🛍️   Business Directory
📣   Classifields
🛍️   Business Directory
📣   Classifields

අධි වේගය අති බිහිසුණුය FURIOUS - 7

අධි වේගය අති බිහිසුණුය FURIOUS - 7


2013 වසරේ නොවැම්බර් 30 දා ලොව පුරා හොලිවුඩ් සිනමා රසිකයන් කම්පනයට පත්වූයේ ෆාස්ට් ඇන්ඩ් ෆියුරියස් චිත්‍රපට පෙළේ බ්‍රයන් ඕ කෝනර්ගේ චරිතයට පණ පෙවූ පෝල් වෝකර් රිය අනතුරකින් මිය ගිය වග අසමිනි. ෆාස්ට් ඇන්ඩ් ෆියුරියස් චිත්‍රපට පෙළ හරහා ජනප්‍රියත්වය ලබා සිටි පෝල් වෝකර් ඒ වන විට එම සිනමා පට‍ පෙළේ සත්වැන්නේ රඟපාමින් සිටි අතර රසිකයන් එකිනෙකාගෙන් විමසන්නට වූයේ පෝල්ගේ මරණය චිත්‍රපට පෙළේ අවසානය වනු ඇත් ද කියාය. ඊළඟ දිනයේ චිත්‍රපට පෙළේ නිෂ්පාදකයන් වූ යුනිවර්සල් සමාගම නිවේදනය කළේ පෝල් ගේ මරණය අවාසනාවක් නමුත් චිත්‍රපට පෙළේ ඉදිරි නිෂ්පාදන කටයුතු නතර කෙරෙන්නේ නැත කියායි.

ෆාස්ට් ඇන්ඩ් ෆියුරියස් චිත්‍රපට පෙළේ සත්වැන්න හා පෝල් වෝකර් රඟ පෑ අවසන් චිත්‍රපටය ‘ෆියුරියස් 7’ පසුගිය අප්‍රේල් මස මුලදී ප්‍රදර්ශනය ඇරැඹිණි. පළමු සති අන්තය ඇතුළත පමණක් ලොව පුරා ප්‍රදර්ශනය වෙමින් එය උපයාගත් ආදායම ඩොලර් ලක්ෂ 3840 ක් වූයේය. එය යුනිවර්සල් නිෂ්පාදන සමාගමේ චිත්‍රපටයක් මුල් සති අන්තයේ ලැබූ ඉහළම දෙවැනි ආදායම වූ අතර හොලිවුඩ් ඉතිහාසයේ චිත්‍රපටයක් මුල් සති අන්තයේ ඉපැයූ ආදායම් ලැයිස්තුවේ සිවුවැන්නය. චිත්‍රපට පෙළේ සයවැන්න ප්‍රදර්ශනය වූයේ 2013 වසරේදීය. එහි සත්වැන්න ෆියුරියස් 7 හි තිර රචනය ක්‍රිස් මෝගන්ගේය. එය අධ්‍යක්ෂණය කර ඇත්තේ ජේම්ස්වැන් ය. වින් ඩීසල්, පෝල් වෝකර්, ඩ්වේන් ‍ජොන්සන්, මිෂෙලෙ රොඩ්‍රිගෑස්, ජෝර්ඩානා බ්‍රෙව්ස්ටර්, ටයිරෙසෙ ගිබ්සන්, ක්‍රිස් බ්‍රිජස්, කර්ට් රසල් හා ජේසන් ස්ටැතම් රඟන ෆියු රියස් 7 හී රූගත කිරීම් ආරම්භ වූයේ 2013 සැප්තැම්බර් මස මුලදීය.

බොහෝ අය සිතුවේ පෝල් වෝකර් ගේ මරණයත් සමඟ. චිත්‍රපටයේ වැඩ කටයුතු ඇණ හිටිනු ඇත කියායි. නමුත් ඒ වන විට ‍පෝල්ගේ දර්ශන බොහොමයක් රූගත කර තිබූ අතර තිර රචනයේ යම් යම් වෙනස්කම් සිදුකිරීමෙන් අනතුරුව චිත්‍රපටය නිම කරගන්නට නිෂ්පාදන සමාගමට හැකි විය. චිත්‍රපටය නිම කර ඇත්තේ පෝල් වෝකර් පණ පෙවූ බ්‍රයන් ඕ කෝනර් ගේ චරිතය මරා දමමින් නොවේ. ‘ෆියුරියස් 7’ හී මැදදී බ්‍රයන් ඕ කෝනර් තම කණ්ඩායමෙන් ඉවත්ව යන ආකාරය පෙන්වමින් චිත්‍රපට කණ්ඩායම චිත්‍රපටයේ ඉදිරි නිෂ්පාදන කටයුතු කරගෙන ගොස් තිබේ. ෆියුරියස් 7 ඇමෙරිකාවේ ජෝර්ජියා ප්‍රාන්තයේ අට්ලන්ටාහි දී ද ඩුබායි හි දීද රූගත කර තිබේ. ඒ හැර කොලරාඩෝ හී අධිවේගී මාර්ගය ද රූගත කිරීම් සඳහා යොදාගෙන ඇති අතර, එම රූගත කිරීම් සඳහා 2013 සැප්තැම්බරයේදී කොලරාඩෝ අධිවේගී මඟ දින කීපයක් තිස්සේ සාමාන්‍ය වාහන ගමනාගමනය සඳහා වසා තිබේ. අඩි 12,000 ක් ඉහළින් පියාසර කරන ගුවන් යානයක සිට බිමට මෝටර් රථ දෙකක් පැන්නවීම ‘ෆියුරියස් 7’ හී එන එක් ත්‍රාසජනක ජවනිකාවකි. එම ජවනිකාව රූගත කරනු පිණිස එකවර කැමරා 15 කට වැඩි ප්‍රමාණයක් භාවිත කර ඇතැයි අන්තර්ජාලයේ සඳහන් වෙයි.

චිත්‍රපට පෙළේ තුන්වැනි, සිවුවැනි හා පස්වැනි චිත්‍රපටවල සංගීත අධ්‍යක්ෂණය කළ බ්‍රයන් ටයිලර් ෆියුරියස් 7 සඳහා ද, පසුබිම් සංගීතය අධ්‍යක්ෂණය කර තිබේ. චිත්‍රපටයේ ගීත හතරක් ඇතුළත් ය. මුලින් මෙම චිත්‍රපටය 2014 වසරේ ග්‍රීෂ්මයේ තිරගත කිරීමට සැලසුම් කරගෙන සිටියත් ඒ සැලසුම් වෙනස් වූයේ පෝල් වෝකර්ගේ හදිසි මරණය නිසාය. හොලිවුඩ් විචාරකයන් ලියූ විචාරකයන්ගෙන් 83% කම සඳහන් වී ඇත්තේ වාණිජ වශයෙන් සාර්ථක විය හැකි උසස් ක්‍රියාදාම චිත්‍රපටයක් බවය. ඔවුන් නිවැරැදි බව ‘ෆියුරියස් 7’ මුල් සති අන්ත බොක්ස් ඛනිජ වාර්තාවන්ගෙන් ම පැහැදිලි වෙයි.

උපුටා ගැනීම සිළුමිණ