This site has features that require javascript. Follow these simple instructions to enable JavaScript in your web browser.
Sithmal Yaya
ආදරය ලබන්න කවුද අකැමැති? - තිරාෂා සෙව්වන්දි
තිරාෂා සෙව්වන්දි මේ දිනවල කලා ක්ෂේත්‍රයේ බොහෝ දෙනෙකුගේ කතාබහට ලක්වී සිටින්නේ දෙරණ නාළිකාවෙන් විකාශය වන “City of dance” වැඩසටහනින් ඇය ඉදිරිපත් කරන මනරම් නර්තන නිසාය. තිරාෂා දක්ෂ නර්තන ශිල්පිනියක මෙන්ම දක්ෂ රංගන ශිල්පිනියකි.

තිරාෂා ඔබ කොහොමද ‍කලා ක්ෂේත්‍රයට සම්බන්ධ වුණේ?

මම කලා ක්ෂේත්‍රයට සම්බන්ධ වුණේ 2005 අවුරුද්දේ. නර්තනය හරහා කලාවට ආවා කිව්වොත් නිවැරදියි. මගේ පවුලේවත් පවුලට සම්බන්ධ අය අතරවත් ප්‍රසිද්ධ කලාවට සම්බන්ධ අය නැහැ. හැබැයි කලා හැකියාව පවුලේ ගොඩක් දෙනෙකුට තියෙනවා. මම මුලින්ම සම්බන්ධ වුණේ ලක්ෂ්මන් පුෂ්පකුමාර අයියගෙ ‘නිසල විල්තෙර’ ටෙලි නාට්‍යයේ කුඩා චරිතයකට. මම පුංචි කාලෙ ඉඳලම ආශා කළේ නර්තනයට. රංගනයෙන් ඉදිරියට එන්න ලැබෙයි කියල හිතුවේ නෑ.

ඔබේ පාසල් කාලය ගතවුණේ කොහොමද?

මගෙ ගම ජාඇළ. පාසල් ගියේ ගම්පහ සිරිකුරුස විදුහලට සහ කඳාන මැසනඩ් විදුහලට. පාසල් කාලෙ නැටුම්වලට වැඩියෙන් යොමුවෙලා ඉන්න විට අම්ම කිව්ව ඉස්සරවෙලා ඉගෙනීමට තැන දෙන්න කියල. ඒ නිසා මම අධ්‍යාපන කටයුතුවලට වැඩියෙන් යොමුවුණා.

එතකොට දැන් ඔබ...?

මම උසස් පෙළ විභාගය හොඳින් සමත් වෙලා දැන් කැලණිය විශ්වවිද්‍යාලයේ ජාත්‍යන්තර අධ්‍යයනය පිළිබඳ විශේෂවේදී උපාධියත්, ජර්මන් භාෂාවත් හදාරනවා. දැන් මම දෙවැනි වසරේ. විශ්වවිද්‍යාල කටයුතුත් නර්තන රංගන කටයුතුත් සමබරව කරගෙන යනවා.

ඔබට මතකද මුලින්ම කැමරාවට මුහුණ දුන් දවස?

ඔව් අද වගේ මතකයි. මට මුලින්ම රඟපාන්න ලැබුණේ අනුරුද්ධිකා පාදුක්කත් එක්ක. එදා මට එයා කිව්ව “නංගි රැල්ලට යන නිළියක් වෙන්න උත්සාහ කරන්න එපා. හොඳ නිළියක් වෙන්න උත්සාහ කරන්න කියල” මම හිතනව මම අද ඒ මඟ යනව කියල.

මේ වන විට ඔබ දායක වෙලා තියෙන නිර්මාණ...?

මංජුලා කුමාරිගෙ නිර්මාණ කීපයකටම දායන වෙන්න අවස්ථාව ලැබුණා. ඒ අතරින් ‘අහස සේ නුඹ අනන්තයි’ ටෙලි නාට්‍යය විශේෂයි. ‘සසර බැඳි බැමි’, ‘ඉසුරු භවන’, ‘ඉතිං ඊට පස්සෙ’, ‘රන් සමනලයෝ’, ‘ඉඳුවරී’, ‘දියමත ලියමි’, ‘පිපෙන මල්’, ‘අරුන්දතී’, ‘සැළමුතු පෙම’, ‘ඔබ කවුද’ වගේ ටෙලිනාට්‍ය ඒ අතරින් විශේෂයි. ‘අරුන්දතී’ ටෙලි නාට්‍යයේ ‘සෙත්මිණී’ කියන චරිතයට ප්‍රේක්ෂක ප්‍රතිචාර ගොඩක් ලැබුණා. ඒ ටෙලි නාට්‍යයේ මම කළේ ප්‍රධාන චරිතය.

මේ දවස්වල ඔබ මොනවද කරන්නේ?

මේ දවස්වල වැඩියෙන්ම මහන්සි වෙන්නේ දෙරණ ‘City of dance’ තරගයට. ඊට අමතරව ටෙලි නාට්‍ය කීපයකම රූපගත කිරීම්වලටත් දායක වෙනවා.

දෙරණ ‘City of dance’ ඔබේ නර්තනවලට හොඳ ප්‍රේක්ෂක ප්‍රතිචාර ලැබෙනවාද?

ගොඩක් දෙනෙක් දැනගෙන හිටියේ නෑ මට නර්තනය පුළුවන් කියල. පාසල් කාලෙ මම කුලසිරි බුදවත්ත සර්ගෙනුත් නැටුම් ඉගෙනගත්තා පාසලෙන් ඉගෙනගන්නවාට අමතරව. අරුන්දතී ටෙලි නාට්‍යයේ මම ‍කළේ නර්තන ගුරුවරියකගේ චරිතයක්. එහි මම කළ නර්තනය දැකල වෙන්න ඕන දෙරණ City of dance එකට මට කතාකළේ. මේ වැඩසටහනට මුලින්ම 25 දෙනෙක් සහභාගි වුණා. ඒ අතරින් අන්තිම කීපදෙනා අතරට එන්න ලැබීම භාග්‍යයක්. මේ මගේ පළමු රියලිටි අත්දැකීම. මේ තරගයෙන් දක්ෂ කෙනාට ඉදිරියට එන්න හැකියාව තියෙනවා. මෙහි විනිශ්චය මණ්ඩලයේ ඉන්නේ නර්තනය කියන විෂයට ලංකාවේ ඉහළින්ම ඉන්න තුන්දෙනෙක්. ඔවුන් පෙන්වාදෙන අපේ අඩුපාඩු හඳුනගෙන අපිට අපේ දක්ෂතාව පෙන්වන්න හැකිවෙලා තියෙනව.

ඔබ උසස් අධ්‍යාපනය හදාරන්නේ නර්තනය හෝ රංගනය නෙමෙයි, වෙනත් විෂයක්. අනාගතයේ ඔබ තෝරාගන්නේ කලාවද නැතිනම් වෙනත් රැකියාවක්ද?

කලාවට සම්බන්ධ වෙන්න පුංචි කාලෙ ඉඳලම තිබුණේ පුදුම ආශාවක්. ඒවගේම ඉගෙනීමටත් මම හරියට ආශා කළා. ඒ දෙකෙන්ම මම අද ඉදිරියට ඇවිත් තියෙනවා. විශ්වවිද්‍යාලයේදි මම හදාරන ‘ජාත්‍යන්තර අධ්‍යයනය’ කියන විෂය ඉතා වටිනා එකක් උපාධිය අවසන් කරල ගැළපෙන රැකියාවකින් ඉදිරියට යන ගමන් කලා කටයුතුවලත් රැ‍ඳෙන්න හිතාගෙන ඉන්නවා.

තවම චිත්‍රපටයකට අවස්ථාව ලැබුණේ නැතිද?

මේ වන විට චිත්‍රපට කීපයකම පුංචි චරිතවලට සහභාගිවෙලා තියෙනවා. මෑතදී ප්‍රධාන මට්ටමේ චරිත කීපයකට කතාකළා. නමුත් තාම ඒව පටන්ගත්තේ නැහැනේ. රංගනයේ උපරිමය තියෙන්නේ සිනමාවේනේ. මම හරිම කැමැතියි හොඳ චිත්‍රපටවලට දායක වෙන්න.

ජනප්‍රිය නිළියක් වීම විශ්වවිද්‍යාලයෙදි ඔබට දැනෙන්නේ කොහොමද?

මම නිළියක් කියල හිතන්නෙ, මට දැනෙන්නෙ රඟපාන විට පමණයි. විශ්වවිද්‍යාලෙ යාළුවො අතර ඉන්න විට මට ඒ බව දැනෙන්නෙම නෑ. මම එහෙම හැසිරෙන්නෙත් නෑ. විශ්වවිද්‍යාලයට මම යන්නෙ ඉතාම සරලව. කැම්පස් යන විට මම මේකප් එකක්වත් දාන්නෙ නෑ. අධ්‍යයන කටයුතුවලදි මට මගෙ යාළුවො ගොඩක් උදව් කරනවා.

නිළියක් නිසා සමාජයෙන් ලැබෙන ආදරයට ආකර්ෂණයට ඔබ කැමැතිද?

සමාජයේ ආදරය ලබන්න කවුද අකැමැති. මේ ක්ෂේත්‍රයේ ගොඩක් දෙනෙක් මෙහි රැඳිල ඉන්නේ ඒ ආදරය ආකර්ෂණය නිසා කියලයි මම හිතන්නේ. සමාජයක ආදරය ලැබීම ලොකු දෙයක්. ඒක හැමෝටම ලබන්න පුළුවන් දෙයක් නෙමෙයි.

ඔබේ පවුලේ කවුද ඉන්නේ?

ම‍ෙග් පවුලේ එකම ගෑනු ළමයා මම. අයියල දෙන්නයි මල්ලියි අම්මයි තාත්තයි තමයි අපේ පවුලේ අය. සමහර අයියලා අකැමැතියිනෙ නංගි රඟපානවට. අපේ පවුලේ එහෙම නෑ. අම්මයි තාත්තයි අයියලයි මල්ලියි මට පුදුම සහයෝගයක් දක්වනවා. අම්ම තමයි මගේ ළඟින්ම ඉන්නේ.

යොවුන් ඔබට පෙම්වතෙක් නොඉන්න බැහැනෙ?

නැහැ. එහෙම කෙනෙක් තවම නෑ. තිරාෂා සෙව්වන්දිගේ ජායාරුප එකතුවට මේ ලින්කුවෙන් එන්න... Click Here උපුටා ගැනීම සිළුමිණ