🛍️   Business Directory
📣   Classifields
🛍️   Business Directory
📣   Classifields

ස්කන්ද කුමාර හා උමයංගනා

එක්තරා අසුරයෙක් ඊශ්වරගෙන් බලගතු මන්ත්‍රයක් ඉගෙනගෙන එම මන්ත්‍රයෙන්ම ඊශ්වරයා විනාශකර උමයංගනා නැමති සුරංගනාව පැහැර ගැනීමට සැරසුණේය. මෙයින් බියට පත්වූ ඊශ්වර තැතිගෙන තැන තැන දුවමින් සැඟවී සිටියේ ය. මේ විනාශය දුටු බලගතු විෂ්ණු දෙවියෝ දිනක් අතර මඟදී රුවැති ස්ත්‍රී රූපයක් මවාගෙන අසුරයා ඉදිරියේ පෙනී සිටියේ ය. උමයංගනාවට වඩා ඉතා ලක්ෂණ රුවැති සුරංගනාව දුටු අසුරයා කාම සිත් පහළ වී සිත බැඳී ඇය සමඟ විවාහවීමට විචාළේ ය. එවිට කිසි දින මා අත් නොහරින බවට හිසෙහි අත තබා මා ඉදිරියේ සහතික වෙන්ට කිවූ සැණින් කාමයෙන් කුල්මත් වූ අසුරයා තම හිසෙහි අත තැබීය. එවිට අසුරයා දැවී පිළිස්සී අලුවී ගියේ ය. ඉන් පසු ඊශ්වරද එම රූමත් සුරංගනාව දැක ඇය කෙරෙහි සිත් බැඳී විවාහ වීමට විචාළේය. එවිට එම සුරූපී කාන්තාව කියා සිටියේ උමයංගනාවගෙන් අවසර ලබා එන ලෙසයි. එවිට ඊශ්වර තම භාර්යාව වන උමයංගනාවගෙන් අවසර ලබා එන විට ඈ පුතකු ලබා සිටියාය. මේ නිසා පුතකු ලබා ඇති බව පවසා නැවත අවසරය ලබාගෙන එන ලෙස කීවාය. එම අවසරයද ලබා එන විට තවත් පුතකු ලබා සිටියාය. ඒ අනුව පුත්‍රයින් දෙදෙනෙක් ලැබූ කාන්තාවක් බව පවසා අවසරය ගෙන එන ලෙස කීවාය. එම අවසරයද ලබා එන විට පුත්‍රයන් තුන්දෙනෙක් විය. පුත්‍රයන් තුන් දෙනෙක් බව පවසා අවසරය ලබා එනවිට පුත්‍රයන් හතර දෙනෙක් විය. මෙලෙස පුත්‍රයන් ගණන හය දෙනා දක්වා වැඩිවිය. මෙයද අවසර ඉල්ලූ විට පුදුම වූ උමයංගනාව වහා දුව ගොස් මෙය නම් විෂ්ණු දෙවියන්ගේ මැවීමක් බව වැටහී ගිය අතර මේ නම් කුමාර කන්දක් බව කියමින් දෑතින් පුත්‍රයින් 6 දෙනා එකට ගත්තේය. එවිට එක ශරීරයකට මූහුණු හයක් අත් දොළහක් ඇති වූ හෙයින් ස්කන්දකුමාර යන නම යෙදුණේය. ශ්‍රී ලංකාවේ දකුණු පළාත සමඟ දඹදිවද ප්‍රදේශ කීපයක් යටත් කරගෙන අධිපති ලෙස බලවත් අසුරයෙක් තාරක නමින් සිටිය බව කියවේ. මෙම අවදියේ දඹදිව සිට ශ්‍රී ලංකාවේ දකුණු පළාතට පැමිණි ප්‍රතාපවත් බලයක් හා ශක්තියක් ඇති කඳකුමරු තාරක හා සටන් වැදී අසුරයා මරා කතරගම පුරවරයෙහි අධිපති වූ බව දේව කථාවල සඳහන් වේ. තාරකයන්ගේ දරුණු පාලනයෙන් පීඩාවට පත්වී සිටි ජනතාව බේරාගත් කඳකුමරු කතරගම මුල්කොට රාජධානිය පතුරුවා ජනාදරයට පත්වීම නිසා ක්‍රමයෙන් කලක් යාමේදී දේවත්වය ආරෝපණය වී කතරගම දෙවි හාමුදුරුවො වශයෙන් ප්‍රසිද්ධ විය. එළාර දුටුගැමුණු සටනේදී දුටු ගැමුණු කුමාරයාට කතරගම දෙවියන්ගේ පිහිට ලබා එළාරයන් විනාශ කිරීමට හැකි වූ බව ජන කථාවල සඳහන් වේ. බුදුරජාණන්වහන්සේ තුන්වැනි වර ලංකාද්වීපයට වැඩම කිරීමෙන් පසු කතරගම දැනට කිරිවෙහෙර පවතින ස්ථානයේ එදා මහාසේන රජ දවස කිහිරි ගස් වනයක් විය. එම ස්ථානයේ පන්සියයක් රහතන් වහන්සේ සමඟ බුදුන් වැඩ සිටිමින් මහාසේන දෙවි රජට හා පිරිසට දහම් දෙසා සෝවාන් පලයේ පිහිටුවා එම ස්ථානයද රජුට භාර කරන ලදී. ඉන් අනතුරුව මරණින් මතු මහාසේන රජු කන්දකුමාර නමින් දේව ආත්මය ලබා කතරගම දේව භූමියට අධිගෘහිත වූ බව ද දේව කථාවල සඳහන් වේ. මෙසේ උත්තම වූ කතරගම දෙවියෝ තමන්ගේ භක්තිමත් පුරවරයේ ගැහැනුන් පිරිමින් කෙල්ලන් අතරේ නැකතක් තිබූ පලියට සැරි සරන්ට එන්නේ නැත. නමුත් බැල්ම වැටේ. ඒත් කිසි කෙනකුට නෙතට ගැටෙන්නේ නැත. කැමරාවලට පොටෝ ගන්ට ලැබෙන්නේ නැත. දෙවියන්ට පැමිණීමට නැකැත් අවශ්‍ය නැත. දෙවියන්ට අවශ්‍ය ප්‍රතිපත්ති ගරුක මිනිසුන් දෙන පින් පමණයි. ප්‍රතිපත්ති, ශීලවන්ත භාවය ඇති පුද්ගලයාට සතියේ සෑම දිනකම රාත්‍රි 10.47 සිට 11.10 දක්වා තමන්ගේ දුක් ගැනවිල්ල කතරගම දේවතාවුන් වහන්සේට කියන්ට පුළුවන්. එය නොපමාව ඉටුකර ගැනීම සඳහා කතරගම පුද බිමටම යාමට අවශ්‍ය නැත. පිරිසිදු ස්ථානයක මල් යහනක් බැඳ කහවතුර ඉස ආරාධනා කර කියන්න. කතරගම දෙවියන් දුටු අය අතර ආගමික ප්‍රතිපත්තිවලින් අගතැන්පත්වී ශීල ගුණයෙන් පිරිපුන් සමාධිගතවූ සිතක් තිබූ බලංගොඩ ආනන්ද මෛත්‍රී මහා නා හිමිපාණෝ සිහියට නැඟේ. ඒ හැරෙන්ට ලෝබයෙන් ද්වේශයෙන් මෝහයෙන් පිරි සිත් ඇති පුද්ගලයින්ට දෙවියෝ නොපෙනේ. කතරගම දෙවියන් යන ප්‍රතාපවත් රණශූර ප්‍රතිපත්ති ගරුක උතුම් දෙවි කෙනෙකි. ග්‍රහතාරකා වලින් යුදකාමී හැඟීම් ඇති කරන බලය ලබාදෙන උච්ච ස්වක්ක්‍ෂේත්‍ර බලයෙන් ලොව පාලනය කරන කුජ ග්‍රහයා (රතු ග්‍රහයා) කතරගම දෙවියන්ගේ බලය විදහා දක්වනු ඇත. මෙලොව උපත ලබන ජන්මියකුගේ කේන්ද්‍රයේ 9 වැන්න 11 වැන්න යන භාවයක කුජ බලයෙන් යුක්තව සිටීනම් කතරගම දෙවියන්ගේ පිහිට නොඅඩුව ලැබේ. නමුත් ඒ අයට දෙවියෝ පේන්ට නොපැමිණේ. සමථ විදර්ශනා භාවනා යෝගී ප්‍රතිපත්ති ගරුක උතුමකුට සමාධියට සම වැදී සිටින අවස්ථාවක සිතිවිල්ල මත දෙවියෝ ළං වෙති. ඡ්‍යොතිෂවේදී ජේ.ගුණපාල උපුටා ගැනීම දිනමිණ පුවත්පත