විහිළුවක් ගිය දුර මා ටෙලි නාට්‍ය අධ්‍යක්ෂණයට යොමු කළා.
"SNAP" ටෙලි නාට්‍යය ස්වර්ණවාහිනී නාළිකාවේ මේ දිනවල විකාශනයවන ප්‍රේක්ෂක අවධානයට ලක් වූ නාට්‍යයක්. මෙය අධ්‍යක්ෂණය කරන්නේ අලුත් පරපුරේ නිර්මාණ කරුවෙක්වන පසිඳු පෙරේරා විසින්. තම කුලුඳුල් ටෙලිනාට්‍ය අධ්‍යක්ෂණය ප්‍රාසංගික ටෙලි නාට්‍යයක් ලෙසින් ප්‍රේක්ෂකයන් අතරට ගෙන එන්නට ඔහුට හැකිවෙනවා. මේ තරුණ නිර්මාණකරුවාට නිදහසේ කතා කරන්න ප්‍රවේශය සලසා දෙමින් මා සංවාදයට එක් වුණා.
කඩුවෙල කොරතොට මගේ උපන්ගම. පුංචි කාලේ ඉඳලා නිර්මාණ කුතුහලයක් මට තිබුණා. මට මතකයි 2004 දී තාත්තා රට ඉදලා එනකොට කැමරාවක් මට ගෙනල්ල දෙනවා. එතකොට මං රාජගිරියෙ ජනාධිපති විද්‍යාලයේ පහ වසරෙ ඉගෙන ගන්නවා. ඒ පොඩි කාලෙ ඉඳන්ම තමයි ඇනිමේෂන් කරන්න පටන් ගන්නෙ. ඒ සමඟම ස්වයං අධ්‍යයනයක යෙදෙමින් තමයි සංස්කරණය ඉගෙන ගත්තෙ. මේ කාලෙදි මා ගණිත අංශයෙන් උසස් පෙළ කරන්න කඩුවෙල බෝමිරිය මධ්‍ය මහා විද්‍යාලයට ඇතුළත් වුණා.
එතකොට ඔබ ටෙලි නිර්මාණ ක්ෂේත්‍රයට සම්බන්ධ වෙන්නෙ කොහොම ද? මේ තරුණ නිර්මාණකරුවාගෙන් විමසුවා.
උසස් පෙළ විභාගයට මාස හයක් විතර තියෙනකොට මගෙම කැමැත්තට රූපවාහිනී
අභ්‍යාස ආයතනයේ සිනමා කැමරාකරණ පාඨමාලාවට ඇතුළත් වුණා. ඒත් එක්ක මම වැඩ
කරන්න පටන් ගත්තා. රූප රචනා කරන්න පටන් ගත්තා. මංගල උත්සව වීඩියෝකරණයට
සම්බන්ධ වුණා. චාමල් සමරසිංහ අයියාගේ ස්ටුඩියෝ එකට සම්බන්ධව වැඩ කළා. යශ් වීරසිංහ පාසලේ පටන් මිත්‍රයෙක්. ඔහු කලා ක්ෂේත්‍රයට ඒ වනවිට
සම්බන්ධයි. චිත්‍රපට හා ටෙලිනාට්‍ය අධ්‍යක්ෂ නාලක විතානගේ අයියා හඳුනගන්න
ලැබුණේ යශ් මාර්ගයෙන්.
ඔබ මුලින්ම නිර්මාණකරණයට එක් වෙන්නෙ ඔහුත් එක්ක ද? මා ඇසුවා.
ඔහු "සරුංගල්" නමින් අධ්‍යක්ෂණය කළ චිත්‍රපටයෙ සංස්කරණයෙනුයි මම මුලින්ම එකතු වුණේ. මට ක්ෂේත්‍රය හඳුනා ගන්න ලැබෙන්නෙ එතැනින්.
පසිඳු පෙරේරා ඒ ප්‍රවේශ මාර්ගය ඔස්සේ පැමිණ අවසානයේ ටෙලි නාට්‍ය
අධ්‍යක්ෂවරයෙක් විදිහට ක්ෂේත්‍රයට එකතු වෙනවා. ඒ පිළිබඳ ඔහු කතා කරන්නෙ
තෘප්තියකින්.
මට ටෙලි නාට්‍ය අධ්‍යක්ෂණයට එන්න ලැබීම නම් අහඹු සිදුවීමක්. ඒක වෙන්නේ
මෙහෙමයි. විශ්ව විජයවර්ධන ඉන්නේ මගේ ගෙවල් කිට්ටුව. එක දවසක් මම විශ්වට
විහිළුවට වගේ කිවුවා මචං අපි ටෙලි නාට්‍යයක් කරමු කියලා. ඇත්තටම ඒ දවස්වල
වැඩක් කරන්න ඕනා කියලා හිතමින් හිටපු කාලයක්. නමුත් අරමුණක් තිබුණේ නැහැ. එදා හිනාවෙලා ගිය විශ්ව නැවත සතියකට විතර පස්සේ මාව හමුවුණා. මුණගැහිලා
කිව්වා මචං මම දැන් තිර පිටපත ලියන්න පටන් ගත්තා මෙහෙම කතාවක් තියෙනවා අපි
වැඩේ කරමු කියලා. මගෙ ඇස් උඩ ගියා. මම විශ්වට කිව්වා මම විහිළුවට කියපු දේ
උඹ ඇත්තට ගත්තෙ ඇයි කියලා. අපිට වඩා ක්ෂේත්‍රයේ කොච්චර අය ඉන්නවද තවම අවස්ථාවක් නැතුව. අපි කොහොමද
මෙහෙම වැඩක් කරන්නේ කියලා හිතුණත් අපි වැඩේ පටන් ගත්තා. මගේ යාළුවෝ සහ
විශ්වගේ යාළුවෝ එකතු වෙලා අපේ වැඩේ යථාර්ථයක් බවට පත් කර ගන්න අපි කටයුතු
කළා.
මේ කටයුත්තට කවුද අනුග්‍රහය දැක්වූවේ... මා ඔහුගෙන් විමසුවා. මේ තරුණයා සිනාසෙමින් උත්තර දුන්නා.
අපිම තමයි. අපිට මූලින් කොටස් පහක් කරන්න සල්ලි හොයාගන්න පුළුවන් වුණා. ණයටත් මුදල් ලබා ගත්තා. විශ්ව මේ වැඩේ ලොකු බරක් කරට ගත්තා.
පසිඳු කියන මේ කතාව අලුත් පරම්පරාවේ තරුණයන්ට හොඳ පූර්වාදර්ශයක්.
හැදෑරීම කැප වීම විතරක් නොවෙයි, අවදානම ගැනීමේ පෞරුෂයත් තරුණ
නිර්මාණකරුවකුට තිබිය යුතු බව ඔහු පෙන්වා දී තිබුණා.
සැලසුම හදාගෙන මුල්
කොටස් පහත් එක්ක මෙය විකාශනය කරන්න පුළුවන්ද බලන්න අපි මුණ ගැහෙන්නේ
ස්වර්ණවාහිනී නාළිකාවේ රංගන ද සිල්වා අයියව. ඔහු මේ ටෙලි නාට්‍යයේ මුල්
කොටස් පහ බලලා මේ වැඩේට කැමති වෙනවා. "SNAP" කතාව විශ්ව විජයවර්ධනගේ. මෙහි කතා තේමා වන්නේ මෝහනය කියන
කන්සෙප්ට් එක. නාට්‍ය අවසානය වෙනතුරු කුතුහලය රඳවගන්න අවශ්‍ය නිසා අපි මේ
කාරණය පිටතදී කතාබහ කළේ නෑ. දැන් නම් කොටස් තිහක් විතර විකාශනය වෙලා
අවසන්."
දැන් පසිඳුට තිබෙන අභියෝග මොනව ද? මා විමසුවා.
නිර්මාණය ඇතුළෙදි ප්‍රධානම ගැටලුව වුණේ ඉදිරි කොටස් හතළිහක් පමණ
නිෂ්පාදනය කරන්න මුදල් සොයා ගැනීම. එතනදිත් රංගන අයියා අපට අර්ජුන කමලනාත්
අයියා සහ අමීෂා කාවින්දි අක්කා හඳුන්වා දුන්නා. ඔවුන් මේ නාට්‍ය බලලා
නිෂ්පාදනයට එක්වුණා.
"SNAP" ටෙලිනාට්‍ය ගොඩ නඟාගැනීමට දක්ෂ රංගන ශිල්පීන් ශිල්පිනියන් රාශියක්
යොදා ගැනීමත් විශේෂයෙන් කැපී පෙනෙනවා. ඒ ගැනත් පසිඳු කතා කළා.
අපිට අවශ්‍ය වුණා දක්ෂ පිරිසක් එකතු කරගන්න. සමනලී ෆොන්සේකා, බිමල්
ජයකොඩි, සුජීව ප්‍රියාල්, ඇතුළු ප්‍රවීණ පිරිසක් මේ වැඩේට එකතු වුණා.
ඇත්තටම ඔවුන්ව සම්බන්ධ කර ගන්න හැකිවේවි කියලා විශ්වාසයක් අපට තිබුණෙ නැහැ.
නමුත් ඒ හැම දෙනාම නිහතමානීව මේ වැඩේට එකතු වුණා. හැම දෙනාගෙන්ම
උපරිමයෙන්ම සහයෝගය ලැබුණා. මා මිත්‍ර සචිත්‍ර සහ ගයාන් වැඩේට හොඳ සහයෝගයක්
දුන්නා. මගේ බිරිය සිඟිති පුතාගෙ වැඩ කරන ගමන් මට දුන්නු ධෛර්ය, මගේ අම්මා
තාත්තා, නංගි, මල්ලි වගේම බිරියගේ මවුපියන් ලබා දුන් අසීමිත සහයෝගය මේ
වෙලාවෙදි මා සිහි කළ යුතුයි.
අවසන් වශයෙන් මේ නිර්මාණයට ලැබෙන ප්‍රතිචාර ගැනත් කතා කරන්න අප අමතක කළේ නෑ.
මෙහි තිර රචනයම සංකීර්ණ මාතෘකාවක් එක්ක ගලා යන්නක්. ඒ නිසා කතා රසය
තියාගෙන මිනිස්සුන් අතරට ගෙනයන්න තමයි අපි බලාපොරොත්තු වුණේ. අපිට අවශ්‍ය
වුණා වෙනස් දෙයක් කරන්න. ටෙලි නාට්‍ය විකාශනයේදී මේ තරම් ප්‍රතිචාර ලැබෙයි
කියලා බලාපොරොත්තුවක් තිබුණෙ නැහැ. හොඳ ප්‍රතිචාර ලැබෙනවා.
ඒ යහපත් ප්‍රතිචාර මේ දිරිමත් තරුණයන් හෙට වඩාත් යහපත් නිර්මාණකරණයක් සඳහා යොමු කරාවි. මා ඔහු හා කළ සංවාදය නිමා කළේ ඒ ප්‍රාර්ථනාවත් එක්ක.
