This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
අමීර්, සල්මන්, ෂාරුක් බොලිවුඩ් රජවරු පුවතට උණුසුම් ප්‍රතිචාර



සජීඩ් නන්දියවාලා බොලිවුඩ් චිත්‍රපට අධ්‍යක්ෂවරයෙකි. 1990 දශකය ආරම්භයේ දී සිය මාමා කෙනකුගේ නිෂ්පාදන සමාගමක නිෂ්පාදක සහායකු ලෙස බොලිවුඩ් පුරයට පා තැබුවේ හෙතෙම නන්දියවාලා ග්‍රෑන්ඩ් සන් එන්ටර්ටේන්ට්මන්ට් නිමිනි. 1992දී සුල්ම් කී හුකුමත් චිත්‍රපටය නිෂ්පාදනය කරමින් සිය නිෂ්පාදන ආයතනය හරහා බොලිවුඩ් පුරයට පා තැබූ ගමනේ නිෂ්පාදකවරයකු ලෙස පමණක් නොව අධ්‍යක්ෂවරයකුගේ භූමිකාවටද හෙතෙම පිළිපන්නේය. අධ්‍යක්‍ෂවරයකු ලෙස ඔහුගේ කූටප්‍රාප්තිය සිදුවූයේ පසුගිය වසරේ තිරගත වූ කික් චිත්‍රපටය බොක්ස් ඔෆිස් වාර්තා තැබීමට සමත් වීමත් සමඟිනි. සල්මන් ඛාන් සහ ජැකලීන් ෆර්නැන්ඩස් ප්‍රධාන චරිත මැවූ කික් ලැබූ ආදායම ඉන්දීය රුපියල් කෝටි 200 ඉක්මවා ගියේය. 2009 වසරේ තිරගත වූ තෙලිඟු චිත්‍රපටයක් ආශ්‍රයෙන් තැනූ චිත්‍රපටයකි කික්.

කික් චිත්‍රපටය ලැබූ ජනප්‍රියත්වයත් සමඟ ඉන්දියාවේ වැඩි කතාබහට ලක් වූ සජීඩ් පිළිබඳ නැවැත වරක් බොලිවුඩ පුරයේ කතාබහට ලක් වෙමින් තිබේ. ඒ ඔහු කළ ප්‍රකාශයක් සම්බන්ධයෙනි. පසුගියදා සිය නවතම චිත්‍රපටය සඳහා දර්ශන රූගත කිරීමේ ස්ථාන සොයා බැලීමට මලයාසියාවට ගිය අවස්ථාවේ සජීඩ් ප්‍රකාශ කර සිටියේ බොලිවුඩයේ ඛාන් තිදෙනා යොදාගෙන චිත්‍රපටයක් කිරීමට කැමැත්තක් ඇති බවයි. මෙම ප්‍රකාශය නිකුත් කර වැඩි වේලාවක් ගත වීමට මත්තෙන් එම පුවතට තටු පැමිණියාසේ ඉන්දියාව පුරාම මාධ්‍ය හරහා පැතිර ගියේ ක්ෂණයකිනි. දැනට බොලිවුඩ් පුරයේ රජවරුන් තිදෙනා යොදාගෙන චිත්‍රපටයක් කිරීම ලෙහෙසි පහසු කාර්යයක් නොවේ. සල්මන්, අමීර්, සහ ෂාරුක් තිදෙන කාලයකට පෙර විරසකව සිටිමුත් මේ වන විට ඔවුන් සාමදානව සිටින සෙයක් පෙනී යයි. අනෙක් අතට තිදෙනාටම අනෙකාට පරයා නොයන ආකාරයේ කතාවක් සකසා ගැනීම පමණක් නොව ඔවුන් තිදෙනා සඳහා වැය වන වියදම ද අති විශාල වනු ඇත. වෙනත් ආකාරයකින් කිවහොත් ඛාන් ත්‍රිත්වය යොදාගෙන චිත්‍රපටයක් කිරීම සුවිසල් ව්‍යාපෘතියක් වෙනවා නියතය.

කික් චිත්‍රපටය ලැබූ සාර්ථකත්වයත් සමඟින් සජීඩ්, සල්මන් ඛාන් සමඟ නැවතත් වැඩ කිරීමේ කැමැත්තකින් පසුවන බව මාධ්‍ය හමුවේ ප්‍රකාශ කර සිටියේය. සල්මන් සමඟ කික් චිත්‍රපටයේ වැඩ කරලා දැන් වසරකට වැඩියි. ජනතාව අහනවා මගේ ඊළඟ චිත්‍රපටය මොකක්ද කියලා. මම ඔවුන්ට කිව්වා ඛාන් ත්‍රිත්වය යොදාගෙන චිත්‍රපටයක් කිරීම මගේ සිහිනයක් බව. සල්මන් මගේ හොඳ යාළුවෙක්. ඒ වගේම ෂාරුක් සහ අමීර් සමඟත් මගේ හොඳ සබඳතාවක් තියෙනවා. මට ඉදිරියටම යන්න පුළුවන් වුණොත් ඔවුන් තිදෙනා යොදාගෙන අනිවාර්යයෙන්ම චිත්‍රපටයක් කරනවා. සල්මන්, අමීර්, ෂාරුක් යන තිදෙනා අතර හිත් අමනාපයක් පැවතුණද පසුගියදා ඒ සියල්ල අමතක කර දමා අමීර් සහ ෂාරුක් සල්මන් හා එක්වූයේ, සල්මන්ගේ නවතම චිත්‍රපටය වන බජ්රංගී බයිජාන් චිත්‍රපටයේ ප්‍රවර්ධන කටයුතු සඳහාය.

දිස්නා ප්‍රියංගිකා
මව්බිම