🛍️   Business Directory
📣   Classifields
🛍️   Business Directory
📣   Classifields

වයසට යන‍කොට ඔහොම තමයි

වයසට යන‍කොට ඔහොම තමයි

හොලිවුඩ්පුරයේ ජනප්‍රිය නිළි ජූලියා රොබට්ස් දැන් මැදිවියේ පසුවන්නියක්. ඇගේ වයස අවුරුදු 46ක්. මෑතකදී ජූලියා සමඟ කෙටි කතාබහක යෙදී සිටි චිත්‍රපට අධ්‍යක්ෂවරයෙකු ඇගෙන් ඉල්ලා සිටියේ රූප සෝබාව වැඩි කරගන්නට අවශ්‍ය කාරණයක් කෙරෙහි අවධානය යොමු කරන ලෙසයි. ඒ කුමක්දැයි ජූලියා මේ අයුරින් පැවසුවා. “මගේ මූණේ සමහර තැන්වල හම දුඹුරු පාට වෙලා තියෙනවා. ඉතින් ඒ අධ්‍යක්ෂවරයා මගෙන් ඉල්ලුවා, මේ දුඹුරුපාට නැතිකර ගන්නය කියලා. ඒවා තිබුණාම එයාට මාව පේන්නෙ කිලුටුවෙලා වගේලු. මේ දුඹුරු පාට මගේ මූණෙ විතරක් නෙමෙයි. අපේ ජනප්‍රිය අනෙක් සහෝදර නිළියන් කීප දෙනෙකුගෙත් මුහුණුවලත් තියෙනවා. ඒවා තිබුණට ඒ අය හරිම ලස්සනයි.” වයසත් සමඟම මතුවන මෙවැනි වෙනස්කම් රංගනයට කිසිදු බාධාවක් නොවන බවත් ජූලියා පැවසුවා.

වෙනස් වෙන්න කැමැති නැත්තෙ මේකයි

ලොව පුරා නළු නිළියන් බොහෝ දෙනෙකු ප්ලාස්ටික් සැත්කම් කරමින් තමන්ගේ මුහුණු ලස්සන කර ගන්න වෑයම් කරනවා. ඒත්, ජනප්‍රිය නිළියක වන කෙලි බෲක් නම් ඒ අයුරින් කෘත්‍රිමව තම මුහුණට ව්‍යාජ සුන්දරත්වයක් මුසුකර ගන්න අකැමැතියි. ඇය නිතරම සිතන්නේ උපතින්ම ලැබී ඇති මුහුණ මෙලෙස වෙනස් කිරීම බලවත් වරදක් බවයි. “මට ඕනෙ මගේ නියම ස්වරූපය මිසක් කෘත්‍රිම පෙනුමක් නෙමෙයි. එහෙම වෙනස් කළාම ඒකෙ ඇති අගයකුත් නැහැ. කවුරු හරි කෙනෙක් තමන්ගෙ මුහුණේ ස්වරූපය ප්ලාස්ටික් සැත්කමකින් වෙනස් කරගෙන ලස්සන කරගත්තත් පිටස්තර අය ඒ දිහා බලන්නෙ අවඥාවෙන්. ඒ අය කිසිම වෙලාවක ඒ මුහුණේ පෙනුම අගය කරන්නෙ නැහැ.” මේ වන විට 34 වැනි වියෙහි පසුවන කෙලී බෲක් පැවසුවා.

එමා නැතිව ජෝශ්ට හැදුණු ලෙඩේ

ජෝශ් හචර්සන් නම් වූ කඩවසම් යොවුන් නළුවා පසුගිය දිනවල ‘බරපතළ’ කල්පනාවක ඇලී ගැලී සිටින අයුරු කාටත් පෙනුණා. ඔහු, මේ කල්පනා කරන්නේ මොකක් ගැනද? කා ගැනද?... කාටත් ප්‍රශ්නයක් ඇතිවුණා. ජෝශ්ගේ යහළුවන්වත් මේ ‘කල්පනාව’ ගැන කිසිම දෙයක් දැනගෙන හිටියේ නැහැ. සතියක් දෙකක් කල්පනා ලොව ගිලී සිටි ජෝශ් අන්තිමේදී තමන්ගේ හිතට වද දුන්න කාරණය ඔහුගේ කළමනාකරුට කීවා. එය, ඉල්ලීමක්. මේ යොවුන් නළුවා තමන්ගේ කළමනාකරුගෙන් ඉල්ලා සිටියේ ජනප්‍රිය යොවුන් නිළි එමා වොට්සන් ව තමන්ට මුණගස්වන්න කියලයි. මේ ඉල්ලීමට අනුව කටයුතු කළ කළමනාකරුට දැනගන්න ලැබුණේ එමා, ලන්ඩන් නුවරට එක්තරා දිනයකදී පැමිණෙන බවයි. ඒ දිනය සටහන් කර ගත් හෙතෙම ජෝශ් සහ එමා අතර හමුවකට අවශ්‍ය දේ ලකලැහැස්ති කළා. මේ වන විට ජෝශ් ඇඟිලි ගනිමින් සිටින්නේ ඔහුගේ ප්‍රියතම නිළිය වූ එමා හමුවීමටලු.

රිදී තිරයට වගේ පුංචි තිරේටත් නැතිවම බැරිලු

දැන් තිරගත වන ‘47 රොනින්’ චිත්‍රපටයේ රඟන මාර්ටින් ෆ්‍රීමෑන් හොලිවුඩ් සිනමාව තුළ විතරක් නොවෙයි බටහිර ජනප්‍රිය ටෙලි වෘත්තාන්තයන්හි කැපී පෙනෙන චරිත නිරූපණය කරන ප්‍රවීණ රංගන ශිල්පියෙක්. ඔහු තමයි ලෝකප්‍රකට ‘ෂර්ලොක්හෝම්ස්’ රහස් පරික්ෂක නවකතාව ඇසුරෙන් මෑතකදී නිර්මාණය වූ චිත්‍රපටවල වෛද්‍ය වොට්සන් මහතා ලෙස රඟන්නේ. ළඟදිම බී.බී.සී. රූපවාහිනිය ඔස්සේ විකාශය වීමට නියමිත ‘ෂර්ලොක ්හෝම්ස්’ තුන්වැනි ටෙලි මාලාවේ වෛද්‍ය වොට්සන් මහතා ලෙස නැවතත් ඔහු රඟනවා. මෙම ටෙලි වෘත්තාන්ත මාලාව වෙනුවෙන් නිර්මාණය කළ පූර්ව ප්‍රචාරක පටය පසුගිය දිනවල බී.බී.සී -1 චැනලය ඔස්සේ විකාශය වුණා. ෂර්ලොක්හෝම්ස් දෙවැනි ටෙලි වෘත්තාන්ත මාලාවේ වෛද්‍ය වොට්සන්ගේ බිරිය ලෙස රඟපෑවේ මාර්ටින් ෆ්‍රීමෑන්ගේම බිරිය වන අමන්දා ඇබින්ටන්.

නැටුමට ගැයුමට උපන් හපන් බ්‍රිට්නිගෙ රැඟුම

ගායිකා, බ්‍රිට්නි ස්පියර්ස් පසුගියදා ඇමෙරිකාවේ ලාස්වේගාස් නගරයේ සංගීත ප්‍රසංගයකට සහභාගි වුණා. ‘ප්ලැනට් හොලිවුඩ්’ නම් වූ සුප්‍රකට සුපිරි අවන්හලේ මේ ප්‍රසංගය පැවැත්වෙද්දී එය නැරඹීමට රසික රසිකාවන් විශාල පිරිසක් එක් රැස්වී සිටියා. ගීයෙන් ගීය ගයමින් රසික පිරිස කුල්මත් කළ බ්‍රිට්නි, තමන් ගැයූ ‘සර්කස්’ නම් වූ ජනප්‍රිය ගීතය ද ගායනා කරන්නට පටන්ගත්තේ රසික රසිකාවන්ගේ උණුසුම් ප්‍රතිචාර මැද්දේයි. ගීතය ගයමින් නර්තනයක ද යෙදෙමින් වේදිකාවේ ඒ මේ අත ගිය බ්‍රිට්නි නොදැනුවත්කමින් දෝ යමක් සිදුවෙමින් තිබුණා. ඇය හැඳ සිටි ඇඳුමේ ‘සිප්’ එකක් ලිහී යමින් ඇගේ සිරුරෙන් මඳක් නිරාවරණය වෙමින් තිබුණා. ඒ මොහොතේ එහි සිටි ප්‍රේක්ෂකයෙකු තමන් අත තිබූ වීඩියෝ කැමරාවෙන් එය රූගත කරන්නටත් පටන් ගත්තා. ඒත් බ්‍රිට්නි මේ කිසිවක් නොදැන දිගටම ගීතය ගයමින් රැඟුවේ ප්‍රේක්ෂකාගාරය වෙත අවධානය යොමු කරමින්. ඒ වුණත් මේ වැරැද්ද හොඳින් දුටුව ඒ මොහොතේ පසුබිම් නර්තනයෙහි යෙදී සිටි ශිල්පියකු වහා එය ‘නිවැරදි’ කළා. සුජීව තේවහෙට්ටිගේ උපුටා ගැනීම සිළුමිණ