ශූරයන් ඕනෑම තැනකින් මතුවිය හැකිය McFarland USA
සත්‍ය කතා ඕනෑ තරම් සිනමාවට නැඟී තිබේ. ක්‍රීඩා ක්ෂේත්‍රයට සම්බන්ධ සත්‍ය කතා ද තිරයට නැඟී ඇති අතර හොලිවුඩයෙන් ලබන 20 වැනිදා ලොව පුරා ප්‍රදර්ශනය වීම සඳහා නිකුත් වන ‘මැක්ෆාර්ලන්ඩ් ද එම ගොන්නට ඇතුළු කළ හැකි සිනමා පටයකි.
‘මැක්ෆාර්ලන්ඩ් යූ.එස්.ඒ.’ නවසීලන්තයේ වෙලිංටන් නුවර උපන් තිර රචිකාවක හා අධ්‍යක්ෂවරියක වන නිකොලා ජීන් කාරෝ ගේ නිර්මාණයකි. ඇය ජාත්‍යන්තර සිනමාවේ වඩාත් ප්‍රකට ‘නිකී කාරෝ’ යන නමිනි. 2002 වසරේ ඇය අතින් නිර්මාණය වූ ‘වේල් රයිඩර්’ විචාරක ප්‍රසාදයට ද, ජාත්‍යන්තර සිනමා උලෙළ කිහිපයක සම්මානයට ද පාත්‍ර වූ චිත්‍රපටයකි. ‘බෑඩ් නෝඩ් ෆෝ අ හාර්ට් (1990) ඇගේ පළමු සිනමා නිර්මාණයයි. පසුව රූපවාහිනී මාලා ටෙලි නාටක රැසක් අධ්‍යක්ෂවරිය හා තිර නාටක රචිකාව වූ නිකී හොලිවුඩයට පා තැබුවේ ‘වේල් රයිඩර්’ නිර්මාණය කරමිනි. පසුව ඇය ‘නෝර්ත් කන්ට්‍රි’ (2005) සහ ‘ද වින්ට්නර්'ස් ලක්’ යන චිත්‍රපට අධ්‍යක්ෂණය කළාය.
ඇගේ නවතම සිනමා නිර්මාණය මැක්ෆාර්ලන්ඩ් වෝල්ට් ඩිස්නි සමාගමේ නිෂ්පාදනයක් වන අතර එයට වැයවූ මුදල ඩොලර් මිලියන 17 කි. මිනිත්තු 129 ක ධාවන කාලයකින් යුත් ‘මැක්ෆාලන්ඩ්’ සඳහා පාදක වන්නේ 1980 දශකයේදී කැලිෆෝනියාවේ සිදුවූ සත්‍ය සිදුවීම් පෙළකි.
කැලිෆෝර්නියාවේ මැක්ෆාර්ලන්ඩ් ප්‍රදේශයේ මැක්ෆාර්ලන්ඩ් උසස් විද්‍යාලය වෙත අලුතින් ගුරුවරයෙක් පත්ව එයි. විද්‍යාලය ඇතුළත ඇත්තේ විසිරුණු අවුල් සහගත බවක් වග වටහා ගන්නා එම ගුරුවරයා වූ ජිම් වයිට් සිතන්නේ එකම අරමුණක් සඳහා මුළු විද්‍යාලයම පෙළ ගැස්විය යුතු බවය. ඊළඟට ඔහු අනාවරණය කරගන්නේ දිවීමේ දක්ෂ ශිෂ්‍යයන් රැසක් සිටින බවය. ජිම් වයිට් එම සිසුන් එක් කොට ‘රට හරහා දිවීමේ කණ්ඩායමක්’ සකසයි. ප්‍රාන්ත ශූරතා තරගාවලියේ රට හරහා දිවීමේ ඉසව්වෙන් ජය ලැබීමේ අරමුණ උදෙසා ඔහු මුළු පාසලම පෙළ ගස්වයි.
විලියම් බ්‍රොයිලෙස් ගේ තිර රචනයකට අනුව නිර්මාණය වූ ‘මැක්ෆාර්ලන්ඩ් යූ.එස්.ඒ.’ හි ප්‍රධාන චරිතය ජිම් වයිට් ලෙස රඟපාන්නේ ප්‍රකට නළු කෙවින් ෆෙස්ට්නර්ය. මාරියා බෙලෝ, මෝගන් සේලර්, කාලෝස් ප්‍රැට්, මර්තා හයිගරේඩා, වැලෙන්ටෙ රොඩ්‍රිගුස් ආදි නළු නිළියෝ රැසක් ද මෙහි චරිත නිරූපණයේ යෙදෙති.
පළමුව මෙම චිත්‍රපටය ‘මැක්ෆාර්ලන්ඩ්’ යන නමින් පසුගිය වසරේ නොවැම්බර් 21 දා තිරගත වීම ඇරැඹීමට කටයුතු යොදා තිබිණි. පසුව අනාවරණය නොකෙරුණු යම් හේතුවක් නිසා තිරගත වීම ඇරැඹීම මෙම පෙබරවාරියට කල් දැමුණු අතර චිත්‍රපටයේ නම ද ‘මැක්ෆාර්ලන්ඩ් යූඑස්ඒ’ යනුවෙන් වෙනසට ලක් කෙරිණි.
ප්‍රාන්තයේ කුඩා පාසලක ශිෂ්‍යයන් එම ප්‍රාන්තයේ වැඩි පහසුකම් සහිත වඩාත් දියුණු පාසල්වලට අභියෝග කරමින් ජය ගන්නා මෙම චිත්‍රපටයෙන් අවධාරණය කෙරෙන්නේ අධිෂ්ඨානය හා කැපවීම ඇත්නම් ඕනෑම අසීරු ඉලක්කයක් ජය ගැනීම අපහසු නැති බවය. විචාරකයන් මෙතෙක් පළ කර ඇති අදහස්වලින් පෙනී යන්නේ ‘මැක්ෆාර්ලන්ඩ් යූ.එස්.ඒ.’ නැරැඹිය යුතුම වූ සිනමා පටයක් බවයි.
උපුටා ගැනීම සිළුමිණ
