මධුරි-ජුහී-ශ්‍රී දේවි රඟපාන සැබෑ ජීවිතයේ බිරියගේ භූමිකාව
මධුරි සමඟ ශ්‍රී රාම්
මධුරි විවාහ වුණේ හෘද රෝග ශල්‍ය වෛද්‍යවරයෙක් එක්ක. ඒ ශ්‍රී රාම් මාධව් නේනෙ. එයා ඉන්දියානුවෙක් වුණත් වැඩ කරන්නෙ ඇමෙරිකාවෙ රෝහලක. ඉතින් මේ විවාහය නිසා මධුරිට ඇමෙරිකාවෙ පදිංචියට යන්න සිද්ධ වුණා. 90 දශකයේ බොලිවුඩයේ අතිශයින් ප්‍රසිද්ධියට පත්වෙලා හිටපු කාලෙ ඉන්දියාව දාලා ඇමෙරිකාවට යන්න වෙන එක මොන වගේ අත්දැකීමක් වෙන්න ඇද්ද? මුලින් මධුරි මේ කසාදයට අකැමැති වුණත් පස්සෙ පස්සෙ ශ්‍රී රාම් එක්ක ටිකක් කතා බහ කරද්දි ඉන්දියාව දාලා යන එක ගැන මධුරිගේ හිතේ තිබුණු අකැමැත්ත ටික ටික අඩු වුණාලු.
ඒ වගේම බොහොම සමාජශීලී චරිතයක් වුණු මධුරි ඇමෙරිකාවට ගිහින් තනියම ගේ ඇතුළට වෙලා ඉන්න එක මුල් මාස දෙක තුනේදි එපා වෙලාලු තිබුණෙ. නමුත් හැමදාම හවසට ටිකක් වේලාසනින් ගෙදර ආපු ශ්‍රී රාම් මධුරි එක්ක ඇවිදින්න යන්න ආවලු. ඒ නිසා පාළුව ටිකක් මඟ හැරුණා කියලා මධුරි කියනවා. ඒ වගේම මධුරිගෙ මේ පාළුව නැති කරන්න ශ්‍රී රාම් බොහොම මහන්සි ගත්තලු. ඒ කියන්නෙ සමහර දවස්වලට මධුරිව සර්ප්‍රයිස් වෙන විදියේ වැඩ කරනවලු. ඒ විතරක් නෙවෙයි මධුරි රඟපාන ෆිල්ම් 100ක් ඉන්දියාවෙ යාළුවකුට කියලා ශ්‍රී රාම් ගෙනැල්ලා දීලා බලන්න කියලා. ඒ සමහර ෆිල්ම් රඟපාපු හැටි ගැන මධුරිට මතකයක්වත් නැහැල්ලු. ඉතින් මධුරි කියන්නෙ ශ්‍රී රාම් තමා වෙනුවෙන් මෙච්චර දෙයක් කරයි කියලා එයා කවදාවත් හිතුවෙ නැහැයි කියලයි.
ඒ වගේම මාස තුනකට විතර වතාවක් මධුරි එක්ක ඉන්දියාවට ඇවිත් සති දෙකක් විතර ඉන්දියාවෙ ගත කරන්නත් ශ්‍රී රාම් කැමැති වෙලා. මුලදි දෙන්නත් එක්කම ආවත් එක දවසක් මධුරි ඇමෙරිකාවෙ ඉඳලා ඉන්දියාවට ඇවිල්ලා තියෙන්නෙ තනියම. ඒ ශ්‍රී රාම්ට හදිසි ශල්‍යකර්ම කීපයක් කරන්න සිද්ධ වුණු නිසා. ඊට දවස් දෙක තුනකට පස්සෙ ඉන්දියානු සිනමා සඟරාවක් එයාලගේ සිරස්තලය විදියට දාලා තියෙන්නෙ 'මධුරි දික්කසාදයකට සැරැසෙයි' කියලලු. මේ ලිපිය නිසා කලබල වුණු මධුරි මේ ගැන ශ්‍රී රාම්ට කියලා. ඊට දවස් දෙකකට පස්සෙ ශ්‍රී රාම් වහාම ඉන්දියාවට ඇවිත්. ඒ විතරක් නෙවෙයි මාධ්‍ය සාකච්ඡාවක් පවා තියන්න සිද්ධ වෙලා. මධුරිගෙ ගෞරවය ගැන ඒ තරමටම උනන්දු වෙන කෙනෙක් තමයි ඇගේ සැමියා ශ්‍රී රාම්.
ශ්‍රී දේවි සහ බොනී
බොලිවුඩ් සිනමාවෙ 80 - 90 දශකවල අතිශය ජනප්‍රිය වුණු දකුණු ඉන්දියානු නිළියක් තමයි ශ්‍රී දේවි. මිතුන් චක්‍රබෝර්ති එක්ක සිද්ධ වුණු කෙටි කාලීන විවාහයෙන් දික්කසාද වුණු ඇය 1996දී බොනී කපූර් එක්ක විවාහ වුණා. ඒ වෙද්දි බොනී කපූර් මහා පරිමාණ වශයෙන් සිනමා නිෂ්පාදනයට අත ගහලයි තිබුණෙ. ඒ නිසා ඉන්දියානු සිනමා ඕපදූප මාධ්‍ය ඒ කාලෙ කිව්වේ ශ්‍රී දේවි බොනී එක්ක විවාහ වෙන්න හේතුව ඔහුගේ නිෂ්පාදනවල ප්‍රධාන නිළිය බවට පත් වෙන්න පුළුවන් වෙන නිසා කියලයි. ඒ වගේම බොනී නිෂ්පාදනය කරපු නිර්මාණ කීපයකම ශ්‍රී දේවි ප්‍රධාන භූමිකාව කරලත් තිබුණා. නමුත් පස්සෙ පස්සෙ ශ්‍රී දේවි රංගනයෙන් ටික ටික ඉවත් වුණා.
ඒකට හේතුව වුණේ ඇය ගැබ් ගැනීම වුණත් බොනී ඇයට සිනමාව තහනම් කරලා කියලා කටකතාවකුත් පැතිරිලා තිබුණා. 1990 දශකයෙන් පස්සෙ අවුරුදු 15ක් තුළ ඇය රඟපාලා තිබුණෙ චිත්‍රපටි 3ක විතරයි. ඒවත් වෙන වෙන අය නිෂ්පාදනය කරපු චිත්‍රපට. ඊට පස්සෙ ඇය බොනී කපූර්ගෙ අවසරය නැතිව චිත්‍රපට 15ක විතර රඟපාලා තියෙනවා. ඒ ගැන 'ද හින්දු' පුවත්පතේ සිනමා අතිරේකය කියන්නෙ මෙහෙම කතාවක්. 'දෙන්නා වෙන් වුණාට පස්සෙ කරන කියන දේවල් ගැන තව මොනවා අහන්නද' කියලයි. මාධ්‍ය එහෙම කිව්වත් බොනී නම් කියන්නෙ ශ්‍රී දේවි තාමත් එයාගෙ බිරිය කියලයි.
මව්බිම
