සල්මන් විවාහ ගිවිස ගනී

ලූලියා වැන්ටර් රුමේනියාවේ ටෙලි නාට්‍ය නිළියක්. ඇය රුමේනියාවේ හිටියත් ඇගේ නම බොලිවුඩ් සුපිරි තරුවකගේ නමක් සමඟ පැටලුණා. ඒ, මීට වසර දෙකකට කලින්. ලූලියාව ඈඳුණේ සුපිරි නළු සල්මන් ඛාන් එක්කයි. විවිධ කටකතා, ඕපාදූපවලට හසුවූ මේ දෙදෙනා ඒ ගැන කතා කරන්නට උනන්දු වුණේ නැහැ. ටික කාලයක් ගතවෙද්දී සල්මන් - ලූලියා කතන්දරය යටපත් වුණා.

නැවතත් එය මතුවුණේ පසුගිය සතියේදීයි. අලුත් ආරංචියකුත් ඒ සමඟ දැවටී තිබුණා. එයින් කියවුණේ සල්මන් සහ ලූලියා රහසේම විවාහ ගිවිසගෙන ඇති බවයි. දෙදෙනාගේ විවාහ මංගල උත්සවය ලබන වසරේ මුල් භාගය තුළදී සිදු කිරීමට බලාපොරොත්තු වන බවක් ද ඒ සමඟම පැවසුණා. මේ ආරංචිය වඩාත්ම පැතිරී ගියේ ලූලියාගේ කළමනාකරුවකු රුමේනියාවේ බුකාරෙස්ට් නුවර සිට කළ ප්‍රකාශයකින් පසුවයි. ඔහු කීවේ ලූලියා සහ සල්මන් දැනටමත් විවාහ ගිවිසගෙන ඇති නිසා විවාහ මංගල්‍යය තවත් මාස කිහිපයකින් සිදු කිරීමට නියමිත බවයි.

කෙසේ වෙතත්, මේ ආරංචියෙහි කිසිඳු සත්‍යතාවක් නැතැයි, සල්මන්ගේ නැගණිය වන අර්විතා ඛාන් සිය ට්විටර් පිටුවෙහි සටහනක් තබමින් ප්‍රකාශ කළා. ඇය එවැන්නක් පවසද්දී රුමේනියානු රූපවාහිනී චැනලවලින් ප්‍රකාශ වූයේ ද සල්මන් සහ ලූලියාගේ රහසිගත විවාහ ගිවිස ගැනීමක් ගැනයි. කෙසේ වෙතත් මේ වන තුරු මෙහි ඇත්ත නැත්ත නිවැරැදිව තවමත් හෙළි වී නැහැ.

සිලුමිණ