පුතා ලැබුනට පස්සේ මම ගොඩක් මහන්සි වුණා ලස්සනට ඇඟ හදාගන්න
නර්ථන ශිල්පිනියක් මෙන්ම නව පරපුරේ දක්ෂ රංගන ශිල්පිනියක් ලෙස කාගේත් හදවත් තුල ලැගුම් ගත් ඇය නමින් හිමාලි සිරිවර්ධන. ඉතින් ඇය මේ වනවිට ආදරණීය බිරිඳක් වගේම සෙනෙහබර මවක්ද වනවා. ඉතින් රංගන කටයුතු නිසා වගේම පවුද්ගලික ජීවිතෙත් එක්ක මේ දවස්වල කාර්යබහුල වෙලා ඉන්න හිමාලි සිරිවර්ධන ඇයගේ අලුත්ම තොරතුරු අපිත් එක්ක කතා බහ කලේ මෙන්න මේ විදිහටයි. මට මවු පදවියෙන් පස්සේ පුතාට වැඩි කාලය යොමු කරන්න අවශ්‍ය වුණා. ඉතින් ටික කාලයක් කලා කටයුතුවලින් ඈත් වෙලා ඉදලා ‘සිහින සමාගම ‘නාට්‍යයෙන් තමයි ආයෙත් වැඩ පටන් ගත්තේ. නර්තනය සම්බන්ධ රියැලිටි වැඩසටහනක විනිශ්චය කටයුතු කරන්නත් මට ආරාධනා ලැබුණා. නර්තනය කියන්නේ මගේ ජීවිතයේ කොටසක් නිසා ඒ ආරාධනය බාර ගත්තේ බොහොම කැමැත්තෙන්. ඒ භූමිකාව නිසා මට දැන් අලුත් ජවයක් ලැබිලා.
මම ලස්සන වුණු රහස මොකද්ද කියලා ගොඩක් කට්ටිය අහනවා. ඒ වෙනුවෙන් මම ගොඩක් මහන්සි වුණා කලින් හිටියා වගේම මගේ ඇඟ හදාගන්න. පුතා නිසත් මම හරිම සතුටින්. ඒ සතුටත් මාව ලස්සන කරනවා වෙන්න ඇති. පුතා ලැබෙන්න මාස පහක් තියෙද්දි තමයි මම රංගන කටයුතු නතර කළේ. කාලයක් දකින්න ලැබුණේ නැති නිසා මෙහෙම කෙනෙක් හිටියද කියලත් බොහෝ නිර්මාණකරුවන්ට අමතක වෙලා තිබුණේ. ආයෙත් නිර්මාණයකින් දකිද්දී තමයි බොහෝ අය ඇහුවේ ඔයා වැඩ කරන්න ගත්ත කියලා අපි දන්නේ නැහැනේ කියලා. ඒ වචනවලින් තේරුණා සමහර නිර්මාණවලට මාව මඟහැරුණා කියලා.
ප්‍රේක්ෂකයන්ට නම් මාව අමතක වුණේ නැහැ. දැන් සමාජ මාධ්‍ය දියුණු නිසා ඒ හරහා මට ඔවුන්ගේ ප්‍රතිචාර නිතරම ලැබෙනවා. මම කොහොමත් වැඩ බදාගන්න කැමැති කෙනෙක් නෙමෙයි. මුල් තැන දෙන්නේ මගේ නර්තන කණ්ඩායමට නිසා ඉස්සරත් අවුරුද්දකට එක නිර්මාණයකට වගේ තමයි එක් වුණේ. නිර්මාණ ගොඩක ඉන්නවට වඩා කාලෙකට පස්සේ වුණත් හොඳ එක නිර්මාණයක් කිරීමයි මට අවශ්‍ය. පුතාව මඟහරින්නේ නැතිව වැඩ කිරීමයි මගේ සැමියාටත් වැදගත් වෙන්නේ. මගේ අක්කා මං නැති වෙලාවට පුතාව බලා ගන්න නිසා බයක් නෑ. දරුවා සහ පවුල මඟහැරගන්නේ නැතිව වැඩ කරන නිසා මට ගැටලුවකුත් නැහැ මම තවත් අලුත් නිර්මාණයකට එකතු වුණා. ලක්ෂ්මන් පුෂ්පකුමාර රචනා කරන චන්දික විජේසේන අධ්‍යක්ෂණය කරන ‘ගඟන පියවර‘යන ටෙලි නිර්මාණයට සම්බන්ධ වුණා. මී කිරි සෑදීම ජීවිකාව කරගත් මාලනි කියන චරිතයයි මම නිරූපණය කරන්නේ. කොරෝනා තත්ත්වය පහව ගියාම එහි ඉතිරි රූගත කිරීම් පටන් ගනිවී.
මම‘සඳගල තැන්න‘ වගේ කලාත්මක නිර්මාණවලට දායක වෙන්න කැමැත්තෙන් තමයි අවුරුදු තුනකට පස්සෙ ආයෙත් රඟපාන්න ගත්තේ. සමහර අවස්ථාවල අපිට තැනේ හැටියට ඇණේ ගහන්න සිද්ධ වෙනවා. දැන් කලාත්මක නිර්මාණ කෙරෙනවා අඩුයි. මේ තිබෙන තරගකාරීත්වය එක්ක එහෙම නිර්මාණවලට ආරාධනා ලැබෙයිද දන්නේත් නැහැ. මමත් එවැනිම නිර්මාණ හොයමින් හිටියා නම් තවත් කාලයක් මට රංගනයෙන් ඈත් වෙලා ඉන්න සිද්ධ වෙයි. ‘සිහින සමාගම‘වගේ මම කලින් කරලා නොතිබුණු විදිහේ නිර්මාණයකට එකතු වුණේ ඒ නිසා. මට දැනෙන නිර්මාණ කරන්න ලැබුණේ හරි අඩුවෙන්. රංගනයේ තව දේවල් කරන්න හැකියාව තියෙන වග විශ්වාසයි. මගේ දක්ෂතාවෙන් හරි ප්‍රයෝජනය තවම අරගෙන නැහැ. දැන් නිර්මාණවලට සම්බන්ධ කරගන්න බලපාන විවිධ කාරණා නිසා අපේ හැකියාවට සාධාරණයක් ඉටු වේවිද කියන්න බැහැ. හොඳ සිනමා නිර්මාණවලටත් මට ඉඩ ලැබුණේ අඩුවෙන්. ‘තානාපතිලාගේ ගෙදර‘ සහ ‘බ්‍රේකින් නිවුස්‘කියලා චිත්‍රපට දෙකකට සම්බන්ධ වුණත් ඒ නිර්මාණ තවම තිරගත වුණේ නැහැ. පුතා නර්තනයට ගායනයට දක්ෂයි. කලාව හරියට කරන කෙනෙක් වැරැද්දට යොමු වෙන්නේ නැහැ. ඒ නිසා පුතා කලාව හරි විදිහට ඇසුරු කරනවට මම කැමැතියි. කොහොම වුණත් ඔහු කැමැති පාර අනාගතයට තෝරා ගනියි. අපි පුතාට ඒ වෙනුවෙන් මඟපෙන්වනවා කියලයි ඇය අවසාන වශයෙන් පැවසුවේ.
උපුටා ගැනීම saaravita.lk
