ප්‍රියංකා වර්ජනයක
‘අයිෆා’ හෙවත් ‘Indian International Film Awards’ සිනමා සම්මාන උලෙළ මෙවර පැවැත්වුණේ මැලේසියාවේ ක්වාලාලම්පූර් නුවර. මේ සඳහා එක්වූ බොලිවුඩ් තරු අතර ප්‍රියංකා චොප්රා ද සිටියා. ඇය එම උලෙළට පැමිණයේ වේදිකා නර්තනයක් ඉදිරිපත් කරන්නත්, ඇය රඟපෑ ‘දිල් ධදක්ගේ දෝ’ චිත්‍රපටයේ මංගල දර්ශනය නරඹන්නත්, සම්මාන රාත්‍රියට සහභාගි වෙන්නත් හිතාගෙන. ඒත් ඇය, ‘අයිෆා’ උලෙළට පැමිණි පසුව තත්වය වෙනස් වුණා. ඇය ‘දිල් ධදක්ගේ දෝ’ චිත්‍රපටයේ මංගල දර්ශනය නරඹන්නට පමණයි එක්වුණේ. සමහරු කීවේ ඇයට සෙම්ප්‍රතිශ්‍යාව වැලඳී ඇති නිසා අනෙක් අංග වලට සහභාගි නොවුණාය කියලයි. කරුණු දන්නා අය නම් කීවේ හේතුව එය නොවන බවයි.
ඇය වෙනුවට අනුශ්කා ශර්මා, ‘අයිෆා’ වේදිකාවේ නර්තනයකට තෝරාගැනීම නිසා ප්‍රියංකා අසතුටට පත්වෙලා. ඇය තරමක් කේන්තියෙන් පසුවූ බවයි පැවසෙන්නේ. මේ හේතුවෙන් ඇය සම්මාන රාත්‍රියට එක්වී නැහැ. ප්‍රියංකා වඩාත් උනන්දුවෙන් ලක ලැහැස්ති වී ඇත්තේ ‘අයිෆා’ වේදිකාවේ රංගනයක් ඉදිරිපත් කරන්නයි. අවසන් මොහොතේ එයින් ඉවත් කර ඇති බව දැන ගන්න ලැබීමෙන් ප්‍රියංකා තුළ කෝපයක් ජනිත වීම පුදුමයක් නොවන බවයි සමහරු පවසන්නේ. මීට කලින් පැවති අයිෆා සම්මාන උළෙලකදී ද ප්‍රියංකා අපහසුතාවට පත්වූ කරුණක් සිදුවී තිබෙනවා. ඒ නිසා ඇය අයිෆා උලෙළේ සංවිධාන කටයුතු සිදු කරන එක්සෙල් එන්ටර්ටේන්මන්ට්ස් ආයතනය අතර අමනාපයක් පවතින බව දැන් රහසක් නොවෙයි.
රසදුන
