''තිබ්බා ගැහුවා ක්‍රමයට නාට්‍ය හැදෙනකොට රඟපෑමේ ආශාව අඩුවෙනවා'' - සුජානි මේනකා
ඇය වරෙක තත්පර ගණනක වෙළෙඳ දැන්වීමකින් රටට ම අමතක නොවන මතකයක් ඉතිරි කළ පුංචි දැරියකි. තවත් වරෙක පෙරළිකාර, ප්‍රචණ්ඩ චරිතවලට හුස්ම දුන් චරිතාංග රංගන ශිල්පිනියකි. නිතර දක්නට නොලැබුණත්, කාලාන්තරයකට මතක සිටින චරිතවලට පණ දෙන ඇය සුජානි මේනකායි.
කොහොම ද මේ දවස්වල ජීවිතේ?
ගොඩක් පරිස්සම් වෙලා අත්‍යවශ්‍ය කටයුතුවලට විතරක් සහභාගි වෙමින් කාලය ගත කරනවා.
කලා කටයුතුවල විස්තර කොහොම ද?
ස්වාධීන
රූපවාහිනියේ නුදුරේදී විකාශය වීමට නියමිත "පෝර්ක් ස්ට්‍රීට්" නාට්‍යයට මං
රංගනයෙන් දායක වුණා. ලොක්ඩවුන් එකට කලින් පටන් ගැනීමට නියමිතව තිබූ නාට්‍ය
දෙකක පෙර පුහුණුවීම් මේ දිනවල සිදුකරනවා.
අසංක සායක්කාර කියන්නේ වෙනස් විදිහේ නිර්මාණකරණයක යෙදෙන්නෙක්. පෝර්ක් ස්ට්‍රීට් නාට්‍යයෙන් ඔබගේ චරිතය හා ඒ නාට්‍ය අත්දැකීම කෙබඳු ද?
සායක්කාර
පිටපත් ලියූ ටෙලි නාට්‍ය 4ක විතර මං රංගනයෙන් දායක වී තිබෙනවා. පෝර්ක්
ස්ට්‍රීට් කියන්නේ වෙනස් ම අත්දැකීමක්. මං වසර 2ක කෙටි නිවාඩුවකින් පසුවයි
මේ නිර්මාණයට දායක වෙන්නේ. ඒ වගේ ම නුවංගි කියන චරිතය තුළ ඇයගේ ගති ලක්‍ෂණ,
චරිත ස්වභාවය, සම්පූර්ණ කතාව ආදී සෑම දෙයක් ම හොඳින් නිරීක්‍ෂණය කිරීමෙන්
පසුව මං මේ චරිතය භාර ගත්තා. රංගන ශිල්පියෙකුට හෝ රංගන ශිල්පිනියකට ආසාවෙන්
රඟපෑ හැකි චරිතයක් ලැබෙන්නෙත් බොහොම කලාතුරකින්. මං හරි ම වාසනාවන්තයි
කාලෙකට පසුව එවන් නිර්මාණයකට දායක වීමට අවස්ථාව ලැබීම ගැන. මෙය කාලිංග
රත්නායකගේ පළමු අධ්‍යක්‍ෂණය. ඔහු සහය අධ්‍යක්‍ෂකවරයෙක් ලෙස ලැබූ අත්දැකීම්
සමුදාය තුළ එකී කාර්යය ඔහු සාර්ථකව ඉටු කරනවා.
කාලයක් රංගන ජීවිතයෙන් ඈත්වෙලා නැවතත් රංගනයට පිවිසීම තුළ ඔබව රසිකයන්ගේ මතකයේ රැඳෙන්න බාධාවක් වුණා ද?
කොහොමත්
එවැනි බාධාකාරී තත්ත්වයක් පැන නැගුණේ නැහැ. මේ දවස්වල අප රඟපාපු පරණ
නාට්‍ය නැවතත් විකාශය වෙනවා. ඒ පිළිබඳව රසිකයන්ගේ කතාබහට ලක්වුණා. වෙළෙඳ
දැන්වීම්වලින් වගේ ම සමාජ ජාල ඔස්සේ නිතර මාව දකින නිසා එවැනි තත්ත්වයක්
පැනනැගුණෙ නැහැ. නමුත් අවුරුදු 2කින් රංගන කටයුතුවල නොයෙදුණු නිසා රඟපෑමේදී
පුංචි චකිතයක් මට දැනෙනවා. ඒක අලුතින් රඟපාන්න ආවා වගේ හැඟීමක්.
ඔබ රඟපෑම් කටයුතුවලින් ඈත් වුණේ ගුණාත්මක නිර්මාණයකට ආරාධනා නොලැබුණු නිසා ද?
ඒකට
හේතු කිහිපයක් තිබුණා. පෞද්ගලික ජීවිතේ කාරණා කිහිපයක් නිසා වසරක පමණ
විවේකයක් මට අවශ්‍ය වුණා. එකී කාලයේ මට ආරාධනා ලැබුණු ටෙලි නාට්‍ය,
චිත්‍රපට සියල්ලම මං ප්රතික්ෂේප කළා. අඩු ම තරමේ ඒ නිර්මාණ මොනව ද
කියාවත් මං සොයා බැලුවේ නැහැ. එකී විවේකයෙන් පසුව මට හොඳ නිර්මාණයකට දායක
වීමේ අවශ්‍යතාව පැනනැඟුණා. චිත්‍රපට 3කට ආරාධනා ලැබුණා වගේම එහි මුහුරත්
උළෙලවල් පවා පැවැත්වූවා. නමුත් කොරෝනා තත්ත්වය නිසා ඒවායේ වැඩකටයුතු
ඇණහිටියා.
මෙගා නාට්‍යවලට සම්බන්ධ නොවීම සුජානි - බිමල් දෙදෙනාගේ පවුලේ ප්‍රතිපත්තියක් ද?
එහෙම
නැහැ. ඒක මගේ පෞද්ගලික මතයක්. සරා නාට්‍ය කොටස් 635ක් විකාශය වුණා. මෙගා
නාට්‍යයක් දීර්ඝ කාලයක් ඇදෙනකොට එහි ගුණාත්මක බව අඩුවෙනවා. සරා
ටෙලිනාට්‍යයටත් එකී තත්ත්වය උද්ගත වුණා. තිබ්බා, ගැහුවා ක්‍රමයට නාට්‍ය
හැදෙනකොට රඟපෑමේ ආශාව අඩු වෙනවා. රංගනය මං ආසාවෙන්, ආදරයෙන් කරන වෘත්තියක්.
කොටස් 100 ඉක්ම වූ නාට්‍යවලට සම්බන්ධ නොවීම මගේ ප්‍රතිපත්තියක්.
වෘත්තීයමය රංගන ශිල්පිනියක් විධියට එවැනි තෝරා බේරා ගෙන නිර්මාණවලට දායක වීම තුළ යහපත් ආර්ථික තත්ත්වයක් ගොඩනඟාගන්න පුළුවන් ද?
එය බෙහෙවින් ම අසීරු කාර්යයක්. නමුත් මම වගේම බිමලුත් රංගන කටයුතුවලට දායක වෙන නිසා එය තරමක් සමබර කර ගන්නවා.
කලාවට පිවිසෙන්න පවුලේ ආභාසය බලපෑවා නේ ද?
ඔව්.
මගේ පියා චිත්‍රපට කලා අධ්‍යක්‍ෂවරයෙක්. ඔහු සරත් සමරවික්‍රම දහනායක. පිය
ආභාසය නිසයි මං ක්‍ෂේත්‍රයට පිවිසෙන්නේ. තාත්තාට අවශ්‍යතාවක් තිබිලා
තියෙනවා මාව කලාවට යොමු කරන්න. නමුත් ඔහුවත් නොහිතපු අවස්ථාවක මට වයස
අවුරුදු 3දී ම රංගනයෙන් දායක වීමට අවස්ථාව උදාවෙනවා.
සාපේක්‍ෂව ඔබට චිත්‍රපටවලට රංගනයෙන් දායක වීමට අවස්ථාව ලැබුණේ තරමක් අඩුවෙන්. ඊට හේතුව මොකක් ද?
අපේ
තරුණ කාලෙදි චිත්‍රපටවලට සම්න්ධ වෙන්න බොහොමයක් අවස්ථාවන් ලැබුණා. නමුත්
වැඩ ගොඩක් බදාගෙන කිරීමේ පුරුද්දක් නැති නිසා ඒ නිර්මාණ බොහෝමයක් මඟහැරුණා.
ටෙලිනාට්‍යවලට දින වෙන්කර ගැනීමෙන් පසුව හොඳ චිත්‍රපටවලට ආරාධනා ලැබුණත්
ඒවා ප්රතික්ෂේප කරන්න මට සිද්ධ වුණා. ඒ ගැන පුංචි පසුතැවීමක් තිබුණත් එය
අතීතයට එක්වුණු දෙයක්. ඒ නිසා මෙතෙක් ආ ගමන ගැන සතුටු වෙනවා.
රංගන කටයුතුවලට සැමියාගෙන් ලැබෙන දායකත්වය කෙබඳු ද?
බිමල්
තමයි මගේ ජීවිතේ හැම දේ ම. මගේ වෘත්තීයමය ජීවිතයට වගේ ම පෞද්ගලික ජීවිතයට
ඔහු ලබා දෙන සවිය කියා නිම කළ නොහැකියි. මට දැන් මහන්සියි, පුංචි විවේකයක්
අවශ්‍යයි කියා කීවම මට අවශ්‍ය එකී පරිසරය ගොඩනඟන්න ඔහු මහන්සි වෙනවා. ඔහු
මගේ සෙවණැල්ල කියන්න බැහැ. මං වාගේ ම මාව බලාගන්නේ ඔහු. ඇතැම් විට මටත් වඩා
මාව ඔහුට තේරෙනවා.
රංගන ජීවිතයෙන් ඔබ්බට පියවරක් ඉදිරියට තියලා අධ්‍යක්‍ෂණයට, නිෂ්පාදනයට යොමුවෙන්න අදහසක් නැද්ද?
මට
ලිවීමේ හැකියාව තියෙන නිසා පිටපතක් ලියන්න බලාපොරොත්තුවක් තියෙනවා. හොඳ
නිර්මාණයක් කරන්න ප්‍රමාණවත් කාලයක් අවශ්‍යයි. මං කැමැතියි මං ලියන
චිත්‍රපටය හෝ ටෙලිනාට්‍යය බිමල් අධ්‍යක්‍ෂණය කරනවා නම්. බිමල් අධ්‍යක්‍ෂණය
කරන නිර්මාණය මං නිෂ්පාදනය කරනවා.
සුජානි මේනකා කියන්නේ ගොඩක් පොත්පත් ඇසුරු කරන්නියක් ද?
මගේ ජීවිතේ හරියට දෙකට බෙදුවොත් එහි හරි අඩක් වෙන්වෙන්නේ කියැවීමට
උපුටා ගැනීම මවුබිම
