බඳින්න පෙර බලන්න අත
විවාහ රේඛාව අත්ලේ සුළැගිල්ලට පහළින් හෘද රේඛාවට ඉහළින් බුධ මණ්ඩලයේ පිහිටා ඇත. මෙය පිටි අත්ලේ සිට හරස් අතට බුධ මණ්ඩලය මතින් ගමන් කරන ආකාරයට වේ. මෙයට සම්බන්ධතා රේඛාව, බන්ධන රේඛාව, කලත්‍ර රේඛාව, ආදර රේඛාව කියාද ව්‍යවහාර කරති. බොහෝ දෙනාගේ අත්වල මෙම රේඛා දෙක තුන පිහිටන්නේය. කිසියම් පුද්ගලයකුගේ අතක මෙසේ රේඛා දෙකක් හෝ ඊට වැඩි ගණනක් වෙතොත් ඒ ඒ රේඛාවන් ගණයට සමාන විවාහ මංගල්‍යයක් සිදු නොවේ. නමුත් ඇතැමුන්ගේ මතය එම රේඛා ගණන අනුව විවාහයන් සිදුවන බවය. එහෙත් එසේ සිදු නොවෙයි. එහෙම වන්නට නම් අත්ලේ ඒ බව වෙනත් රේඛා ලක්ෂණවලින් සටහන්ව තිබිය යුතුය. රේඛා එකකට වඩා වැඩියෙන් වැටී විට තිබීමෙන් වැඩිපුර ප්‍රේම සම්බන්ධතා ඇතිකර ගනියි. සමහර විට එකවර සම්බන්ධතා කීපයක් විය හැකිය. රේඛා එකකට වඩා වෙතොත් ඒවා අතුරෙන් දිග අනෙක් රේඛා ඉක්මවා ගිය රේඛාව විවාහ රේඛාව සේ ගණන් ගැනේ. අනෙක් ඒවා ඇති වී නැති වී ගිය ප්‍රේම සම්බන්ධතා පෙන්න්නු කරයි. රේඛාවල ප්‍රබලතාව අනුව සම්බන්ධතාවලද තත්ත්තවය විමසාගත හැකිය. විවාහයකට සුදුසුකම් ඇති බවද ඉන් ඉගියක් පළ කෙරේ.
කෙසේ වෙතත් විවාහ රේඛා එකක් පමණක් පිහිටීම සාර්ථක ගෘහ ජීවිතයක් ගත කරන ලක්ෂණයකි. මේ අතර විවාහ රේඛාව අත්ලේ ප්‍රදර්ශනය නොවන තැන්ද වේ. කිසිදා විවාහයක් සිදු නොවේ යෑයි එයින් නොසිතිය යුතුය. විවාහ වුනත් ඒ අයගේ සිතෙහි ප්‍රේමය, ආශාව, ආදරය, සෙනෙහස වැනි මානසික තත්ත්වයන් ඇති නොවන බව ඉන් පෙන්නුම් කරයි.
විවාහ රේඛාවද හෘද රේඛාවට සමීපව පිහිටා තිබීමෙන් ඉක්මන් විවාහයක් පෙන්නුම් කරයි. එවැනි අය වයස අවුරුදු 22 ට පළමුව විවාහ වේ. මෙම රේඛාව සුළැගිල්ලටත් හෘද රේඛාවටත් හරි මැදින් පිහිටා තිබේ නම් මධ්‍යම වයසේ හෙවත් වයස අවුරුදු 26 ත් 30 ත් අතර විවාහය සිදුවේ. සැළැගිල්ල ඉතා ආසන්නව විවාහ රේඛාව වැටී තිබේ නම් විවාහය ප්‍රමාද වන ලක්ෂණයකි. වයස අවුරුදු 45 ත් 52 ත් අතර විවාහය සිදුවේ. දෛව රේඛාවට නැගෙන බලපෑම් රේඛා අනුවද විවාහය සිදුවන වයස ගණනය කළ හැකිය. විවාහ රේඛාව හෘද රේඛාවට සමීප වන තරමට විවාහය ඉක්මන් වන බවද විවාහ රේඛාව හෘද රේඛාවෙන් දුරස්ථ වන තරමට හෙවත් සුළැගිල්ලට ආසන්න වන තරමට විවාහය ප්‍රමාද වන බවද මේ අනුව සිතාගත යුතුය.
විශේෂයෙන්ම විවාහය ගැන පරීක්ෂා කිරීමේදී සිකුරු මණ්ඩලය පරීක්ෂා කර බැලිය යුතු අතර විවාහ රේඛාව, චන්ද්‍ර මණ්ඩලය මෙන්ම දෛව රේඛාවට විහිදෙන බලපෑම් රේඛාද චන්ද්‍ර මණ්ඩලයෙන් ජීවන රේඛාවට නැගෙන අතු රේඛාද පරීක්ෂා කර බලා අවසාන නිගමනයක් ගත යුතු ය.
මෙම ලිපියේදී ඔබට පහසුවෙන්ම ඔබේ අත්ල පරීක්ෂා කර බලා විවාහය ගැන යම් පූර්ව නිගමනයකට එළැඹිය හැකි ආකාරයට විවාහ රේඛාව පිළිබඳව විස්තරයක් රූප සටහන් අනුසාරයෙන් ඉදිරිපත් කෙරේ. හස්ත රේඛා පරීක්ෂණයේදී පුරුෂයන්ගේ දකුණනත්, ස්ත්‍රීන්ගේ වමතත් පරීක්ෂා කිරීම පිළිගත් මතය වේ. එහෙත් දැතම පරීක්ෂා කර බැලිය යුතුය. වමත හුරු අයගේ අත් පරීක්ෂා කිරීමේදී ප්‍රධාන වශයෙන්ම වම් අත පරීක්ෂා කිරීම සුදුසු වේ. එමෙන්ම හස්ත පරීක්ෂණයකදී තමන්ගේ ඇගිලි තුඩුවලින් අත්ල සියුම් ලෙස පොඩිකර ගත යුතුය. එවිට අතෙහි ඇති රේඛා ලක්ෂණ මනාව පෙන්නුම් කරයි.
මෙය උඩු අතට (සුළැගිල්ල දෙසට) නැමී ගොස් තිබේ නම් විවාහය ප්‍රමාද වීමේ ලක්ෂණයකි. සමහරවිට විවාහයක් සිදු නොවිමටද පිළිවන. කෙටි රේඛාවකින් කැපී තිබේ නම් විවාහයට අවහිරකම් ඇති කරයි. විවාහ රේඛාව කැඩී තිබීමෙන් පෙන්නුම් කරන්නේ විවාහයේ පදනම දෙදරා යන බවයි. කැඩුණු තැන සමචතුරස්‍රයකින් වටවී තිබේ නම් බාධක වෙතත් වෙන් නොවේ. තිත් හෝ ලප මෙම රේඛාව මත වෙතොත් විවාහ ජීවිතය බාධක කරදර සහිතව ගත කරයි. විවාහ රේඛාව බොහෝ සෙයින් දික් වී තිබේ නම් තමාට වඩා උසස්, ප්‍රසිද්ධ කෙනෙකු සමග විවාහය සිදුවේ.
විවාහ රේඛාව හෘද රේඛාව දෙසට නැවීම යුග දිවිය අඩ දබර සහිතය. දෙදෙනා අතර නිතර නිතර ආරවුල් හටගනී.
විවාහ රේඛාව හෘද රේඛාවට හමුවේ නම් වෙන් වීමට සිදුවේ. විවාහ රේඛාව හෘද රේඛාව මතට වැටී කැපී තිබේ නම් දික්කසාදය හෝ විවාහ සහකාරයාට හෝ සහකාරියට මාරක අපල දෙන්නකි. විවාහ රේඛාව හෘද රේඛාවට නැමී තිබේ නම් තරුණ වියෙහිම බලාපොරොත්තු කඩ වීම සිදුවේ. එසේම විවාහ රේඛාව සෘජුවම බුධ මණ්ඩලයට ගොස් පහළට නැමී හෘද රේඛාව ස්පර්ශ කරයි නම් ජීවිතයේ අග භාගයේදී බලාපොරොත්තු සුන්වේ. මේ නිසා විශාල කනගාටුවක් ඇතිවේ.
දූපත් ලක්ෂණයක් විවාහ රේඛාව උඩ තිබීම නිසා ඒ අය පහත් විවාහයකට පත්වේ. දික්කසාදය වීමට පවා හේතුවන පිහිටීමකි.
දෛනික ජීවිතය අඩදබර සහිතව ගත කරයි. කලකිරීම් සහිත ආදරයක්ය. විවාහ රේඛාවේ මුල් දූපත් ලක්ෂණයක් පිහිටියේ නම් විවාහය ප්‍රමාද වේ. විවාහයට පෙර තිබුණු අයහපත් සබඳතා හේතුවෙන් විවාහය නීරස වන්නේය. විවාහය අසාර්ථක වන පිහිටීමකි. මෙම ලකුණ විවාහ රේඛාව මධ්‍යයෙහි පිහිටියේ නම් විවාහය සම්බන්ධයෙන් ආරවුල් ඇතිවේ. දික්කසාද වීමට සිදුවේ. මෙම ලකුණ විවාහ රේඛාව අග පිහිටියේ නම් යුග දිවියේ කෙළවර විනාශයකි. අවසාන භාගයේදී විවාහය කැඩී බිඳි යන්නේය. දෙදෙනා අතර නිතර ආරවුල් පවතී. විවාහ රේඛාව උඩ දූපත් ලක්ෂණ තිඛෙන කාලයේ විරහ වේදනා ඇතිවේ. ස්ත්‍රියකගේ අත් දෙකෙහිම විවාහ රේඛාව මත දූපත් ලක්ෂණ වෙතොත් විවාහක පුරුෂයකු හා ප්‍රේම සබඳතාවක් ඇතිකර ගනී. විවාහ රේඛාවේ දූපත් ලක්ෂණ පිහිටා ඇති අවිවාහක පුද්ගලයන්ට විවාහ දිවියට එළැඹෙන්නැයි අන්‍යයන් නිතර නිතර ඇවිටිලි කරන අතර විවාහකයකුගේ නම් විවාහ ජීවිතය පිළිබඳ කලකිරීමට පත්වේ.
විවාහ රේඛාව කරුවකින් අවසන් වේ නම් මුල් කාලයේ සාර්ථක විවාහ ගත කොට අවසාන කාලයේ වෙන්වෙයි හෙවත් විශාල බලාපොරොත්තු සහිතව ආරම්භ කරන ලද විවාහ දිවිය ඉතා අවාසනාවන්ත ලෙස කෙළවර වන්නේය. අන්‍යයන්ගේ මැදිහත්වීම් මෙයට හේතු සාධක විය හැකිය. විවාහ රේඛාවේ අග ඇති කරුවේ එක් අත්තක් හෘද රේඛාවට ස්පර්ශ වේ නම් විශාල අප කීර්තියක් යුක්තව දික්කසාද වන්නේය. භාර්යාවගේ සොහොයුරිය සමග සම්බන්ධතාවක් ඇතිකර ගන්නා පිහිටීමක් වශයෙන්ද මෙය දැක්විය හැකිය. කරු ලක්ෂණය පටුවට වෙත්නම් කලත්‍රයාගේ බාහිර කාරණයක් හේතුවෙන් විවාහය වෙනස් වේ.
විවාහ රේඛාව උඩ කතිර ලක්ෂණයක් පිහිටීම හේතුවෙන් යුග දිවියේ අවහිරතා ඇතිවේ. කාන්තා අත්ලක නම් ගබ්සා වීම් සිදුවිය හැක. විවාහ රේඛාව අවසානයේ කතිර ලක්ෂණයක් වේ නම් ස්වාමි පුරුෂයාට හදිසි අනතුරක් හෝ ක්ෂණික මරණයක් සිදුවීමට හේතුයි.
විවාහ රේඛාවේ තාරකා ලක්ෂණයක් පිහිටීම මගින් පෙන්වන්නේ විවාහයේ කැඩීමක් ඇතිවන බවයි. දික්කසාදය නැතොත් සහකරුගේ හෝ සහකාරියගේ මරණය සිදුවේ. මේ නිසා විශාල කනගාටුවක්ද ඇතිවේ. විවාහ රේඛාවේ අග තාරකා ලක්ෂණයක් තිබීම නිසා යුග දිවිය අඩ දබර සහිතව ගත කෙරේ. විශාල අපකීර්තියකින් පසුව විවාහය කෙළවර කරගනී. මෙවැනි පිහිටීමක් ඇති අත් හිමියන් අතර ආදරය කිරීමේදී විරුද්ධ පාර්ශ්වයෙන් අයුතු ප්‍රයෝජන ගැනීමට උත්සාහ කරයි.
කෙටි විවාහ රේඛාවක් තිබීම නිසා කෙටිකාලීන සබඳතා ඇතිවේ. විවාහ රේඛාව දිග නම් සබඳතාව බොහෝ කල් පැවැත්විය හැකිය. විවාහ රේඛාව දම්වැල් ආකාරයෙන් යුක්ත නම් කාමාධිකය. ආදරය සෙනෙහස නොහඳුනයි. විවාහයේ අවහිරතා ඇතිවේ. දිගින් හා ගැඹුරින් යුතු සෘජු විවාහ රේඛාව සුළැගිල්ල යටදී අවසාන වීමෙන් කියෑවෙන්නේ සන්තෝෂමත් විවාහයක් සිදුවන බවකි. විවාහ රේඛාවෙන් උඩ පැත්තට කුඩා අතු රේඛා විහිදීම ද එම ප්‍රතිඵලයමය. එහෙත් විවාහ රේඛාවෙන් පහළට ගිය අතු රේඛා සුබ ප්‍රතිඵල ගෙන නොදේ. එය විවාහ නොවී සිටීමේ ලක්ෂණයකි. අනාගතය පිළිබඳ සිහින මවන්නෙකි. මානසික වියවුල් ඉස්මතු විය හැකියි. රේඛාවෙන් නැගෙන අතු රේඛාවක් වෙදැගිල්ල යටට හෙවත් රවි මණ්ඩලයට විහිදී ඇතොත් ඉතා යහපත් විවාහයක් සිදුවේ.
බණ්ඩාරවෙල මංජුල තරුකෙම
උපුටා ගැනීම දිවයින පුවත් පත ඇසුරෙනි
