කලාව වෙනුවෙන් එදා වගේම අදත් හෙටත් හඬ නඟන්න මම සූදානම්
රූපණය මහා බරසාර කලාවකි. එහි ගැඹුර ස්පර්ශ කළ හැක්කේ පැතිරීගිය මානව වාදී පරිකල්පනා සහිත, පොදු මිනිසාගේ භාව විනිවිඳිය හැකි සමාජ දේශපාලන දෘෂ්ටියකින් යුතු පිරුණු මනුෂ්‍යයන්ටය. එවැනි මිනිසුන් කලාව හසුරුවන විට සමාජයක් සුවපත් වන්නේය. ගංගා ජීවනී වැලිවත්ත අපේ සමාජය තුළ අපට හමුවන එවැනි විරල රංගන ශිල්පිනියකි. ඇය උපන්නේ වේදිකාවෙනි. සිනමාව මෙන්ම ටෙලි නාට්‍යයෙහි ද ස්වීය අනන්‍යතාවක් සනිටුහන් කළ මේ මානව වාදී ප්‍රභාමත් රංගන ශිල්පිනිය කලකට පසුව රසඳුන සමඟ සංවාදයකට එක් වූවාය.
කලාව සමඟ බද්ධ වෙන්නට ඔබේ මූලික අඩිතාලම සකස් වුණේ කොහොමද?
මම ළමාවියේදී ලේඛනයට දක්ෂයි. කුඩා අවධියේදීම මම ලියූ කවි ආදිය
පුවත්පත්වල පළවුණා. පාසල් අවධියේ දී වේදිකා නාට්‍ය බැලීමට අපව පාසලෙන්
රැගෙන ගියා. ඒ අවස්ථාවල මම වේදිකාව දැක්කේ අපූරු අමුතු ලෝකයක් විදිහට. ඒ
ලෝකයට අවතීර්ණ වන්නට හැකි නම් කොතෙක් දේවල් කළ හැකිද යන හැඟීම ඇති වුණා.
ඉන්පසු ලේඛනයට වඩා මගේ සිත වැඩිපුර ඇදගත්තේ රංගනය ඇතුළු එහි සියලු පැති. පාසලෙන් ඉවත් වූ මුල් වකවානුවේ දී ම සෝමවීර සේනානායක මහතා යටතේ තිර රචනය
පිළිබඳ හදාරන්න මට හැකි වුණා. ඒ අතර නාට්‍ය ශිල්ප ශාලිකාවට සම්බන්ධ
වෙන්නත් අවස්ථාව ලැබුණා. ඒ ගමන් මඟ ඔස්සේ උපාලි අත්තනායකගේ ‘මේක යස
කතාවක්‘වේදිකා නාට්‍යයේ රඟපාන්න අවස්ථාවක් හිමි වුණා. නමුත් ඒ වනවිට මම ‘දූ
දරුවෝ‘ටෙලි නාට්‍යයේ දෙවන සහාය අධ්‍යක්ෂවරිය ලෙස සම්බන්ධ වී සිටී නිසා මෙම
නාට්‍යයත් සමඟ දිගු කලක් රැඳී ඉන්න බැරි වුණා. රංජිත් ධර්මකීර්ති මහතාගේ ‘මේඝ‘වේදිකා නාට්‍යයට සම්බන්ධ වෙන්න මට
අවස්ථාව හිමි වුණේ ඒ වන විට වේදිකාවේ සිටි ප්‍රවීණ රංගන ශිල්පීන් පිරිසක්
සමඟ. ඒ නාට්‍යයේ දී මට එම වසරේ හොඳම සහාය නිළිය සම්මානය දිනා ගන්න හැකි
වුණා. මේ සියල්ල අතරේ ජයලාල් රෝහණ, මහෙන්ද්‍ර පෙරේරාගෙන් සහ සොලමන්
ෆොන්සේකා ගුරුතුමාගෙන් තවදුරටත් රංගනය පිළිබඳ හදාරන්නත් මට හැකි වුණා.
රංගනය පිළිබඳ වූ සහජ හැකියාවත් හැදෑරීමත් සහිතව ක්ෂේත්‍රයට එක් වූ ඔබට මෙතෙක් ලද අවස්ථා ගැන තෘප්තිමත්ද ?
ලැබුණු අවස්ථා පිළිබඳ කිසිසේත්ම අතෘප්තිමත් වෙන්න නම් හේතු කාරණා නැහැ. ඒ
තරමට හොඳ අවස්ථා මට හිමි වුණා. නමුත් විවිධ හේතූ මත ලැබුණු අවස්ථා මා
අතින් ගිලිහුණා. උපාලි අත්තනායක මහතා සමඟ වැඩ කරන්න ලැබුණු අවස්ථාව ගිලිහීම
පිළිබඳ අදටත් සියුම් දුකක් තිබෙනවා. අශෝක හඳගමගේ 'නැගෙනහිර වෙරළෙන් ඇසෙන'
ටෙලි චිත්‍රපටය ඇතුළු චිත්‍රපට දෙකක්ම කාර්යබහුලත්වය නිසාම මා අතින්
ගිලිහුණා. එවැනි අවස්ථා ගැන යම් දුකක් දැණුනත් ලැබුණු අවස්ථා පිළිබඳ
යම්තාක් තෘප්තිමත් වෙන්න පුළුවන්.
හඬකැවීම් ශිල්පිනියක් ලෙස ඔබේ ගමන ඇරුඹෙන්නේ කොහොමද?
වේදිකා නාට්‍යවලට සම්බන්ධවීමම එයට එක් හේතුවක්. හඬකැවීම් සමඟ සම්බන්ධ වී
සිටි බොහෝ දෙනා වේදිකාව සහ නාට්‍ය කලාව සමඟ සම්බන්ධතා තිබූ අය. ඒ ඇසුරෙන්
හඬ කැවීම්වලට අවස්ථාව හිමි වුණා. ඒ සඳහා අවශ්‍ය හඬක් මා සතුව වීමත් වැඩි
වාසියක් වුණා.
වේදිකාව, පුංචි තිරය සහ රිදී තිරයෙන් ඔබේ වැඩිම කැමැත්ත හිමිවන්නේ කොතැනටද?
මම වේදිකාවට සේම සිනමාවටත් එක ලෙස කැමතියි. වෘත්තිමය ටෙලි නාට්‍ය
නිළියක් ලෙස කටයුතු කළත් අදටත් වැඩි කැමැත්ත සිනමාවට. ටෙලි නාට්‍යයකට වඩා
යම් යම් කුඩා සිදුවීම් පවා ප්‍රබලව ඉදිරිපත් කරන්නට හැකි තැනක් ලෙසයි මම
සිනමාව දකින්නේ.
මේ දිනවල ඔබ එකිනෙකට වෙනස් චරිත දෙකකින් පුංචි තිරයෙන් දකින්න පුළුවන් ?
දෙරණ රූපවාහිනියේ විකාශනය වන ‘ධරණී‘ ටෙලි නාට්‍යයට මේ දිනවල මම රංගනයෙන්
දායක වනවා. එය රෝද පුටුවක් මත ජීවත්වන භාව ප්‍රකාශනයෙන් පමණක් හැඟීම්
ප්‍රකාශ කළ හැකි රෝගාතුර මවකගේ චරිතයක්. සියත රූපවාහිනීයේ ‘කකුළුවෝ සහ
මකුළුවෝ‘ ටෙලි නාට්‍යයේ අලුතෙන් පොහොසත් වූ නවීන පන්නයට හැඩ ගැහෙන්නට උත්සහ
දරන කාන්තාවකගේ චරිතයක් නිරූපණය කරනවා.
මේ සමයේදී ඔබ තුළ සිටින ලේඛිකාව යළි අවදි කරන්න අදහසක් නැද්ද ?
දැනටමත් එය සිදුවෙමින් තිබෙනවා. ඉදිරියේදී කවි පොතක් එළිදක්වන්න අදහසක්
තිබෙනවා. එළැඹෙන සැප්තැම්බර් මාසයේ බොහෝ දුරට ඒ කටයුත්ත සිදු වෙයි. ඒ වගේම
මම ලියූ තිර පිටපත් සහිත පොතක් එළි දක්වන්නත් අදහසක් තිබෙනවා.
ඔබ කලාකරුවන් වෙනුවෙන් හඬක් නැඟූ කලාකාරිනියක්. දේශපාලනයටවත් එකතුවන බලාපොරොත්තුවක් තිබෙනවා ද?
කලාව වෙනුවෙන් එදා වගේම අදත් හෙටත් හඬ නඟන්නට මම සූදානමින් සිටිනවා.
ක්‍රියාකාරී දේශපාලනයට එකතුවෙන්න ආරාධනා කිහිපයකුත් ලැබී තිබෙනවා. නමුත් මේ
මොහොතේ නම් ඒ ගැන කිසිදු බලාපොරොත්තුවක් නැහැ. ක්‍රියාකාරීව දේශපාලනයේ
නිරත නොවුණත් කලාකරුවන් වෙනුවෙන් හඬ අවදි කරන්නට බැරිකමක් නැහැ.
කලා ජීවිතයේ ඉදිරි බලාපොරොත්තු මොනවාද ?
ගතවෙන කාල වකවානුව අනුව කලා ජීවිතයේ ඉදිරිය පිළිබඳ පැහැදිලි අදහසක්
දක්වන්න හැකියාවක් නැහැ. නමුත් මම ලියූ තිර පිටපත් අතරෙන් චිත්‍රපටයක්
නිර්මාණය කරන අදහසක් සහ බලාපොරොත්තුවක් තිබෙනවා. ඒ වගේම දිගු කාලයක් පුරා
දුටු සිහින අතර රංගන ශිල්පිනියක් ලෙස ජාත්‍යන්තරය ජය ගැනීම තවත් එක්
සිහිනයක්. ඒ සඳහා අවශ්‍ය වන ප්‍රතිභාව සහ හැකියාව මා සතු බවත් මම විශ්වාස
කරනවා. ඉදිරියේදී ඒ සිහින යථාර්ථයක් කරගන්න දැනට බලාපොරොත්තුවෙන් සිටිනවා.
උපුටා ගැනීම සිළුමිණ
