මේ දේව වරම මානසික රෝගයක්
කලින් වෙන් කර ගත් වෙලාවක අප වෙත ඉතා රහසිගතව එක් අයෙක් පැමිණියේය. ඔහු දිවයිනේ ඉතා ප්‍රසිද්ධ දේවාරූඪයෙන් සාස්තර කියන හා රෝගීන් සඳහා යම් යම් ප්‍රතිකාර නියම කරන ප්‍රධාන පෙළේ කපුවෙකි. මහජනතාවට දෙවියන්ගේ අණ පරිදි සේවය කළ ද තමාට ඇති වී තිබෙන යම් ප්‍රශ්න කිහිපයකට විසඳුම් ලබා ගැනීමට රහසිගතව මෙම කපු මහතා අප හමුවට පැමිණ සිටියේය.
“මම කුඩා කාලෙ ඉඳලාම ගොඩක් දුක් විඳලා තමයි අද මේ තත්ත්වයට ඇවිත් ඉන්නෙ. මට සල්ලි අතින් කිසි අඩුවක් නෑ. තාත්තාගෙ මරණෙන් පස්සෙ අපේ පවුල ගොඩගන්න තමයි මට මේ දේව වරම ලැබුණෙ. මට උන්වහන්සෙ නිතර නිතර කතා කරනවා. මට යම් යම් නියෝග දෙනවා. ඉතින් දෙවියන්ගෙ නියමයෙන් මම මිනිස්සුන්ට සේවය කරලා සල්ලි ගන්න කැමැතියි. ඒ වුණාට මගේ දියුණුවට මේ දේවාල ක්ෂේත්‍රයේ ඉන්න අනෙක් අය කැමැති නෑ. එයාලා මගේ දියුණුවට ඊර්ෂ්‍යා කරනවා. මගෙ ජීවිතය නැති කරන්න කිහිප වතාවක්ම වස විස දෙන්න උත්සාහ කළා. මම ඒ දේවල් වලින් ප්‍රවේශම් වෙන නිසා බේරුණා.
එක කපුවෙක් ඉන්නවා එයා හරිම බලවත්. මිනිහා ළඟ තියන පරිගණකය උපයෝගී කරලා සමහර වෙලාවට මාව පාලනය කරනවා වගේ මට හැ‍ඟෙනවා. මම දෙවියන් සමඟ කතා බහ කරන දේවල් වුණත් සමහර වෙලාවට මිනිහා පාලනය කරනවා. ඇත්තටම මට මේක හරිම කරදරයක්. මට දැන් නින්ද යනවත් හරි අඩුයි. එහෙම වුණහම පහුවදාට වැඩ කරගෙන යන්නත් හරිම අමාරුයි. එතකොට අනිත් අය එක්ක තරහ යනවත් වැඩියි.”
මේ සියල්ල ඔහු එක දිගටම කියාගෙන ගියේ ඔහුට යම් කිසි සහනයක් ලබා ගැනීම පිණිසයි.
“මම කරන දේව කටයුතු එක්ක මට මේක හෙළි කරන්න බෑ. ඉතින් මම දොස්තර කෙනෙකුට මේ ගැන කියන්න ගියෙත් නෑ. කාට හරි හෙළි වුණොත් හොඳ නැති නිසා.”
මේ සියල්ල අසා සිටි මට කපු මහතාගේ රෝගය ඉතා පැහැදිලිව අවබෝධ විය. ඇත්ත වශයෙන්ම දේවාරූඪයෙන් අන් අයට ප්‍රතිකාර කරනු ලබන මොහු උග්‍ර මානසික රෝගයක් වන භින්නෝන්මාදයෙන් පෙළෙමින් සිටින බව මට හැඟිණි. මානසික රෝගයන් අතුරින් ඉතාම සුලබ රෝගයක් වන්නේ භින්නෝන්මාදයයි. සමීක්ෂණවලට අනුව ඕනෑම වයසක, ඕනෑම ජාතියක, තරාතිරමක, ගැහැනු පිරිමි දෙපක්ෂයටම හට ගන්නා මේ රෝගයට ජානමය හේතූන් ද ඇති විය හැකි බවට හෙළි වී තිබේ. මෙහි රෝග ලක්ෂණ ඉහත කපු මහතා හෙළි කළ කරුණු වන අතර ඊට අමතරව ආහාර පිළිවෙළ අක්‍රමතාව නින්ද අක්‍රමවත් වීම නිතර නිතර කේන්ති යෑම තමාව යම් අයෙකු විසින් පාලනය කරන බවට සිතීම ආදි බොහෝ කරුණු වේ.
මීට අමතරව මෙම රෝගීන් භ්‍රාන්ති තත්ත්වයට පත් විය හැකිය. එනම් ඔවුන්ව දෘෂ්‍ය මායාවන් නොයෙක් දර්ශන මැවී පෙනීම දෙවියන්ගේ කටහඬවල් ඇසීමට පත් වීම වැනි තත්ත්වයට පත් විය හැකිය. එවිට තනියම කතා කිරීම, බැණ වැදීම, තනිව සිනහ වීම වැනි දේ කරනු දක්නට ලැබේ. උග්‍ර ලෙස අන් අයව සැක කිරීම ද ඇති විය හැකිය. මේ නිසා පවුල් ජීවිතය මෙන්ම රාජකාරි කටයුතුවලදීත් සමාජයේ අන් අය සමඟ ගැටීමේදීත් ගැටලු ඇති වේ. එවැනි බොහෝ රෝගීන් තමාට මෙවැනි රෝගයක් ඇති බවට පිළි නොගනියි.
බලෙන් ප්‍රතිකාර සඳහා යොමු කරවීමට සිදු වේ. බොහෝ විට ලංකාවේ දේවාරූඪයෙන් භූත බලයෙන් යම් යම් කටයුතු සිදු කරන සමහර අය මේ රෝගයෙන් පෙළෙන පුද්ගලයන් ය. ඇත්ත වශයෙන් ම ඔවුන් තමාගේ රෝගය හඳුනාගෙන ඇත්තේ දේව වරමක් ලෙසයි. මේ ආකාරයට ශබ්ද ඇසීම මොළයේ රසායනික වෙනස් වීමක් මත ඇති වන රෝගයක් නිසා ඔවුන්ට රෝගයක් ඇති බව නොසිතයි. එවිට මෙවැනි පුද්ගලයෝ දේව වරමින් අන් අයගේ ලෙඩ රෝග සුව කිරීමට පෙලඹෙති. එවිට සමාජයට මහත් හානියක් සිදු වේ.
මෙවැනි දේවාරූඪ වලට බොහෝ දුරට ලක් වනුයේ කුඩා කල සිට ඉතා අමිහිරි ලෙස මතකයන් ඇති ජීවිතයේ පහළ තලයේ උගත් කමින් අඩු පුද්ගලයන් ය. පසුව නෑ හිතවතුන් විසින් මෙම මානසික රෝගියාට මහත් බලවේගයක් ඇතැයි ප්‍රචාරය කොට ගතමනාවක් සෙවීමට පෙලඹේ. මෙවැනි රෝග ලක්ෂණයන් ඇති අයෙකු දුටුවහොත් ඔවුන් ගෙන් උපදෙස් හා ප්‍රතිකාර ගැනීම නොව ඔවුන්ව වහාම ප්‍රතිකාර ගැනීමට සුදුසු ස්ථානයකට යොමු කිරීමයි කළ යුතු වන්නේ.
මෙම රෝගී තත්ත්වය සුව කළ හැකිය. මේ සඳහා ඖෂධ ප්‍රතිකාර, විද්යුත් ප්‍රතිකාර මෙන්ම මනෝ චිකිත්සක ප්‍රතිකාර ද ඉතා සාර්ථක ලෙස භාවිත කරනු ලබයි. නිසි ප්‍රතිකාර ලබමින් ඔවුන්ව ඕනෑම කටයුත්තක යෙදීමට හුරු කළ හැකිය. අප සේවා දායක කපු මහතාට ද ඉහත කරුණු කෙරෙහි දැනුවත් කොට අවශ්‍ය මනෝ චිකිත්සක ප්‍රතිකාර ඖෂධ ප්‍රතිකාර සඳහා මනෝ වෛද්‍ය වරයකු වෙත ද යොමු කරවන ලදි. ඖෂධ ප්‍රතිකාර වලින් හා මනෝ චිකිත්සක ප්‍රතිකාර වලින් ඔහු එම තත්ත්වයෙන් මිදෙමින් සිටින අතර වෘත්තිය ද වෙනස් කොට ඇත.
මනෝ විද්‍යා උපදේශක
මේජර් සුසන්ත ද සිල්වා (විශ්‍රාමික)
උපුටා ගැනීම සිළුමිණ පුවත්පත
