This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
ආක්ෂේ-ශිල්පා යළි එක්වෙලා
එකිනෙකාට මඩ ප්‍රහාර එල්ල කරගත්ත පෙම්වතුන් යුවළක් බොලිවුඩ්පුරයේ සිටියා. ඒ මීට දශක එකහමාරකට කලින්. කාලයක් තිස්සේ වැඩෙමින් තිබුණු ආදරයක් හිටි හැටියේම නතර වීමෙන් පසුවයි මේ පෙම් යුවළ ‘මඩ ගොඩක’ එරුණේ. ඒ දෙදෙනා තමයි ජනප්‍රිය නළු නිළි යුවළක් වන ආක්ෂේ කුමාර් සහ ශිල්පා ශෙට්ටි. වසර කිහිපයක්ම ආදරයෙන් බැඳී සිටි ආක්ෂේ සහ ශිල්පා 2000 දී ඒ ආදර කතාවට අවසන් තිත තැබුවා. විවාහ දිවියටත් පිවිසෙන්නට සූදානම් වෙමින් සිටින බවට ආරංචි පැතිරෙද්දී හිටි හැටියේ වෙන්වූ ආක්ෂේ සහ ශිල්පා ඉන් පසුව එකිනෙකාට චෝදනා එල්ල කර ගත්තා. මේ චෝදනාවල ඇතැම් විට ‘මඩ’ පවා තැවරී තිබුණා. බොලිවුඩ් සිනමාවේ කැපී පෙනෙන පෙම් යුවළක් වූ ආක්ෂේ සහ ශිල්පා අවසන් වතාවට පෙම් යුවළක් ලෙස රඟපෑවේ ‘ධද්කාන්’ චිත්‍රපටයේ. ඒ, 2000 වසරේදී. නැවතත් ආක්ෂේ සහ ශිල්පා 2007 දී තිරගත වූ ‘ඕම් ශාන්ති ඕම්’ චිත්‍රපටයේ රඟපෑවත් ඒ ආරාධිත රංගනයක් පමණයි. (පෙම්වතුන් හැටියට නම් නොවෙයි.) 2000 දී ‘ධද්කාන්’ තිරගත වීමෙන් පසුව ශිල්පා ප්‍රකාශ කළේ නැවතත් ආක්ෂේ සමඟ කිසිම දවසක වැඩ නොකරන බවයි. “ආක්ෂේ මාව රැවැට්ටුවා. එයාට වෙන කවුද මුණ ගැහුණාම මාව කිසිම අපහසුවක් නැතුව අතහැරියා.” ශිල්පා එදා එලෙස කීවා. ආක්ෂේ සමඟ කිසිම ගනුදෙනුවකට එක් නොවන බව ශිල්පා එදා කීවත් අද ඒ ප්‍රකාශය වෙනස් කරන්න ඇයට සිදුවෙලා. ළඟදීම ඇරැඹීමට යන අලුත් ව්‍යාපාරික කටයුත්තකට ආක්ෂේගේ දායකත්වය ලබා ගන්න ඇය එකඟ වෙලා. ඉන්දියාවේ පළමු වරට ඇරැඹුණු ‘ෂොපින් චැනල්’ එකකටයි ආක්ෂේගේ දායකත්වය ලැබෙන්නේ. පසුගියදා මෙහි ව්‍යාපාරි කටයුතු ආරම්භ කෙරුණා. මුම්බායි නගරයේදී මෙහි වැඩ කටයුතු ඇරඹුණේ විශාල පිරිසකගේ සහභාගිත්වයෙන්. ශිල්පා ඒ මොහොතේ රැස්ව සිටි පිරිස අමතමින් කතාවක් පවත්වද්දී ඇයට මඳක් නුදුරින් ඇගේ සැමියා සමඟ ආක්ෂේ ද රැඳී සිටියා. ආක්ෂේ සහ ශිල්පාගේ සැමියා ‘බර’ සාකච්ඡාවක යෙදී සිටින අයුරු කාටත් දැකගත හැකි වුණා.

චිත්‍ර ශිල්පී සල්මන් ඛාන්

‘නාහෙට නාහන’ නළුවෙකු හැටියටයි සුපිරි නළු සල්මන් ඛාන් බොහෝ දෙනෙකු හඳුනා ගෙන ඇත්තේ. සැබවින්ම ඔහු එවැනි චරිතයක් තමයි. ඔහුගේ මේ දඩබ්බර ගති නිසා ඔහුට නීතිය හමුවේ චූදිතයකු බවට පත්වෙන්නටත් සිදුවී ඇති බව රහසක් නොවෙයි. ඒ කොහොම වෙතත් සල්මන් චිත්‍රපටවල රූගත කිරීම්වලින් නිවාඩුවක් ලැබූ අවස්ථාවලදී චිත්‍ර අඳින්නට හුරු පුරුදු වී සිටිනවා. ආගමික තේමා කැටිවූ චිත්‍ර මෙන්ම තමන් ප්‍රිය කරන අයගේ මුහුණු සිතුවම් කරන්නට සල්මන් තුළ ඇත්තේ සහජ හැකියාවක්. සල්මන් විසින් එලෙස අඳින ලද චිත්‍ර තමන්ගේ ඥාතීන්ට, හිතවතුන්ට තෑගි කිරිම ඔහුගේ සිරිතක්. සල්මන්ගේ චිත්‍ර අගය කරන සුපිරි නළු නිළි දෙදෙනකු තමයි, ශ්‍රී දේවි සහ අමීර් ඛාන්. මේ දෙදෙනාගේම නිවෙස්වල සල්මන් විසින් සිතුවම් කරන ලද චිත්‍ර කිහිපයක්ම තැන්පත් කර තිබෙන බවයි පැවසෙන්නේ. සල්මන් පසුගිය සතියේ මෙවැනි සිතුවම් රාශියක්ම තමන්ගේ ආදරණීය නැගණියට පරිත්‍යාග කළා. පසුගිය වසරේ නොවැම්බර් මාසයේදී ආයුෂ් ෂර්මා සමඟ යුගදිවි ගමන් ඇරඹූ සල්මන්ගේ නැඟණිය වන අර්පිතා ඛාන්, මේ සිතුවම් සියල්ලටම ප්‍රිය කරන බවයි පැවසෙන්නේ. ඒවායින් තෝරා ගත් සිතුවම් කිහිපයක්ම ඇය තම ඉන්ස්ටග්‍රෑම් ගිණුම ඔස්සේ අන්තර්ජාලයෙන් තම හිතවත් පිරිසට යවා තිබෙනවා. ඒ සෑම සිතුවමක් වෙනුවෙන්ම කිසියම් සටහනක් තබන්නටත් ඇය අමතක කරලා නැහැ.

හංසිකාටත් ‘වීඩියෝ ප්‍රශ්නයක්’

ජනප්‍රියත්වයෙන් ඉහළට ඇදී එන නවක නිළියන්ට විඳීමට සිදුවී ඇති අමිහිරි අත්දැකීම් නම් එමටයි. ඒ අතරින් වඩාත් ප්‍රචලිත වී ඇති අත්දැකීමක් තමයි නිරුවත් චලන රූප අන්තර්ජාලයට එක්කිරීම. මෙලෙස අන්තර්ජාලයට එක් කෙරෙන්නේ එම දර්ශනවල සිටින්නේ ජනප්‍රිය නිළියන් යැයි හඳුන්වා දීමෙන්. හඳුනා නොගත් පුද්ගලයන් විසින් සිදුකරනු ලබන මෙම ක්‍රියා නිසා ජනප්‍රිය නවක නිළියන් දැඩි අපහසුතාවන්ට පත්වූ බව නිතරම අහන්නට ලැබුණා. බොලිවුඩ් සිනමාවේ නිරතුරුවම සිදුවන මේ අකටයුත්තට මෑතකදී ගොදුරු වූ නවක නිළිය හංසිකා මොට්වානි. මේ වන විට 23 වැනි වියෙහි පසුවන ඇය කුඩා කාලයේදී බොලිවුඩ් චිත්‍රපට කිහිපයකම ළමා චරිත රඟපා තිබෙනවා. ඉන් පසුව යොවුන් වියේදී ඇය රඟපා ඇත්තේ දෙමළ සහ තෙළිගු චිත්‍රපටවලයි. දකුණු ඉන්දීය චිත්‍රපට වෙනුවෙන් ද පවත්වන ‘ෆිල්ම් ෆෙයාර්’ සම්මාන උලෙළේදී 2007 නැඟි එන නවක නිළියට හිමිවන සම්මානය දිනා ගන්නටත් හංසිකා සමත් වුණා. මේ වන විට ඇය කාර්යබහුල නිළියක් බවට පත්ව සිටිනවා. 2015 වසරේදී තිරගත වීමට නියමිත ‘වාලු’, ‘රොමියෝ ජුලියට්’ ඇතුළු තවත් දකුණු ඉන්දීය චිත්‍රපට කිහිපයකම ඇගේ රඟපෑම් ඇතුළත් වී තිබෙනවා. උපතින් දෙමළ ජාතික නිළියක වුවද ඇය බෞද්ධාගම්කාරියක්. හංසිකා පෙනී සිටිනවා යැයි හඳුන්වා ඇති මේ වීඩියෝ පටයේ ධාවන කාලය විනාඩි 2 යි. කිසියම් තරුණියක් නාන කාමරයක නිරුවතින් සිටින අවස්ථාවක් එහි දැක්වෙන බවත් එම තරුණියගේ මුහුණ හංසිකාට බෙහෙවින් සමාන නිසා ආන්දෝලනාත්මක වාතාවරණයක් මතුවී ඇති බවත් ඉන්දීය මාධ්‍ය පවසනවා. මේ දර්ශනය රූගතකොට ඇත්තේ එම නාන කාමරයේ කිසිවකුට නොපෙනෙන ලෙස, අටවා තිබූ ජංගම දුරකථනයකින් යැයි ද පැවසෙනවා. කෙසේ වෙතත් හංසිකා පවසන්නේ එහි සිටින්නේ තමන් නොවන බවයි. උපුටා ගැනීම සිළුමිණ