🛍️   Business Directory
📣   Classifields
🛍️   Business Directory
📣   Classifields

71 වන වියේ පසුවන ආසියාවේ දීර්ඝ කාලීනතම සුපිරි තරුව බච්චන්

71 වැනි වියෙහි පසුවන ආසියාවේ දීර්ඝකාලීනතම සුපිරි තරුව, තරුණ තරුණියන්ට පූර්වාදර්ශී චරිතයක් වන අතරම වැඩිහිටියන්ට පරමාදර්ශයක්ද වෙයි. තරුණ තරුණියන්ට පූර්වාදර්ශී චරිතයක් බවට පත් වීමට වයස්ගත වීම නුසුදුසුකමක් වන බව ඔබ විශ්වාස කරන්නේ නම්, ඔබ සමහර විට අමිතාබ් බච්චන් ගැන නොදන්නවා වීමට පුළුවන්. මෑතකදී 71 වැනි වියද එළඹි මෙම රංගධරයා, ජනතා මතකයේ දී දැනටමත් රැඳී තිබෙන 1970 සහ 80 දශකවල දී තිරගත කෙරුණු විශිෂ්ට සිනමා කෘති සමූහයකට දායකත්වය ලබා දී ඇති අතර, ඔහුගේ පරමාදර්ශීභාවය රැඳී තිබෙන්නේ ඒ මත පමණක් නොවේ. අනෙකුත් රංගන ශිල්පීන් ද විශිෂ්ට වෘත්තීමය සිනමා ජීවිතවලට හිමිකම් කියන නමුත්, ඉන්දියාවේ කිසිදු නළුවෙකු විසින් ඔහු විසින් බුක්ති විඳින ආකාරයේ දීර්ඝකාලීන ජනප්‍රියතාවයක් අත්විඳ නොමැත. මෙම වයසේදීද ඔහු සතුජව සම්පන්නභාවය සහ කාර්යය කටයුතු රැසකින් පිරි දින චරියාව බොලිවුඩ් පුරාවෘත්තයේ අත්‍යවශ්‍ය අංගයන් වේ. සෑම දිනකම සිදු කරන පරිදි, දහස් ගණනාවක් රසික ජනතාව ඔහුගෙන් “ට්වීට්” එකක් බලා‍පොරොත්තුව සිටියදී, 2012 ඔක්තෝබර් 28 වැනි දින හිමිදිරි උදෑසන ඔහු “ට්විටර්” සාමජ ජාල වබේ අඩවියේ ඔහු පළ කළ අදහස්වලින් ඔහුගේ අඛණ්ඩ ජන ආකර්ෂණය පිළිබඳ වඩා හොඳ අදහසක් ලබා ගත හැකිය. * “ටී 914-ඔබ සිතුවා නම් මම නොයෙනු ඇතැයි කියා...... ඔබට බලා‍පොරෙත්තු වීමට දෙයක් තිබේ..... කේ.බි.සී. හි කාර්යය කටයුතු නිම කර ආපසු පැමිණියෙමි..... මට කේ.බි.සී. හි හොඳම මෙහෙයවන්නා ලෙස තවත් සම්මානයක් හිමි වී ඇත.” ඉන් අනතුරුව * “ටී 914- දැන් මම ඔබගෙන් සමුගනිමි. තවමත් බ්ලොග් එකෙහි ලිවීමට සහ ෆේස්බුක් අඩවියට යාමට ඉතිරිව තිබේ. දැනටමත් උදෑසන 3.40 පසුවී තිබේ. ඔබට මාගේ ආදරය. සුබ රාත්‍රියක් වේවා.” “ටී 914” යන අංකය මගින් මෙම සුපිරි තරුවගේ අන්‍යයන්ට සම කළ නොහැකි සංවිධිත ලෝකය පිළිබිඹු කරයි. ඔහු කොපමණ දින ගණනක සිට ට්වීට් කිරීමේ යෙදී සිටිද යන්න අංකයක් මගින් දැක්වීමට ඔහු කටයුතු කරයි. කේ.බි.සී. යනු “කෝන් බනේගා කරෝර්පති” යනුවෙන් හැඳින්වෙන “Who Wants To Be A Millionaire” යන වැඩසටහනේ හින්දි අනුවාදයයි. අමිතාබ් බච්චන්ගේ පසුබෑමකට ලක් වී තිබූ වෘත්තීමය ප්‍රගතිය යළි පණ ලැබුවේ, වසර 13 කට පෙර දී මෙම වැඩසටහන මෙහෙයවීම ආරම්භ කිරීමෙන් පසුවය. තවද, උදෑසන 3.40 වන විට ඔහු ට්වීට් කිරීම අවසන් කළද, නින්දට යාමට පෙර ඔහුගේ බ්ලොගයේ ලිවීමටද, අඩවිය වෙත යාමටද ඔහු කටයුතු කළේය. පෙනෙන ආකාරයට අමිතාබ් බච්චන් ලබා ඇති ප්‍රගතිය පිළිබඳව කිසිදු රහසක් නොමැත. එය ඉතා සරලය: ඔහු අද වන විටද ඉතා වෙහෙස වී සහ එමෙන්ම සඵලදායීව කටයුතු කරයි. ඔහු අද සිටින බොහෝ නව යොවුන් තරුණ තරුණියන්ට වඩා ජවසම්පන්නය. තවද ඔහුට වඩා බොහෝ සෙයින් වයසින් අඩු නළුවන්ට වඩා ඔහු තාක්ෂණය සහ නව මාධ්‍ය පිළිබඳව උනන්දුවක් දක්වයි. අවශ්‍ය විටක තම වැරදි සුදුසු ලෙස නිවැරදි කර ගැනීමට තරම් ඔහු යථාර්ථය තුළ ගැවසෙන්නෙක් වේ. ඔහු යෞවනයන්ට හිමි විය යුතු වන කාර්යයන් භාර ගෙන ඔවුන් කොන් කරන්නෙකු ද නොවේ. ඔහුගේ වයස සහ අත්දැකීම් ඔහුගේ වෘත්තීමය ජීවිතයේම කොටසක් වේ. පියෙකු මෙන් කේ.බි.සී. වැඩසටහන මෙහෙයවීම අති සාර්ථකත්වයටපත් වූ අතර, වසර 2000 අනතුරුව ඔහුගේ චිත්‍රපට අතළොස්සක් සාර්ථකත්වයට පත් විය. නමුත් ඔහු විසින් රඟපෑ වැඩි චිත්‍රපට සංඛ්‍යාවක් හා ඔහුගේ රංගනයන් ගණනාවක් පසුගිය දශකයේදී විචාරකයන්ගේ තදබල විවේචනයට සහ ප්‍රේක්ෂකයන්ගේ ප්‍රතික්‍ෂේප කිරීම්වලට ලක් වී ඇත. කෙසේ වුවද, මෙම දුක් සහ සැප මධ්‍යයේ, ඔහුගේ වෘත්තීය භාවය කිසි දිනෙක ප්‍රශ්නයකට ලක්වී නොමැත. අමිතාබ් බච්චන් ස්වෝත්සාහයෙන් නැගී සිටින්නෙකු නොවූයේ නම් මේ කිසිදු සාර්ථකත්වයක් ඇති කර ගැනීමට නොහැකි වනු ඇත. ඔහුගේ සිනමා සගයන් වූ රංගන ශල්පීන්ගේ ජීවිත තුළින් විවිධ දෑ ලබාගැනීම වෙනුවට ඔහු ස්වෝත්සාහයෙන්ම ජයග්‍රහණ ලබාගත් බව නිතර සිහි කෙරේ. පසුගිය වසරේදී කිසිදු නරඹන්නෙකු නොමැති හිස් ශාලාවක දී දේව් ආනන්ද්ගේ අවසාන චිත්‍රපටය නැරඹීම පිළිබඳ ඉතා දුක්බර මතකයක් මට සිහියට නැගෙයි. එය නැරඹීම, මා රචනා කරන ‍පොත සම්බන්ධයෙන් වූ පර්යේෂණ කටයුතු සඳහා අත්‍යවශ්‍ය නොවූයේ නම් එය බැලීමට මා කරදර නොවනු ඇති බව මම දනිමි. සිය ජීවිතයේ අවසාන දශකවලදී ආනන්ද් මුළුමනින්ම පාහේ කිසිදු නරඹන්නෙකුගේ ආකර්ෂණය දිනා ගැනීමට අසමත් වූ සහ ඊටත් අඩු මාධ්‍ය ආවරණයක් ලැබුණු චිත්‍රපටයෙන් චිත්‍රපටය නිෂ්පාදනය කිරීම, අධ්‍යක්ෂණය කිරීම සහ එම චිත්‍රපටවල රඟපෑම යන කටයුතු සියල්ලම සිදු කළේය. ඊට ප්‍රතිවිරුද්ධ ලෙස, බච්චන් තමා සතු වන කිසිවෙකු හා සම කළ නොහැකි වන සාර්ථකත්වය ද නොතකා, ජනතාවගේ හදගැස්ම සහ මාධ්‍ය පිළිබඳ නිරන්තරයෙන් අවධානය යොමු කරයි. 1970 දශකයේදී බච්චන් ගත හැකි සියලු වේගයන් රිදී තිරය මත නිරූපනය කරමින්. බොක්ස් ඔෆිස් වාර්තා පිට වාර්තා තැබුවේය. ත්‍රාස්‍යජනක කටයුතුවල යෙදෙන වීරයෙකු, දුක්බර ආදරවන්තයෙකු කනස්සල්ලෙන් පසුවන චින්තකයෙකු යනාදී චරිත ඔහු විසින් නිරූපණය කරන ලදී. ඔහු විසින් නිරූපණය කළ චරිත රිදී තිරයේ දී බලයේ සිටින අය සමග ඇති කරගත් ඝට්ටනයන් මඟින්, යටත් විජිත වාදීන් මෙරටින් පන්නා දැමීමෙන් දශක තුනක් ගත වූ පසුද, පාලනය සමග ඉන්දියානු ජනතාවගේ තිබූ අතෘප්තිමත් භාවය පිළිබිඹු විය. කෙසේ වුවද, 1990 දශකය වන විට, වයස සහ බොලිවුඩ් හි සුපුරුදු සම්ප්‍රදායන් විසින් ඔහුගේ විශිෂ්ට සිනමා දිවියේ අවසානය සනිටුහන් කරන බව පෙනෙන්නට තිබුණි. “කිපුණු තරුණ මිනිසා” යන ඔහු ...... ඇත්තෙන්ම ....... තරුණ වියේදී ඔහුට පටබැඳුණු නාමයට ඔබ්බෙන් ඔහු දෙස බැලීමට සිනමා කර්මාන්තයෙහි නිරතව සිටි. අන් අයට අසීරු විය. එම නිසා චිත්‍රපටවල සෑම විටම එකම ආකාරයේ සටන් සිදු කරමින් ඔහුගේ දූවරුන් වීමට තරම් ළාබාල නිළියන් සමග ආදර ජවනිකාවල යෙදෙමින් සහ ඒ සියල්ලටම වඩා තමන්ගේ සත්‍ය වයසට වඩා බොහෝ බාල චරිත නිරූපණය කරමින් ඔහු දශකයන් ගත කළේය.එක් කලක ආදර සත්කාරයෙන් ඔහු සමඟ වෙළී සිටි නරඹන්නන් වෙනතකට ගොස් ඇති බව පෙනෙන්නට තිබිණ. බච්චන්ගේ සිනමා පට නැවත නැවතත් අඩු බොක්ස් ඔෆිස් ආදායම් වාර්තා කළේය. ඔහු වඩා අඩු පෞරුෂයකින් යුතු පුද්ගලයෙකු නම්, මේ හමුවේ බිඳ වැටෙනු ඇත. නමුත් අමිතාබ් බච්චන් එසේ නොවේ. මෙම රංගධරයා සතුව ඇතැයි කියන මානය පිළිබඳ නිරන්තරයෙන්ම දෝෂාරෝපණ එල්ල වෙයි. මෙම දෝෂාරෝපණ සිනමා කර්මාන්තයේ නියුතු අනික් සගයන්යන් විසින් සෙමින් කියන රහස් ලෙසද, මාධ්‍ය විසින් ප්‍රසිද්ධියේම ද සිදු කරනු ලබන ප්‍රකාශ ලෙසද එල්ල වේ. නමුත්, ඔහු සිය වැරදිවලින් ඉගෙනගන්නා බව කිසිවෙකුට ප්‍රතික්‍ෂේප කළ නොහැක. නව සියවස උදා වූ අවස්ථාවේදී, ඔහු තරුණයෙකු ලෙස පෙනී සිටීම අත්හැර දැමූ අතර, ඔහුගේ හිසකෙස්වල සුදු බව පෙනෙන්නට ඉඩ හැරියේය. එක් චිත්‍රපටයක ඔහු වැඩිහිටි අධ්‍යාපනඥයකුගේ චරිතය ද නිරූපණය කරන ලද අතර, එවකට කිසිදු ප්‍රධාන පෙළේ සිනමා නළුවෙකු ගනු නොලබනු ඇති පියවරක් ගන්නා ලදී. ඔහු රූපවාහිනී වැඩසටහන් මෙහෙයවන්නෙකු බවට පත් විය. වර්තමානයේදී ඉන්දියානු සිනමා තරු අතර, බච්චන්,පරම්පරා ගණනාවක් නියොජනය කරන රසික සමූහයක් සිටින දැවැන්ත සුපිරි තරුවක් ලෙස වැජඹේ. වැඩිහිටි නළු නිළියන් යෞවන යෞවනියන් ලෙස පෙනී සිටීමට වඩා, වැඩිහිටි පිරිමි චරිතවලට සරිලන වීරයන්ගේ චරිත රචනා කිරීමට බොලිවුඩය පෙළඹවූයේ ඔහු විසිනි. ඔහු ඉන්දියාවේ වැඩිම මුදලක් උපයන සන්නම් තානාපතිවරුන් අතරින් එක් අයෙකි. ඔහු මේ සියල්ල කරන්නේ 1982 වර්ෂයේ දී සිදු වූ මාරාන්තික විය හැකි තරම් දරුණු අනතුරෙන් පසු ඔහුට බලපෑ සෞඛ්‍ය ප්‍රශ්න සමඟ සටන් වදිමින් සිටින්නෙකු ලෙස සහ දුර්ලබ සහ සිරුර දුබල කළ හැකි වන හා ස්වයං ප්‍රතිශක්තිය ලබා දෙන ස්නායු පේෂි ආශ්‍රිත රෝගයක් වන මියස්තේනියා ග්‍රැවිස් රෝගයෙන් සුවය ලැබුවෙකු ලෙසය. එක්තරා තරුණ සගයෙකු එක් දිනෙක අමිතාබ් බච්චන් පිළිබඳව ෆේස්බුක් හි මෙසේ සඳහන් කර තිබිණ. “කේ.බි.සී. හි සිටින වඩාත්ම වෘත්තීමය, වෙහෙස වී වැඩ කරන, ජවසම්පන්න, සූදානමින් සිටින, දක්ෂ, ප්‍රසන්න, චතුර, ආචාරශීලී, බුද්ධිමත් සහ ආකර්ෂණීය පුද්ගලයා, එහි සිටින ‍‍‍ජ්‍යෙෂ්ඨතම පුද්ගලයා ද වන බව මට කිසි දිනෙක කල්පනා වූයේ නැත. මට වයස 71 වන විට මේ අතුරින් අඩක් හෝ ගතිගුණ මා සතු වේ නම් අවම වශයෙන් දිනකට පැය කිහිපයක් වත් මසකට දින කිහිපයක් වත් එසේ වීමට මට හැකි නම්. මම දේවතාවියක් වන බව මට හැඟී යනු ඇත. එම නිසා “බිග් බි”, තනි පුද්ගලයෙකුගෙන් සමන්විත වන කාර්මාන්තය, ඉන්දියාවේ විශාලතම සුපිරි තරුව ලෙස හැඳින්වෙන රටේ වඩාත්ම ශක්තිමත් හැත්තෑ එක් වියැති පුද්ගලයාව හඳුන්වන නාමයන් අතරට, තරුණ තරුණියන්ගේ පූර්වාදර්ශී චරිතය සහ වැඩිහිටියන්ගේ පරමාදර්ශය යන දෙකද එකතු කර ගන්න. මෙවැනි චරිත මෙම රට තුළ සිටින්නේ ඉතා අඩුවෙනි. India perspectives සඟරාවේ ලිපියක අනුවාදයකි උපුටා ගැනීම ලක්බිම පුවත්පත