කඩුවක් ගත්ත අවතාරයක් අපේ පස්සෙන් පන්නන් එනවා හීනෙන් දැක්කා
මවකට ඇති එකම සම්පත දරු සම්පතයි. කුඩා කල සිට උස් මහත්කොට හදන දරුවාගේ අනාගත පහන්ටැඹේ නොනිමෙන පහනද මවයි. ජීවන ගමන් මඟේ ඒ උත්තරීතර මවු පදවිය දරන කාන්තාවන් සිය දියණියන් නිසි වයසට ළඟා වූ විට ඇය කරකාර බන්දා දෙන්නට සුදුසු සැමියකු සෙවීමට උත්සාහ දරන අයුරු මංගල යෝජනාවලින් මනාව පැහැදිලි වන්නකි. ඒ මංගල යෝජනා රැගෙන කපුවන්ද රටපුරා පිටත්කර යවති. පුවත්පත්වල දැන්වීම් දමමින් දුරකතනයෙන් තොරතුරු සොයා වෙහෙසෙති. එසේ වෙහෙසෙන ඇතැම් මවුපියන් පවසන්නේ "එනවා", "බලනවා", "යනවා" තවමත් දියණිය නිවෙසේ වයසට යන බවයි.
සිය දියණියට සහකරුවකු සොයා එය ඉටු නොවුණු විට දිවයන්නේ දේවාලයකට හෝ කෝවිලකටය. එවැනි අන්දමේ බලාපොරොත්තු සුන් වූ මවුපියන් වැඩිදෙනා දිව එන එක් තැනකි හලාවත මහා භද්‍රකාලි අම්මාන් කෝවිල. විවාහ විය යුතු නිසි වයසේ ගෙදර තනිවී සුසුම්ලන දියණියකට තවමත් අහිමිව තිබෙන ආදර අන්දරය ගැන ඇගේ මව කියන දුක්බර කතාවට කාලි මෑණියන්ගේ දහසකුත් දෑස් යොමුවීම සත්‍යයකි. ඒ දුක කාලි මෑණියන්ගේ දෑස් අතරට ගන්නේ මවකගෙන් තවත් මවකට පිහිටවෙන්නාක් මෙන් දෑත දිගු කරමිනි. එහෙත් ඒ බලාපොරොත්තුව මාසයක් ගතවීමටත් පෙර ඉටුවන තැන කාලි මෑණියන් මෙන්ම කාලි කෝවිල අමතක කර දමන මවුපියන් කොතෙකුත් සිටින බව මහා භද්‍රකාලි අම්මාන් කෝවිලේ මහේන්ද්‍රසාමි පැවැසීය. ඇතැම් මවුවරුන් එවැනි අන්දමේ දුක්ගැනවිලි කාලි මෑණියන් වෙත ගෙන එන්නේ සෑම වසරකම අගෝස්තු මාසයේ දින 10ක් පුරා පැවැත්වෙන කාලි මංගල්‍ය උත්සව දිනවලදීය. එම දිනවලදී කාලි මෑණියන් වැඩි වශයෙන් බැතිමතුන් අතර ගැවසෙමින් සිටින බව අතීත සිද්ධීන්වලින් ඔප්පු වී ඇති බවද මහේන්ද්‍රසාමි පවසයි. එම දිනවලට සිය දියණිය වෙනුවෙන් භාර වුණ මෑණි කෙනකු තම ප්‍රාර්ථනය ඉටුවීමෙන් පසු අමතක කර දැමීම නිසා ඇයටත් කාලි මෑණියන්ගේ පිහිටෙන් යුග දිවියට පත් දියණියටත් ඇගේ සැමියාටත් දඬුවම් විඳින්නට සිදුවූ අතීත සිද්ධියක් ගැන කියන්නට මෙවරත් කටහඬ අවදිකර සිටියේ මහේන්ද්‍රසාමිය.
"මම මේ කියන කාන්තාව මීගමුව ප්‍රදේශයට නුදුරු ප්‍රදේශයක ව්‍යාපාරික පවුලකට අයත් කාන්තාවක්. ඇයට හිටියේ එකම දියණියයි. ඒ දියණිය රූමත් තරුණියක් වුණත් ඇයට ගෙන එන විවාහ යෝජනා කිසිවක් හරි ගියේ නැහැ. බොහෝ අවස්ථාවල ඇගේ විවාහයට කේන්දර හරස් වුණා. විවිධ නොගැළපීම් නිසා සෑම විවාහ යෝජනාවක්ම බිඳ වැටුණා. ඒ ගැන මහත් සිත්තැවුලට පත්වෙලා හිටිය ඒ ව්‍යාපාරික යුවළ ඒ අයගේ දියණියත් සමඟ රට හැරයන්න පවා සූදානම් වුණා. එහෙම හිතලා ඒ අයගේ විදේශගත වී සිටින ළඟම ඥාතීන් සමඟ අදහස් හුවමාරු කරගත්තා. ඒ අය මෙහෙම කල්පනා කරමින් සිටිද්දි හලාවත පැත්තෙ ඉන්න ඒ ව්‍යාපාරිකයාගේ පාසල් මිත්‍රයෙක් අහම්බෙන් කොළඹදි එයාව හමුවුණ අවස්ථාවක කාලි කෝවිල ගැන විස්තර කියලා කාලි කෝවිලට යන්න පවුලේ සියලුදෙනාටම කතා කළා.
ඒ ව්‍යාපාරිකයා පාසල් මිත්‍රයාගේ කීම පිළිඅරන් දිනක් ඒ අය සියලු දෙනා කාලි කෝවිලට ආවා. ඒ අය ආවේ ඒ රූමත් දියණියද සමඟ. ඒ ඇවිත් කාලි මෑණියන් ළඟ හඬා වැලපිලා ඒ අය කාලි මෑණියන්ගෙන් පිහිටක් අයැද සිටියේ සිය දියණියට හොඳ විවාහයක් ළඟාකර දෙන්න කියල. එදා තමයි ඒ පවුලේ අය පළමු වතාවට කාලි මෑණියන් ළඟට ආවේ. එහෙම කඩිනමින් විවාහයක් සිදු වුණොත් සෑම වසරකම අගෝස්තු මාසේ පැවැත්වෙන කාලි මංගල්‍ය දිනවල කෝවිල් භූමියට එන අයටත් දානය දෙමින් පූජාවල් පවත්වනවා කියලා ඒ අය කාලි මෑණියන්ට භාර වුණා. එහෙම කියලා භාරවෙලා ගිහින් සති කීපයක් යන්න පෙර මඟුල් කපුවකු ගෙන ආ මංගල යෝජනාවක් අනුව ව්‍යාපාරික පවුලක හිටිය එකම පුතා මේ දියණියගේ සහකාරයා වුණා. සියල්ල එසේ වුණත් දියණියගේ මවටත්, පියාටත් කාලි මෑණියන් අමතක වුණා, අමතක කළා.
ඇගේ දියණියට දරු සම්පතක් ලැබුණායින් පසුවවත් ඒ පවුලේ අය කාලි කෝවිලට ගියේ නැහැ. දෙවැනි අවුරුද්දත් එළැඹුණා. ඒ දියණිය සමඟ විවාහ වෙලා හිටිය සැමියාවත් කාලි කෝවිලට වුණ භාරය ගැන දැන සිටියේ නැහැ. කාලි මෑණියන් උදෙසා මංගල්‍යය පැවැත්වෙන මාසය උදාවන්නෙ හැම වසරකම අගෝස්තු මාසයේදී. ඒ මංගල්‍යය දින 10ක් තිස්සේ පැවැත්වෙනවා. කාලි බැතිමතුන් ලක්‍ෂ 5කට අධික සංඛ්‍යාවක් මේ දිනවල කාලි කෝවිලට එනවා. ඒ දිනවල දිනපතා කාලි මෑණියන් වෙනුවෙන් විශේෂ පූජාවල් වගේම කාලි භූමියට එන බැතිමතුන්ට දානය දීම කෙරෙනවා. මේ දිනවලදී අනිවාර්යයෙන්ම කාලි මෑණියන් විවිධ වෙස්ගෙන කාලි භූමියේ බැතිමතුන් අතර සැරිසරමින් බැතිමතුන් දෙන දානය පිළිගන්න එක සත්‍යයක්. ඒ දිනවලදි අලුයම් කාලේ කාලි මෑණියන් දර්ශනය වුණ බැතිමතුන් අදත් ඉන්නවා. මේ වගේ කාලි මංගල්‍යයේදී අර කාන්තාව සහල් කිලෝ 50ක්, එළවළු කිලෝ 50ක් කාලි කෝවිලට දෙන්න භාර වෙලයි හිටියෙ. ඒත් ඒ පොරොන්දු සියල්ල ඒ කාන්තාව අමතක කරලයි තිබුණෙ. පසුගිය වසරේ ඒ මංගල්‍යය ආරම්භයේදීම අර අඹු සැමි යුවළ අතර සතියක් පුරා අඬදබර ඇති වෙන්න පටන් ගත්තා.
ඒ දියණිය විවාහ වෙලා හිටිය ව්‍යාපාරිකයාගේ ව්‍යාපාරික දියුණුවත් පහත වැටුණා. ව්‍යාපාරය යළි ගොඩගන්න එයාට දෑවැද්දට ලැබුණ ගේ‍ෙදාර පවා විකුණලා ව්‍යාපාරික ස්ථානයට බඩු භාණ්ඩ දාලා නැන්දම්මා පදිංචි මහ ගෙදර පදිංචියට ආවා. ඒ අඹු සැමියන් අතර ආරවුල්, ගුටි බැට හුවමාරුවල පවා දිග්ගැස්සී ගියේ නැන්දම්මාගේ දෑස් ඉදිරිපිටමයි. ඒ ආරවුල් දින දහයක් පුරා එක දිගට පැවතුණා. අන්තිමේ අලුත් බෑනා නැන්දනියටත් පහරදීලා ඇයව ගෙදරින් පන්නලා ගේ අයිති කරගන්න හැදුවා. නමුත් ඥාතීන් ඉදිරිපත් වෙලා ඒක වළකා දැමුවත් පවුල් ආරවුල් වැඩි වුණා. මෙහෙම ආරවුල් දිග්ගැසී යද්දී දෑවැද්දට හම්බ වුණ ගේ ෙදාර විකුණලා නැවතත් බඩු භාණ්ඩවලින් පුරවා ගත්ත ව්‍යාපාරික ස්ථානය සොරු බිඳලා රුපියල් විසි ලක්‍ෂයක විතර බඩු සොරාගෙන ගොස් තිබුණා. සොරු ඒ ව්‍යාපාරික ස්ථානය බිඳලා බඩු අරන් ගිහින් තිබුණෙ වැසි දිනයක මහ රෑ ජාමේ නොම්බර වෙනස් කළ ලොරියක. මේ සිද්ධි වැල නිසා ඒ ව්‍යාපාරික නිවෙස අවුල් ජාලයක් බවට පත් වුණා. මේ සියල්ල වුණේ අගෝස්තු මාසේ කාලි මංගල්‍යය සිදුවෙද්දි. අර ව්‍යාපාරිකයා සමඟ විවාහ වෙලා සිටිය දියණියටත් විටින් විට අසනීප වෙන්න පටන් ගත්තා. එක් දිනක් මැදියම් රාත්‍රි අඹු සැමි යුවලයි නැන්දනියයි හීනෙන් බය වෙලා කෑගසන ශබ්දය ඒ අය නිදාගෙන සිටිය කාමර තුළින් ඇහෙන්න වීමෙන් යාබද නිවෙස්වල අයත් බියවී අවදිවෙලා මේ නිවෙසට දිව ආවා. අසල්වාසීන් ඒ ගෙදරට දිව එන විට ඒ අයගේ කෑගැසීම නැවතිලා තිබුණෙ නැහැ. අසල්වාසීන් දිගින් දිගටම ෙදාරට ගහලා ෙදාර කඩන්න හදද්දි කෑගහන ශබ්දය නතර වුණා. ගෙදර කාන්තාව ෙදාර අරිද්දි ගේ ඉදිරිපිට අසල්වාසීන් දහ දෙනෙක් විතර හිටගෙන ගේ දිහා බලා හිටියෙත් බිය සැක ඇතිව. නැන්දයි, දුවයි, බෑනයි, මාමයි සියලු දෙනාම කීවේ එකම දේ. ඒ අය කීවේ ගෙදර ජනෙල්වලින් ඇතුළු වුණ දෑස් දල්වාගත් අවතාරයක් කඩුවක් අරන් ඒ අයගේ පිටුපස පන්නනවා දැක්ක බව. එහෙම පන්නගෙන ආව ඒ අවතාර ගෙදර ගේට්ටුව ළඟදි මේ අය බිම වැටෙද්දි ඒ අයට පහර දෙන්න කඩුව උස්සන කොට ඒ අය මහ හ¾ඩින් කෑගැහැව්වා කියලා කීවේ තැති ගැනීමෙන් වටපිට බලමින්. මෙන්න මේ වෙලාවේ තමයි ඒ මව දියණියට සහකාරයකු සොයන විට කාලි කෝවිලට වුණ භාරය සිහි වුණේ. ඒ මොකද හීනෙන් පෙනුණු සොහොන් කාලි අවතාරය ඇගේ සිහියට ආවේ ඒ වෙලාවෙ. ඇගේ මතකය අලුත් වුණා විතරයි ඇය කිසි දෙයක් කියන්නෙ නැතිව පසුදාම දුවයි, බෑනයි එකඟ කරගෙන ඥාතියකුගේ වාහනයකින් කාලි කෝවිලට ඇවිත් මම ඉදිරියේ වැඳ වැටිලා එයාට වුණ අතපසු වීම ගැන කාලි මෑණියන්ගෙන් සමාව ඉල්ලා සිටියා.
එදා තමයි එයාගේ බෑනා දැනගත්තෙ ඔහු විවාහ වෙන්න පෙර නැන්දනිය කාලි මෑණියන්ට භාරවී තිබුණ වග. පස්සේ ඒ දරු පවුලම කාලි මෑණියන් ඉදිරියේ පුද පූජා තියලා භාර ඔප්පු කරලා සොහොන් කාලි අවතාරයෙන් සමාව අයැද සිටියා. කාලි මංගල්‍යය තියෙන දින 10 තුළ කාලි මෑණියන්ගෙන් සිදුවන බලපෑම වැඩියි. වසරක් බලා සිට හෝ පොරොන්දු කඩකරන ඕනෑම බලවතකුට කාලි මෑණියන්ගේ සොහොන් කාලි අවතාරයේ දඬුවම ඒකාන්තයි. මේ පවුලේ අය ඒ පොරොන්දුව ඉටුකරන්න තවත් ප්‍රමාද වුණා නම් සොහොන් කාලිගේ දඬුවම මීට වඩා දරුණු වන්නට ඉඩ තිබුණා.
ප්‍රේමලාල් විජේරත්න
උපුටා ගැනීම මව්බිම
