අද මෙහෙමහරි තැනක ඉන්න ලැබුණු එක ගැන සතුටුයි…
- දිග පළල බලන්නෙ නැතිව රඟපාන්න වෙනවා…
- මම දැන් අම්මා කෙනෙක්…
‘පබා’ ටෙලිනාට්‍යයේ සුවිශේෂී චරිත අතර සුවිශේෂී චරිතයක් තමයි මාර්තා. ඇයගේ රංගන දිවියේ සුවිශේෂී කඩඉමක් ලෙසට ඒ නිර්මාණය හඳුන්වන්න පුළුවන්. ඇය දැන් ටෙලිනාට්‍ය ක්‍ෂේත්‍රයට නැතුවම බැරි අම්මා කෙනෙක් වෙලා. ඇත්තටම කවුද මේ ඔබ ආදරය කරන අම්මා. ඒ වෙන කවුරුවත් නෙවේ ජනප්‍රිය රංගන ශිල්පිනී උදේනි නදීකා. ඒ මවු සෙනෙහසේ සුන්දරත්වය කොයි වගේද කියලා ඇය සමග කතා කිරීමට අප හිතුවා.
ඔබ දැන් ගෙදරට විතරක් නෙවේ හැමෝටම මවක් වෙලා නේද. ඉතින් කියමුකෝ බලන්න මේ විඳින සතුට ගැන?
ඒ
සතුට මම කොහොම කියලා කියන්නද කියලා මටම තේරෙන්නේ නැහැ. මම මගේ දරුවන්ට
මවක් වෙලා විඳින සතුට අනෙකුත් අම්මලා වින්දා වගේම සතුටක් වින්දා. හැබැයි මම
දැන් ඊටත් වඩා පියවරවල් කිහිපයකින් මවක් වෙලා ඇවිත් ඉන්නවා. හරියටම
කිව්වොත් නුග ගසක් වගේ හැම දරුවෙක්ටම සෙවණක් දෙනවා අම්මා කියන උත්තරීතර
නාමය මුල්කරගෙන.
ඉතින් මේ දවස්වල ඔබ ටෙලිනාට්‍ය කිහිපයකම ඒ අම්මා ලෙසින් අප හමුවට එනවා?
ඔව්…
හදවිල අරණ, දූවිලි සළඟ, කොළඹ ඉතාලිය ටෙලිනාට්‍යවල මම අම්මා ලෙසට තමයි
රඟපාන්නේ. මෙවැනි චරිත හරහා මම නිරූපණය කරන අම්මලා අපේ සමාජයේ ඕනෑ තරම්
ඉන්නවා.‘සිහින වසන්තයක්’ ටෙලිනාට්‍යයේ තමයි මම මුල්වරට අම්මා ලෙසට රඟපෑවේ.
එදා ඉඳලා ඉතින් මට නිර්මාණ ගොඩක අම්මා ලෙසට ජීවත් වෙන්න සිදුවුණා.
ඔබ පාසල් කාලයේ ඉඳලම රංගන ක්‍ෂේත්‍රයට යොමු වීමට සිහින දැක්ක බව ආරංචියි?
මගේ
පියා ගමේ තියටර්වල රඟපාපු රංගන ශිල්පියෙක්. ඔහුගේ ආභාෂයත් මට ලැබෙන්නට
ඇති. පාසලේදී හැම සාහිත්‍ය සමිතියකදීම මුලින්ම ඉදිරිපත් වෙලා වැඩ කිරීමේ
පුරුද්දක් මට තිබුණා. මගේ මුල්ම වේදිකාව පාසල. පස්සේ මම විවාහ වෙලා දරුවන්
හැදුවාට පස්සේ නැවැත රඟපාන්න ආශාවක් ඇති වුණා. ඊට පස්සේ මම ජයසේන අපොන්සු
මහතා ළඟට ගියා රංගනය හැදෑරීමට. එතැනදී මාවම එතුමාගේ ‘සිල්’ ටෙලිනාට්‍යයට
තෝරාගත්තා. එතැනින් පටන්ගත්තු මම අද මෙහෙම හරි තැනක ඉන්න ලැබුණු එක ගැන
සතුටු වෙනවා.
හීන හොයන විසේකාරි නිර්මාණ තුළින් ඔබව වෙනස් පැත්තකට යොමු වුණා නේද?
2018
මම හීන හොයන විසේකාරී වේදිකා නාට්‍ය නිෂ්පාදනය කරමින් අධ්‍යක්‍ෂණය කළා.
පසුකාලීනව ගොඩාක් ප්‍රශ්න ආවා. දැන් කොරෝනා ප්‍රශ්න මතුවෙලා. ඉතින් මගේ
වේදිකා නාට්‍ය ගොඩාක් ප්‍රේක්‍ෂකයන්ට දැකබලා ගැනීමට නොහැකි වුණා. ඉතින් මේ
දවස්වල මගේ සැලැසුම නැවැත වේදිකා නාට්‍ය අරගෙන රටවටා යන්න තමයි.
මවක් විදියට නිර්මාණවලට සම්බන්ධ වීමේදී සීමා මායිම් මොනවද?
මම
දැන් අම්මා කෙනෙක්. සමාජයට වැරැදි ආදර්ශයක් දෙන විදිහේ නිර්මාණවලට මම
සම්බන්ධ වෙන්නේ නැහැ. අපෙන් සමාජයට වියයුතු වැදගත් දෙයක් තියෙනව නම් තමයි
මම ඒ නිර්මාණවලට සම්බන්ධ වෙන්නේ. එහෙම ආවාට ගියාට මම රඟපාන්න යන්නේ නැහැ.
ජනප්‍රිය වුණු මෙගා නාට්‍ය රැසකට ඔබේ දායකත්වය ලැබුණා නේද?
වසුදා,
කාව්‍යා වැනි දීර්ඝතම ටෙලිනාට්‍යවලට මම සම්බන්ධ වුණා. මේ අපේ වෘත්තීය. අපට
දිග, පළල නොතකා නිර්මාණවලට සම්බන්ධ වෙන්න සිදුවෙනවා. හැබැයි හොඳ චරිතයක්
නම් විතරයි මම එහෙම හරි සම්බන්ධ වෙන්නේ.
පසුගිය කාළේ ඔබ සුවිශේෂී සිනමා නිර්මාණයකට සම්බන්ධ වුණු බව අපට දැනගන්න ලැබුණා?
ඔව්…
වෙස්සන්තර ජාතකය මූලාශ්‍රයෙන් තමයි ‘වෙස්සන්තර’ චිත්‍රපටය නිර්මාණය
වෙන්නේ. මම වෙස්සන්තරගේ මවට තමයි රඟපාන්නේ. ඒ චිත්‍රපටය කරලා ගොඩාක් කල්
වෙනවා. ආශාවෙන් ඉන්නවා ඒ චිත්‍රපටය තිරගත වෙනකම් දැකබලා ගන්නට.
වසන්ත විතාරණගේ
උපුටා ගැනීම මව්‍ රට
