයාගේ අංකය 2 වී, ඔහු අංක 2 හැර වෙනත් ඕනෑම අංකයක් හිමි තරුණියක හා විවාහ වූයේ නම් විවාහ ජීවිතය සතුට උතුරායන්නක් වනු නොඅනුමානය.කෙසේ නමුත් සතුට හා දුක යනු ඕනෑම අයෙකුගේ ජීවිතයට වරින්වර පැමිණෙන්නකි. යම්කිසි තරුණයකුගේ අංකය 3 වී, ඔහු අංක 3, 4 හෝ 5 හිමි තරුණියක හා විවාහ වූයේ නම්, අංක විද්‍යාවට අනුව ඔවුනගේ විවාහ ජීවිතය ප්‍රසන්නශීලී එකක් වනු නිසැකය. තරුණයාගේ අංකය 3 වී තරුණියගේ අංකය 7 වී නම් ඔවුනගේ ජීවිතයට දුක හා සතුට එක හා සමානව ලැබේ. තරුණියගේ අංකය 3 නොවූයේ නම් ඇයට අංක 3 හිමි තරුණයකු හා විවාහ වන්නට ලැබුණේ නම් ඔවුනගේ ජීවිතයද කිරියෙන් පැණියෙන් උතුරන්නක් වන්නේය. පුරුෂයාගේ අංකය 4 වී කාන්තාවගේ අංකය 2, 4 හෝ 5 වී නම් ඔවුනගේ ගෘහ ජීවිතය වාසනාවන්ත වන්නේය. පුරුෂයාගේ අංකය 4 වී කාන්තාවගේ අංකය 6 හෝ 8 වී නම් ඔවුන් සිය විවාහ ජීවිතය තුළදී දුෂ්කරතාවන්ට මුහුණ නොදෙනු ඇත.පුරුෂයාගේ අංකය 5 නම්, ඔහු විවාහ විය යුත්තේ අංක 1, 2, 5, 6 හෝ 8 හිමි කාන්තාවක් සමගිනි. ඔබ අංක 4 හෝ 7 සහිත තරුණියක් නම් ඔබට සාමාන්‍ය විවාහ ජීවිතයක් හිමිවනු ඇත. ඔබ වෙනත් අංකයකට අයිති වූයේ නම්, විවාහ ජීවිතයේ ගැටලුවලට මුහුණ දෙන්නට සිදුවන නොඅනුමානය. අංක 6 හිමි තරුණයෙක් වෙත්නම් ඔහු විවාහ විය යුත්තේ අංක 1 හෝ 6 හිමි තරුණියක සමගිනි. තරුණියගේ අංකය 2 හෝ 4 නම්, එවිට ඇයට යහපත් විවාහ දිවියක් නොලැබෙන්නට ඉඩකඩ තිබේ. පුරුෂයාගේ අංකය 7 වී කාන්තාවගේ අංකය 1, 3 හෝ 6 නම්, දෙදෙනා අතර ආදරයෙන් පිරුණු විවාහයක් හිමිවන්නේය. කාන්තාවගේ අංකය 5, 8 හෝ 9 නම්, ඇයට විවාහ ජීවිතයේ යම් යම් ගැටලු ඇති වුවද, සමස්තයක් ලෙස ඇයට සාමාන්‍ය විවාහයක් හිමි වේ. ඇය වෙනත් අංකයකට අයිති වූයේ නම් ඇගේ විවාහ ජීවිතය සැපවත් එකක් නොවනු ඇත. යම්කිසි පුරුෂයකුගේ අංකය 8 නම්, ඔහුට අංක 5, 6 හෝ 7 හිමි කාන්තාවක හා විවාහ වීමෙන් ප්‍රීතිමත් විවාහ දිවියක් හිමිවන්නේය. ඔහු අංක 2 හෝ 3 හිමි කාන්තාවක හා විවාහ වූයේ නම්, විවාහ ජීවිතය සාමාන්‍ය තත්ත්වයකින් පවතිනු ඇත. ඔහු මේ අංක හැර වෙනත් අංක හිමි කාන්තාවක හා විවාහ වූයේ නම්, විවාහ ජීවිතය තවත් පහළට වැටෙනු නිසැකය. අංක 9 හිමි පුරුෂයකුට විවාහ වන්නට සුදුසු කාන්තාවන් අයත් වන්නේ අංක 1, 2, 3, 6 හෝ 9 යන අංකවලටය. අංක 5 හෝ 7 හිමි කාන්තාවක හා විවාහ වූයේ නම් විවාහය සාමාන්‍ය තත්ත්වයක පවතිනු ඇත. අංක 4 හෝ 8 හිමි කාන්තාවන් ඔහුට ගැළපෙන්නේම නැත. කෙසේ මුත් මෙය ‍පොරොන්දම් ගැළපීමක් ලෙස වරදවා වටහා නොගත යුතුය. මේවායේ සත්‍ය අසත්‍ය බව කෙතරම්ද යන්න පිළිබඳ අපට කිසිවක් පැවැසිය නොහැකිය. නමුත්, මෙසේ කෙරෙන අංක විශ්‍ලේෂණයෙන් හෙළිවන තොරතුරුවල යම් සත්‍යතාවක් ඇතැයි ඔබට සිතෙන්නේ නම්, එවිට ඔබගේ වැරදි හා අඩුපාඩු නිවැරදි කරගෙන ඔබගේ සහකරු හෝ සහකාරිය සමග සතුටින් ජීවත්වන්නට පුළුවන. මෙවැනි විද්‍යාවන්ගේ අරමුණ වන්නේද එයයි. නිරංජන් චාමින්ද කරුණාතිලක උපුටා ගැනීම ලක්බිම පුවත්පත