ජනප්‍රිය ගායිකා ශකිරා දැන් දෙදරු මවක්...
ජනප්‍රිය ගායිකා ශකිරා දැන් දෙදරු මවක්. ඇයට පුතුන් දෙදෙනෙකු සිටිනවා. වැඩිමලාගේ නම මිලාන්. ඔහුගේ වයස අවුරුදු දෙකයි. දෙවැනි පුතු මෙලොව එළිය දුටුවේ පසුගිය ජනවාරි මාසයේදීයි. පසුගියදා ශකිරා, අන්තර්ජාලයට අලුත් වීඩියෝ රූප රාමු පෙළක් එකතුකර තිබුණා. එහි දැක්වෙන්නේ ඇය තම වැඩිමල් පුතුට අකුරු කියා දෙන අවස්ථාවක්. කුඩා මිලාන් තරමක උස් පුටුවක වාඩිවී සිටින අයුරු එහි දිස්වෙනවා. ඊට ඉදිරියෙන් සුදු පැහැති ලෑල්ලක (වයිට් බෝඩ් එකක) වචන කිහිපයක් ලියන ශකිරා, ඒවා පුතුට කියා දෙනවා. ඒවා ස්පාඤ්ඤ භාෂාවේ වචනයි. (කොලොම්බියාවේ උපත ලද ශකිරාගේ මවු භාෂාව එයයි.) ඉංග්‍රීසි ගීත ගායනයෙන් ජනප්‍රිය වුවත් තමන්ගේ මවු බස දැන ගැනීම ඉතාම වැදගත් නිසා වන්නට ඇති ඇය එලෙස ස්පාඤ්ඤ භාෂාව පුතුට මුලින්ම උගන්වන්නේ. මේ වීඩියෝ දර්ශන පෙළ ලොව පුරා ප්‍රේක්ෂකයන් මිලියන 1.2 ක පමණ පිරිසක් නරඹා ඇතැයි ද එයින් 100,000 ක පිරිසක් ඊට කැමැත්ත පළකර ඇතැයි ද වාර්තා වෙනවා. ශකිරාගේ සැමියා ජෙරාඩ්. ඔවුන් දෙදෙනා ලද දෙවැනි පුතු, සාෂායි. පසුගියදා සම්මුඛ සාකච්ඡාවකට එක්වෙමින් ශකිරා පැවසුවේ ජෙරාඩ් සමඟ ගත කරන යුග දිවියේදී තමන්ට දරුවන් 9 දෙනෙකු පමණ සිටී නම් සතුටු වන බවයි. “එතකොට අපිට ෆුට් බෝල් ටීම් එකක් දාන්න පුළුවන්.” ඇය සිනාසෙමින් කීවා.
සින්ඩරෙල්ලාගේ ගවුම ප්‍රශ්නයක් වෙලා.
දැන් තිරගත වන ‘සින්ඩරෙල්ලා’ චිත්‍රපටයේ ප්‍රධාන චරිතය නිරූපණය කරන්නේ රුවැති යොවුන් නිළි ලිලි ජේම්ස්. මේ වන විට 25 වැනි වියෙහි පසුවන ඇය ලන්ඩනයේ ගිල්ඩ්හෝල් අධ්‍යයන ආයතනයෙන් සංගීතය සහ රංගනය හදාරා 2010 දී එම ආයතනයෙන් පිටවූයේ උපාධිධාරිණියක හැටියටයි. පසුගිය දා මාධ්‍ය හමුවකට එක්වෙමින් ඇය කියා සිටියේ ‘සින්ඩරෙල්ලා’ චිත්‍රපටයේ තමන් රඟපෑවේ මුළු හදවතින්ම සින්ඩරෙල්ලා චරිතය. වැලඳගෙන බවයි. සින්ඩරෙල්ලා කුමරිය ලෙස රඟපෑම සුන්දර අත්දැකීමක් වුවත් ඒ වෙනුවෙන් දැඩි කැපවීමක් කළ බව ද ඇය පැවසුවා. “මේ චිත්‍රපටයේ බෝල් රූම් නැටුම් නිරූපණය කරන්න තිබුණා. ඒ වෙනුවෙන් මට මාස ගණනක්ම බෝල් රූම් නැටුම් කලාව ඉගෙන ගන්න සිදුවුණා. මේ නැටුම් පන්තිවලට ‘සින්ඩරෙල්ලා’ චිත්‍රපටයේ කුමාරයාගේ චරිතය නිරූපණය කළ රිචඩ් මැඩ්න් ද එකතු වුණා. අපි දෙන්නා ඒ නැටුම් හොඳින් පුහුණු වුණා. චිත්‍රපටය රූගත කරද්දී අපි දෙන්නටම ප්‍රශ්නයක් වුණේ සින්ඩරෙල්ලා කුමරියගේ දිග ගවුමයි... ඒක ඇදගෙන රඟපෑම නම් කොහෙත්ම බැරි වේවි ය කියලයි. අපි දෙන්නටම හිතුණෙ. ඒත් ඒ ගවුමට මම හුරු වුණා. ඉන් පස්සෙ රිචඩ් නිතරම කිව්වෙ සින්ඩරෙල්ලා කුමරියගෙ ගවුම අපි දෙන්නත් එක්කම හොඳට යාළු වුණා නේද කියලයි.” ලිලී සිනහමුසු මුහුණින් පැවසුවා.
බොරු ගෙතීම සිරිතක්ලු.
ජූලියා රොබට්ස් ගැන හොලිවුඩ් සිනමා රසිකයන්ට අලුතෙන් හඳුන්වා දිය යුතු නැහැ. මේ සුපිරි තරුව විවාහ වී සිටින්නේ චිත්‍රපට අධ්‍යක්ෂ, ඩැනි මොඩර් සමඟ. දීර්ඝ කාලයක් තිස්සේ එක වහලක් යට ජීවත්වන ඩැනි - ජූලියා යුවළ දැන් දරු සෙනෙහස ලබන දෙමවුපියන් බවට පත්වී හමාරයි. ඔවුන් දෙදෙනා අතර කිසිඳු ගැටුමක් ඇතිවුණේ නැහැ. ඒත් හොලිවුඩ්පුරයේ ඇතැම් පුවත්පත් නිතරම උත්සාහ ගන්නේ ඩැනී - ජූලියා වැනි සාමකාමී විවාහ ජීවිත ගත කරන අය ගැන අතිශය සාවද්‍ය තොරතුරු ගෙන එන්නයි. ඇමෙරිකාවේ ප්‍රකාශයට පත්වන ‘ස්ටාර්’ නම්වූ පුවත්පත සඳහන් කළේ ජූලියා’ තම සැමියා වන ඩැනී ගෙන් දික්කසාද වීමට යන බවයි. මේ වෙනුවෙන් ඇගේ සැමියාගෙන් ඇයට ඩොලර් මිලියන 225 ක් ලැබුණු බවත් එම පුවත්පත වාර්තා කර තිබුණා. ඒත් එය සත්‍ය තොරතුරක් නොවෙයි. ඩැනි සහ ජූලියා අදටත් යහපත් පවුල් ජීවිතයක් ගත කරනවා. මේ අසත්‍ය පුවත පළ කිරීම ගැන ‘ස්ටාර්’ පුවත්පතට දොස් පවරන ඇමෙරිකාවේම තවත් පුවත්පතක් වන ‘ගොසිප් කෝප්’ පවසන්නේ මෙවැනි බොරු ගෙතීම ‘ස්ටාර්’ පුවත්පතෙහි සිරිතක් බවයි.
‘ස්ටාර් වෝස් අට’ 2017 දී
ලෝක ප්‍රකට ‘ස්ටාර් වෝස්’ චිත්‍රපට මාලාවේ අටවැනි කතාංගය රැගත් ‘ස්ටාර් වෝස් VIII’ චිත්‍රපටය 2017 මැයි 26 දා තිරගත කෙරෙන බව එහි නිෂ්පාදන කටයුතු සිදුකළ වෝල්ට් ඩිස්නි සමාගම ප්‍රකාශ කළා. ‘ස්ටාර් වෝස් VIII’ චිත්‍රපටයේ රූගත කිරීම් කටයුතු ඇරැඹුණේ 2014 වසරේදීයි. චිත්‍රපටයේ ප්‍රධාන චරිතයක් නිරූපණය කරන සුපිරි නළු හැරිසන් ෆෝඩ් එහි එක්තරා දර්ශනයක රඟපාද්දී අනතුරකට ලක්වුණා. පයින්වුඩ් චිත්‍රාගාරයේදී රූගත කිරීම් සිදු කෙරෙද්දී ඔහුගේ පාදයක් එහි තිබූ දොරක වැදීමෙනුයි ඔහුට තුවාල සිදුවුණේ. මේ හේතුවෙන් ඔහුට රෝහල් ගතවීමටත් සිදුවුණා.
උපුටා ගැනීම සිළුමිණ
