විදේශගමන් හෙළිකරන රේඛා
අප සමාජයේ වැඩි දෙනෙක්‌ විදේශ ගතවීමට සිහින මැව්වත් එම සිහින සැබෑ වෙන්නේ කීයෙන් කීදෙනාටද... සමහරු රැකියා සඳහා විදේශගත වෙයි. තවත් සමහරු ව්‍යාපාර කටයුතු සඳහා විදේශගත වෙයි. තවත් සමහරුන්ට එවැන්නක්‌ ඉටුකර ගැනීමට දෛවය අනුවද ඉඩ සැලසී තිබිය යුතුයි. ඒ අනුව විදේශ ගතවීමේ වාසනාවක්‌ ඇත්නම් ඒ බව අපේ අත්ලේ රේඛාවලිනුත් සටහන් වෙයි. අද අපි සාකච්ඡා කරන්නේ ඒ පිළිබඳවයි. දැන් අපි බලමු කෙනකුගේ අත්ලේ විදේශ ගමන් රේඛා පිහිටන්නේ කුමන ආකාරයෙන්ද කියා, එම රේඛාවල සාර්ථක අසාර්ථක භාවය කෙසේද කියා.
ජීවන රේඛාවේ කෙළවරින් එනම් මැණික්‌ කටුව ප්‍රදේශයෙන් පටන් ගන්නා චන්ද්‍ර මණ්‌ඩලය හරහා ඇදී යන රේඛා වන (AA) දේශාටන රේඛා හෙවත් විදේශ ගමන් රේඛා ලෙස හඳුන්වයි. මෙම රේඛා චන්ද්‍ර මණ්‌ඩලයෙන් සිරස්‌ව හෝ හරස්‌ව පිහිටිය හැක. මෙම රේඛාවන් ඉතා පැහැදිලිව ගැඹුරුව රෝස පැහැයෙන් යුක්‌තව පිහිටා ඇත්නම් ඉක්‌මනටම විදේශ ගමනකට වාසනාව ලැබෙන අතර එම විදේශ ගමනද සාර්ථක එකක්‌ වනු ඇත. එම රේඛාව අඳුරුව, කැඩී බිඳී පළුදු වී ඇත්නම් එම ගමනින් කෙනකුට බාධා කරදරවලට මුහුණපෑමට සිදුවෙන අතර තමන්ගේ අරමුණද ඉටු නොවනු ඇත.
මැණික්‌ කටුව ආසන්න ප්‍රදේශයෙන් ආරම්භ වන රේඛා හැරෙන්නට විදේශගත වීමට බලපාන තවත් රේඛා කීපයක්‌ ගැන දැන් බලමු.
මේ සමග රූප සටහනේ B B ලකුණු දෙස බලන්න. මේ අයුරින් ජීවන රේඛාවේ පහළ කොටසින් එක්‌ රේඛාවක්‌ සිකුරු මණ්‌ඩලයටත්, තව රේඛාවක්‌ චන්ද්‍ර මණ්‌ඩලයටත් ගොස්‌ දෛව රේඛාවට සම්බන්ධ වීමද විදේශ ගමන් පෙන්නුම් කරයි. මෙම රේඛාවන්ගේ විශේෂත්වය නම් එය විදේශ සංචාරය කිරීම සඳහා බලපෑම් කරන රේඛාවක්‌ වීමය. මෙය බොහෝ ක්‍රියාශීලී අත්වල දක්‌නට ඇත. මේ හේතුව නිසා තමන්ගේ ගම රට දෙමාපිය සහෝදර සහෝදරියන්ගෙන් ඈත්ව විදේශ රටවල ජීවත් වෙති. මෙවැනි අයට වෙන්වීමේ කාන්සියක්‌ නොදැනේ. තම මව්බිම පිළිබඳ හැඟීම්ද අඩුවේ. එක තැනක වාඩිවී රැකියාවක්‌ කිරීමට වඩා ඔවුන් නිතර එහා මෙහා ඇවිදීමට ක්‍රියා කිරීමට ප්‍රිය කරති. ඉහත රේඛා දෙකම හොඳින් ඝනව වැඩී ඇත්නම් ඔවුන් කරන ව්‍යාපාර කටයුතු වඩාත් සාර්ථක වෙයි. වැඩි ලාභ පෙන්නුම් කරයි. එම රේඛා කැඩී බිඳී දූපත් සලකුණුවලින් යුක්‌ත නම් අධික ලෙස පාඩු වෙන අතර තම ධනයද නාස්‌ති වේ.
චන්ද්‍ර මණ්‌ඩලයෙන් තිරස්‌ අතට හෝ සිරස්‌ අතට ගමන් කරන රේඛා A A මුහුදු ගමන් පිළිබඳව පෙන්නුම් කරයි. එම රේඛා දීර්ඝ නම්, විදේශ ගමන් හෙළිකරයි. එම රේඛාව සමග දූපත් සලකුණක්‌ තිබුණහොත් ගමනින් සිදුවන මාරක අනතුරක්‌ පෙන්වයි. කතිරයක සලකුණක්‌ ඇත්නම් ගමන නිෂ් ප්‍රයෝජන එකක්‌ වනු ඇත. චතුරස්‍රයක්‌ ඇතිනම් ගමනින් සිදුවන අනතුරුවලින් ආරක්‌ෂා කරනු ලබයි. තාරකාවක්‌ සමග චතුරස්‍රයක්‌ ඇතිනම් අනතුරක්‌ සිදු නොවේ. මුලින් සඳහන් කළ සංචාරක රේඛාවන් ඉහළට හැරී ගුරු මණ්‌ඩලය හෝ රවි මණ්‌ඩලය හෝ බුධ මණ්‌ඩලය හෝ කුජ මණ්‌ඩලය දෙසට හැරී ඇතිනම් ගමනින් වාසි සිදු වේ.චන්ද්‍ර මණ්‌ඩලයෙන් ඉහළට ගමන්ගත් රේඛාවන් තරුවකින් හෝ කතිරයකින් අවසාන වී ඇතිනම් ගමනේ බලාපොරොත්තු කඩවේ. චතුරස්‍රයකින් අවසාන වූ විට ගමනින් ඔහුට සිදුවන අනතුරක්‌ වළකන බව පෙන්නුම් කරයි. දූපතින් අවසාන රේඛා ඇතිවීම වැඩි ප්‍රයෝජනයක්‌ ලැබීමට හේතුවෙයි. මෙම රේඛාවන් ඉහළට ගමන් කර ගුරු මණ්‌ඩලයටද (දබරැඟිල්ල මුල) යා හැක. එයද ඔහුගේ ගමන වඩාත් සාර්ථක වීම හෙළිකරන සලකුණකි. මෙම රේඛා ශනි මණ්‌ඩලය දෙසට විහිදයැමද සුබ නොවේ. ගමනේදී සිදුවන අනතුරක්‌ එමගින් පෙන්නුම් කරයි. මෙම රේඛාවන් රවි මණ්‌ඩලය හෝ බුධ මණ්‌ඩලය දෙසට යැම මිල මුදල් මෙන්ම උසස්‌ තනතුරු ලැබීමටද හේතුවෙයි. තිරස්‌ අතට පිහිටි රේඛාවන් චන්ද්‍ර මණ්‌ඩලය හරහා ගොස්‌ දෛව රේඛාවට සම්බන්ධ වන අවස්‌ථාද ඇත. එය දීර්ඝ ගමනක්‌ මෙන්ම වැදගත් ගමනක්‌ බව පෙන්වයි. දෛව රේඛාවට සම්බන්ධ වුණ රේඛාවක්‌ තවත් රේඛාවකින් කැපුණහොත් පළමුවර ගමනට බාධාවක්‌ වුවත් නැවත උත්සාහ ගැනීම හේතුවෙන් විදේශ ගමන සාර්ථක වෙයි.
C C සලකුණු මගින් පෙන්නුම් කරන චන්ද්‍ර මණ්‌ඩලයෙන් ඉහළට විහිදයන ඉතා කුඩා රේඛා මගින් පෙන්නුම් කරන්නේ තම මව්බිම වෙනුවෙන් රටේ යහපතට අදාළව රාජකාරි කටයුතු සඳහා විදේශගත වන බවය. විදේශ ප්‍රභූන් තානාපති අමාත්‍යවරු වැනි අය සම්බන්ධ වන විදේශ සම්මේලනවලට සහභාගිවීම සඳහා යන අයගේ අත්ලවල මෙම පිහිටීම් දැකිය හැක. එම රේඛා හොඳින් මනාව පිහිටීම අරමුණු සාර්ථක වන බව පෙන්නුම් කරයි.
හිඹුටානේ පියතිලක ද අල්විස්‌
උපුටා ගැනීම දිවයින පුවත් පත
.jpg "කෑම කන්න සුදුසුම වේලාව")
