This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
‘කොස්බි ෂෝ’ තවදුරටත්...

‘කොස්බි ෂෝ’ තවදුරටත්...

ලොව පුරා ප්‍රේක්ෂකයන් සිනහවෙන් රස ගැන්වූ විකට නළු බිල් කොස්බිට මෑතකදී ස්ත්‍රී දූෂණ චෝදනා එල්ල වුණා. දැනට 77 වැනි වියෙහි පසුවන කොස්බි මේ නොපනත්කම් සිදුකර ඇත්තේ මීට දශක තුන හතරකට කලින් බවයි පැවසෙන්නේ. කාන්තාවන් 15 දෙනෙකුගෙන් එල්ල වී ඇති මේ චෝදනාවලට නුදුරු දිනයකදී ප්‍රසිද්ධියේ උත්තර දෙන බවයි කොස්බි ප්‍රකාශ කර ඇත්තේ. ඔහුගේ මේ ප්‍රකාශය පළවීමෙන් පසුව ඇමෙරිකාවේ ජනප්‍රිය රූපවාහිනී චැනල අතර තරගකාරිත්වයක් හටගත්තා. ඒ, කොස්බිගේ ප්‍රකාශය සිදුකරන ‘නිල’ රූපවාහිනී චැනලය වීමේ වරම ලබා ගන්නටයි. කොහොම වෙතත් පසුගිය සතියේ කොස්බි වෙනුවෙන් පෙනී සිටින නීතිඥවරුන්, දූෂණ චෝදනා එල්ල කරන එක් කාන්තාවකට එරෙහිව නීතිමය ක්‍රියාමාර්ගවලට යොමුවීමට කටයුතු කරමින් සිටියා. මේ කාන්තාවගේ නම ජූඩි හච්. ඇය පවසන්නේ මීට අවුරුදු 40 කට පෙර තමන් 15 වියැති දැරියක වී සිටිද්දී එක්තරා ප්‍රසිද්ධ ගොඩනැඟිල්ලක් තුළදී කොස්බි තමන්ට අතවර කළ බවයි. මේ ප්‍රකාශයට පිළිතුරු දෙන කොස්බිගේ නීතිඥවරුන් පවසන්නේ ජූඩ් හච් නමැත්තිය මීට මාසයකට පමණ පෙර කොස්බිට දූෂණ චෝදනා එල්ල කරමින් ඇමෙරිකානු ඩොලර් 100,000 ක මුදලක් බලහත්කාරයෙන් ලබා ගැනීමට උත්සාහ කළ බවයි. එය නොලැබුණු විට ඇමෙරිකානු ඩොලර් 250,000 ක වන්දියක් ඉල්ලා මේ වන විට කැලිෆෝනියා අධිකරණයෙහි කොස්බිට එරෙහිව නඩුවක් පවරා ඇතැයි ඔවුන් පවසනවා. ඇගේ මේ කටයුතුවලින් සිදුවූයේ කොස්බිගෙන් මුදල් ගරා ගැනීමට තවත් වංචනික කාන්තාවන් උත්සාහ දැරීම යැයි ද මේ නීතිඥවරුන් අවධාරණය කර සිටිනවා.

‘අන්බ්‍රෝකන්’ බලලා කාර් එක බ්‍රෝකන්

චිත්‍රපටයේ නම, ‘අන්බ්‍රෝකන්'. මෙහි අධ්‍යක්ෂවරිය ඔබ අප කවුරුත් දන්නා සුපිරි තරුවක්. ඇය තමයි ඇන්ජලිනා ජොලී. ‘අන්බ්‍රෝකන්’ නම් වූ ප්‍රබන්ධය ඇසුරින් නිර්මාණය කළ මේ චිත්‍රපටයේ නිෂ්පාදකවරියත් ඇන්ජලීනාමයි. චිත්‍රපටය තිරගත කිරීම ආරම්භ වන්නේ දෙසැම්බර් 25 දා. මෙහි ජැක් ඕකොනෙල්, රඩාම්හල් ග්ලීසන් ඇතුළු නළු නිළි පිරිසක් චරිත නිරූපණය කරනවා. ‘අන්බ්‍රෝකන්’ චිත්‍රපටයේ මංගල දර්ශනය පසුගිය දා නිව්යෝක් හි සිනමා ශාලාවක පැවැත්වුණා. චිත්‍රපටය තිරගත වී හමාර වීමෙන් පසුව කාගේත් පැසසුම් මැද තම මෝටර් රථයට නැඟුණු ඇන්ජලිනා එය පදවාගෙන ගියා. හතර වටින්ම කළුවර වැටී තිබුණු ඒ මොහොතේ ධාරානිපාත වැස්සක් ද කඩා හැලෙන්න පටන් ගත්තා. මහ වැස්සේ වුණත් ඇන්ජලිනා මෝටර් රථය පැදවූයේ වේගයෙන්. ටික දුරක් ගතවෙද්දී වේගය තවත් වැඩිවුණේ ඇයටත් නොදැනීම වාගෙයි. ඒත් ඒ අයුරින් ඇයට ඉගිලෙන්න ලැබුණේ නැහැ. හදිසියේම ලිස්සා ගිය වාහනය මාර්ගයේ වම්පස තිබුණු පදික වේදිකාවේ ගැටිත්තක හැපුණේ මහ හඬක් නංවමින්. මේ අනතුරෙන් ඇන්ජලීනාගේ රථයට සැලකිය යුතු අලාභ හානියක් සිදුවුණා. “පදික වේදිකාවේ මේ කාර් එක තදින්ම වැදුණේ ඒක ගොඩක් වේගයෙන් ආපු නිසයි. කාර් එකේ ඉස්සරහ ටයර් දෙකත් පුපුරලා තිබුණා.” මෙලෙස ප්‍රකාශ කර තිබුණේ අනතුර දුටු අයෙක්. මෝටර් රථයට හානියක් සිදුවුණු බව වාර්තා වුණත් ඇන්ජලීනාට තුවාල සිදුවුණා ද නැද්ද යන්න මෙතෙක් දැනගන්න ලැබී නැහැ.

හතර වරක් පුළුවන්

තවත් ජේම්ස් බොන්ඩ් චිත්‍රපටයක් රූගත කරන්නට සැරසෙන බවට ආරංචියක් ලැබී තිබෙනවා. මේ චිත්‍රපටයට තවම නමක් යොදා නැහැ. ‘බොන්ඩ්’ චිත්‍රපට මාලාවේ 24 වැනි චිත්‍රපටය හැටියටයි දැනට මෙය හඳුන්වන්නට සිදුවන්නේ චිත්‍රපටය අධ්‍යක්ෂණය කරන්නේ සෑම් මෙන්ඩස්. මේ අලුත්ම ජේම්ස් ‍බොන්ඩ් චිත්‍රපටයේ ප්‍රධාන චරිතය හෙවත් රහස් පරික්ෂක ජේම්ස් බොන්ඩ් ලෙස රඟන්නේ කවුරුන්දැයි පසුගිය දිනවල හොලිවුඩ් පුරයේ බොහෝ දෙනෙකුගේ කුතුහලයට ලක්වී තිබුණා. සමහරු ප්‍රකාශ කළේ ජනප්‍රිය නළු ලූක් ඉවන්ස් එම චරිතය නිරූපණය කරනු ඇති බවයි. (මෑතකදී තිරගත වූ ‘ඩ්‍රැකියුලා අන්ටෝල්ඩ්’ චිත්‍රපටයේ ද ඔහු ප්‍රධාන චරිතයක් නිරූපණය කළා.) මෑතකදී තිරගත වූ ජේම්ස් බොන්ඩ් චිත්‍රපට තුනක බොන්ඩ් චරිතය රඟපෑවේ ජනප්‍රිය නළු ඩැනියල් ක්‍රේග්. මේ නිසා ආරංචි පැතිරී ගියේ ඩැනියල්, බොන්ඩ් චරිතයෙන් සමුගැනීමට ඉඩ ඇති බවයි. ඔහු වෙනුවට ලූක් ඉවන්ස් තෝරා ගන්නට අධ්‍යක්ෂ සෑම් මෙන්ඩස්ගේ අදහසක් ඇතැයි පැවසුණා. ඒත් මේ අදහස පසුව වෙනස් වුණා. අධ්‍යක්ෂවරයා අන්තිමේදී නැවතත් තෝරා ගත්තේ ඩැනියල් ක්‍රේග්වයි. ඒ අනුව ඔහුට 4 වැනි වරටත් බොන්ඩ් ගේ චරිතය භාර ගන්නට සිදුවුණා. අලුත්ම ආරංචිවලට අනුව මේ චිත්‍රපටයේ රූගත කිරීම් රැසක් ඉතාලියේ රෝම නගරය ආසන්නයේ සිදු කෙරෙනවා. මෙහි එන එක්තරා දර්ශනයක ඩැනියල් ක්‍රේග් පැරෂුටයක ආධාරයෙන් ඉතාලියේ ඉපැරැණි පොන්ටෙ සිස්ටෝ නම් වූ පාලම වෙතට පනින අවස්ථාවක් රූගත කිරීමට නියමිතයි. මෙවැනි ත්‍රාසජනක දර්ශන ඇතුළත් මේ අලුත්ම බොන්ඩ් චිත්‍රපටයේ රූගත කිරීම් ලබන වසරේදී සිදු කෙරෙන බව පැවසෙනවා. උපුටා ගැනීම සිළුමිණ
as-7.jpg
449 views