This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
බොලිවුඩ් ගොසිප් කියවමු..

නේහා හදිසියේම ලංකාවට එයි

ජනප්‍රිය නිළි බිපාෂා බාසුට වේදිකාවේ නටන්න බැරි වුණොත් ඇය වෙනුවෙන් නටන්න පුළුවන් කාට ද? නේහා ඩුපියාට පුළුවන්ලු දෙදෙනාගේ ස්වරූපය හරියටම එක සමාන නොවුණත් නෙහාට බිපාෂාගේ අඩුව පුරවන්නට පසුගිය දා මෙරට පැවැත්වුණු ‘හිරු’ සම්මාන උලෙළේදී සිදුවුණා. බොලිවුඩ් තරු රැසක් සහභාගිවූ මේ සම්මාන රාත්‍රියේදී බිපාෂාට නර්තනයක් ඉදිරිපත් කරන්න නියමිතව තිබුණා. ඒත් නොසිතූ විලසින් ඇයට ඒ රංගනය වේදිකාව මත නිරූපණය කරන්නට හැකිවුණේ නැහැ. ඇගේ පාදයක ආබාධයක් මතුවීම එයට හේතුවයි. මේ නිසා අපහසුවෙන් හෝ ඒ නර්තනය ඉදිරිපත් කිරීම පැත්තකට දමන්නට බිපාෂාට සිදුවුණා. මෙහිදී උත්සවය සංවිධානය කළ අය වහාම ක්‍රියාත්මක වී බිපාෂා වෙනුවට වෙනත් ජනප්‍රිය නිළියක සොයන්නට උත්සාහ ගත්තා. ජනප්‍රිය නිළි නෙහා ඩුපියා ගැන සඳහන් වුණේ ඒ උත්සාහයේදියි. සම්මාන රාත්‍රියේ නර්තනයක් ඉදිරිපත් කරන්නැයි ඇගෙන් ඉල්ලීමක් කෙරුණා. තමන්ගේ වැඩ කටයුතු සියල්ලටම තාවකාලික විරාමයක් තැබු ඇය වහාම ගුවනින් ශ්‍රී ලංකාවට පැමිණියේ සම්මාන උලෙළ පැවැත්වුණු දිනයේදීමයි. එදින සවස් වරුවේ නර්තන පුහුණුවීම්වල යෙදුණු නෙහා, කිසිඳු අපහසුවක් නොමැතිව සම්මාන රාත්‍රියේ වේදිකාව වර්ණවත් කළේ හැමෝගෙම පැසසුම් මැද්දේ. “මේ වගේ නොහිතන දේවල් ඕනෑම උත්සවයකදී වෙන්න පුළුවන්. නෙහා වේදිකාවට ගොඩවෙන්න කලින් බිපාෂාත් එක්ක ටිකක් වෙලා කතාබහ කරමින් හිටියා. මං හිතන්නෙ බිපාෂාගෙ කකුලේ ආබාධය ගැන වෙන්න ඇති” මෙලෙස කීවේ නෙහාගේ මිතුරියක්.

‘කිං ඛාන්’ ට ප්‍රහාරයක්

ෆාරා ඛාන් අධ්‍යක්ෂණය කළ ‘හැපි නිව් ඉයර්’ චිත්‍රපටය ගැන පසුගිය සති කිහිපය තිස්සේ බොහෝ දෙනෙකු අදහස් පළ කර තිබුණා. ඒ හැම කෙනෙක්ම කතා කළේ මේ චිත්‍රපටයේ සාර්ථකත්වය ගැනයි. එහි වරදක් නම් කියවුණේම නැහැ. ඒත් පසුගිය සතියේ, ප්‍රවීණ නිළියක වන ජයා භච්චන් විසින් ප්‍රසිද්ධියේ කරන ලද ප්‍රකාශයකින් සියල්ල වෙනස් වුණා. මුම්බායි නුවර පැවති කලා උලෙළකදී ඇය ප්‍රකාශ කළේ තමන් මෑතකදී නැරඹු අසාර්ථකම චිත්‍රපටය ‘හැපි නිව් ඉයර්’ බවයි. එය ‘විකාරයක්’ යැයි ද ඇය කෙළින්ම කියා සිටියා. ඇගේ මේ ප්‍රකාශය ඒ චිත්‍රපටයට කළ අපහාසයක් බවයි සිනමා විචාරකයන් පැවසුවේ. ඇය සුපිරි නළු ශාරුක් ඛාන්ව ද විවේචනයට ලක් කළා. ” ‘හැපි නිව් ඉයර්’ චිත්‍රපටය වගේම එහි ප්‍රධාන නළුවාත් විකාරයක්. මම ඔය චිත්‍රපටය බැලුවේ මගේ පුතා අභිෂේක් එහි රඟපෑව නිසයි. මම අභිෂේක්ට කිව්වෙ, ඔයත් අර විදිහට කැමරාව ඉස්සරහ මෝඩයෙක් වගේ රඟපෑව නම් ඔයාටත් මහ ලොකු නළුවෙක් වෙන්න පුළුවන් කියලයි.” ජයා භච්චන් මෙලෙස ප්‍රකාශ කරද්දී උත්සව සභාවේ සිටි අය පුදුමයෙන් ඇය දෙස බලා සිටියා. ඇගේ මේ ප්‍රකාශයෙන් වඩාත්ම අපහසුතාවයට පත්වුණේ සැමියා අමිතාබ්, පුතු අභිෂේක් සහ ලේලිය, ඓශ්වර්යායි. ජයාගේ මේ ප්‍රකාශය ප්‍රසිද්ධියට පත්වීමත් සමඟම නොසන්සුන් තත්ත්වයට පත්වූ බොලිවුඩ්පුරය දුටු අමිතාබ්, වහාම ශාරුක් අමතා තම බිරිඳගේ ප්‍රකාශය ගැන සමාව අයැද සිටියා. අභිෂේක් සහ ඓශ්වර්යා ද ශාරුක් ගෙන් සමාව ඇයැද සිටියේ ඔහුගේ නිවෙසට ගොස් මඳ වේලාවක් කතා බහ කරන අතරේදීයි. ශාරුක් සහ භච්චන්ලා ගැන කාගේත් අවධානය එලෙස යොමු වී තිබෙද්දී තවත් අලුත් වැඩක් ගැන ආරංචියක් කොල්කටා නුවරින් අහන්න ලැබුණා. ඒ, ඉටි පිළිරූ කෞතුකාගාරයක් විවෘත කිරීමක් ගැනයි, එංගලන්තයේ පිහිටි සුප්‍රසිද්ධ ‘මැඩම් තුසේඩ්’ ඉටි පිළිරූ කෞතුකාගාරය වැනි කෞතුකාගාරයක් කොල්කටා හි පසුගිය 10 දා විවෘත කෙරුණා. ‘මැඩ් තුසේඩ් කෞතුකාගාරයෙහි මෙන් මෙහි තැන්පත් කෙරෙන්නේ ද ප්‍රසිද්ධ පුද්ගලයන්ගේ ජීවමාන ස්වරූපයේ පිළිරූ රැසක්. තෙරේසා මව්තුමියගේ නමින් ‘මදර්ස් වැක්ස් මියුසියම්’ යනුවෙන් නම් කර ඇති මෙහි මුලින්ම නිරාවරණය වූයේ අමිතාබ් භච්චන්ගේ සහ ශාරුක් ඛාන්ගේ පිළිරූ දෙකක්.

සල්මන්ගෙන් මෝදිට මංගල ඇරයුමක්

භාරත අග්‍රාමාත්‍ය නරේන්ද්‍ර මෝදි මුණ ගැසීමට පසුගිය දා බොලිවුඩ් සුපිරි තරුවක් පැමිණියා. ඔහු තමයි සල්මන් ඛාන්. අග්‍රාමාත්‍යවරයා බැහැදැකීමට සල්මන් පැමිණ සිටියේ විවාහ මංගල ඇරයුම් පතක් ද අතැතිවයි. හැබැයි ඒ සල්මන්ගේ විවාහ මංගල්‍යයට ඇරයුම් කරන්න නම් නොවෙයි. ඔහුගේ නැගණිය ආර්පිතා ඛාන් ගේ විවාහ මංගල උත්සවයට ඇරයුම් කරන්නයි. ආර්පිතා සහ ඇගේ පෙම්වතා වන ආයුෂ් ශර්මාගේ විවාහ මංගල්‍යය සිදු කෙරෙන්නේ නොවැම්බර් 18 දායි. මේ ආරංචිය තහවුරු කළ සල්මන්ගේ පියා, සලීම් ඛාන් පැවසුවේ අග්‍රාමාත්‍ය නරේන්ද්‍ර මෝදි මහතාට මේ වෙනුවෙන් ඇරයුම් කළ බවයි. බොලිවුඩ් සිනමා කලාකරුවන් කිහිප දෙනා අතරින් නරේන්ද්‍ර මෝදි ගේ මැතිවරණ ව්‍යාපාරයට සහය දුන් එක් අයෙකු වන්නේ සලීම් ඛාන්. ඔහු එම මැතිවරණයේදී මෝදි වෙනුවෙන් උර්දු බසින් වෙබ් අඩවියක් නිර්මාණය කර දියත් කර තිබුණා. මෝදි අගමැති තනතුරෙහි දිවුරුම් දීමේ උත්සවයට සල්මන් ඛාන් සහභාගි වූ බවත් රහසක් නොවෙයි. “අපේ මුළු පවුලම මේ විවාහය ගැන අප්‍රමාණ සතුටකින් ඉන්නවා” සලීම් ඛාන් මාධ්‍යවේදියකු සමඟ එලෙස පවසා සිටියා. ආර්පිතා සහ ආයුෂ් ගේ ප්‍රේමය දීර්ඝ කාලයක් තිස්සේ පැවැති එකක් නම් නොවෙයි. ඔවුන් දෙදෙනාගේ ප්‍රේමයට ගත වී ඇත්තේ වසර 1 1/2 ක පමණ කාලයක්. ආයුෂ්ගේ උපන් බිම දිල්ලි නුවර වුණත් විවාහයෙන් පසුව මුම්බායි නුවර පදිංචියට යන්නයි නව යුවළගේ බලාපොරොත්තුව. බොලිවුඩ් පුරයෙන් ලැබුණු අලුත්ම ආරංචියක සටහන් වී තිබුණේ මුම්බායි නුවර. තට්ටු නිවාසයකින් තට්ටු තුනකින් යුතු නිවෙසක් ආයුෂ් - ආර්පිතා යුවළට තෑගි දීමට සල්මන් ලක ලැහැස්ති වන බවයි, මේ අතර සල්මන් ඛාන් ඇතුළු පවුලේ සියලුම දෙනා මෙතෙක් පදිංචිව සිටි ‘ගැලක්සි’ තට්ටු නිවාසයෙන් මඳකට බැහැර වී වෙනත් ස්ථානයක තාවකාලික පදිංචියකට පිටත්ව යන්නට සැරසෙනවා. ඒ, ‘ගැලක්සි’ නිවෙසෙහි අලුත්වැඩියා කිරීමේ කටයුතු සිදුවන නිසා.’ ආයුෂ සහ ආර්පිතාගේ විවාහ මංගල උත්සවය පැවැත්වෙන දිනයේදී වසර 50 ක විවාහ මංගල සැමරුමක් ද යෙදී තිබෙනවා. ඒ, සල්මන්, අර්පිතා සහ සොහේල්ගේ දෙමවුපියන්ගේ විවාහයේ ස්වර්ණ ජුබිලියයි. ඒ නිසා නොවැම්බර් 18 දා ඛාන් පවුලට විශේෂ දිනයක්ම වේවි. උපුටා ගැනීම සිළුමිණ