This site has features that require javascript. Follow these simple instructions to enable JavaScript in your web browser.
Sithmal Yaya
ලෝක කාන්තා සමුළුව ඇමැතීමේ වරම් දිනාගත් ප්‍රථම බොලිවුඩ් නිළිය



කන්ගනා රනවුන් බොලිවුඩ් නිළියක් විතරක්ම වුණත් ගිය සතියෙ ලෝක ප්‍රසිද්ධ කාන්තාවක් බවට පත් වුණා. ඒ ඇයට 'වුමන් ඉන් ද වර්ල්ඩ්' සමුළුව අමතන්න අවස්ථාවක් ලැබුණු නිසා. මේ කතාව ඒ ගැනයි.

හොඳම නිළිය
පසුගිය මාසවල කන්ගනා රනවුන් ගැන ඉන්දියානු වගේම වෙනත් රටවල මාධ්‍යවලිනුත් ගොඩක් කතා වුණා. ඒකට හේතු වුණේ කන්ගනා පසුගිය අවුරුද්දෙ ෆිල්ම් ෆෙයාර් සම්මාන උළෙලේ හොඳම නිළිය සඳහා වූ සම්මානය ලබා ගත් එක. ඇයට මේ හොඳම නිළිය සම්මානය ලැබුණේ 2014 රිලීස් වුණු විකාශ් බාල්ගෙ ක්වීන් කියන ෆිල්ම් එකට. කන්ගනා කියන විදියට නම් ක්වීන් ෆිල්ම් එකේ කතාව එයාගෙ පෞද්ගලික ජීවිතයට ගොඩක්ම සමීපයිලු. නමුත් අද කතා කරන්න යන්නෙ ක්වීන් ගැන නෙවෙයි.

සමුළුව ඇමැතීම
ගිය සතියෙ, හරියටම කියනවා නම් ඔක්තෝබර් 9 වැනිදා 'වුමන් ඉන් ද වර්ල්ඩ්' සමුළුව පැවැත්වුණා. ඒ එක්සත් රාජධානියෙ. 'වුමන් ඉන් ද වර්ල්ඩ්' සමුළුව කියලා කියන්නේ ලෝකයේ බලවත් කාන්තාවන්ගේ සහභාගිත්වයෙන් පවත්වන සමුළුවක්. මේ සමුළුවට සාමාන්‍යයෙන් සහභාගි වෙන්නේ සෑම අතින්ම සාර්ථකත්වය කරා පිය නඟිමින් ඉන්න කාන්තාවන් කිව්වොත් නිවැරැදියි. ඉතිං පසුගිය නොවැම්බර් 9 වැනිදා තිබුණු මේ සමුළුවට ඇමෙරිකානු හිටපු ජනාධිපති බිල් ක්ලින්ටන්ගෙ බිරිය හිලරි ක්ලින්ටන්, සුපිරි හොලිවුඩ් නිළි ඇන්ජලිනා ජොලී, ඇමෙරිකාවේ හිටපු රාජ්‍ය ලේකම් කොන්ඩලීසා රයිස්, ලොව ළාබාලතම නොබෙල් සම්මානලාභිනී මලාලා යූසුෆ්සායි වගේ අයත් සහභාගි වෙලා තිබුණා. ඉතිං මේ වගේ ප්‍රබල කාන්තාවන් සහභාගි වන සමුළුවකට සහභාගි වෙන්න කන්ගනාට තියෙන සුදුසුකම මොකක්ද කියලා හිතෙන්න පුළුවන්. ඒ ගැන කතා කරන්න නම් කන්ගනාගෙ බාල කාලයට යන්න වෙනවා.

ගැහැනු ජීවිතය ගැන වෛරයක්
කන්ගනා පුංචි කාලේ ඉඳලාම තමන් ගැහැනු ළමයෙක් විදියට ඉපදීම ගැන තරහෙන් වෛරයෙන් හිටපු කෙනෙක්. ඒකට හේතු වුණේ කන්ගනා ඉපදෙන්න කලින් පුතෙක් උපදින්න කියලා දෙවියන්ට භාරහාර වුණු කන්ගනාගෙ මවුපියන්ට දෙවැනි දරුවත් කෙල්ලෙක් වුණු නිසා දැනුණු ආතතිය කන්ගනාගෙ ජීවිතයට පීඩනයක් බවට පත් වුණු නිසා කියලා ඇය කියනවා. කොහොමහරි කන්ගනාගෙ මවුපියන් මේ ආතතියෙන් නිදහස් වෙලා තියෙන්නෙ ඇයට මල්ලි කෙනෙක් ලැබුණට පස්සෙ. මවුපියන් ඒ ආතතියෙන් නිදහස් වුණාට කන්ගනාට අර කියපු පීඩනයෙන් නිදහස් වෙන්න පුළුවන් වෙලා නැහැ. මවුපියන්ගෙ ආදරය මල්ලිට තරම්ම ලබාගන්න ඕනෙ වුණු නිසා කන්ගනා හැසිරිලා තියෙන්නෙත් පිරිමි ළමයෙක් වගේ. ඒ විතරක් නෙවෙයි පිරිමි සෙල්ලම් බඩු ඉල්ලලා අඬන්නත් පුරුදු වෙලා ඉඳලා. පිරිමි ඉස්කෝලෙකට දාපු නැති එකට අම්මටයි තාත්තටයි වෛර කරන්න පටන් අරන්.

සමුළුවට ගිය හේතුව
ඉතිං ඒ පීඩනයත් එක්ක කන්ගනා ගත කරලා තියෙන්නෙ බොහොම මුරණ්ඩු ජීවිතයක්. මවුපියන් කියන දේ කරන්නෙ නැතිව එයාගෙ කැමැත්තට වැඩ කරපු නිසා එයාට හොස්ටල් එකක නවතින්න සිද්ධ වෙලා. අම්මලා එයාව ඩොක්ටර් කෙනෙක් කරන්න හිතාගෙන හොස්ටල් එකකට දාලා ඉගැන්නුවත් කන්ගනා ඉස්කෝලෙන් කට්ටි පැනලා එයාට ඕනෙ ගමන් බිමන් යනවලු. තුන් පාරක් ඉස්කෝලෙන් අවවාද කළාට පස්සෙත් මේ මුරණ්ඩුකම නැති වුණේ නැතිලු. කොහොම හරි ඉස්කෝලෙ යන්න බැරි නම් ගෙදර යමු කියලා කන්ගනාව ගෙදර එක්ක යන්න අම්මලා ගිය වෙලාවෙ තමයි දන්නෙ ඒ වෙද්දිත් ඇය ප්‍රසිද්ධ නිරූපිකාවක් බවට පත් වෙලා කියලා. කන්ගනාට ෆිල්ම් ෆෙයාර් සම්මානය ලැබුණු වෙලාවෙ මේ කතා සඟරාවල ප්‍රචාරය වුණා. හොලිවුඩ්වල ප්‍රචාරය කරන සඟරා තුනකත් ඇගේ විස්තර පළවෙලා තියෙනවා. ඉතිං පුංචි කාලෙ ළමයෙක්ගෙ හිතට මොකක්හරි පීඩනයක් දැනුණාම ඒක ජීවිතේට බලපාන්නෙ කොයි විදියටද කියන එක ගැන කතාවක් කරන්න තමයි කන්ගනාට 'වුමන් ඉන් ද වර්ල්ඩ්' සමුළුවට ආරාධනා කරලා තියෙන්නෙ.

ඒ වගේම මේ වෙද්දී කන්ගනා රඟපාලා තියෙන්නෙ ෆිල්ම් 10ක විතරයි. ඒවලින් ෆිල්ම් පහක්ම කන්ගනා සම්මානයට පාත්‍ර වුණු ඒවා. ඉතිං පුංචි කාලෙ ඒ තරම් පීඩනයකින් හිටපු ඇයට මේ විදියෙ සාර්ථකත්වයක් ලැබුණෙ කොහොමද කියන එක ගැන ඇය 'වුමන් ඉන් ද වර්ල්ඩ්' සමුළුවේදී කතා කළා. වරක් ඇයට වියදමට සල්ලි දෙන එක තාත්තා නතර කළාලු. ඒ වෙලාවෙ ඇය දවස් ගණන් බඩගින්නෙ හිටියලු. ඒ වගේම හොස්ටල් එකේ ගාස්තු ගෙවපු නැති නිසා පේමන්ට් එකේ නිදා ගන්න සිද්ධ වුණාලු. ඊට පස්සෙ දවසක් තාත්තා ඇවිත් අහලා 'දැන්වත් ඔයා පාඩමක් ඉගෙන ගත්තද?' කියලා. එතකොට කන්ගනා තාත්තට කිව්වලු 'නැහැ. නමුත් දැන්වත් ඔයා පාඩමක් ඉගෙන ගත යුතුයි. ඔයාගෙ දෙවැනි දුව ඔයා හිතනවට වඩා ශක්තිමත් හිතක් තියෙන කෙනෙක්' කියලා.


දුලංජලී මුතුවාඩිගේ
මව්බිම