පිරිතේ අසිරිමත් බලය
ධර්මය අදහන්නන්ට පමණයි!
භාග්‍යවතුන් වහන්සේගේ ධර්මය හරි ම පුදුම දෙයක්‌. අපිට අදහාගන්න අමාරු තරම් ම ඒ ධර්මය පුදුමයි. ඒ ධර්මය තුළ බුදුරජාණන් වහන්සේගේ ගුණ විස්‌තර කෙරෙනවා. සද්ධර්මයේ ගුණ විස්‌තර කෙරෙනවා. ආර්ය මහා සඟරුවනේ ගුණ විස්‌තර කෙරෙනවා. චතුරාර්ය සත්‍ය ධර්මය විස්‌තර කෙරෙනවා. සප්ත බෝජ්ජංග ආදී බෝජ්ජංග ධර්මයන් ගැන විස්‌තර කෙරෙනවා. ඒ වගේ ම නිවන් මඟ දියුණු කර ගැනීම පිණිස බණ භාවනා වශයෙන් වැඩිය යුතු සඤ්ඤාවන් ගැන විස්‌තර කෙරෙනවා. මේ ආදී ධර්මයන් ප්‍රකාශ වන උතුම් සූත්‍ර දේශනා තමයි අපි පිරිත් වශයෙන් සජ්ජායනය කරන්නේ. මේ පිරිත් දේශනා සඡ්ජ්ධායනය කිරීමත්, ශ්‍රවණය කිරීමත් කියන කාරණා දෙක අපට ආගන්තුක දෙයක්‌ නොවෙයි. ඒක අපිට ඉතා ම සමීප වූ දෙයක්‌.
එවිට, මේ පිරිත් දේශනා සජ්ජායනය කිරීමත් වැදගත් වෙනවා, ඒ වගේම පිරිත් ශ්‍රවණය කිරීමත් වැදගත් වෙනවා. පිරිත් දේශනා සජ්ජායනය කිරීමත්, ශ්‍රවණය කිරීමත් කියන මේ කාරණා දෙක ම බොහෝම ආනිසංසයන්ගෙන් යුක්‌තයි. ඒ නිසා මේ පිරිත් දේශනා කිරීමත්, ශ්‍රවණය කිරීමත් කියන මේ කරුණු දෙක ඉතා හොඳින් පැහැදීමෙන් කිරීමට අපි කවුරුත් කල්පනා කළ යුතු යි. ඒ සඳහා මේ ධර්මයන්ගේ තිබෙන අත්භූත බව අපි තේරුම් ගත යුතු යි. ඇතැම් අයට අසනීපයක්‌ හැදුනම, රෝග පීඩාවලට ලක්‌ වුණාම, පිරිත් දේශනා කරනවා. එහිදී ඒ පිරිත් අහගෙන සිටිද්දී ඒ අසනීප සුව වෙනවා. ඇතැම් අයට බය, තැති ගැනීම් ඇති වෙනවා. එවිටත් පිරිත් කියනවා. ඒ පිරිත ශ්‍රවණය කිරීමෙන් ඒ බය, තැතිගැනීම දුරු වෙනවා. මේක මේ ධර්මයේ තිබෙන ආශ්චර්යවත් දෙයක්‌. අත්භූත දෙයක්‌. මේ ලෝකයේ මෙබඳු ආශ්චර්යයක්‌, මෙබඳු අත්භූත බවක්‌ ඒ භාග්‍යවතුන් වහන්සේ විසින් වදාළ ධර්මයෙන් තොර වෙන කිසිවක දකින්න ලැබෙන්නේ නැහැ.
ඒ නිසා මෙබඳු ආශ්චර්යවත් ධර්මයක ඒ ආශ්චර්යවත් බව කොහොමද උපදින්නේ කියන කරුණ අපි තේරුම් ගත යුතු යි. දැන් බලන්න යම් රෝගයක්‌ අසනීපයක්‌ වැළඳුණ කෙනෙකුට පිරිත් කියද්දී ඒ අසනීපය සුව වෙනවා නම්, ඒක ආශ්චර්යවත් දෙයක්‌ අත්භූත දෙයක්‌ නේද? යම් බයක්‌, තැති ගැනීමක්‌ හටගත්තහම පිරිත් කියද්දී, පිරිත් අහද්දී ඒ භය තැති ගැනීම දුරුවී යනවා නම්, ඒක ආශ්චර්යවත් දෙයක්‌ අත්භූත දෙයක්‌ නේද? ඒ ආශ්චර්යවත් බව, අත්භූත බව උපදින ආකාරය අපි තේරුම් ගත යුතු යි. එවිටයි අපිට පිරිතකින් ලබන සැබෑම ආනිසංසයන් ලැබීමට හැකියාව ලැබෙන්නේ.
භාග්‍යවතුන් වහන්සේ වැඩ සිටි කාලයේදී ම ඇතැම් අයට රෝග පීඩා වැළඳු විට පිරිත් සජ්ජායනය කිරීමෙන්, පිරිත් ශ්‍රවණය කිරීමෙන් ඒ රෝග පීඩා සුවපත් වුණා. අපි අසා තිබෙනවා මුගලන් මහරහතන් වහන්සේට කායිකව අසනීප වුණ වෙලාවේදී සප්ත බෝජ්ජංග ගැන විස්‌තර කෙරෙන පිරිත්, දේශනා කළා. ඒ වෙලාවෙදි ඒ පිරිත් ධර්මය ශ්‍රවණය කළ මුගලන් මහරහතන් වහන්සේ සුවපත් බවට පත් වුණා. භාග්‍යවතුන් වහන්සේට කායිකව අසනීප වුණ වෙලාවේදීත් සප්ත බෝජ්ජංග ගැන කියවෙන ඒ පිරිත් ධර්මය සජ්ජායනය කළා. භාග්‍යවතුන් වහන්සේ ඒ ධර්මයන් ශ්‍රවණය කළා. ඒ වෙලාවේදී ම ඒ රෝගය සම්පූර්ණයෙන් ම සුවපත් බවට පත් වුණා. ඒ වගේම එදා ගිරිමානන්ද මහරහතන් වහන්සේ අසනීප වුණා. භාග්‍යවතුන් වහන්සේට මේ කරුණ සැලකළා. භාග්‍යවතුන් වහන්සේ දස සඤ්ඤාව වදාළා. ඒ දස සඤ්ඤාව ශ්‍රවණය කිරීමෙන් ඒ ගිරිමානන්ද මහරහතන් වහන්සේ මුළුමනින් ම සුවපත් බවට පත් වුණා.
ඒ ධර්මයේ තිබෙන අසිරිමත් බව, ආශ්චර්යවත් බව, අත්භූත බව. එදා භාග්‍යවතුන් වහන්සේ භික්‌ෂුන් වහන්සේලාට අනුශාසනා කළා, යම් තැනක ගිහින් බණ භාවනා කරද්දී, බයක්‌ තැති ගැනීමක්‌ ඇති වුණොත් ලොමු දැහැගැන්වීමක්‌ ඇති වුණොත් බුදුරජාණන් වහන්සේගේ ගුණ සිහි කරන්න කියල. එහෙම නැත්තම් සද්ධර්මයේ ගුණ සිහි කරන්න කියල. එහෙම නැත්තම් ආර්ය මහා සඟ රුවනේ ගුණ සිහි කරන්න කියල. ඒ ලෙසින් තෙරුවන් ගුණ සිහි කරද්දී ඒ භය තැතිගැනීම් පහවී යන බව භාග්‍යවතුන් වහන්සේ වදාළා. ඒ අනුශාසනා පිළිගත් ඒ භික්‌ෂුන් වහන්සේලා බියක්‌ තැතිගැනීමක්‌ හටගත් වෙලාවකදී බුදු ගුණ සිහි කරමින් ඒ බිය තැති ගැනීම දුරු කරගත්තා. සද්ධර්මයේ ගුණ සිහි කරමින් ඒ බිය තැතිගැනීම් දුරු කරගත්තා. ආර්ය මහා සඟරුවනේ ගුණ සිහි කරගනිමින් ඒ බිය තැතිගැනීම් දුරු කරගත්තා. ඒක අදටත් ඒ විදිහටම යි. භික්‌ෂු භික්‌ෂුණීන් පමණක්‌ නොවෙයි, උපාසක උපාසිකාවන් පවා යම් භය තැති ගැනීමක්‌ හටගත් වෙලාවක දී බුදු ගුණ සිහි කරමින් ඒ බිය තැති ගැනීම් පහ කරගැනීමට පුරුදු වෙලා හිටියා. මේ ධර්මය තුළ තිබෙන ඒ ආශ්චර්යවත් බව තමයි ඒ.
ඒ ආකාරයට එදා භාග්‍යවතුන් වහන්සේ වැඩ සිටිය කාලයේ සිට ම මේ දක්‌වා ම පිරිත් දේශනා මගින් විශාල ආරක්‌ෂාවක්‌ රැකවරණයක්‌ ලබා ගන්න බුදුරජාණන් වහන්සේලාගේ ශ්‍රාවකයන් සමත් වුණා. ඒ නිසා අපි තේරුම් ගත යුතුයි අදටත් ඒ විදිහටම පිරිත් සජ්ජායනයෙන්, පිරිත් ශ්‍රවණයෙන් කොහොමද මේ ලෙඩ දුක්‌ සුවකරගන්න පුළුවන් වන්නේ..? කොහොමද භය තැති ගැනීම් දුරු කරගන්න හැකිවෙන්නේ..? කියන කාරණය අපි තේරුම් ගත යුතු යි. එහෙම තේරුම් නොගත්විට අපට එයින් ලැබිය හැකි ප්‍රතිලාභ, ආනිසංස, රුකවරණය ලබන්න හැකියාවක්‌ ලැබෙන්නේ නැහැ. එදා ඉතා ම කටුක ආකාරයේ දුක්‌ පීඩා විඳිමින් අසනීප වී හිටිය ගිරිමානන්ද ස්‌වාමීන් වහන්සේ ඒ ගිරිමානන්ද සූත්‍රය සඳහන් ධර්මය ශ්‍රවණය කිරීමෙන් සුවපත් බවට පත් වුණා. කොහොමද එහෙම සිදු වුණේ. අපි තේරුම් ගත යුත්තේ එයයි. එහෙම තේරුම් ගත්විට අපටත් පුළුවන්කම තිබෙනවා මේ පිරිත් සජ්ජායනය කිරීම මගින් ඒ වගේ ම පිරිත් ශ්‍රවණය කිරීම මගින් ඒ ධර්මයෙන් ලැබිය හැකි ආනිසංස ලැබීමට.
මේ පිරිත් ධර්මයන් තුළ ප්‍රකාශ වෙන්නේ බුදුරජාණන් වහන්සේ වදාළ ධර්මය යි. ඒ ධර්මය තුළ බුදු ගුණ කියවෙනවා, දහම් ගුණ කියවෙනවා, සඟ ගුණ කියවෙනවා, චතුරාර්ය සත්‍ය ධර්මය ප්‍රකාශ වෙනවා, සප්ත බෝජ්ජංග ආදී ඒ බෝජ්ජංග ධර්මයන් ගැන විස්‌තර කෙරෙනවා. එවිට ඒ උතුම් ධර්මය තමයි මේ පිරිත් සූත්‍ර තුළ ප්‍රකාශ වෙන්නේ. පිරිත් සජ්ජායනය කරන කෙනා තුළත්, පිරිත් ශ්‍රවණය කරන කෙනා තුළත් මේ පිරිත් දේශනාවන් පිළිබඳ විශ්වාසයක්‌ තිබිය යුතු යි. පිරිත් දේශනාව තුළ කියවෙන ධර්මයන් ගැන විශ්වාසයක්‌ තිබිය යුතු යි. ඒ විශ්වාසය කියන්නෙ 'මේ පිරිත් දේශනා තුළ ප්‍රකාශ වෙන්නෙ බුදුරජාණන් වහන්සේගේ අවබෝධය යි. බුදුරජාණන් වහන්සේගේ අවබෝධය ප්‍රකට වන ඒ ධර්මය යි මේ පිරිත් දේශනා තුළින් කියවෙන්නේ යනුවෙන් ඒ ධර්මය ගැන අප තුළ විශ්වාසයක්‌ පැහැදීමක්‌ ඇති වුණොත්, ඒ පැහැදීම මුල්වී අපට මේ පිරිත් සජ්ජායනයෙන් හා පිරිත් ශ්‍රවණය කිරීමෙන් ලැබිය හැකි ආනිසංස ලැබීමේ
පින්වත් නාවලපිටියේ අරියවංශ හිමිපාණන් විසිනි.
උපුටා ගැනීම දිවයින පුවත්පත
