මූණවත් නොබලන පැරණි පෙම
බොලිවුඩ් පුරයේ ඇතිවන සැබෑ පෙම් බැඳුම් බිඳී විසිරී යන අවස්ථා අනන්තයි. එහෙම වෙන්වීම් සිදුවුණායින් පස්සෙ පෙම්වතා සහ පෙම්වතිය අතර කිසිදු කතාබහක් සිදු නොවන බව අමුතුවෙන් කිව යුතු නැහැ. ඒත්, ඔවුන්ට සිනමා ලෝකයේ කටයුතු කරද්දි ඇතැම් විට නිළ වශයෙන් කතා බහ කරන්නට සිදු වෙනවා. එවැනි කතාවක් බහක් තබා මුහුණුවත් නොබලන පෙම්වතුන්, පෙම්වතියන් සිටිනවා.
එවැනි පෙම් යුවළක් තමයි, හර්මන් බවේජා සහ බිපාෂා බාසු. මීට වසර කිහිපයකට පෙර අත්වැල් අල්ලාගෙන සිටි මේ දෙදෙනා දැන් වෙන් වෙලා. පෙමින් බැඳී සිටි කාලෙය් එක් මොහොතකදී ආරංචි පැතිරී ගියේ හර්මන් සහ බිපාෂා විවාහ ගිවිස ගැනීමටත් ලක ලැහැස්ති වූ බවයි. එහෙත් එවැන්නක් සිදුවුණේ නැහැ. කොහොම වෙතත් දෙදෙනාගේ වෙන්වීම නම් සිදු වුණා. මේ වෙන්වීමට මුල් වුණේ හර්මන් ගේ වෙනත් සබඳකමක්. ඔහු, වෙනත් රටක නිරූපිකාවක් වන ඔලේගා නමැත්තිය සමඟ සබඳකමක් පවත්න බවට බිපාෂාට ආරංචි වීමත් සමඟම ඇය ඔහුගෙන් සමුගත් බවයි පැවසෙන්නේ.
ඉන්පසුව ඔවුන් දෙදෙනා මුහුණට මුහුණ මුණ ගැසුණේ නැහැ. පසුගියදා පැවති උපන් දින සාදයකට නම් බිපාෂාටත් හර්මන්ටත් ඇරයුම් ලැබී තිබුණා. මේ උපන් දින සාදයේ ‘හිමිකාරිය’ තමයි, ජනප්‍රිය නිළි ශිල්පා ශෙට්ටි. ඇගේ 40 වැනි උපන් දිනය වෙනුවෙන් මේ සාදයට නොමසුරුව, ඇති තරම් මුදල් වියදම් කර තිබුණේ ශිල්පාගේ සැමියා වන රාජ් කුන්ද්‍රායි. ශිල්පාගේ සහ රාජ් ගේ පවුලේ උදවියත් සහභාගි වූ මේ සාදයට ඇරයුම් ලැබූ සෙසු අය තමයි සමීපතම හිතවතුන්. හර්මන් බවේජාත් රාජ් සහ ශිල්පාගේ සමීප හිතවතෙක්. බිපාෂා ත් ඔවුන් දෙදෙනා ගේ සමීප හිතවතියක්. ඒ නිසා මේ විරසක වූ පෙම් යුවළත් ඇරයුම් ලබා සිටියා.
හර්මන් නම් උපන් දින සාදයට එක්වුනණ් දැඩි සතුටකින්. ඔහු බොහෝ වේලාවක් එහි රැඳී සිටියා. ශිල්පා සහ රාජ් ඊළඟට බලා සි‍ටියේ බිපාෂා පැමිණෙන තුරුයි. මැදියම් රැය ආසන්න වන තුරු උපන් දින සාදය පැවැත්වුණත් බිපාෂා එයට සහභාගිවීමට පැමිණියේ නැහැ. ශිල්පාටත් රාජ්ටත් තවත් බොහෝ දෙනෙකුටත් ඇගේ නොපැමිණීමේ හේතුව තේරුම් ගියා. හර්මන් එහි පැමිණෙන බව බිපාෂා දැන සිටි නිසයි, ඇය උපන් දින සාදයේ පැත්ත පළාතකටවත් නොගියේ.
රසදුන
