කාලෙන් කාලෙට ආපු දේශපාලන නාට්‍ය ටික දැන් හොදටම ඇති…
- දේශපාලකයන්ට වැඩිය මිනිස්සු අපිට ආදරෙයි…
- කොරෝනා පොකුරු අන්තිමට බිස්නස් එකක් වුණා…
- රටේ දුප්පත් අසරණ ජනතාව දුක් විඳිනවා…
- මට හිතාගන්න බැහැ කොහොම ආවද කියලා…
කලා ක්‍ෂේත්‍රයේ ජනප්‍රිය ශිල්පීන් රැසකට පසුගිය කාලයේ කොවිඞ් රෝගය වැළඳුණා. ඒ ශිල්පීන් සියලුම දෙනා ගැනම අපි නිරන්තරයෙන් සුවදුක් විමසා බැලුවා. ජනප්‍රිය රංගන ශිල්පිනී දමිතා අබේරත්නටද පසුගිය කාලවකවානුවේ කොවිඞ් රෝගය වැලඳුණු බව ඔබට ආරංචි වන්නට ඇති. ඉතින් ඇය ඒ ගෙවපු කාලවකවානුවේ විඳපු අත්දැකීම් කොයි වගේද කියා දැනගැනීමට අපි ඇයට කතා කළා…
ඉතින් දමිතා දැන් කොහොමද ඔබගේ අසනීප තත්ත්වය, සුපුරුදු පරිදි කලා කටයුතු කරගෙන යනවද මේ දවස්වල?
දැන්
දවස් දෙක තුනක් විතර වෙනවා වැඩකටයුතු පටන් අරගෙන. තවම මට එහෙම ලොකුවට
මහන්සිවෙලා වැඩ කරන්න බැහැ. ඇඟට මහන්සියක් දැනෙනවා. ඒ වගේම ජීවිතයටවත්
හැදුන්නැති ලොකු හිසරද වේදනාවන් විටෙන් විට එනවා. මම දන්න තරුණ ළමයෙක්
ඉන්නවා ඔහුට කොරෝනා හැදිලා මාස හතක් විතර වෙනවා. තවමත් ඔහුට බාහිර රෝගී
ලක්‍ෂණ විටෙන් විට මතුවෙනවා. ඉතින් මේ රෝගය දවස් දහහතරක් තුළ සුව වුණත් ඇඟේ
ප්‍රතිශක්තිකරණය අඩුවක් තිබෙන බව මට විශ්වාසයි. ඒ නිසා උපරිම පරෙස්සම් වීම
තමයි වැදගත්.
අසනීප වුණු කාලවකවානුවේ ඔබ සම්බන්ධ වුණු නිර්මාණ කිහිපයක් විකාශය වුණා. ඒ වැඩකටයුතුත් නතර කළාද?
ඔව්…
ඒ වැඩකටයුතු සියල්ලගේම රූගත කිරීම් නතර කළා. සමහර අවස්ථාවල පුළුවන් විදියට
නිර්මාණයට හානියක් නොවන විදියට සෞඛ්‍ය නීති-රීති අනුගමනය කරමින් වැඩකටයුතු
කළ යුතු අවස්ථාවල වැඩ කරගෙන ගියා.
ඔබේ සමකාලීන කලා ශිල්පීන් රැසකට මේ රෝගය වැලඳී තිබුණා. ඔවුන් හරහා ඔබට මෙය වැලඳුණාද?
මම
එහෙම හිතන්නේ නැහැ. මම සමග ගොඩදෙනෙක් වැඩ කලා. අපි එකට කාලය ගතකළා. මට ඒ
අයගෙන් මෙය හැදෙනවා නම් මෙයට කලින් මේ රෝගය මට වැලඳිලා. මට හිතාගන්නත් බැහැ
කොහොම ආවාද කියලා. අනෙක අපි ඉන්නේ පුංචි දූපතක. මේ දූපතට කොරෝනා ඇවිත්
ඉවරයි. ඉතින් මේ වසංගතය පාලනය කරගත්තත් නැවැත මතුවෙනවා. මෙයට කලින් මේ ගැන
බලවතුන් හිතන්න තිබ්බේ.
ඒ කියන්නේ දූපතකට රෝගය පැතිරීම අඩුයි කියලද?
අනිවාර්යයෙන්ම…
අපේ රට රටවල් ගොඩකින් වෙන්ව තිබෙන නිසා මේ කොරෝනාව ලංකාවට එන්න කොහොමත්
විදිහක් නැහැ. මෙය ලංකාවෙන් මතුවුණු රෝගයක් නෙවෙයි. රට හැරියට ක්‍රමානුකූලව
සැලැසුම් සහගතව ක්‍රියා කළා නම් අපේ රටේ ජනතාවට මේ තරම් ප්‍රශ්න මතුවෙන්නේ
නැහැ. සුපුරුදු පරිදි ලස්සනට ජීවත් වෙන්න තිබුණා. අද එදාවේලවත් කන්න නැතුව
රටේ ජනතාව අසරණ තත්ත්වයට පත්වෙලා ඉන්නේ.
පසුගිය කාලේ රටේ තිබුණු අර්බුදකාරී තත්ත්වයත් එක්ක ඔබට දැනුණේ මොන වගේ දෙයක්ද?
බලන්න
පසුගිය කාලේ රටේ ඇඳිරි නීතියක් තිබුණා. ඒක නමට විතරයි. බාර්, වෙළෙඳ සාප්පු
ඇරගෙන වෙනදා වගේම ජනාකීර්ණ නගරයක් විදියට තමයි මම දැක්කේ. ඉතින් එහෙම
වුණාම තවත් කොරෝනා පොකුරු හැදෙනවා. ඒ පොකුරු අවසානයේ ව්‍යාපාරයක් බවට
පත්වෙන්න ගත්තා. මට පෙනෙන්නේ නැහැ ඇයි මේ නීති-රීතිය වර්ගීකරණයන් අනුව
සැකසෙන්නේ කියලා. අවසානයේ මේ රටේ දුප්පත් අසරණ ජනතාව වන්දි ගෙවනවා. පිටි
පැකට් බීපු මේ රට දැන් හැඳි ගානට කිරිපිටි ගන්න තත්ත්වයක් උදාවෙලා
තියෙන්නේ. පිරිසුදු වතුර ටිකක් බොන්න පුළුවන් රටේ අද වතුර ටික සල්ලිවලට
ගන්න වෙලා. මේ රටේ මොනවටද බදු නොගැහුවේ. ජනතාවගේ සල්ලි හැම දේකටම යට කළා
බදු කියලා. ඒත් අවසානයේ ණය ගෙවන රටක් බවට පත්වෙලා. කෝ මේ බදු ගහපු සල්ලි.
මට තියෙන එකම දුක අපේ රටේ මේ අසරණ ජනතාව ගැනයි.
අර ප්‍රශ්න, මේ ප්‍රශ්න කිය කියා අවසානයේ කලාවටත් ලොකු ප්‍රශ්නයක් මතුවුණා නේද?
අනිවාර්යයෙන්ම…
මගේ ආදර සහෝදර ශිල්පීන්ගේ ප්‍රසංග වේදිකාව කෝ. ඒ ප්‍රසංග වේදිකාවේ
බුලත්විටක් කඩයක් හරි දාගෙන හිටිය ඒ මිනිසුන් අද ජීවත් වෙන්නේ කොහොමද. අසරණ
තත්ත්වයට පත්වුණු ඒ ශිල්පීන් ගැන කවුද හොයලා බැලුවේ. කලාවට තමයි ලොකුම
ප්‍රහාරය වැදුණේ. අද අපි මෙහෙම ටෙලිනාට්‍යයක හරි රඟපාලා කීයක් හරි
හොයාගන්නවා. ඒකත් නැති වුණානම් අපිට වෙන්නෙත් අර දේම තමයි. දැන් අපි
රඟපාන්න අවශ්‍ය නැහැ. මේ කාලයෙන් කාලයට මතුවෙන දේශපාලන නාට්‍ය ටික හොඳටම
ඇති. ඒ වගේනේ සුපිරි නළු වීරයෝ ඉන්නේ.
ඔබ මේ දවස්වල නිර්මාණ කිහිපයක සුවිශේෂී චරිත නිරූපණය කරනවා. කොහොමද එයට ලැබෙන ප්‍රතිචාර?
අපිට
රටේ ජනතාවගෙන් තිබෙන ආදරය කවදාවත් අඩුවෙන්නේ නැහැ. රටේ දේශපාලනය කරන අයට
වඩා අපිට දක්වන ඒ ආදරය, ගෞරවය ඉතා උතුම්. මම ඒකයි මගේ ජනතාව වෙනුවෙන් මෙහෙම
හරි කතා කරන්නේ. අඳුන්ගිර, වලවෙට්ටුවා, පෝක් වීදිය ටෙලිනාට්‍ය තුනේම මම
එකිනෙකට වෙනස් චරිත නිරූපණය කරනවා. මේ රටේ ජනතාවගේ හිත හදන්න මොහොතකට හරි
මෙහෙම චරිත කරන්න ලැබීම සතුටක්.
වේදිකාවට අලුත් පණක් දෙන්න සැරසුණා නේද?
එය ගැන
ලොකු වේදනාවක් අපිට තියෙන්නේ. පාස්කු ප්‍රහාරයෙන් පසු වේදිකාව විතරක් නෙවේ
මේ කලා ක්‍ෂේත්‍රයම කඩාවැටුණා. ගුරුතරුව, තලමල පිපිලා වේදිකා නාට්‍ය ජයලත්
මනෝරත්නයන්ගේ අභාවයෙන් පසු මන්දගාමී වුණා. නමුත් අපි අලුත් ශිල්පීන්
සම්බන්ධ කරගෙන පණගන්වන්න උත්සාහයක් ගන්න කොටම නැවැත මේ කොවිඞ් ප්‍රශ්න මතු
වුණා.
-වසන්ත විතාරණගේ
